Neemiyaa̱ 5
5
Kjo̱a̱xchán xí kisꞌie ngi̱jii̱n xota̱ na̱xi̱ńdaá.
1Kósꞌe̱ ínchjiín ko̱jo xota̱ na̱xi̱ńdaá ꞌniú askjandáyà kondraa̱ já ntsꞌi̱e̱ xi xota̱ jundíoo̱, 2ngatꞌa̱ tjín xí bi̱ katsó: Ji̱n, ko̱jo ndí xíꞌínjne̱ ko̱jo ndí ínchjínjne̱, achichí kjín má ji̱n, kó chjiénjne̱ to ndso̱ko̱a̱n ṉño̱pan, tsi̱ꞌe̱ nga xi̱ni̱e̱jne̱, ko̱jo nga ku̱i̱ndyionjne̱. 3Tjín xí bi̱ katsó: Jè to̱n ikꞌíjñangijne̱ kꞌijñájne̱, ko̱jo ngi̱ndie nínga tjitjíe̱jne̱ tostsi̱je̱è, ko̱jo ndiꞌajne̱, tsi̱ꞌe̱ nga kꞌuiéjne̱ to ndso̱ko̱a̱n ṉño̱pan nga ka̱ma kjindiaá. 4Kó ti̱ tjín xí bi̱ katsó nga: Ji̱n jè kichjíyájne̱ to̱n tsi̱ꞌe̱ nga kꞌuíchjíjne̱ to̱n xi machjítjé ni nda̱ ree̱, kjo̱a̱a̱ tꞌanangijne̱ ko̱jo ngi̱ndie nínga tjitjíe̱jne̱ tostsi̱je̱è, 5ngotꞌe̱ ꞌne̱, ji̱n bo̱a̱ kónjne̱ xikoó ntsꞌiejne̱, kó ndií kuí, bo̱a̱ kón xikoó ndíjne̱, kó kuíni nga chjiéngá xikoó tsi moso̱ xi kastiñá si̱ꞌan ndí xíꞌínná, ko̱jo ndí ínchjínná, kó tsi je tjín ndí ínchjínná xí je moso̱ xi kastiñá je kamá, jmíjínná kótsꞌèn ka̱ma si̱ꞌandé, ngatꞌa̱ kꞌijñáná ko̱jo ngi̱ndie nínga tjitji̱e̱ná tostsi̱je̱è, jè kje̱ꞌe xí tsi̱ꞌe̱.
6Kó nga tsintꞌie an nga ni̱ma̱ katsó, ko̱jo én xí tsíchji̱a̱, achichí katsꞌenxchán án, 7kó achichí ni xi kamaá ngi̱jin ini̱ma̱na, kó katsꞌenxchánjo̱ an xota̱ xi yandikoón, ko̱jo xota̱ xi ngito̱ko̱o̱, kó bi̱ kixiáa̱n:
—A ti̱ júnní xi ndajín niꞌánjo̱jnú xingi̱jnú, nga chjeꞌéchjíjnúu̱ ndyi̱ko̱n to̱n xi niꞌánkíyájnúu̱. Kó ítikó an xota̱ kjiín, kondra̱a̱ kui xotaa̱, 8kó bi̱ kixiáa̱n:
Ji̱n, xikótsꞌèn kamájne̱, jè kaꞌnaxiéꞌájne̱ ntsꞌiejne̱ xi xota̱ jundío̱ xi je akatíñaá xota̱ xi jundío̱jiín, kó jún, a ko̱ti̱ñájnú ntsꞌiejnú, ngije ji̱n kaꞌnaxiéꞌájne̱. Kó kui jaá xió kisꞌińdo, ngatꞌa̱ nde bejín mí ni xi ka̱tso̱. 9Kósꞌe̱ bi̱ kixian an:
—Ndajínkjiꞌi ni xi ndyi̱niꞌánjnú. A chjiénjín nga Néná xí ko̱nda̱konjnú, ta̱ngatꞌanii̱ nga ndyi̱mojnókiejnú xota̱ xi jundío̱jín xí kondra̱ná. 10Ko̱jo an, ko̱jo já ntsꞌié án, ko̱jo moso̱na, jè ndyi̱mindyiséjne̱ to̱n, ko̱jo to ndso̱ko̱a̱n ṉño̱pan. ¡Kuíni nga ngiti̱ jmí ndyi̱kon to̱n chje̱ꞌéchjíjínjne̱! 11Kó kuíni nga ꞌniú míꞌájnúꞌun nga ngotꞌe̱ má ti̱ꞌankꞌasꞌien nginíjnúu̱ tꞌanangii̱, ko̱jo ngi̱ndie nínga kjiꞌii̱ tostsi̱je̱è, ko̱jo nínga tjitjieé toꞌaseituna̱, ko̱jo ndiꞌaa̱. Kó ngata̱ chjeꞌéchjíjínjnúu̱ ndyi̱ko̱n nga kiniꞌánkíyájnúu̱ to̱n, ko̱jo kjo̱a̱a̱ to ndso̱ko̱a̱n ṉño̱paa̱n, ko̱jo toꞌaseituna̱, ko̱jo binoo̱, kojo̱ istii̱.
12Kósꞌe̱ bi̱ katsó kui xotaa̱:
—Ko̱e̱ꞌéꞌoyá nginíjne̱, kó jmí ni chji̱a̱ꞌájínjne̱ ngase, bo̱a̱ si̱ꞌanjne̱ xikó tꞌísé ji.
Kósꞌe̱ itikó án já chináꞌmii̱, kó katsꞌen an nga katsjátsꞌoá kjo̱a̱a̱ nga sa̱ꞌínkjatjosón ni xi je ikꞌíndaa̱. 13Kó itsanie an ńjño xi yajá an, sꞌe̱ bi̱ kixian an:
¡Bi̱ tsꞌén ngatꞌitsánie Néná ki̱a̱ Ndiꞌaa̱ ko̱jo kjo̱a̱nda xi tjiín, ngayeje xi sa̱ꞌínkjatjosónjín kui ni xi kiꞌmíyatjoón!
Kó ngayeje xota̱ xi kamátikoó, bi̱ katsó: ¡Bo̱a̱ kjíꞌí téi! Kó katsꞌéntsjaà Néná. Kó xota̱ na̱xi̱ńdaá, bo̱a̱ katsꞌén.
Neemiyaa̱ achichí ndaxota̱ kamá
14Kó ndeskande koó nga katseꞌéxána nga nda̱ xtitjón kamá an ki̱a̱ nangi Jundáa̱, ndeskande nó kan nga atíxoma nda̱ re Artajerjee̱, ngaskande nó kantié joó, tie jó nó nga ti̱nde an, ti̱nde já ntsꞌié án kichiniéjínjne̱ nichiniee̱ nda̱ ree̱. 15Kó ndatsi kui xtitjón xi kisꞌińdo ngindiee̱ nga katsen an, xá ꞌniú ínieé xota̱ na̱xi̱ńdaá, kó tsꞌatiora̱ yichán to̱ntiboa jaꞌáchjií nga katsjáa̱ nichinie ko̱jo bino̱, kó ngaskande já mosoo̱ xi ꞌniú katsꞌeén xota̱ na̱xi̱ńdaá nga. Ta̱nga an bo̱a̱jín katsꞌen an, ngatꞌa̱ katsakjon an Néná. 16Kó ta̱sá ki̱a̱ katsꞌenxá án ngo ndiè xoó na̱xi̱ńdáꞌniuú, kó jmí tꞌanangi tsꞌatsiejín an, kó ngayeje moso̱na, ki̱a̱ kamátikó nga katsꞌénxá kuí ngi̱ndiee̱ nga. 17Kó ki̱a̱ yámíxa̱na kisꞌińdotꞌa úchán ichítié jáxíꞌín xi xota̱ jundío̱, ko̱jo xota̱ xi ngito̱ko̱, kje̱ꞌénií xota̱ xi kjindibáni na̱xi̱ńdá xí síndo nga ngo foaꞌatjiyajonjne̱. 18Kó xki̱ nga ngo ni̱xtjin, ngo cho̱yojo xi̱ꞌin, ko̱jo jun cho̱tsa̱nga̱ xi katjoꞌójin xi kiniꞌánkjiesón nga nichinie kiniꞌánda, kó ti̱ kiniꞌándana nichinie xi ni̱sie, kó xki̱ tie ni̱xtjin katseꞌéjne̱ ngayeje to̱ko̱ya bino̱, kó ndatsi bo̱a̱ kjiꞌi kui nii̱, jmíni̱xtjin nga tsíꞌáa̱ nichinie nda̱ xtitjoón, ngatꞌa̱ xota̱ na̱xi̱ńdaá achichí é kamaá kui xaá.
19Sꞌe̱ tsíchjiáa̱ Néná nga bi̱ kixiáa̱n: Ji Ne xi tsa̱ꞌa̱n, ngatjaꞌátsjiee̱n an kjo̱a̱a̱ ni xi nda sa̱ꞌínna, ko̱jo kjo̱a̱a̱ ngayeje ni nda xi je katsꞌen an kjo̱a̱a̱ kui xota̱ na̱xi̱ńdaá.
Currently Selected:
Neemiyaa̱ 5: MAIX
Highlight
Copy
Compare
Share
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
