Xki̱ 23
23
Balaa̱n katsꞌénchikonñé xota̱ Israee̱l
1Kósꞌe̱ Balaa̱n bi̱ katsoó Balaa̱k: Ti̱ꞌinde ji kꞌi̱e̱e̱ yito ṉchandikón tsi̱ꞌe̱ nga sa̱ꞌinkꞌasꞌièe̱n ngo kjo̱a̱tjó Néná xi yito cho̱yojo toro̱ ko̱jo yito cho̱tsa̱nga̱ xi jaꞌatji ndi̱ja̱a̱.
2Kó Balaa̱k katsꞌén ni xi tsíꞌá Balaa̱n. Sꞌe̱ jaskan nga joó nga katsꞌénkꞌién kui cho̱yojo toroo̱ ko̱jo kui cho̱tsa̱nga̱ xi jaꞌatji ndi̱ja̱a̱, kó ngo cho̱yojo toro̱ ko̱jo ngo cho̱tsa̱nga̱ xi jaꞌatji ndi̱ja̱a̱ íjñasón nga ngo nga ngo ṉchandikoón. 3Kósꞌe̱ Balaa̱n bi̱ katsoó Balaa̱k: Ti̱ndyinra ji kꞌi̱e̱e̱. An chjiéngá skoya an nga kji̱ndi̱bá Néná, tsi̱ꞌe̱ nga ka̱tso̱yàna ni xi sa̱ꞌin an.
Kó Balaa̱n kijí ngo ngi̱ndie xi nkꞌa ko̱jo xi kjiꞌitiya. 4Tji̱e̱nga tikón ki̱a̱a̱, Néná jatjokjaà. Kósꞌe̱ Balaa̱n bi̱ katsoó Néná:
—Jè katsꞌenkꞌasꞌien an ngo kjo̱a̱tjó nganda tse̱ xi yito cho̱yojo toro̱, ko̱jo yito cho̱tsa̱nga̱ xi jaꞌatji ndi̱ja̱a̱, ki̱a̱ nínga síndo nga yito ṉchandikón xi katsangiya an nga si̱ꞌanda.
5Kósꞌe̱ Néná katsjaá kui eén Balaa̱n:
—Tꞌen nginí ji nínga tikón Balaa̱k, kó ndókjo̱e̱je ji kui én xí je katsjaa.
6Kó Balaa̱n kijí nginí nínga síndo ṉchandikoón, kó ki̱a̱ kasakoo̱ Balaa̱k ko̱jo ngayeje já ngito̱ko̱o̱ nangi Moaa̱b. 7Kó ki̱a̱ Balaa̱n, bi̱ tsó só xi kisie:
Balaa̱k ree̱ nangi Moaa̱b,
ndeskande na̱xi̱i̱ Arabia̱ kjindibájo̱na,
tsi̱ꞌe̱ nga chꞌo tsꞌén kuichjiátaꞌin an xota̱ Israee̱l,
ko̱jo tsi̱ꞌe̱ nga skjinínié an jé.
8Ta̱nga ka̱májínna nga an kꞌuichjáa̱,
ni xi katsóna Néná nga bi̱ katsóna:
Ngatꞌa̱ chꞌójíntsꞌèn ndokjo̱a̱taꞌin ji xota̱ na̱xi̱ńdána,
ti̱nde nga jmí jé chinínijín ji.
9Ndeskande nínga ꞌniú nkꞌaá kui na̱xi̱i̱,
tsꞌénkotsijée̱n kui xota̱ na̱xi̱ńdá ndikoón.
Jo̱o̱n, ndeskande nínga nkꞌaa̱,
tsꞌénkotsijée̱n kui xota̱ na̱xi̱ńdá xí ntꞌiéꞌeén.
10¡Xota̱ nda boá xota̱ Israee̱l!
Jmíjín xi ka̱maa̱ ku̱i̱ꞌíxki̱.
¡Xota̱ xi tjiín kjo̱a̱xió boá xota̱ Israee̱l!
¡Achichíra̱ ndatsi bo̱a̱ kon ka̱ma an xikoó kui xotaa̱!
11Nga tsintꞌié kuí nii̱, Balaa̱k katsꞌénxchánjo̱ Balaa̱n, kó bi̱ katsoó:
—Mí xí kjimaa ji. ¡Kꞌi̱e̱ jéꞌe̱joo̱ tsi̱ꞌe̱ nga chꞌo tsꞌén ko̱ndókjo̱e̱taꞌin ji xota̱ xi kondra̱na, ta̱nga ta̱sá ndatsꞌèn kandokjo̱e̱taꞌin ji!
Ta̱nga Balaa̱n bi̱ katsoó:
12—Ta̱kuítsí ni xi Néná ko̱tíxomana xi kuichjiá an.
Xi ma joó kjo̱a̱niꞌánchikonñé xi katsjá Balaa̱n
13Kósꞌe̱ Balaa̱k bi̱ katsoó:
—Ja̱bíchinní kó kje̱ꞌe ngi̱ndie kjuínjoo̱. Tsi ta̱ nda ni̱xtjin ka̱mamejeén chꞌo tsꞌén ko̱ndókjo̱e̱taꞌin ji kui xota̱ na̱xi̱ńdaá, tsi ta̱ chiboa tsí má xi xche̱ ji.
14Kó Balaa̱k kijíjo̱ Balaa̱n ki̱a̱ kꞌijñá xí ꞌmí Sofii̱n, ki̱a̱ nínga ꞌniú nkꞌaá na̱xi̱ Pisgaa̱. Ki̱a̱ katsꞌénda yito ṉchandikón, kó nga ngo nga ngo kui ṉchandikoón katsꞌénkꞌiensón ngo cho̱yojo toro̱ ko̱jo ngo cho̱tsa̱nga̱ xi jaꞌatji ndi̱ja̱a̱. 15Jaskan Balaa̱n bi̱ katsoó Balaa̱k: Chiyéraní kꞌi̱e̱e̱, tꞌa nínga síndo ṉchandikoón, tji̱e̱nga an kjuín án nínga sa̱kóna Néná.
16Kó Néná jatjokjaà Balaa̱n, kó kui eén katsjaá: Tꞌen nginí ji nínga tikón Balaa̱k, kó tꞌíyée̱ nginíi̱ kui én xi je katsjaa.
17Balaa̱n kijí nginí nínga tikón Balaa̱k ko̱jo xota̱ ngito̱ko̱o̱ nangi Moaa̱b, ki̱a̱ tꞌa nínga síndo ṉchandikoón. Kósꞌe̱ Balaa̱k bi̱ tsꞌén asíyaá Balaa̱n:
—Mí xí katsoó Néná.
18Kó Balaa̱n bi̱ tsó só xi kisiee̱:
Balaa̱k ndií Sipoo̱r,
¡ti̱sítji̱n ji kó nda má tasínijìnní!
19¡Néná jmí tsi bo̱a̱ kon xikoó ñá! Jmí éndísó chji̱a̱jín,
ti̱nde bosíkjojín xi kókón kui.
Néná tsꞌénkjátjosón ni xi tsóyàtjón nga sa̱ꞌín.
20Néná boá xi atíxomana nga
sa̱ꞌinchikonñé an xota̱ na̱xi̱ńdaá.
Kuí boá xi bo̱a̱ tsꞌén atíxoma,
Kó ka̱májín án kꞌuichjáa̱.
21Néná boá xi ree̱ xota̱ Israee̱l.
Ki̱a̱ tikónjin kui ngamasiee̱n xota̱ na̱xi̱ńdaá.
Néná jmí tsi ni xi ndajín xi mejeén nga ka̱maa̱,
ti̱nde mejénjiín nga ni xi ndajín sa̱ꞌínjo̱.
22Ngo ngaꞌniú xí je ngase,
xi xikoó tsi tsi̱ꞌe̱ ngo cho̱ búfalo̱ xi katsꞌénkjién Néná,
nga katsꞌénkjatjoni nangi Ejipto̱
xota̱ na̱xi̱ńdaá.
23Jmíjín kjo̱a̱tjiꞌe xi ka̱maa̱ sa̱ꞌínꞌoón
xota̱ na̱xi̱ńdaá Néná.
¡Tsitsíjenjnúu̱ ngayeje ni nda
xi Néná je katsꞌénjo̱ xota̱ na̱xi̱ńdaá!
24Xikónií tsi ngo xtín xandi̱je̱,
xi je mejeén sa̱ꞌínkꞌién cho̱ xi skji̱ni̱e̱.
Xota̱ na̱xi̱ńdá Israee̱l sa̱ꞌínkjaꞌyájín
ngaskande nga sa̱ꞌiín nga skjánjo̱ xota̱ kondraa̱.
25Kósꞌe̱ Balaa̱k bi̱ katsoó Balaa̱n:
—¡Ja̱ tsi ka̱májiín chꞌo tsꞌén ko̱ndókjo̱e̱taꞌin ji kui xota̱ na̱xi̱ńdaá, ngata̱ bo̱a̱jín se ji nga nda ka̱maa̱ ni xi sa̱ꞌín!
26Ta̱nga Balaa̱n bi̱ katsoó:
—¡Jè bo̱a̱ kixiaan nga chjiéngá kuintꞌieꞌée̱n Néná!
Xi ma jaán kjo̱a̱niꞌánchikonñé xi katsjá Balaa̱n
27Balaa̱k ti̱ bi̱ ti̱ katsó nginií Balaa̱n:
—Ja̱bíꞌi̱n, kó xín ngi̱ndie kjuínjoo̱. Yá jàn tsi ta̱ ki̱a̱ tsja̱ndieè Néná nga chꞌo tsꞌén ko̱ndókjo̱e̱taꞌin ji xota̱ Israee̱l.
28Kó Balaa̱k kijíjo̱ Balaa̱n nínga ꞌniú nkꞌaá na̱xi̱ Peoo̱r. Ndeskande ki̱a̱a̱ yanii̱ ngayeje nangi kixií. 29Kó Balaa̱n bi̱ katsoó Balaa̱k:
—Ti̱ꞌinde ji yito ṉchandikón tsi̱ꞌe̱ nga si̱ꞌankꞌasꞌiee̱n Néná yito cho̱yojo toro̱ ko̱jo yito cho̱tsa̱nga̱ xi jaꞌatji ndi̱ja̱a̱.
30Kjiꞌanga kamaá Balaa̱k nga katsꞌénda kui ṉchandikoón, Balaa̱n katsꞌénkꞌasꞌien kjo̱a̱tjó xi ngo cho̱yojo toro̱, ko̱jo ngo cho̱tsa̱nga̱ xi jaꞌatji ndi̱ja̱a̱ nga ngo nga ngo kui ṉchandikoón.
Currently Selected:
Xki̱ 23: MAIX
Highlight
Share
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
