Neemiyaa̱ 4
4
Kondra̱ xi kamámejénjiín nga kamá kui xaá
1Ta̱nga kjiꞌanga Sanbalaa̱t tsintꞌié nga ji̱n ndyi̱niꞌándayajne̱ xoó na̱xi̱ńdáꞌniuú, achichí katsꞌénxchán, kó tsajnókie xota̱ jundíoo̱, 2kó tsíchji̱a̱jo já ntsꞌi̱e̱ ko̱jo jájuún ki̱a̱ na̱xi̱ńdáꞌniú Samaria̱, nga bi̱ katsoó:
—Mí xí ndyi̱tsꞌèn kuí xota̱ jundío̱ xi̱xꞌi̱a̱a̱n. A ka̱mando̱jòrií nga sa̱ꞌíndaya nginí kui ngi̱ndiee̱. A ko̱e̱ꞌéndièrií nga sa̱ꞌínkꞌasꞌien nginí kjo̱a̱tjó. A ngo ni̱xtjin ka̱mando̱jo̱ò. A ka̱márií nga sa̱ꞌínkjaꞌáꞌyá nginií ndi̱jo̱ xi je síndoxoó, nga sku̱i̱e̱ nga je chojo je kamá.
3Kó nga ki̱a̱ tiña tikón Tobií, ngo nda̱ xi chji̱a̱ni xota̱ tji̱e̱e̱ Amoo̱n, bi̱ katsó kui nda̱a̱: ¡Ngaskande tsi ngo cho̱ńda ko̱e̱je̱kꞌíjñasón kui xó ndi̱jo̱ xi ndyi̱tsꞌèndaa̱, ku̱i̱xo̱ndò!
4Kósꞌe̱ tsíchji̱a̱a̱ Néná nga bi̱ kixiáa̱n:
¡Ji Ne tsa̱ji̱n, ndaꞌyé Ji nga tjíniꞌánchꞌójne̱! ¡Ti̱ꞌin Ji nga ti̱kuii ngatꞌákanieé kui ni xi chꞌo ndyi̱tsójne̱, kó ti̱ꞌinkꞌasꞌíi̱n kui xotaa̱ xi ndyi̱fíjo̱ꞌniuú! 5Ngata̱ niꞌínjetakínjíi̱n ni xi ndajín xi ndyi̱tsꞌèn, ti̱nde ngata̱ niꞌínkjiéjín Ji jeé ngindyikin Ji, ngatꞌa̱ jè katsꞌénxtií ngindyi̱ko̱n xota̱ xi ndyi̱kjininkꞌa kui ngi̱ndiee̱.
6Kó bo̱a̱ tsꞌén kiniꞌándajne̱ xoó, kó ngayeje xó xí tjichjáꞌyáni kui ngi̱ndiee̱, kamándaya ngaskande masien xikó kjiꞌi nga nkꞌa, kó xota̱ na̱xi̱ńdaá, tsja kamaá nga katsꞌénxá.
7Ta̱nga ngije tsintꞌié Sanbalaa̱t, ko̱jo Tobií, ko̱jo xota̱ xi chji̱a̱ni nangi Arabia̱, ko̱jo xota̱ xi chji̱a̱ni xota̱ tji̱e̱e̱ Amoo̱n, ko̱jo xota̱ xi chji̱a̱ni na̱xi̱ńdáꞌniú Asndoo̱nd, nga tsá tsꞌénfí nga tjíniꞌándaya xó xí tjíchjáꞌyáni na̱xi̱ńdáꞌniú Jerusalee̱n, ko̱jo nga je tjísichjá nginí ngi̱ndie nínga bitjasꞌi̱e̱nnii̱, achichí katsꞌénxchán, 8kó ngayejee̱ nga ta̱ ngo kamá, nga índa tsi̱ꞌe̱ nga skjánjo̱ na̱xi̱ńdáꞌniú Jerusalee̱n, ko̱jo nga ndajín sa̱ꞌínjo̱. 9Ta̱nga ji̱n ꞌniú kandokjo̱a̱jne̱ Néná, kó ni̱xtjin ni̱xtji̱e̱n, kichindájne̱ tsi̱ꞌe̱ nga jmí ni sa̱ꞌínjo̱jínjne̱ kui xotaa̱. 10Kó xota̱ tji̱e̱e̱ Jundáa̱, bi̱ katsó: ¡Jè ngiti̱ jmí ngaꞌniújiín xota̱ xi ndyi̱bonkꞌá nii̱, kó achichí má ngase xó xí je ixóndoó, kuíni nga ka̱májín si̱ꞌandayà nginíjne̱ kui xoó!
11Kó kondra̱jne̱, bi̱ katsoó xkjín: Kui xotaa̱ nde sku̱i̱e̱jín, ti̱nde ka̱makjínjiín, ngaskande nga kjóchó ngi̱jii̱n, kósꞌe̱ si̱ꞌankꞌién, tsi̱ꞌe̱ nga ngiti̱ ka̱maxájín ngase. 12Ta̱nga kjiꞌanga jachó xota̱ jundío̱ xi síndotꞌa kui ngi̱ndiee̱, ngaskande tie ndi̱yà, bi̱ katsójne̱: Ngayeje ngi̱ndie nínga kongín nginíjnú, skjánjo̱jnú kui xotaa̱. 13Kuíni nga ngi̱ndie nínga ngindiee̱, ki̱a̱ nga̱xto̱n xó xí tjíchjáꞌyánii̱, ko̱jo ngi̱ndie nínga tsijee̱n indo an xota̱, xki̱ xtín xota̱ ndiꞌa, kó índonda nga tsaꞌa ki̱cha̱ndojó, ko̱jo yáyojoó, ko̱jo yáchjonyáa̱. 14Jaskan askotsijen an, kó jastjíe̱n an, sꞌe̱ bi̱ kixiáa̱n xota̱ xi tjín xaá, ko̱jo xi ngito̱ko̱o̱, ko̱jo xota̱ na̱xi̱ńdaá xí ngasee̱: ¡Ngata̱ ndakonjínmájnú ngindyi̱ko̱n kui xotaa̱! ¡Ngatjaꞌátsjienjnú Néná, kui Néná xí achichí jee̱, ko̱jo xi yandikoón, kó ti̱xkántjéjnú ngayeje ntsꞌiejnú, ko̱jo ndí xíꞌínjnú, ko̱jo ndí ínchjínjnú, ko̱jo chjo̱ónjnú, ko̱jo ndiꞌajnú!
15Kó kjiꞌanga kondra̱jne̱ tsintꞌié nga je kiꞌmíyajne̱ kui nii̱, Néná katsꞌénkjatsón ni xi índa, kó ngayeje ji̱n tsangín nginíjne̱ tꞌa xó xí tjíchjáꞌyáni na̱xi̱ńdáꞌniuú, kó nga ngo nga ngo kiniꞌánjne̱ xá xí tsoboájne̱. 16Kó ndeskande kui ni̱xtjii̱n, masien já moso̱na katsꞌénxá ki̱a̱ na̱xi̱ńdáꞌniuú, kó xi ingi masien yáyojoó tsaꞌa, ko̱jo ni xi ꞌbíchjaá ni xi ndajiín, ko̱jo yáchjonyá, ko̱jo ńjño ki̱cha̱, kó nga̱xto̱n kui jaá kisꞌińdo já ngito̱ko̱o̱ xota̱ tji̱e̱e̱ Jundáa̱. 17Xota̱ xi katsꞌénxá ki̱a̱ xoó na̱xi̱ńdáꞌniuú, ko̱jo xota̱ xi tsankꞌá nii̱, ngo tsja katsꞌénkjién nga katsꞌénxá, kó xi ingoo̱ tsja tsaꞌani yáyojoó. 18Kó xota̱ xi chji̱ni̱e̱xo̱ó, nga ngo nga ngo kjiyojotꞌaa̱ ki̱cha̱ndojó ndáyaá, kó bo̱a̱ tsꞌén katsꞌénxá, kó kui nda̱ xi katsꞌénkjanie tjioo̱, ki̱a̱ kisꞌijñatꞌana. 19Ngatꞌa̱ bi̱ kixiáa̱n xota̱ xi yandikoón, ko̱jo xota̱ ngito̱ko̱o̱, ko̱jo xota̱ na̱xi̱ńdaá xi ngasee̱:
Kui xá xí ndyi̱niꞌánjne̱ achichí tsie má, kó je ńkjin ńkjin tindyionijne̱ xingi̱jne̱ ki̱a̱ xoó. 20Ta̱ nínga ko̱nda̱ꞌyájnú nga kjo̱ni̱e̱ tjioo̱, ki̱a̱ ngatamatikójnú tꞌa nínga tindyionjne̱, ngatꞌa̱, ¡Néná boá xi ska̱ntjéná!
21Kó bi̱ tsꞌén kiniꞌánxájne̱: Masien kui xotaa̱ xi tsaꞌa yáyojoó, ndeskande nga kisisie̱èn, ngaskande nga jatjo ńñoo. 22Kó kui ni̱xtjin jàn, bi̱ kixiáa̱n xota̱ na̱xi̱ńdaá: Nga ngo nga ngojnú ki̱a̱ nijan tindyionjo̱jnú moso̱jnú ngi̱yaa̱ na̱xi̱ńdáꞌniú Jerusalee̱n, tsi̱ꞌe̱ nga, nga ni̱xtji̱e̱e̱n kui skondáná, kó nga ni̱xtjii̱n nga ka̱ma sa̱ꞌínxá. 23Ta̱nga ti̱nde an, ti̱nde ntsꞌié án, ti̱nde já moso̱na, ti̱nde jájún xi konda xi tjimátji̱ngina, kachjeꞌéxínjne̱ ńjño xi ndyi̱chajájne̱, kó nga ngo nga ngojne̱, ndsa̱ kixi̱jne̱ katsjayindsa̱jne̱ ni xi bixkánjoo̱.
Currently Selected:
Neemiyaa̱ 4: MAIX
Highlight
Copy
Compare
Share
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
