Xki̱ 22
22
Ni xi kamaá Balaa̱k ko̱jo Balaa̱n
1Xota̱ Israee̱l kijíra nínga ndyi̱fí, kó ki̱a̱ katsꞌénkjaꞌyá nga índo ndiꞌaa̱ ki̱a̱ nangi soón Moaa̱b, kui ngi̱ndie xi tikón xtji̱e̱e̱n nínga fotjo tsꞌueé ki̱a̱ ndejèꞌ Jorndaa̱n, kje̱n na̱xi̱ńdáꞌniú Jerikoo̱. 2-4Balaa̱k ndií Sipoo̱r boá, kui nda̱ xi ree̱ nangi Moaa̱b kamá.
Kjiꞌanga tsintꞌié Balaa̱k ngayeje ni xi xota̱ Israee̱l katsꞌénjo̱ xota̱ Amoo̱r, kui ko̱jo xotaa̱ nangi Moaa̱b achichí katsakjónní, ngatꞌa̱ xota̱ Israee̱l achichí kamá. Kósꞌe̱ xota̱ Moaa̱b katsangiyakjaꞌá já ngito̱ko̱o̱ xota̱ Mandiaa̱n, kó bi̱ katsoó: Xota̱ Israee̱l sa̱ꞌínkjié ngayeje ni xi tjínná, xikótsꞌèn cho̱yojoo̱ nga tsꞌenkjié ndi̱xcho̱ xi tjín kꞌijñaá.
5Kui ni̱xtjin jàn Balaa̱n, kui xi ndií Beoo̱r ki̱a̱ kisꞌijña kui ko̱jo xota̱ ndiꞌaa̱ ki̱a̱ Petoo̱r, ngo na̱xi̱ńdáꞌniú xi tikóntꞌa ndejèꞌ Éufratee̱. Kó Balaa̱k katsangiyakjaꞌá já ngito̱ko̱o̱ na̱xi̱ńdaá, kó bi̱ tsó én xí katsangiyaa̱ Balaa̱n:
Ngo xtín xota̱ na̱xi̱ńdá xi achichí kjín má xi jatjoni nangi Ejipto̱, kꞌi̱e̱ ndyi̱tsꞌènkjaꞌyá kje̱n nangi nínga botixoma an, 6kó achichí ꞌniú kuí xotaa̱ ta̱bo̱a̱jiín ñá. A ka̱ma kji̱ndi̱bé ji, tsi̱ꞌe̱ nga chꞌo tsꞌén ko̱ndókjo̱e̱taꞌin ji. Jè be an nga kjiꞌanga tjín xí nda ndokjo̱e̱taꞌin ji, nda maá, kó kjiꞌanga tjín xí chꞌo tsꞌén ndokjo̱e̱taꞌin ji, ndajín maá ngayeje ni xi tsꞌén. Ngo kjo̱a̱nda míꞌaá, ja̱bíꞌi̱n, kó chꞌo tsꞌén ndokjo̱a̱taꞌin ji xota̱ na̱xi̱ńdá Israee̱l. Tsi ta̱ꞌaa̱ ka̱mana sa̱ꞌìi̱n nga skjanjo̱ an, kósꞌe̱ ka̱ma kꞌoxié an kui ngi̱ndiee̱ ngijee̱.
7Kó xota̱ ngito̱ko̱ xi chji̱a̱ni nangi Moaa̱b, ko̱jo nangi Mandiaa̱n kijíjoo̱ kui eén Balaa̱n. Kó ti̱ kijíjoo̱ to̱n tsi̱ꞌe̱ nga chꞌo tsꞌén ku̱i̱chji̱a̱taꞌin xota̱ Israee̱l. 8Kó Balaa̱n bi̱ katsoó: Ti̱ndyionrajnú kꞌi̱e̱e̱ kui ni̱xtji̱e̱e̱n. Ndyiojón xiyàjnúꞌun ni xi mejeén Néná nga sa̱ꞌin an.
Kó bo̱a̱ katsꞌén kui jaá. 9Kó kui ni̱xtji̱e̱e̱n Néná jatjokjaà Balaa̱n, kó bi̱ katsoó nga asíyaá:
—ꞌYá xotaa̱ bo̱a̱ xi síndojoo̱ ki̱a̱a̱.
10Kó Balaa̱n, bi̱ katsó:
—Nangi Moaa̱b kjindibáni, xota̱ chji̱ni̱e̱ꞌe̱én nda̱ re Balaa̱k boá. 11Nda̱ ree̱ boá xi katsangiya kꞌi̱e̱e̱, tsi̱ꞌe̱ nga chꞌo xò tsꞌén kuichjiátaꞌin an ngo xtín xota̱ na̱xi̱ńdá xi jatjoꞌmani nangi Ejipto̱. Ngatꞌa̱ ki̱a̱ xò kje̱n nínga tikón nangi Moaa̱b índo ndiꞌaa̱ nga ndyi̱tsꞌènkjaꞌyá, kó nda̱ ree̱ mején xoò nga ko̱ngatji̱nginii̱ kui ngi̱ndiee̱.
12Kósꞌe̱ Néná, bi̱ tsꞌén atíxomaa̱ Balaa̱n:
—Jmí, ngata̱ ꞌmije̱jín ji kui jaá, ti̱nde ngata̱ chꞌójíntsꞌèn ndokjo̱e̱taꞌin ji kui xota̱ na̱xi̱ńdaá, ngatꞌa̱ án boá xi sa̱ꞌin an nga nda ka̱maa̱ ngayeje ni xi sa̱ꞌín.
13Nga kamángindyiojón, jastjíe̱n Balaa̱n kó katsóyaà kui jaá kui én xí Néná katsjaá, kó bi̱ katsoó: Tangín nginíjnú na̱xi̱ńdájnú, ngatꞌa̱ Néná tsjandièjínna nga jún kjuínjo̱jnúꞌun.
14Kó já ngito̱ko̱o̱ nangi Moaa̱b kijí nginí nínga kjindibáni, kó bo̱a̱ katsoó Balaa̱k nga Balaa̱n kamámejénjiín kijíjo̱ kui jaá.
15Kósꞌe̱ Balaa̱k ngo xtín xí kjín ngase já ngito̱ko̱ xi ꞌniú yandikón ki̱a̱ Moaa̱b katsangiya nginí. 16Nga jachó nínga tikón Balaa̱n, katseꞌeé ngo én xí tsíchji̱a̱ nda̱ ree̱ xi bi̱ tsó: Tsá ndibé, ngata̱ boeꞌéndièjín ji nga tjín xí ku̱i̱ꞌíchjaá. 17Tsi chꞌo tsꞌén ko̱ndókjo̱e̱taꞌin ji kui xota̱ na̱xi̱ńdaá, ka̱ma kꞌuichjií ngayeje to̱n xi mejeén nga tsjaa, kó ngo xota̱ xi xcha̱ndikón sa̱ꞌiin ji.
18Ta̱nga ndatsi bo̱a̱ kiꞌmií Balaa̱n, bi̱ katsó:
Ndatsi Balaa̱k ka̱mamejeén tsja̱ana ndo̱bo̱a̱xa̱á, nga tjikítsie maá to̱nsinié ko̱jo to̱ntiboa, sa̱ꞌinjín an ni xi tsꞌénmíꞌána. ¡Chjiéngá kuintꞌieꞌée̱n Nee̱ xota̱ Israee̱l! 19Kꞌi̱e̱ ti̱ndyiónjnú kui ni̱xtji̱e̱e̱n, skuié mára an, míra̱ ni xi ka̱tso̱na Néná nga sa̱ꞌin an.
20Kó kui ni̱xtji̱e̱e̱n Néná bi̱ katsoó Balaa̱n: Tsi kui jaá xi ka̱mamejeén nga kꞌuínje̱ ji, tꞌen, ta̱nga ta̱ ni xi xiyàñaá xi si̱ꞌin ji.
21Kó Balaa̱n achichí ta̱jñó jastjíe̱n, ísoón xiri̱e̱e̱ ngo bórró chjo̱on, kó kijíjo̱ kui já ngito̱ko̱ xi chji̱a̱ni nangi Moaa̱b. 22Ta̱nga Néná achichí katsꞌénxchánjo̱ Balaa̱n ngatꞌa̱ kijíjo̱ kui jaá. Kuíni nga ndítsjiee̱ Néná ki̱a̱ kisꞌijñachjá ndi̱ya̱à tsi̱ꞌe̱ nga tsja̱ndièjiín nga kjo̱a̱ꞌa.
Balaa̱n kisꞌijñasoón kui bórró chjo̱on, kó jó má já xi asíko̱jo xi nijan kijíjo̱. 23Nga kamábe kui bórró chjo̱on nga ndítsjiee̱ Néná ki̱a̱ sikónyà ngi̱ya ndi̱ya̱à, kó nga je tikónda nga sa̱ꞌínꞌoón Balaa̱n nga yaꞌa ngo ki̱cha̱ndojó, jatjoxieni ndi̱ya̱à. Kó Balaa̱n ja̱ kamá nga tsaꞌon bórró chjo̱on tsi̱ꞌe̱ nga ko̱e̱je̱ nginí ngi̱ya ndi̱ya̱à.
24Kósꞌe̱ ndítsjiee̱ Néná ki̱a̱ kisꞌijña ndi̱yà nínga xkjoó, ngamasiee̱n jó xó ndi̱jo̱ yiꞌi nínga tjín tostsi̱jè. 25Nga kamábe kui bórró chjo̱on ndítsjiee̱, ngoboátꞌa kasasien, kó ki̱a̱ ínieé se Balaa̱n ki̱a̱ tꞌa kui xoó. Kósꞌe̱ Balaa̱n ti̱ tsaꞌon nginí.
26Sꞌe̱ kui ndítsjiee̱ kijítjón ngi̱chií, kó ki̱a̱ kasasien nginí ngo ngi̱ndie nínga achichí xkjó, nínga ngojín xi ka̱maa̱ sa̱ꞌíntíyá kꞌi̱e̱ sa̱ꞌíntíyá ngaján. 27Nga kamábe nginí kui bórró chjo̱on kui ndítsjiee̱, jajña tꞌanangi, kó ngiti̱ kamámejénjiín kijí ngase. Kó Balaa̱n achichí katsꞌénxchán, kó ngo yá tsaꞌon kui bórró chjo̱ón. 28Kó kjiꞌá má, Néná katsꞌénkíchji̱a̱ kui bórró chjo̱on, tsi̱ꞌe̱ nga bi̱ ka̱tso̱o̱ Balaa̱n:
—Mí xí katsꞌenjoo̱. Ánní nga je ján ndi̱yànií nga tifoéní.
Kó Balaa̱n bi̱ katsó:
29—¡Án akajnéchéní! ¡Tsi ngora̱ ki̱cha̱ndojó kjiyandsa̱ án, ngotꞌe̱ má sa̱ꞌínkꞌieén katsaki!
30Kó bórró chjo̱on bi̱ katsó ngase:
—¡Bórró chjóo̱n boá án! ¡Ngatsjéni̱xtjin tsꞌénfíjoo̱ ngayeje ngi̱ndie nínga ꞌmi ji, kó jmíni̱xtjin nga ndajín tjítsꞌenjoo̱, xikó tiniꞌínje̱ní ngotꞌe̱!
Kósꞌe̱ bi̱ katsó Balaa̱n:
—Kjénní ni xi se ji.
31Ti̱ kjiꞌa, Néná katsjandieè Balaa̱n nga kamábe kui ndítsjiee̱ nga sikónyà ngi̱ya ndi̱ya̱à, nga tsꞌényaꞌa ngo ki̱cha̱ndojó, nga je tikónda nga sa̱ꞌínꞌoón kui. Kósꞌe̱ Balaa̱n asiéntikoó ngaskande nga kisitꞌaa̱ kje̱n tꞌanangii̱, 32kó ndítsjiee̱ Néná bi̱ katsoó Balaa̱n:
—Ánní nga ján ndi̱yà akjée̱ bórró chjóo̱n. Án boá xi ichjaá ndi̱ya̱à, ngatꞌa̱ sasiénjínna nga kꞌuin jí nangi Moaa̱b. 33Tsi kamábejínna bórró chjóo̱n, kó tsi kasasienjín nga ján ndi̱ya̱à, jera̱ katsꞌenkꞌieén, kó kui, jmí ni katsꞌenjo̱jínra̱ an tsobo̱a̱.
34Kó Balaa̱n bi̱ katsó:
—Ti̱ꞌinjetakínní, Ndi̱a̱. Achichí ꞌniú ndajín katsꞌen an. Bejín an tsi ji xi tiniꞌínkasínní ngi̱ya ndi̱ya̱à. Tsi ji xi mejénjiín nga kjuín án nangi Moaa̱b, ngotꞌe̱ má bi̱ kjuínꞌóyá ngiñá an ndiꞌana.
35Kó kui ndítsjiee̱ Néná bi̱ katsoó:
—Tꞌenje̱ ji kui jaá, ta̱nga ta̱kuítsí ni xi xiyaá xi ko̱ndókjo̱e̱ ji.
Kó Balaa̱n kijíjo̱ kui já ngito̱ko̱ xi katsangiya Balaa̱k. 36Nga kiꞌmíyaà Balaa̱k nga Balaa̱n je kjochó tiña, kijíkjaꞌáyíndi̱yà ki̱a̱ ngo nangi xi tikón xtji̱e̱e̱n ta̱ꞌii̱n tsindioó kui na̱xi̱ńdaá. 37Kó ki̱a̱ Balaa̱k, bi̱ katsoó Balaa̱n:
—Ánní nga kjindibéjín ji kjiꞌanga tsíchji̱a̱a̱. A kiniꞌínkjé jí nga tsjajaán ni xi kixiaan nga tsjaa.
38Kó Balaa̱n bi̱ katsoó:
—Ja̱ jè kꞌi̱e̱ tikòn an, ta̱nga ta̱kuítsí ni xi Néná ko̱tíxomana xi kuichjiá an.
39Kó Balaa̱n kijíjo̱ Balaa̱k nínga ꞌmí Kiriaa̱t-Usoo̱t. 40Kó ki̱a̱ Balaa̱k katsꞌénkꞌasꞌiee̱n ngo kjo̱a̱tjó Néná xi cho̱yojo xi bokján tꞌanangi ko̱jo cho̱tsa̱nga̱, kó katsꞌéndaa̱ nichinie Balaa̱n ko̱jo xota̱ chji̱ni̱e̱ꞌe̱én.
41Nga kamángindyiojón, Balaa̱k kijíjo̱ Balaa̱n nínga ꞌmí Bamoo̱t-Baa̱l. Ndeskande ki̱a̱a̱ kamáyà chiboa ndiꞌa nínga kisꞌińdo xota̱ Israee̱l.
Currently Selected:
Xki̱ 22: MAIX
Highlight
Share
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
