Neemiyaa̱ 1
1
Neemiyaa̱ tsíchji̱a̱a̱ Néná kjo̱a̱a̱ xota̱a̱ na̱xi̱ńdáꞌniú Jerusalee̱n
1Kuí bí én xí tsíchji̱a̱ Neemiyaa̱, ndií Akaliyaa̱. Ngo ni̱xtjii̱n sá xi ꞌmí Kisleu̱, nó kan nga kisꞌijña an na̱xi̱ńdáꞌniú Susa̱, ngi̱ndie nínga tikón ndo̱bo̱a̱xa̱á nda̱ ree̱, 2jachó ngo nda̱ ntsꞌié án kui xi ꞌmí Ananii̱, kó jachójo̱ chiboa jáxíꞌín xi chji̱a̱ni nangi Jundáa̱, kó asíyáa̱ kjo̱a̱a̱ xota̱ jundío̱ xi jatjongii̱ yojoo̱, ko̱jo kui xi tsangínjo̱ꞌniuú, ko̱jo kjo̱a̱a̱ na̱xi̱ńdáꞌniú Jerusalee̱n. 3Kó bi̱ katsóna kui jaá: Xota̱ xi tsꞌangii̱ yojoo̱, kui xi tsangínjo̱ꞌniú kui nangi jàn, achichí nga ndajín tjíndo, ko̱jo tsie kjo̱a̱soboá ndyi̱foaꞌatio, kó xoó na̱xi̱ńdáꞌniú Jerusalee̱n je ixóndó, kó nga̱ntjo̱a̱a̱ je ikꞌítí.
4Ngije tsintꞌie an kui eén, kisꞌijñando an, kó achichí askjandá an, kó kjín ni̱xtjin nga kisꞌijña ndasen an, kó katsꞌenkjaꞌa an kjindiá yojona, ko̱jo tsíchji̱a̱a̱ Néná xí tsi̱ꞌe̱ ndiꞌakꞌajmii̱. 5Kósꞌe̱ bi̱ kixiáa̱n:
Ji Ne, Ji xi Nee̱ ndiꞌakꞌajmii̱ Ji, Ji xi tjiín ngaꞌniú, ko̱jo Ji xi je Ji, ko̱jo Ji xi ndakoo̱n, Ji xi niꞌínkjatjosén Ji kjo̱a̱ꞌbíndàa̱, ko̱jo Ji xi niꞌínkjìn Jí kjo̱a̱ni̱ma̱takoón kjo̱a̱a̱ xota̱ xi tjoó Jí, ko̱jo xi tsꞌénkjátjosón kjo̱a̱botíxomàa̱. 6Tasínijin Ji, ko̱jo chjáxꞌé Jí ndyikin, tsi̱ꞌe̱ nga ko̱nda̱ꞌyé Ji nga ku̱i̱chji̱a̱a̱ kui mosòo̱, kui xi tsꞌénchji̱a̱ ngindyikin Ji ngotꞌe̱, nga ni̱xtjin ko̱jo nga ni̱xtji̱e̱n, ta̱ngatꞌanii̱ xota̱ Israee̱l, kui xi mosòo̱ ma, nga tsꞌénxiya an jé xí katsꞌén ndíi̱ xota̱ Israee̱l ko̱jo xi katsꞌen an kondra̱ tse̱. ¡Jo̱o̱n, an ko̱jo xota̱ ndiꞌaa̱ na̱ꞌmina boá xi kiniꞌánjéjne̱! 7Achichí nga ꞌniú ndajínkjiꞌi ni xi kiniꞌánjne̱ kondra̱ tse̱, ngatꞌa̱ kiniꞌánkjatjosónjínjne̱ kjo̱a̱botíxomàa̱, ko̱jo kjo̱a̱kitii̱, ko̱jo kjo̱a̱botíxoma xi katseꞌée̱ Moisee̱, kui xi mosòo̱ ma. 8ꞌNiú míꞌaá ngotꞌe̱ nga si̱ꞌinkjaꞌátsjin Ji én xí katseꞌée̱ mosòo̱ Moisee̱, nga bi̱ kasèe̱: Tsi si̱ꞌanjéjnú, Án boá xi sa̱ꞌintsojoboajnúꞌun ngi̱jii̱n nangi xi ngasee̱, 9ta̱nga tsi kji̱ndi̱báchon nginíjnúꞌun, kó tsi ko̱nda̱ꞌyáꞌénjnú kjo̱a̱botíxomana, ko̱jo tsi si̱ꞌankjatjosónjnú, ndatsi ngaskande nínga fetꞌanii̱ nkꞌajmii̱ kongínjo̱ꞌniújnú, ki̱a̱ fikjaꞌajnúꞌun, kósꞌe̱ kjuínjo̱ nginíjnúꞌun ngi̱ndie nínga jaꞌajinjnúꞌun, tsi̱ꞌe̱ nga kꞌuijñájo̱jnú Jaꞌénna.
10Ngotꞌe̱ ꞌne̱, kui xotaa̱, moso̱ tse̱ boá ko̱jo xota̱ na̱xi̱ńdáa̱ boá, kui xi kaꞌnaxiéꞌé Ji nga kiniꞌínkjín Jí ngaꞌniú jèe̱, ko̱jo ngaꞌniú xí tjiín ndse̱ Ji. 11ꞌNiú míꞌaá Ji Ne, tsi̱ꞌe̱ nga ko̱nda̱ꞌyé Ji nga ku̱i̱chji̱a̱a̱ kui mosòo̱ xi̱ꞌbi̱, ko̱jo nga ku̱i̱chji̱a̱a̱ kui moso̱ xi mejeén nga sku̱i̱e̱ndikón Jaꞌée̱n, te̱ꞌéndièe̱ Ji nga nda ko̱e̱je̱e̱, ꞌniú míꞌaá, nga ko̱e̱ꞌée̱ ni xi tsꞌénmíꞌaá ngotꞌe̱ kui mosòo̱ xi̱ꞌbi̱, kó te̱ꞌée̱ ngi̱ndie nga kꞌuieé kjo̱a̱nda ngindyi̱ko̱n kui nda̱a̱.
Kui ni̱xtjin jàn, án boá xi kamá an nda̱ xi tjón kotꞌa ni xi katsꞌe nda̱ ree̱.
Currently Selected:
Neemiyaa̱ 1: MAIX
Highlight
Copy
Compare
Share
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
