Neemiyaa̱ 6
6
Ni ikꞌínda kondra̱a̱ Neemiyaa̱
1Kó kjiꞌanga Sanbalaa̱t, ko̱jo Tobií, ko̱jo Ngesee̱n, nda̱ xi chji̱a̱ni nangi Arabiaa̱, ko̱jo xota̱ kondra̱ xi ngasee̱, tsintꞌié nga an je iskjininkꞌa ngiñá an xó xí tjíchjáꞌyáni na̱xi̱ńdáꞌniuú, ko̱jo nga jè ngiti̱ jmíjín ngi̱ndie nínga bitjasꞌi̱e̱nnii̱, ndatsi kji̱e̱ ꞌbíndojiín ngatiee̱ nga̱ntjo̱a̱a̱ na̱xi̱ńdáꞌniuú, 2Sanbalaa̱t ko̱jo Ngesee̱n katsangiyana én, nga bi̱ katsóna: Ja̱bíꞌi̱n, kó ki̱a̱ ka̱matikó ki̱a̱ nangi Kefirii̱n, xi tikón ki̱a̱ nangisoón na̱xi̱ńdáꞌniú Onoo̱. Ta̱nga kui jaá kamámejeén nga ni xi ndajín sa̱ꞌínjo̱na. 3Kó katsangiyáa̱ já chji̱ni̱e̱ꞌén, nga bi̱ kixiáa̱n: Míkjo̱a̱a̱ nga sa̱ꞌinkasién an, ko̱jo nga kꞌuijñámasien an kui xaá, ta̱ngatꞌanii̱ nga ji kjuinkoón. 4Kó nijón ndi̱yà nga ꞌniú katsꞌénna kjo̱a̱a̱ kui nii̱, ta̱nga ti̱ bo̱a̱ ti̱ kixián ngiñáa̱, xikó je kixiáa̱n. 5Kósꞌe̱ Sanbalaa̱t katsangiyana nda̱ mosoo̱ xi ma uún ndi̱yà kjo̱a̱a̱ kui nii̱, kó ngo xo̱jo̱n tjiyátsja xi katsangiyajo̱ kui nda̱a̱, 6kó bi̱ tsó ni xi tjítꞌa kui xo̱jo̱o̱n:
Tjíndaꞌyá ngi̱jii̱n na̱xi̱ńdá xí síndotꞌaa̱, kó nangi Ngasmu̱, bo̱a̱ kjiꞌi tjítsó ndatsa kui nga, kjo̱a̱a̱ nga ji, ko̱jo xota̱ jundíoo̱ ndyi̱niꞌánkjójnú nga kjo̱a̱xchán si̱ꞌánjnú, kó nga kuí xò ni nga tiniꞌíndaye ji kui xó xí foaꞌatjiyajoo̱n na̱xi̱ńdáꞌniuú, ngatꞌa̱ mején xoò nga ji xi ka̱ma ji re, 7ko̱jo nga jè xò ikꞌínde ji jáchji̱ni̱e̱ꞌén, xi ka̱tso̱yà nga ji xi je re ji ki̱a̱ na̱xi̱ńdáꞌniú Jerusale̱n, nga bi̱ ka̱tso̱: ¡Jè tikón ngo re ki̱a̱ nangi Jundáa̱! Kó kuíni nga kui eén je si̱ꞌankintꞌié nda̱ ree̱, kuíni nga mejénna nga kji̱ndi̱bé ji, tsi̱ꞌe̱ nga nijan xchi̱boáni̱jmì nga kꞌuínda kuí nii̱.
8Kósꞌe̱ katsangiyáa̱ ngo én, nga bi̱ kixiáa̱n: ¡Jmí, bo̱a̱jín kjiꞌi ni xi tꞌísé ji, jí boá xi tiniꞌínde ji kui eén, xikó tsó ini̱ma̱a̱! 9Ngatꞌa̱ kui xotaa̱ kamámejeén indyiándikónjne̱, nga katsꞌenkjó nga ndsa̱jne̱, ngiti̱ jmí ngaꞌniú kꞌuiéjiín nga sa̱ꞌín kui xaá, ko̱jo nga kꞌuijñámasienjne̱ ni xi ndyi̱niꞌánjne̱.
Ta̱nga ngotꞌe̱ ꞌne̱ Ji Ne, ¡te̱ꞌéngaꞌníi̱ ndsa̱ án!
10Jaskan kijí an ndiꞌaa̱ nda̱ xi ꞌmí Semayiaa̱ ndií Ndelayiaa̱, ndíndeè Meetabee̱l, ngatꞌa̱ kui nda̱a̱ ki̱a̱ tikónꞌyá ndiꞌaa̱, kó bi̱ katsóna:
—Kꞌuítikó yojoná ki̱a̱ Ndiꞌaa̱ Néná, ki̱a̱ ngi̱ya ndiꞌandikoón, kó kꞌuíchjá nga̱ntjo̱a̱a̱, ngatꞌa̱ jè tjín xí mejeén kjo̱chó nga sa̱ꞌínkꞌieén jí, jo̱o̱n, ja̱koxi̱ boá nga kui ni̱xtji̱e̱e̱n kji̱ndi̱bá niꞌánkꞌieén jí.
11Ta̱nga an bi̱ kixiáa̱n:
—A kongáñáa̱ ngo xota̱ xi xikoó an, kó a ka̱ma ki̱a̱ Ndiꞌandikoón kꞌosꞌi̱e̱n an, kósꞌe̱ to̱kó kotíjña̱ ngase an. ¡Jmí kꞌosꞌi̱e̱njín an!
12Kósꞌe̱ kamákjínna nga jmí tsi Néná xí katsangiya kui nda̱a̱, ngatꞌa̱ tsíchji̱a̱ boá kuí én xí ꞌmíyatjoón kondra̱ tsa̱ꞌa̱n, ngatꞌa̱ Tobií ko̱jo Sanbalaa̱t to̱n katsjaá. 13Ngatꞌa̱ to̱n katseꞌeé, tsi̱ꞌe̱ nga ku̱i̱ndyiándikónna, kó nga sa̱ꞌin an kui nii̱, ko̱jo nga sa̱ꞌinjé án, kósꞌe̱ bo̱a̱ tsꞌén kꞌuieé ngi̱ndie nga ku̱i̱chji̱a̱ kondra̱ tsa̱ꞌa̱n, kósꞌe̱ ku̱i̱chji̱a̱taꞌinna. 14Kósꞌe̱ bi̱ kixiáa̱n nga tsíchji̱a̱a̱ Néná: Ji Ne, ngatjaꞌátsjiee̱n Tobií ko̱jo Sanbalaa̱t, kjo̱a̱a̱ kui én xí tsíchji̱a̱, ko̱jo kjo̱a̱a̱ na̱ chji̱ni̱e̱ꞌe̱én xi ꞌmí Noandiyaa̱, ko̱jo jáchji̱ni̱e̱ꞌén xí ngasee̱ xi kamámejeén indyiándikónna.
15Kó bo̱a̱ tsꞌén nga ni̱xtjin kan uún sá xí ꞌmí Eluu̱l nga kamándo̱jo kuí xoó, kó ichítié ko̱jo jó ni̱xtjin tsꞌandíyájne̱. 16Kó ngije tsintꞌié kuí nii̱ ngayeje kondra̱jne̱, ngayeje xota̱ na̱xi̱ńdá xí síndotꞌajne̱, achichí katsakjónní, kó ni̱ma̱kjo̱a̱ kisꞌińdo, ngatꞌa̱ kamábe nga Néná boá xi tsi̱ꞌe̱ kui xaá.
17Kui ni̱xtjin jàn xota̱ ngito̱ko̱o̱ nangi Jundáa̱, kjín xo̱jo̱n katsangiyaa̱ Tobií, kó xo̱jo̱n xi tsi̱ꞌe̱ Tobií ti̱ jachoó kui xotaa̱ nga. 18Ngatꞌa̱ achichí má xota̱ xi chji̱a̱ni nangi Jundáa̱ xi katsjátsꞌoá nga kixi̱ ka̱ma kjo̱a̱a̱ Tobií, ngatꞌa̱ nda̱ xkandaa̱ Sekaniyaa̱ ndií Araa̱ kamá, kó ndií kui nda̱a̱ xi ꞌmí Joanaa̱n, kisꞌijñajo̱ tsa̱kji̱ín Mesulaa̱n ndií Berekiyaa̱. 19Kó ngindyikón án nda kandokjo̱a̱ kjo̱a̱a̱ ngayeje ni nda xi katsꞌén, kó kuí, kiꞌmíyaà énna. Kó Tobií katsangiyana xo̱jo̱n tsi̱ꞌe̱ nga indyiándikónna.
Currently Selected:
Neemiyaa̱ 6: MAIX
Highlight
Copy
Compare
Share
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
