Neemiyaa̱ 3
3
Nga ítsꞌi̱yanii̱ nga kachjaninkꞌa nginí na̱xi̱ńdáꞌniuú
1Kósꞌe̱ chináꞌmi xi ꞌniú nkꞌa xaá xi ꞌmí Eliasii̱b, kui ko̱jo já chináꞌmi xi ngasee̱, jastjíe̱n kó iskjininkꞌa nga̱ntjo̱a̱ xi ꞌmí nga̱ntjo̱a̱a̱ Cho̱tsa̱nga̱a̱. Ti̱kuii kui jaá katsꞌéndaya, ko̱jo katsꞌénkꞌasꞌien nga̱ntjo̱a̱a̱, ngaskande tarieé Ameaa̱, ngaskande tarieé Ananee̱l.
2Kó já xí chji̱a̱ni na̱xi̱ńdáꞌniú Jerikoo̱ asíko̱jo kui já chináꞌmii̱, kó ti̱ nijan asíko̱jo Sakuu̱r ndií Imrii̱.
3Kó xota̱ tji̱e̱e̱ Senaa̱ boá xi katsꞌéndaya nga̱ntjo̱a̱a̱ Tji̱o̱o̱, kó ti̱kuii kui jaá xi yíjón yátie, kó índo nginií nga̱ntjo̱a̱a̱, ko̱jo ni xi ꞌbíchjájo̱ni, ko̱jo ki̱cha̱a̱.
4Kó ki̱a̱ tꞌa kui ngi̱ndiee̱, katsꞌendaya Meremoo̱t ndií Uriyaa̱, ko̱jo ndií Koo̱, kó ko̱jo kui jaá nijan katsꞌéndaya, nda̱ xi ꞌmí Mesulaa̱n ndií Berekiyaa̱, ko̱jo ndií Mesesabee̱l. Kó ti̱ ki̱a̱ nijan katsꞌéndaya Sandoo̱k ndií Baanaa̱ nga.
5Kó já xí chji̱a̱ni na̱xi̱ńdáꞌniú Tekoaa̱ nijan katsꞌéndaya nga, ta̱nga xota̱ xi ꞌniú yandikoón, kamámejénjiín asíko̱jo nga katsꞌén xá xí tsi̱ꞌe̱ Ndi̱a̱a̱.
6Kó Nga̱ntjo̱a̱ Xcháa̱, Joyandaa̱ ndií Paseaa̱ katsꞌéndaya, ko̱jo Mesulaa̱n ndií Besondiyaa̱, ti̱kuii kui jaá xi yíjón yátie, ko̱jo íjñanda nga̱ntjo̱a̱a̱, ko̱jo íjñaá ni xi ꞌbíchjájo̱ni, ko̱jo ki̱cha̱a̱.
7Kó ki̱a̱ nijan katsꞌéndaya Melatiyaa̱, nda̱ xi chji̱a̱ni nangi Ngabaóo̱n, ko̱jo Jandoo̱n, nda̱ xi chji̱a̱ni nangi Meronoo̱t, ko̱jo já xí chji̱a̱ni na̱xi̱ńdáꞌniú Ngabaóo̱n, ko̱jo na̱xi̱ńdáꞌniú Mispa̱, kui xi nda̱ xtitjón xi chji̱a̱ni xtji̱e̱e̱n nínga ꞌniú kjii̱n ndejeèꞌ atíxomaa̱.
8Kó ki̱a̱ nijan katsꞌéndaya Usiee̱l ndií Arayaa̱, nda̱ xi katsꞌenda ni tsjakon xi to̱ntiboaa̱, kó ki̱a̱ katsꞌéndaya Ananiyaa̱ ndií ngo nda̱ xi tsꞌénda ndásíjee̱n. Kó bo̱a̱ tsꞌén nga katsꞌendaya na̱xi̱ńdáꞌniú Jerusalee̱n, ngaskande nga jachó xó xí tiyaá.
9Kó ki̱a̱ nijan katsꞌéndaya nda̱ xi ꞌmí Refayiaa̱ ndií Uu̱r, nda̱ xi atíxomaa̱ masien ngo ndieè na̱xi̱ńdáꞌniú Jerusalee̱n.
10Kó ki̱a̱ nijan katsꞌéndaya Jendayiaa̱ ndií Arumaa̱f, ngaskande kje̱n ndiꞌaa̱.
Kó ki̱a̱ tꞌa kui ngi̱ndiee̱, katsꞌéndaya Atuu̱ ndií Asabniyaa̱.
11Kó Malkiyaa̱ ndií Jarii̱n, ko̱jo Asuu̱b ndií Pajaa̱t-Moaa̱b katsꞌéndaya ingo ndiè, ko̱jo tarieé Orjnoo̱.
12Kó ki̱a̱ tꞌa katsꞌéndaya Saluu̱n ndií Aloee̱, nda̱ xi tjiín xá masien ngo ndieè na̱xi̱ńdáꞌniú Jerusalee̱n, kui ko̱jo ínchjiín kui nda̱a̱.
13Kó nga̱ntjo̱a̱a̱ Nangi Soón, nda̱ xi ꞌmí Anuu̱n ko̱jo xota̱ xi chji̱a̱ni na̱xi̱ńdáꞌniú Sanoaa̱, kui xotaa̱ xi katsꞌéndaya ki̱a̱a̱, kó índoo̱ nga̱ntjo̱a̱a̱, ko̱jo ni xi ꞌbíchjájo̱ni nga̱ntjo̱a̱a̱, ko̱jo ki̱cha̱a̱, kó mara̱ tsi ta̱ ngo mi̱ nijón úchán metro̱ kui xoó, ngaskande nga̱ntjo̱a̱a̱ Xtjieé.
14Kó Malkiyaa̱ ndií Rekaa̱b, kui nda̱ xi ngito̱ko̱ kamá ki̱a̱ Bee̱t-Akeree̱n, katsꞌéndaya nga̱ntjo̱a̱a̱ Xtjieé, kuí má xi iskjininkꞌa nginí, ko̱jo xi índo nga̱ntjo̱a̱a̱, ko̱jo ni xi ꞌbíchjájo̱ni, ko̱jo ki̱cha̱a̱.
15Kó Saluu̱n ndií Kolosee̱, nda̱ ngito̱ko̱o̱ nangi Mispa̱, katsꞌéndaya nga̱ntjo̱a̱a̱ Ndáńchꞌií. Kuí boá xi iskjininkꞌa nginí, ko̱jo yíjón yátie, kó índoo̱ ngajó nga̱ndee̱ nga̱ntjo̱a̱a̱, ko̱jo ni xi ꞌbíchjáꞌniúní, ko̱jo ki̱cha̱a̱. Kó ti̱ katsꞌénda xtji̱e̱e̱n tꞌa ndáńchꞌií Siloe̱, xtji̱e̱e̱n nínga tikón ngi̱ndie nínga tjitjíe̱ naxoó nda̱ ree̱, ngaskande xókíjo̱n xi fochó na̱xi̱ńdáꞌniuú Ndabii̱.
16Jaskan kui nda̱a̱, Neemiyaa̱ ndií Asbuu̱k, nda̱ xi ngito̱ko̱o̱ masien nangi Bee̱t-Suu̱r, katsꞌéndaya ndeskande kje̱n nga̱tsjo̱ó Ndabii̱, ko̱jo ngaskande ndáńchꞌi̱ xi kiniꞌándaa̱, ko̱jo ngaskande ndiꞌa nínga síndo já chꞌokon xi fí kjo̱a̱xcha̱án.
Xota̱ xi bosikójoo̱ xi chji̱a̱ni xota̱ tji̱e̱e̱ Lebii̱
17Jaskan kui, xota̱ tji̱e̱e̱ Lebii̱ katsꞌéndaya kui ngi̱ndiee̱ kui xi: Rejuu̱n ndií Banii̱, kó ti̱ ki̱a̱ nijan katsꞌéndaya na̱xi̱ńdáꞌniú Asabiyaa̱, nda̱ xi ngito̱ko̱o̱ masien nangi xi xi ꞌmí Keilaa̱, xi chji̱a̱ni na̱xi̱ńdáꞌniuú.
18Jaskan kui, katsꞌéndaya kui ngi̱ndiee̱ já ntsꞌi̱e̱ xi ꞌmí Babaai̱ ndií Enandaa̱nd, nda̱ xi ngito̱ko̱o̱ xi ngi masiee̱n nangi xi ꞌmí Keilaa̱.
19Kó ti̱ ki̱a̱a̱ katsꞌénxátꞌa, Esee̱r ndií Jesuaa̱, nda̱ ngito̱ko̱o̱ na̱xi̱ńdáꞌniú Mispaa̱, kó ti̱ katsꞌéndaya ingo tjín xí tikón ki̱a̱ kje̱n nínga fínijíngií ndiꞌa nínga kisꞌińdo ni xi bixkánjoo̱, ki̱a̱ nijon nínga bitjasꞌi̱e̱nnii̱ xoó. 20Jaskan kui, Baruu̱k ndií Sabaii̱, tsá katsꞌénxá nga katsꞌéndaya ki̱a̱ ngi̱ndie xi fíni ndeskande nijon ndiꞌaa̱, ngaskande nga̱ntjo̱a̱a̱ ndiꞌaa̱ chináꞌmi xi ꞌniú nkꞌa xaá xi ꞌmí Eliasii̱b. 21Jaskan kui, Meremoo̱t ndií Uriyaa̱, ndíndeè Koo̱, katsꞌéndaya xi ingo nga̱ntjo̱a̱ nínga bitjasꞌi̱e̱nnii̱ ndiꞌaa̱ Eliasii̱b, ngaskande xi ingoboá nínga fetꞌanii̱ kui ndiꞌaa̱.
Ko̱jo já chináꞌmii̱ katsꞌéndaya kui ngi̱ndiee̱ nga
22Jaskan kui, já chináꞌmi xi chji̱a̱ni nangi soón katsꞌéndaya kui ngi̱ndiee̱. 23Jaskan kui, katsꞌendaya kui ngi̱ndiee̱ Benjaa̱, ko̱jo Asuu̱b ki̱a̱ kje̱n ndiꞌaa̱, kó jaskan kui jaá, Asariyaa̱ ndií Maasiyaa̱, ndíndeè Ananiyaa̱ katsꞌéndaya, ki̱a̱ tꞌa ndiꞌaa̱ kui. 24Jaskan, Binuii̱ ndií Enandaa̱nd, katsꞌéndaya ingo ndiè, ndeskande ndiꞌaa̱ Asariyaa̱, ngaskande ngi̱ndyióngi̱nijon nínga bitjasꞌi̱e̱nnii̱ xoó na̱xi̱ńdáꞌniuú, ngaskande nijon.
25Palaa̱l ndií Usaii̱ boá xi katsꞌendaya ngi̱ndyióngi̱nijoo̱n tarieé xi nkꞌaa̱, kui xi je ngase ta̱bo̱a̱jiín ndiꞌaa̱ nda̱ ree̱, kui xi tikón ki̱a̱ ndi̱tsee̱n ndo̱bo̱a̱ya̱à, kó jaskan kui, kisꞌijña Pendayiaa̱ ndií Faroo̱. 26Kó xota̱ xi tsꞌénxá ki̱a̱ na̱ngo̱xi̱i̱, kui xi síndo na̱xi̱ńdáꞌniú Ofee̱l katsꞌéndaya ngaskande kje̱n nga̱ntjo̱a̱a̱ Ndáfoaa̱, ki̱a̱ xtji̱e̱e̱n nínga fotjo tsꞌueé tarié xi tikón xtji̱e̱e̱n ndi̱tsee̱n.
Kje̱ꞌe ngase xota̱ xi asíko̱joo̱
27Jaskan kui xotaa̱, xota̱ Tekoaa̱ katsꞌéndaya ingo ndiè, ngaskande kje̱n tarié xi jee̱, kui xi ꞌniú jee̱, ngaskande xoó na̱xi̱ńdáꞌniú Ofee̱l.
28Ngi̱chí ta̱ꞌii̱n nga̱ntjo̱a̱a̱ Ndi̱je̱e̱ katsꞌendaya já chináꞌmii̱, nga ngo nga ngo ki̱a̱ kje̱n ndiꞌaa̱. 29Jaskan kui jaá, Sandoo̱k ndií Imee̱r katsꞌéndaya kje̱n ndiꞌaa̱, kó jaskan kui, katsꞌendaya Semayiaa̱ ndií Sekaniyaa̱, nda̱ xi konda nga̱ntjo̱a̱ xi tikón xtji̱e̱e̱n nínga fotjo tsꞌueé. 30Jaskan kui, Ananiyaa̱ ndií Selemiyaa̱, katsꞌéndaya ingo ndieè, ko̱jo Anuu̱n ndí xíꞌín xi ma juu̱n Salaa̱f, kó jaskan kui, Mesulaa̱n ndií Berekiyaa̱ katsꞌéndaya kje̱n ndiꞌaa̱ kui. 31Jaskan kui, Malkiyaa̱ ndií nda̱ xi tsꞌénda ni tsjakon xi to̱ntiboaa̱, katsꞌéndaya ngaskande ndiꞌaa̱ xota̱ xi tsꞌénxá ki̱a̱ na̱ngo̱xi̱i̱, ko̱jo ndiꞌaa̱ xota̱ xi botiñá nii̱, xi tikón kje̱n nga̱ntjo̱a̱ nínga botíjeé, ngaskande nínga fínijíngí ki̱a̱ nijoo̱n.
32Kó xtji̱e̱e̱n nínga fínijíngí xi tikón nijoo̱n ko̱jo nga̱ntjo̱a̱a̱ Cho̱tsa̱nga̱a̱, katsꞌéndaya xota̱ xi tsꞌénda ni tsjakon xi to̱ntiboaa̱, ko̱jo xota̱ xi botiñá nii̱.
Currently Selected:
Neemiyaa̱ 3: MAIX
Highlight
Copy
Compare
Share
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
