Neemiyaa̱ 9
9
Nga kiꞌmíyà jeé
1Ni̱xtjin kan nijoón ti̱kuii kui saá, kamátikó xota̱ Israee̱l, kó katsꞌénkjaꞌa kjindiá yojoo̱ nga tsajá ńjño tokjuie, ko̱jo nga indyiaá ndiso to̱ko̱. 2Kó xota̱ tji̱e̱e̱ xota̱ Israee̱l, katsꞌénkjii̱n yojoo̱ ngayeje xota̱ xi kje̱ꞌe nangi chji̱a̱ni, kó katsóyà jé xí katsꞌén, ko̱jo ni xi ndajín xi katsꞌén xota̱ xi xchaá. 3Kó nga ndyi̱a̱kixi̱ ki̱a̱ ngi̱ndie nínga síndo, ngo nga nijón tjiín ni̱xtjii̱n katsꞌényà Chꞌo̱ Xo̱jo̱n Kjo̱a̱kitii̱ Néná, kui xi Nee̱ kui xotaa̱, kó xi ingo nga nijón tjiín ni̱xtjii̱n nga katsóyà jé xí katsꞌén, ko̱jo katsꞌéndikón Néná, kui xi Nee̱ kui nga.
4Kósꞌe̱ Jesuaa̱, ko̱jo Banii̱, ko̱jo Kandmiee̱l, ko̱jo Sebaniyaa̱, ko̱jo Bunii̱, ko̱jo Serabiyaa̱, ko̱jo Banii̱, ko̱jo Kenanii̱, kixindyia ki̱a̱ nga̱soón ngi̱ndie nkꞌa xi tsi̱ꞌe̱ xota̱ tji̱e̱e̱ Lebii̱, kó achichí ꞌniú tsíchji̱a̱a̱ Néná, kui xi Nee̱.
5Kó xota̱ tji̱e̱e̱ Lebii̱ xi chji̱a̱ni Jesuaa̱, ko̱jo Kandmiee̱l, ko̱jo Banii̱, ko̱jo Sabniyaa̱, ko̱jo Serabiyaa̱, ko̱jo Ondiyaa̱, ko̱jo Sebaniyaa̱, ko̱jo Petayiaa̱, bi̱ katsó:
¡Ti̱sítji̱e̱njnú, kó nda ndókjo̱a̱jnú kjo̱a̱a̱ Néná, kui xi Nejnú,
ndeskande ngasꞌe̱ ko̱jo ta̱kjiꞌání!
¡Nda ndókjo̱a̱jnú Jaꞌée̱n Kuí, kui xi tjiín kjo̱a̱jee̱,
kó ꞌniú ngase ngachjaninkꞌa, ta̱bo̱a̱jiín ngayeje kjo̱a̱niꞌánchikonñé ko̱jo kjo̱a̱niꞌántsjà xi tjín!
6Kósꞌe̱ xota̱ na̱xi̱ńdaá, bi̱ tsꞌén tsíchji̱a̱a̱ Néná:
¡Ta̱ Jí tsí bo̱a̱ xi Néná Jí!
Jí boá xi kiniꞌínde Ji nkꞌajmii̱,
ko̱jo nkꞌajmi xi ngasee̱, ko̱jo ngayeje ńñoo,
ko̱jo tꞌanangii̱, ko̱jo ngayeje ni xi tjín ngi̱jii̱n,
ko̱jo ndáchíkoón, ko̱jo ngayeje ni xi tjín ngi̱jii̱n.
Jí boá xi niꞌínkꞌijní Ji nga̱sondiee̱ ngayeje kui nii̱.
¡Kó ndítsjiee̱ nkꞌa jàn ndyi̱tsꞌéndíkoón Jí!
7Jí Ne, Jí ngo Ne xi kachjeꞌéjin Ji Abraa̱n,
kó kaꞌnaxiéni Ji ki̱a̱ nangi Uu̱r xi chji̱a̱ni xota̱ Kalndeaa̱,
kósꞌe̱ Abraa̱n ikítꞌe jaꞌén jí.
8Kó kamáye Ji nga ini̱ma̱a̱ kamáꞌniátakoón Ji,
kó ikꞌíndeje̱ Ji ngo ni, nga katseꞌée̱ tꞌanangii̱ xota̱ Kanaa̱n,
ko̱jo tsi̱ꞌe̱ xota̱ Ee̱t, ko̱jo tsi̱ꞌe̱ xota̱ Amoo̱r,
ko̱jo tsi̱ꞌe̱ xota̱ Feree̱, ko̱jo tsi̱ꞌe̱ xota̱ Jebuu̱,
ko̱jo tsi̱ꞌe̱ xota̱ Jerjee̱, ko̱jo nga Ji xi ko̱e̱ꞌée̱ xota̱ tji̱e̱e̱,
kó kiniꞌínkjatjosén ée̱n, ngatꞌa̱ kixi̱ Jí.
9Sꞌe̱ jaskan kamáyè Ji kjo̱a̱ni̱ma̱ xi jaꞌatio xota̱ xi xchájne̱ ki̱a̱ nangi Ejiptoo̱,
kó kandaꞌyé Ji nga ni̱ma̱ katsó nga tsíchji̱a̱ ki̱a̱ tꞌa Ndáchíkón Inií.
10Kó kiniꞌín Ji chi̱bo̱a̱ ko̱jo kjo̱a̱ndikón ngindyi̱ko̱n nda̱ faraoo̱n,
ko̱jo ngayeje mosoo̱, ko̱jo ngayeje xota̱ na̱xi̱ńdaá,
ngatꞌa̱ kamáye Ji nga nkꞌakon katsꞌénjo̱ xkjín.
Kó bo̱a̱ tsꞌén nga ꞌniú kamáyàndikón Jí, xikoó kui ni̱xtjin xi̱ꞌbi̱.
11Kó ngindyi̱ko̱n kui xotaa̱, jó tjín kiniꞌín Ji ndáchíkoón,
kó xota̱ xi ndyi̱mongatji̱ngii̱, ki̱a̱ kiniꞌínkjí Jí nínga na̱nga̱a̱ ndáchíkoón,
xikó maá ngo ndi̱jo̱ ki̱a̱ ngi̱jii̱n ndáfoa ꞌniuú.
12Nga ni̱xtjii̱n, akakèe̱ ndi̱yà nga kiniꞌínkjìn Jí ngo ṉdi̱ xi ja̱kjiꞌi yásé má kjiꞌi,
kó nga jñoó, ngo ndiꞌí xí ja̱kjiꞌi yásé má kjiꞌi xi kiniꞌínkjín Jí,
xi katsꞌéntsijee̱n ndi̱yà nínga chjiéngá ko̱e̱je̱.
13Sꞌe̱ jaskan ikitjaje̱n Ji ki̱a̱ na̱xi̱ Sinaii̱,
kó ndeskande nkꞌajmii̱ kandokjo̱e̱je Ji,
kó katseꞌée̱ kjo̱a̱botíxoma xi kixi̱, ko̱jo kjo̱a̱kiti xi ja̱koxi̱,
kjo̱a̱kiti ko̱jo kjo̱a̱botíxoma xi nda.
14Kó akakèe̱ kjo̱a̱tsjiee̱ ni̱xtjin ndikóo̱n,
kó katseꞌée̱ kjo̱a̱botíxoma, ko̱jo ngo Kjo̱a̱kiti,
kó mosòo̱ xi ꞌmí Moisee̱ kiniꞌínkjìn Jí.
15Kjiꞌanga kamábojoó, paa̱n ndiꞌakꞌajmii̱ katseꞌée̱,
kó kjiꞌanga kamáxíndá, ngi̱jin ndi̱jo̱jee̱ kaꞌnaxiéni Ji ndáfoa.
Kó kiꞌmíyée̱ nga kꞌo̱sꞌien, ko̱jo nga sa̱ko̱ó kui tꞌanangi xi kiꞌmíyetjée̱n nga ko̱e̱ꞌée̱.
16Ta̱nga kui ko̱jo xota̱ xi xchájne̱, achichí nkꞌakon kamá,
ko̱jo kitikjo̱a̱ kamá ini̱ma̱a̱, kó tsintꞌiéꞌénjiín kjo̱a̱botíxomáa̱.
17Kamámejénjiín tsintꞌié, kó jaꞌátsjienjiín kjo̱a̱ndikón xí kiniꞌín Ji ngi̱jii̱n kui xotaa̱,
kó ta̱sá katsꞌéntajá ini̱ma̱a̱, kó nga katsꞌénxchán,
jaꞌájin ngo ngito̱ko̱, tsi̱ꞌe̱ nga moso̱ xi kastiñá kamá nginí.
Ta̱nga Jí boá ngo Ne xi tsꞌénjétakón, ko̱jo xi ndaxota̱,
tjiínri kjo̱a̱ni̱ma̱takón, kó tsájín niꞌínxchín Jí,
achichí tsie kjo̱a̱ni̱ma̱takón tjiín, kó ikꞌíndemasínjín Ji,
18ndatsi katsꞌénda ngo ndií cho̱yojo xi ki̱cha̱ katsꞌénńdání,
kósꞌe̱ bi̱ katsó: ¡Kuí bí xi̱ꞌbi̱ xi Nejnú, xi tsꞌaxiénijnú ki̱a̱ nangi Ejiptoo̱!
Kó achichí ni xi ꞌniú ndajín xi katsꞌén.
19Ta̱nga Ji, ta̱ngatꞌanii̱ kjo̱a̱ni̱ma̱takón tsie xi tjiín,
nga ikꞌíndemasínjín Ji ki̱a̱ nangi kixií.
Nga ni̱xtjii̱n, ngo ṉdi̱ xi ja̱kjiꞌi yásé má kjiꞌi xi akoó ndi̱yà nínga kijí,
kó nga jñoó, ngo ndiꞌí xí ja̱kjiꞌi yásé má kjiꞌi xi akoó xi ndi̱yà nínga ko̱e̱je̱.
20Kó katseꞌée̱ A̱siénni̱xtjin xi ndàa̱, tsi̱ꞌe̱ nga akóyaá,
kó ngatsjéni̱xtjin katseꞌée̱ nga iskjinie kui mana̱ xi katseꞌée̱ ngi̱ya tsꞌoa,
kó ti̱ katseꞌée̱ ndáfoa nga kamáxíndaá.
21Jo̱o̱n, yichán nó katseꞌée̱ ni xi iskjinie ko̱jo ni xi katsꞌe ki̱a̱ nangi kixií,
kó nde ngojín ni xi kamáchjieén, kó ńjñoo̱ kamáxchájín, ti̱nde kamáskejín sé.
22Katseꞌée̱ ngi̱ndie nínga botíxoma, ko̱jo na̱xi̱ńdá, kó xki̱ nangi katseꞌée̱ ngi̱ndie,
kó kui katsꞌéntsi̱ꞌe̱ nangi Sijoo̱n, ko̱jo tꞌanangii̱ ree̱ na̱xi̱ńdáꞌniú Esboo̱n,
ko̱jo tꞌanangii̱ re Oo̱j, xi botixómaá nangi Basaa̱n.
23Kiniꞌínkjín Ji ndií, xikó maá ńño xi tjín nkꞌa jàn,
kó ki̱a̱ kꞌinje̱ Ji ki̱a̱ tꞌanangi xi kaseyetjée̱n xota̱ xi xchaá nga kui tsi̱ꞌe̱ ka̱ma.
24Kó bo̱a̱ tsꞌén nga kjindibá kui xota̱ tji̱e̱e̱, kó iskjíbé kuí tꞌanangii̱,
kó ngindyi̱ko̱n kui, ni̱ma̱kjo̱a̱ kiniꞌín Ji xota̱ xi kisꞌińdo kui ngi̱ndiee̱,
kui xi xota̱ Kanaa̱n, kó ngi̱ya tsja kui, kiniꞌínkꞌasꞌin Ji kui xotaa̱,
ko̱jo já ree̱, ko̱jo nangii̱, tsi̱ꞌe̱ nga katsꞌén ta̱ ni xi mejénrií.
25Kó bo̱a̱ tsꞌén katsꞌéntsi̱ꞌe̱ na̱xi̱ńdáꞌniú xi nda tjíchjáꞌyánii̱,
ko̱jo tꞌanangi xi ndaa̱, kó iskjíbé ndiꞌa xi tjikítsie maá ni xi nda,
ko̱jo ndáńchꞌi̱ xi kiniꞌánda, ko̱jo ngi̱ndie nínga ꞌbítji̱e̱ tostsi̱je̱è,
ko̱jo nínga tjitjíe̱ toꞌaseituna̱, ko̱jo achichí yá xí tsjá to.
Kó iskjinie, kó kitsie cha̱n cha̱a̱n, kó ngaskande tsꞌajón maá,
kó kamáyiꞌi má, kó achichí tsjá kamaá kjo̱a̱a̱ kjo̱a̱nda je xi kisꞌiee̱.
26Kó katsꞌénxtií Jí, kó katsꞌénkitikjo̱a̱ yojoo̱ kondra̱ tse̱,
kó katsꞌénchjíjiín kjo̱a̱kitìi̱, kó katsꞌénkjiesón jáchji̱ni̱e̱ꞌée̱n,
kui xi bo̱a̱ katsoó nga Ji ko̱e̱je̱kon nginií, kó katsꞌén ni xi ꞌniú chꞌokjiꞌi.
27Kuíni nga Ji ki̱a̱ kiniꞌínkꞌasꞌin Ji ngi̱ya tsja kondra̱a̱,
kó kui kondra̱a̱ kjo̱a̱ni̱ma̱ katsꞌénkjaꞌatio.
Ta̱nga ngije tsie kjo̱a̱ni̱ma̱ jaꞌatio, ni̱ma̱ katsó nga tsíchji̱a̱a̱ Ji,
kó Ji, ndeskande nkꞌajmii̱ kandaꞌyé Ji,
kó ta̱ngatꞌanii̱ kjo̱a̱ni̱ma̱takón tsie xi tjiín,
nga kanangiyèe̱ xota̱ xi tsꞌaxiéꞌá ngi̱ya tsja kondra̱a̱.
28Ta̱nga ngije kisꞌiee̱ kjo̱a̱xió, ti̱ katsꞌén nginí ni xi ndajín ngindyikin Ji,
kó kuíni nga Ji ki̱a̱ kiniꞌínkꞌasꞌin Ji ngi̱ya tsja kondra̱a̱, kó kui xotaa̱ xi atíxomaa̱.
Kósꞌe̱ kjiꞌanga katsꞌénkꞌoyá nginí yojoo̱, ko̱jo nga ni̱ma̱ katsó nga tsíchji̱a̱a̱ Ji,
Ji kandaꞌyée̱ ndeskande ndiꞌakꞌajmii̱, kó bo̱a̱ tsꞌén nga kjín ndi̱yà kaꞌnaxiéꞌé Ji,
ta̱ngatꞌanii̱ kjo̱a̱ni̱ma̱takón tsie xi tjiín.
29Akatíxomée̱ tsi̱ꞌe̱ nga sa̱ꞌínsén nginií kjo̱a̱kitìi̱,
ta̱nga kui xotaa̱ achichí nga nkꞌakon kamá,
kó tsintꞌiéjiín kjo̱a̱botíxomáa̱, kó ta̱sá katsꞌénjé kondraa̱ kjo̱a̱botíxomáa̱,
kui kjo̱a̱botíxoma xi nda ꞌbíndoni xota̱ xi tsꞌénkjatjosoón,
kó ti̱ katsꞌénchjíjín nginií kjo̱a̱kitìi̱, kó ti̱ katsꞌénkitikjo̱a̱ nginí yojoo̱, kó kamá mejénjiín tsintꞌié.
30Ta̱nga Ji achichí kjín nó nga kiniꞌínchíkjo̱e̱e̱,
kó A̱si̱énni̱xtjìi̱n kiniꞌínkjìn Jí nga katsꞌénkíchji̱a̱ jáchji̱ni̱e̱ꞌée̱n, ta̱nga kui xotaa̱ tsintꞌiéꞌénjín,
kuíni nga ki̱a̱ kiniꞌínkꞌasꞌin Ji ngi̱ya tsja xota̱ xi síndo kui tꞌanangii̱.
31Ta̱nga ta̱ngatꞌanii̱ kjo̱a̱ni̱ma̱takón tsie xi tjiín, nga kiniꞌínkjiéjín Ji,
ti̱nde ikꞌíjñímasínjín Ji, ngatꞌa̱ achichí ndaxota̱ Ji xota̱, kó tjiínri kjo̱a̱ni̱ma̱takón.
32¡Kó ngotꞌe̱ ꞌne̱, Ji Ne xi tsa̱ji̱n! ¡Ji xi tjiín kjo̱a̱je! Ji xi tjiín ngaꞌniú, ko̱jo xi yandikoón,
Ji xi niꞌínkjatjosén Ji ni xi ꞌbínde Ji, ko̱jo kjo̱a̱ni̱ma̱takón xi tjiín,
ngata̱ chiboajín niꞌín Ji ngayeje kui kjo̱a̱ni̱ma̱ xi je kjindibániéjne̱,
ko̱jo xi kjindibánié já rejne̱, ko̱jo já ngito̱ko̱jne̱, ko̱jo chináꞌmijne̱,
ko̱jo jáchji̱ni̱e̱ꞌénjne̱, ko̱jo xota̱ xi xchájne̱, ko̱jo ngayeje xota̱ na̱xi̱ńdájne̱,
ndeskande ni̱xtjii̱n já ree̱ nangi Asiria̱, ngaskande ngotꞌe̱.
33Kixi̱ boá Jí kjo̱a̱a̱ ngayeje ni xi kjindibániéjne̱,
ngatꞌa̱ achichí kixi̱ kiniꞌín Ji ngayeje nii̱,
ta̱nga ji̱n, ndajín kjiꞌi ni xi kiniꞌánjne̱.
34Ngatꞌa̱ rejne̱, ko̱jo xota̱ xi botixómájne̱, ko̱jo chináꞌmijne̱, ko̱jo xota̱ xi xchájne̱,
katsꞌénkjatjosónjín ni xi tsó Kjo̱a̱kitìi̱, ti̱nde katsꞌénsénjiín kjo̱a̱botíxomáa̱,
ko̱jo ni xi akatíxome Ji kondra̱a̱ kui xotaa̱.
35Ngatꞌa̱ ki̱a̱jín katsꞌénxátꞌaa̱ ki̱a̱ nínga atíxoma kui,
kó ngi̱jii̱n ni nda tsie xi katseꞌée̱, ko̱jo ki̱a̱ tꞌanangi nda xi ikꞌíjñí Ji kje̱n,
nde katsꞌénkꞌoyájín yojoo̱ nga katsꞌén ni xi nda.
36Kuíni nga ngotꞌe̱ ꞌne̱, ¡kꞌi̱e̱ tindyionjne̱ nga moso̱jne̱, ti̱ kꞌi̱e̱e̱ kui tꞌanangi xi katseꞌée̱ xota̱ xi xchájne̱,
tsi̱ꞌe̱ nga iskjinie ni tjieé, ko̱jo ni ndaa̱! Ngotꞌe̱ ꞌne̱, moso̱ ji̱n kui tꞌanangii̱.
37Ngatꞌa̱ ta̱ngatꞌanii̱ jéjne̱ nga achichí kjima kjín ni tjié xi sakoó kui já re xi ikꞌíjñí Ji nga ko̱tíxomajne̱,
kó kuí boá xi botixómaá yojojne̱, kó cho̱ tjiéjne̱ ta̱ ni xi mejénrií ndyi̱tsꞌènjo̱,
kó ji̱n, achichí nga nda̱jín kjimataꞌinjne̱.
Ni xi índajo̱ xota̱ na̱xi̱ńdaá, tsi̱ꞌe̱ nga sa̱ꞌínkjatjosón kjo̱a̱kitii̱
38Kó ta̱ngatꞌanii̱ ngayeje kui nii̱, nga ji̱n ndyi̱boeꞌéjne̱ ndso̱ꞌbajne̱ nga si̱ꞌankjatjosónjne̱ Ji, kó ngo xo̱jo̱n ndyi̱ꞌbítꞌajne̱ kui nii̱, xi ku̱i̱ꞌíjñaá chi̱bo̱a̱ tsja já ngito̱ko̱jne̱, ko̱jo xota̱ tji̱e̱e̱ Lebii̱, ko̱jo já chináꞌmijne̱.
Currently Selected:
Neemiyaa̱ 9: MAIX
Highlight
Copy
Compare
Share
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
