Neemiyaa̱ 2
2
Nga kijí Neemiyaa̱ na̱xi̱ńdáꞌniú Jerusale̱n
1Kó nga jachó sá xí ꞌmí Nisaa̱n, xi ma kan nónií nga atíxoma nda̱ re Artajerjee̱, ngo ndi̱yà kjiꞌanga je tikón binoo̱ ngindyi̱ko̱n kui, katsꞌè an chií kui binoo̱, kósꞌe̱ indyiáa̱ ngo chi̱tsen nda̱ ree̱, kó kji̱e̱ ngo ndi̱yà nga ndasen kisꞌijña an ngindyi̱ko̱n kui, 2kósꞌe̱ nda̱ ree̱, bi̱ katsóna:
—Míkjo̱a̱a̱ nga ndasen tindyin kon ji, xi jmí tsi ndajín tjiín, a jmí tsi ndasen tikón ini̱ma̱a̱.
Kósꞌe̱ achichí katsakjon an, 3kó bi̱ kixiáa̱n nda̱ ree̱:
—¡Ngatsjéni̱xtjin nga ngatꞌíjñá nda̱ ree̱! Kótsꞌèn nga ndasenjín xcha̱ kje̱n án, nga na̱xi̱ńdáꞌniuú, kui ndiꞌa nínga síndo nga̱tsjo̱ó xota̱ xi xchána, je ixóndó, kó nga̱ntjo̱a̱a̱ ndiꞌií je ítí.
4Sꞌe̱ nda̱ ree̱, bi̱ katsóna:
—Mí ni xi chjiéꞌéní.
Kósꞌe̱ tsíchji̱a̱a̱ Néná xí tsi̱ꞌe̱ ndiꞌakꞌajmii̱, 5kó bi̱ kixiáa̱n nda ree̱:
—Tsi nda sasieén ji nda̱ ree̱, kó tsi nda kasasiee̱n kui mosòo̱ xi̱ꞌbi̱, te̱ꞌéndièní nga ki̱a̱ kjuín án nangi Jundáa̱, ki̱a̱ na̱xi̱ńdáꞌniú nínga síndo nga̱tsjo̱ó xota̱ xi xchána, tsi̱ꞌe̱ nga skjininkꞌa ngiñá an kui ngi̱ndiee̱.
6Kó nda̱ ree̱, kjiꞌanga ki̱a̱ tikóntꞌaa̱ na̱ ree̱, bi̱ katsóna:
—Kótjín ni̱xtjin kꞌo̱ndíyaá, kó kjiꞌání kji̱ndi̱bé nginí ji.
Kó nda kasasiee̱n nda̱ ree̱ nga katsangiyana, kixiyáa̱ ni̱xtjin xi kꞌo̱ndíyána. 7Kó bi̱ kixian ngasèe̱ nda̱ ree̱:
—Tsi sasieén kui nii̱ ji nda̱ ree̱, mejénna nga ko̱e̱ꞌéna ngo xo̱jo̱n tsi̱ꞌe̱ xtitjón xi síndo nínga kjin ngasenii̱ ndejeèꞌ, tsi̱ꞌe̱ nga tsja̱ndièna nga ka̱ma kjo̱a̱ꞌa an ngaskande nga kjóchó an nangi Jundáa̱, 8ko̱jo ngo xo̱jo̱n tsi̱ꞌe̱ nda̱ xi ꞌmí Asaa̱f, kui xi konda kꞌijñaá, tsi̱ꞌe̱ nga tsja̱ana yá xí kꞌuijñáa̱ nga̱ntjo̱a̱a̱ na̱xi̱ńdáꞌniuú, kui xi tikón ki̱a̱ tꞌa Ndiꞌaa̱ Néná, ko̱jo tsi̱ꞌe̱ xoó na̱xi̱ńdáꞌniuú, ko̱jo tsi̱ꞌe̱ ndiꞌa nínga kotíjña̱ an. Kó nda̱ ree̱ katsjána kui xo̱jo̱o̱n, ta̱ngatꞌanii̱ nga Néná íjñaniéna kjo̱a̱ndaa̱.
9Kó nda̱ ree̱ katsꞌénkjíjo̱na ngito̱ko̱o̱ jájún, ko̱jo jájún xi ꞌbíndosoón ndi̱je̱, ki̱a̱ ka̱maa̱ kjiꞌanga kjóchokóo̱n xtitjón xi síndo nínga kjin ngasee̱ ndejeèꞌ, sa̱ꞌinkꞌasꞌièe̱n kui xo̱jo̱n xi katsangiya nda̱ ree̱.
10Ta̱nga nga tsintꞌié Sanbalaa̱t, nda̱ xi chji̱a̱ni nangi Oroo̱n, ko̱jo Tobií, nda̱ xi mosoo̱, nda̱ xi chji̱a̱ni xota̱ tji̱e̱e̱ Amoo̱n, achichí kamáxtií, ngatꞌa̱ nga jachó ngo xota̱ xi mejeén nga nda ko̱e̱je̱e̱ xota̱ Israee̱l.
Neemiyaa̱ jachó na̱xi̱ńdáꞌniú Jerusalee̱n
11Kó bo̱a̱ tsꞌén jachó an na̱xi̱ńdáꞌniú Jerusalee̱n, kó ján ni̱xtjin kamána nga kisꞌijña an ki̱a̱a̱, 12jastjíe̱n an nga jñoó, kó an ko̱jo chiboa já xí nijan síndojo̱na, ta̱nga nde ngojín xi kixiyàa̱ ni xi Néná íjñajin ngi̱jin ini̱ma̱na, tsi̱ꞌe̱ nga sa̱ꞌin an ki̱a̱ na̱xi̱ńdáꞌniú Jerusalee̱n, kó nde ngo ndi̱je̱ kisꞌiejínna, ta̱kuítsí ndi̱je̱ xi kisꞌijñasóo̱n. 13Kó nga jñoó, jatjo an ki̱a̱ xtji̱e̱e̱n nga̱ntjo̱a̱a̱ Nangi Soón, kó jaꞌa an xtji̱e̱e̱n ndáńchꞌi̱ xi ꞌmí cho̱ yito to̱ko̱o̱, ko̱jo ki̱a̱ nga̱ntjo̱a̱a̱ Xtjieé, kó ki̱a̱ askotsijèe̱n xoó na̱xi̱ńdáꞌniú Jerusalee̱n, nga je ixóndó, ko̱jo nga je kití nga̱ntjo̱a̱a̱. 14Kósꞌe̱ jaꞌa an ki̱a̱ nga̱ntjo̱a̱a̱ Ndáńchꞌií, sꞌe̱ jáchó an ti̱xa̱ je xi mindyiá ndáfoa nda̱ ree̱, ta̱nga kisꞌiejiín ngi̱ndie nínga kamá jaꞌa cho̱ xi tikónsóo̱n. 15Kósꞌe̱ nga jñoó kijínijíngí an xtji̱e̱e̱n xo̱ngàndántꞌieé, kó askotsijèe̱n xó xí tjíchjáꞌyáni na̱xi̱ńdáꞌniuú, sꞌe̱ ngije jaꞌatjiya an, tsꞌasꞌien an nga̱ntjo̱a̱a̱ Nangi Soón, sꞌe̱ kijí nginí an ngijee̱.
16Ta̱nga já xí ndyi̱tsꞌènxájo̱ na̱xi̱ńdáꞌniuú, nde bejín nínga kijí an, ti̱nde bejín ni xi katsꞌen an, ngatꞌa̱ nde kji̱e̱ xiyájáa̱n xota̱ jundíoo̱, ko̱jo chináꞌmii̱, ko̱jo xota̱ xi yandikoón, ko̱jo já xí tjiín xaá, ko̱jo xota̱ xi ngasee̱ xi ndyi̱tsꞌènxaá. 17Kósꞌe̱ bi̱ kixiáa̱n:
—Jún jè yàjnú nga ndajín tindyión, ko̱jo nga je yàjnú nga na̱xi̱ńdáꞌniú Jerusalee̱n je kiniꞌánkjié, kó nga nga̱ntjo̱a̱a̱ ndiꞌií je ítí. ¡Ndibájnú tsobo̱a̱, kó si̱ꞌandaya ngíñá xoó na̱xi̱ńdáꞌniú Jerusalee̱n, tsi̱ꞌe̱ nga ngiti̱ jmí kjo̱a̱soboá ku̱i̱tja̱jín ñá!
18Kó kixiyàa̱ kótsꞌèn nga Néna achichí nda katsꞌénjo̱na, ko̱jo én xí tsíchji̱a̱jona nda̱ ree̱. Kósꞌe̱ bi̱ katsó kui xotaa̱:
—¡Ku̱i̱stjíe̱n, kó chjaninkꞌa ngíñá!
Kó bo̱a̱ tsꞌén katsjángaꞌniuú yojoo̱ nga katsꞌén kui xá xí ndaa̱. 19Ta̱nga nga tsintꞌié kuí nii̱ Sanbalaa̱t, nda̱ xi chji̱a̱ni nangi Oroo̱n, ko̱jo Tobií, nda̱ xi mosoo̱ kamá, ko̱jo Ngesee̱n, nda̱ xi chji̱a̱ni nangi Arabiaa̱, tsajnókiejne̱, kó katsꞌénchꞌójne̱, sꞌe̱ bi̱ katsójne̱:
—Mí ni xi ndyi̱niꞌánjnú jún. A kondra̱a̱ nda̱ ree̱ jè tindyiónjnú tsobo̱a̱.
20Kó bi̱ kixiáa̱n nga tsíchji̱a̱jo an:
—Kui Néná xí tsi̱ꞌe̱ ndiꞌakꞌajmii̱ boá xi tjítsꞌén nga nda ko̱e̱je̱jne̱, kuíni nga ji̱n xi mosoo̱ kui majne̱, ku̱i̱stjíe̱njne̱, kó chjanínkꞌá nginíjne̱ kui ngi̱ndiee̱, ngatꞌa̱ jún, jmí nijínjnú kjo̱a̱a̱ kui ni xi ndyi̱niꞌánjne̱, ti̱nde jmíjínjnú ngo kjo̱a̱nda, ti̱nde jmíjínjnú kjo̱a̱foaꞌátsjien kꞌi̱e̱ kui na̱xi̱ńdáꞌniú Jerusalee̱n.
Currently Selected:
Neemiyaa̱ 2: MAIX
Highlight
Copy
Compare
Share
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
