Neemiyaa̱ 8
8
Esndraa̱ katsꞌényaà kjo̱a̱kitii̱ xota̱ na̱xi̱ńdaá
1Kó ngayeje xota̱ na̱xi̱ńdaá kamátikó nga ta̱ ngo tjín kamá ki̱a̱ ndi̱tse̱e̱n nínga tikón nga̱ntjo̱a̱a̱ Ndáfoaa̱, kó ki̱a̱ kichjiáꞌaá nda̱ chji̱ni̱e̱ xo̱jo̱n eén Néná xi ꞌmí Esndraa̱, tsi̱ꞌe̱ nga kji̱ndi̱bájo̱ Chꞌo̱ Xo̱jo̱n Kjo̱a̱kitii̱ Moisee̱, kui xi Néná katsjaá xota̱ Israee̱l. 2Kó ni̱xtjin tjoón sá xí yitoo̱, chináꞌmi Esndraa̱ kijíjo̱ Xo̱jo̱n Kjo̱a̱kitii̱ ngindyi̱ko̱n xota̱ xi kamátikoó, kó ngayeje xotaa̱, xi xi̱ꞌin ko̱jo xi ínchjiín kamákjiín ni xi tsintꞌié. 3Kó kje̱n ndi̱tse̱n kui xi tikón kje̱n nga̱ntjo̱a̱a̱ Ndáfoaa̱, ki̱a̱ katsꞌényà kui Chꞌo̱ Xo̱jo̱o̱n, ndeskande nga kisisie̱èn ngaskande nga kamá ndisꞌueé, ngindyi̱ko̱n ngayeje xota̱ na̱xi̱ńdaá, xi xi̱ꞌin ko̱jo xi ínchjín, ko̱jo ngayeje xota̱ xi kamákjiín. Kó ngayeje xota̱ na̱xi̱ńdaá asiénnijoo̱n Chꞌo̱ Xo̱jo̱n Kjo̱a̱kitii̱.
4Kó nda̱ chji̱ni̱e̱ xo̱jo̱n xi ꞌmí Esndraa̱, ki̱a̱ kisꞌijña ngo ngi̱ndie xi nkꞌa xi yá kamándani, kui xi xá kiniꞌánda kjo̱a̱a̱ kui nii̱, kó ki̱a̱ tꞌa kui ndaa̱ xtji̱e̱e̱n tsja fojnií, kisꞌińdo Matatiyaa̱, ko̱jo Semaa̱, ko̱jo Aniyaa̱, ko̱jo Uriyaa̱, ko̱jo Ilsiyaa̱, ko̱jo Maasiyaa̱, kó xtji̱e̱e̱n tsja skón kisꞌińdo Pendayiaa̱, ko̱jo Misaee̱l, ko̱jo Malkiyaa̱, ko̱jo Asuu̱n, ko̱jo Asbandanaa̱, ko̱jo Sakariyaa̱, ko̱jo Mesulaa̱n. 5Kó Esndraa̱ iskjíxꞌá kuí Chꞌo̱ Xo̱jo̱o̱n ngindyi̱ko̱n ngayeje xota̱ na̱xi̱ńdaá, ngatꞌa̱ nkꞌa ngase ngi̱ndie nínga kisꞌijñanii̱ xota̱ na̱xi̱ńdaá. Kó kjiꞌanga iskjíxꞌá kui Chꞌo̱ Xo̱jo̱o̱n, ngayeje xota̱ na̱xi̱ńdaá jastjíe̱n nga kixindyia kixi̱. 6Kósꞌe̱ Esndraa̱, katsꞌéntsjaà Néná, kui Néná xí tjiín kjo̱a̱jee̱, kó ngayeje xota̱ na̱xi̱ńdaá iskjininkꞌa tsja, nga bi̱ katsó: ¡Bo̱a̱ kjiꞌi! ¡Bo̱a̱ kjiꞌi! Kó asiéntikoó ngaskande nga kisitꞌaa̱ kje̱n tꞌanangii̱ nga katsꞌéndikón Néná.
7Jaskan ngije kamá kui nii̱, kui já xíꞌbi̱ xi chji̱a̱ni xota̱ tji̱e̱e̱ Lebii̱, akóyaá xota̱ na̱xi̱ńdaá tsi̱ꞌe̱ nga kamákjiín Kjo̱a̱kitii̱.
Jesúaa̱,
ko̱jo Banii̱,
ko̱jo Serebiyaa̱,
ko̱jo Jamii̱n,
ko̱jo Akuu̱b,
ko̱jo Sabetai̱,
ko̱jo Ondiyaa̱,
ko̱jo Maasiyaa̱,
ko̱jo Kelitaa̱,
ko̱jo Asariyaa̱,
ko̱jo Josabee̱nd,
ko̱jo Anaa̱n,
ko̱jo Pelayiaa̱.
Kó ngayeje xota̱ na̱xi̱ńdaá xioó kisꞌińdo ngi̱ndiee̱ nga asiénnijoo̱n kui nii̱. 8Kó katsꞌényà cha̱n cha̱a̱n Chꞌo̱ Xo̱jo̱n Kjo̱a̱kitii̱ Néná, kó katsóyà ni xi mejeén tsó kui eén, tsi̱ꞌe̱ nga nda kamakjiín xota̱ Israee̱l ni xi kiniꞌányaà. 9Kó ngayeje xota̱ na̱xi̱ńdaá askjandá tji̱e̱nga tsintꞌieé kui én xí tjítꞌa Kjo̱a̱kitii̱, kósꞌe̱ Neemiyaa̱, ko̱jo nda̱ xtitjoón, ko̱jo Esndraa̱, kui nda̱ xi chináꞌmi ko̱jo chji̱ni̱e̱kjo̱a̱kitii̱ kamá, ko̱jo xota̱ tji̱e̱e̱ Lebii̱ xi akóyaá, tsi̱ꞌe̱ nga kamákjiín kjo̱a̱kitii̱ xota̱ na̱xi̱ńdaá, bi̱ katsoó ngayeje xota̱ na̱xi̱ńdaá: Ni̱xtjin ndikón xí tsjie xi tsi̱ꞌe̱ Néná boá kui ni̱xtjin xi̱ꞌbi̱, kó ngata̱ ndasenjín mindyiónjnú, ti̱nde ngata̱ chaꞌájínjnú. 10Kósꞌe̱ Esndraa̱ bi̱ katsó nga: ¡Tangínjnú, kó chi̱ni̱e̱jnú ni xi nda chinie, ko̱jo tꞌi̱o̱jnú bino̱ xi ndaa̱, kó nangíyájnúu̱ chií kui nii̱, kui xota̱ xi jmí ni tikóndajiín, ngatꞌa̱ kui ni̱xtjii̱n, ni̱xtjii̱n tsjie tsi̱ꞌe̱ Ndi̱a̱ná boá! ¡Ngata̱ ndasenjín mindyiónjnú, ngatꞌa̱ kjo̱a̱tsjaa̱ Néná, kuí boá kui nii̱ xi ngaꞌniújnú!
11Kó xota̱ tji̱e̱e̱ Lebii̱, katsꞌénkꞌíxió ngayeje xota̱ na̱xi̱ńdaá, nga bi̱ katsoó: ¡Ngata̱ ndasenjín mindyiónjnú, ngatꞌa̱ kui ni̱xtjii̱n, ni̱xtjii̱n tsjie boá! ¡Ngiti̱ ndasénjín mindyion ngasejnú!
12Kó ngayeje xota̱ na̱xi̱ńdaá kijíkjinie nichinie ko̱jo kijíkꞌi ni xi ꞌyó, ko̱jo katsangiyaa̱ chií kui nii̱ xkjín, kó achichí tsjá kamaá, ngatꞌa̱ jè kamákjiín kui eén xi akakoyaá.
13Nga kamángindyiojón, kamátikó ngayeje já ngito̱ko̱o̱ xtín xota̱ ndiꞌa xi chji̱a̱ni ngayeje xota̱ na̱xi̱ńdaá, ko̱jo já chináꞌmii̱, ko̱jo xota̱ tji̱e̱e̱ Lebii̱, ki̱a̱ nínga tikón nda̱ xi chji̱ni̱e̱kjo̱a̱kitii̱ Esndraa̱, tsi̱ꞌe̱ nga ꞌniú ngase nda kamákjiín én xí kjitꞌa kjo̱a̱kitii̱. 14Kó ki̱a̱ kamábe ni xi tsó Xo̱jo̱n Kjo̱a̱kitii̱, kótsꞌèn nga Néná katsjaá kjo̱a̱botíxoma Moisee̱, tsi̱ꞌe̱ nga xota̱ Israee̱l ki̱a̱ kꞌuíndo ndiꞌańjñoo̱ kjiꞌanga ka̱ma sꞌué xí má nga ma yito saá, 15ko̱jo nga ki̱a̱ ka̱tso̱yaa̱ ko̱jo nga ꞌniú skja̱ndáyà ngayeje na̱xi̱ńdáꞌniuú, ko̱jo na̱xi̱ńdáꞌniú Jerusalee̱n, nga bi̱ ka̱tso̱: Tangínjnú ki̱a̱ nínga tji̱ngi̱i̱, kó ndibájo̱jnú tjiaa̱ yáꞌolibo̱ xi ndaa̱, ko̱jo tjiaa̱ yáꞌolibo̱ xí ꞌbé ngi̱jin kꞌijñaá, ko̱jo tjiaa̱ yáꞌarrayaa̱n, ko̱jo tjiaa̱ yáxka̱jèn, ko̱jo tjiaa̱ yámirto̱, tsi̱ꞌe̱ nga si̱ꞌanda ndiꞌańjñoo̱, xikótsꞌèn kjitꞌa xo̱jo̱n eén Néná.
16Kó xota̱ na̱xi̱ńdaá jatjoxieni na̱xi̱ńdáꞌniuú, kó jachójo̱ tjiaa̱ kui yaá, kósꞌe̱ katsꞌénda ndiꞌańjñoo̱ nga ngo nga ngo ki̱a̱ nkꞌaa̱ ndiꞌaa̱, ko̱jo ki̱a̱ ndi̱tsen Ndiꞌaa̱ Néná, ko̱jo ki̱a̱ ndi̱tse̱e̱n nga̱ntjo̱a̱a̱ Ndáfoaa̱, ko̱jo ki̱a̱ ndi̱tse̱e̱n nga̱ntjo̱a̱a̱ Efraii̱n. 17Kó ngayeje xota̱ na̱xi̱ńdá xí jeꞌeꞌoyá nginí nga tsangínjo̱ꞌniuú, katsꞌenda ndiꞌańjñoo̱, kósꞌe̱ ki̱a̱ kisꞌińdo, kui nii̱ jmí ni̱xtjin katsꞌén xota̱ Israee̱l, ndeskande ni̱xtjin nga kisꞌijña Josuee̱ ndií Nuu̱n. Kó achichí kjo̱a̱tsja kisꞌiee̱. 18Kó Esndraa̱ ndyiojón ndyiojón katsꞌényà Chꞌo̱ Xo̱jo̱n Kjo̱a̱kitii̱, ndeskande ni̱xtjin xi tjoón, ngaskande ni̱xtjin xi fetꞌanii̱. Kó yito ni̱xtjin katsꞌén kui sꞌueé, sꞌe̱ xi ma jii̱n ni̱xtjii̱n kamátikó xtín, xikótsꞌèn kjitꞌa kjo̱a̱botíxomaa̱.
Currently Selected:
Neemiyaa̱ 8: MAIX
Highlight
Copy
Compare
Share
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
