Xki̱ 25
25
Xota̱ Israee̱l katsꞌéndikón ne Baa̱l-Peoo̱r
1Kó xota̱ Israee̱l nga kisꞌińdo nangi Sitii̱n, ítsꞌi̱yanii̱ nga kisꞌiejo̱ ꞌma ínchjín xí chji̱a̱ni xota̱ tji̱e̱e̱ Moaa̱b. 2Kui ínchjiín katsóyaà kui xotaa̱ tsi̱ꞌe̱ nga ko̱e̱je̱ sꞌué xí tsꞌén. Kó ki̱a̱ nijan iskjinie nichinie, kó nijan katsꞌéndikón ne xi tjiín xota̱ tji̱e̱e̱ Moaa̱b. 3Kó bo̱a̱ tsꞌén nga ko̱jo xota̱ Israee̱l katsꞌéndikón ne Baa̱l-Peoo̱r.
Kósꞌe̱ Néná achichí katsꞌénxchán, 4kó bi̱ katsoó Moisee̱:
Tꞌítikí jí ngayeje ngito̱ko̱o̱ xota̱ na̱xi̱ńdaá, kó ti̱ꞌinkꞌin ji nga kjuínboéꞌé ji, xikoó tsi ngo kjo̱a̱tjó nganda tsa̱ꞌa̱n ngatama. Nga ni̱xtjii̱n nga ti̱ꞌin ji kui nii̱, kó bo̱a̱ tsí tsꞌén nga kjo̱a̱ꞌajenda an, kó ngiti̱ sa̱ꞌínxchánjo̱jín an xota̱ na̱xi̱ńdá Israee̱l.
5Kó Moisee̱ tji̱e̱nmá kijíkoón xota̱ xi xchá xi chji̱a̱ni Israee̱l, kó bi̱ katsoó nga atíxomaa̱:
Nga ngo nga ngojnú, chjiéngá si̱ꞌankꞌiénjnú xota̱ tji̱e̱jnú xi kijítsꞌéndíkón ne Baa̱l-Peoo̱r.
Kó bo̱a̱ katsꞌén kui jaá. 6Kó tji̱e̱nga Moisee̱ ko̱jo xota̱ Israee̱l ndyi̱kjandà ki̱a̱ nínga bitjasꞌi̱e̱nnii̱ ndiꞌandikoón, kamábe nga ngo nda̱ Israee̱l katsangisꞌien ndiꞌa nínga tikón ngo na̱ xi chji̱a̱ni xota̱ tji̱e̱e̱ Mandiaa̱n.
7Kósꞌe̱ Finee̱, kui xi ndií Eleasaa̱, ko̱jo xi ndíndee̱ Aaroo̱n, iskjíbé yáyojó, 8kó kijí ndiꞌaa̱ kui nda̱ Israee̱l, kó katsꞌénkꞌién nga katsꞌénkjaꞌaxtikjaá kui yáyojoó nda̱ Israee̱l, ko̱jo kui na̱ xi chji̱a̱ni xota̱ tji̱e̱e̱ Mandiaa̱n. Kó bo̱a̱ tsꞌén nga Néná ngiti̱ katsꞌénjéjín ngasee̱ xota̱ Israee̱l. 9Ta̱nga kui ni̱xtjii̱n, jè kan nijón mi̱ ma xota̱ Israee̱l xi je jesoón.
Ni xi katsóyàtjón Néná nga sa̱ꞌín ngandaa̱ Finee̱
10Néná bi̱ katsoó Moisee̱:
11Finee̱ xikónií an, ngatꞌa̱ tsjandièjín nga kje̱ꞌe ne si̱ꞌandikón ngajona. Kuíni nga kamánii̱ nga katsꞌénkjaꞌajinda kjo̱a̱xchánna, ko̱jo nga ngiti̱ katsꞌenjéjáa̱n xota̱ Israee̱l. 12-13Kuí boá xi akó nga tjoó an, kó kamaá katsꞌén nga an katsꞌenjetakóo̱n xota̱ Israee̱l, kuíni nga ngotꞌe̱ ꞌne̱, ngo ni xi ndikón tsꞌénꞌbindajo̱ an kui ko̱jo xota̱ tji̱e̱e̱, nga kuí boá xi ka̱ma ngatsjéni̱xtjin chináꞌmina.
14Kui nda̱ Israee̱l xi kiniꞌánkꞌieén Simri̱ kiꞌmí, kui xi ndií Saluu̱ kamá, ngito̱ko̱o̱ ngo xtín xota̱ xi chji̱a̱ni xota̱ tji̱e̱e̱ Simeoo̱n. 15-18Kó kui na̱ xi chji̱a̱ni xota̱ tji̱e̱e̱ Mandiaa̱n xi kiniꞌánkꞌieén Kosbi̱ kiꞌmí, kui xi ndií Suu̱r kamá, ngito̱ko̱o̱ ngo xtín xota̱ xi ꞌniú yandikón xí chji̱a̱ni xota̱ tji̱e̱e̱ Mandiaa̱n. Kuíni nga jaskan ngije jaꞌa chiꞌin xi kanangiyaa̱, Néná bo̱a̱ katsoó Moisee̱ nga skjánjo̱ xota̱ tji̱e̱e̱ Mandiaa̱n kó nga sa̱ꞌiín, ngatꞌa̱ kuí boá xi konnii̱ nga xota̱ Israee̱l katsꞌéntsjajo̱ ne Baa̱l-Peoo̱r.
Currently Selected:
Xki̱ 25: MAIX
Highlight
Share
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
