Neemiyaa̱ 13
13
Ni xi asíkjo Neemiyaa̱
1Kó kui ni̱xtjin jàn, kiniꞌányà Chꞌo̱ Xo̱jo̱n xi katsꞌénꞌindó Moisee̱ ngindyi̱ko̱n xota̱ na̱xi̱ńdaá, kó kamáyà nga ki̱a̱ tjítꞌa, nga xota̱ tji̱e̱e̱ Amoo̱n, ko̱jo xota̱ tji̱e̱e̱ Moaa̱b, ngiti̱ ka̱májín nga ki̱a̱ kꞌo̱sꞌienjii̱n xota̱ na̱xi̱ńdaá Néná.
2Kjo̱a̱a̱ nga jmí pan ko̱jo jmí ndáfoa ndyi̱yaꞌajín nga kijíkjaꞌáyíndi̱yà xota̱ Israee̱l, kó ta̱sá to̱n íchjií Balaa̱n, tsi̱ꞌe̱ nga chꞌo tsꞌén tsíchji̱a̱taꞌin kondra̱a̱ kui xotaa̱, ta̱nga Néná, kui ni xi ndajiín, kjo̱a̱niꞌánchikonñé katsꞌén. 3Kó kuíni nga kjiꞌanga tsintꞌieé Kjo̱a̱kitii̱, kachjeꞌéxín ngi̱jii̱n xota̱ Israee̱l ngayeje xota̱ xi xín nangi chji̱a̱ni.
4Ta̱nga ngindiee̱ nga ka̱ma kui nii̱, chináꞌmi Eliasii̱b, kui nda̱ xi kisꞌijñatjoón ngi̱yaꞌmaa̱ Ndiꞌaa̱ Néná, kui xi xkjín kamá Tobií, 5kui nda̱a̱, íjñanda ngo ngi̱yaꞌma xi ta̱nisién je, nínga ikꞌíjñá chji̱e̱ xi kiniꞌánkꞌasꞌiee̱n Néná, kui xi ni maxchá tꞌanangii̱, ko̱jo nisije̱n xi niꞌánkjién nga niꞌándikón Néná, ko̱jo ngayeje boso̱, ko̱jo ni xi tie nga úchaán to ndso̱ko̱a̱n ṉño̱pan xi kiniꞌánkꞌasꞌiee̱n, ko̱jo bino̱ tja̱tsi̱e̱e̱, ko̱jo isti̱i̱, kui xi katseꞌeé xota̱ tji̱e̱e̱ Lebii̱, ko̱jo xota̱ xi siee̱, ko̱jo já xí konda nga̱ntjo̱a̱a̱, ko̱jo chji̱e̱ xi kiniꞌánkꞌasꞌiee̱n já chináꞌmii̱. 6Kó ngije kamá ngayeje kui nii̱, ngiti̱ ki̱a̱jín tikón an ki̱a̱ na̱xi̱ńdáꞌniú Jerusale̱n, ngatꞌa̱ nga jachó nó kantié jó nga tikón nda̱ re Artajerjee̱, xi chji̱a̱ni nangi Babilonia̱, kijí an ngindyi̱ko̱n nda̱ ree̱, kó ngije jaꞌa ni̱xtjin, tsíꞌáa̱ nga tsja̱na kjo̱a̱, 7kó kijíꞌoyá nginí an na̱xi̱ńdáꞌniú Jerusalee̱n, kó kjiꞌa tsintꞌié an kjo̱a̱a̱ ni xi ndajín xi Eliasii̱b katsꞌénjo̱ Tobií, nga ngo ngi̱ndie nínga niꞌánkjaꞌyá katsꞌéndaa̱ ki̱a̱ ndi̱tsee̱n Ndiꞌaa̱ Néná. 8Kó achichí katsꞌenxchán án kjo̱a̱a̱ kui nii̱, kuíni nga tsꞌaxié an ngayeje ni xi tjiín Tobií ki̱a̱ ngi̱yaꞌmaa̱. 9Kósꞌe̱ katsjáa̱ kjo̱a̱ tsi̱ꞌe̱ nga sa̱ꞌíntsjie kui ngi̱yaꞌmaa̱, kó ki̱a̱ katsꞌen an nga ki̱a̱ kꞌuíndo nginí ngayeje ni xi niꞌánkjién Ndiꞌaa̱ Néná, ko̱jo kjo̱a̱tjoó ni xi maxchá jno̱o̱ xi niꞌánkꞌasꞌiee̱n, ko̱jo nisije̱n xi niꞌánkjién nga niꞌándikón Néná.
10Kó ti̱ kamábe an nga kui xotaa̱ tji̱e̱e̱ Lebii̱ kji̱e̱ boeꞌéjiín ni xi tsoboaá, kó kuíni nga xota̱ tji̱e̱e̱ Lebii̱, ko̱jo xota̱ xi siee̱, ngindiee̱ nga sa̱ꞌínkjatjosón ni xi tsꞌén, ta̱sá nga ngo nga ngo kijítsꞌén xá xí tsꞌén ki̱a̱ tꞌanangii̱. 11Kósꞌe̱ katsꞌenxchánjo̱ an xota̱ xi ngito̱ko̱o̱, kó bi̱ kixiáa̱n: Ánní nga tikónmasien kon Ndiꞌaa̱ Néná. Kósꞌe̱ ítikó an, sꞌe̱ indo an ngi̱ndie xi tsoboaá nínga tsꞌénxá. 12Kó ngayeje xota̱ tji̱e̱e̱ Jundáa̱ jachójo̱ ki̱a̱ nínga chjaꞌátjó ngayeje nii̱, tie nga úchán ni xi tsoboaá xikoó to ndso̱ko̱a̱n ṉño̱paa̱n, ko̱jo bino̱ tja̱tsi̱e̱e̱, ko̱jo istii̱. 13Kó índo an já xí sa̱ꞌínxá ki̱a̱ ndiꞌa nínga chjaꞌátjó nii̱, kui xi chji̱a̱ni kui xotaa̱, katsjaxáa̱ chináꞌmi Selemiyaa̱, ko̱jo Sandoo̱k, nda̱ xi chji̱ni̱e̱kjo̱a̱kitii̱, kó xi chji̱a̱ni xota̱ tji̱e̱e̱ Lebii̱, katsjaxáa̱ Pendayiaa̱, kó ki̱a̱ nijan kisꞌińdo Anaa̱n ndií Sakuu̱r, ndíndeè Mataniyaa̱, ngatꞌa̱ kuí jaá ꞌniú kamáꞌniátakón, kó kuí boá xi katsoboaá nga sa̱ꞌínkabisoón nichiniee̱ já ntsꞌi̱e̱.
14Ngije katsꞌen an kui nii̱, bi̱ kixiáa̱n Néná: Ji Ne, ngatjaꞌátsjiee̱n an kjo̱a̱a̱ kui nii̱, kó ngata̱ niꞌínchíyéjín ji ni nda xi katsꞌen an kjo̱a̱a̱ Ndiꞌaa̱ Néna ko̱jo kjo̱a̱a̱ xá xí si̱ꞌaa̱n.
15Kui ni̱xtjin jàn, kamábe an xota̱ xi chji̱a̱ni nangi Jundáa̱, xi ndyi̱tsjánié tostsi̱je̱è ki̱a̱ ngi̱ndie nínga ꞌnaxié ndaá kui too̱ nga ni̱xtjin ndikón, kó bórroó ndyi̱yaꞌa chꞌo̱o̱ xka̱a̱ to ndso̱ko̱a̱n ṉño̱ paa̱n, ko̱jo binoo̱, ko̱jo tostsi̱je̱è, ko̱jo toꞌingoo̱, ko̱jo ngayeje to̱ko̱ya ni xi chꞌià, kó ki̱a̱ ndyi̱fíjo̱ ki̱a̱ na̱xi̱ńdáꞌniú Jerusalee̱n nga ni̱xtjin ndikón. Kó katsꞌenxchánjo̱ an, kjo̱a̱a̱ nga nichinie ndyi̱botiñá kui ni̱xtjii̱n. 16Kó ti̱ kisꞌińdo ki̱a̱a̱ jáxíꞌín xi chji̱a̱ni na̱xi̱ńdáꞌniú Tiroo̱, kui xi ndyi̱yaꞌa tji̱o̱, ko̱jo kje̱ꞌe ngase ni xi ndyi̱botiñaá xota̱ xi chji̱a̱ni nangi Jundáa̱, nga ni̱xtjin ndikón, ki̱a̱ na̱xi̱ńdáꞌniú Jerusalee̱n. 17Kósꞌe̱ katsꞌenxchánjo̱ an xota̱ xi ngito̱ko̱o̱ nangi Jundáa̱, kó bi̱ kixiáa̱n:
Mí xí mejeén tsó kui ni xi ndajín xi ndyi̱niꞌánjnú, nga ndyi̱niꞌánchjíjínjnúu̱ ni̱xtjin ndikoón. 18A mí tsí bo̱a̱ katsꞌén xota̱ tji̱e̱ xchájnú, kuíni nga Néná kjindibájo̱na ngayeje kui ni xi ndajiín kꞌi̱e̱ kui na̱xi̱ńdáꞌniuú. Kó jún, míkjo̱a̱a̱ nga ndyi̱niꞌán ꞌniú ngasejnú kjo̱a̱xcha̱án Néná kondraa̱ xota̱ Israee̱l, nga ndyi̱niꞌánchjíjínjnú ni̱xtjin ndikoón.
19Kósꞌe̱ ngo ni̱xtjin ngindiee̱ nga kjo̱chó ni̱xtjin ndikoón, kjiꞌanga je kjimajñoó nga jachó an nga̱ntjo̱a̱a̱ na̱xi̱ńdáꞌniú Jerusalee̱n, katsja an kjo̱a̱ tsi̱ꞌe̱ nga kꞌuíchjá nga̱ntjo̱a̱a̱ na̱xi̱ńdáꞌniuú, kó nga katsjáa̱ kjo̱a̱ tsi̱ꞌe̱ nga si̱chjá, ngaskande ngije jaꞌa ni̱xtjin ndikoón, kó ki̱a̱ indo an moso̱na ki̱a̱ nga̱ntjo̱a̱a̱, tsi̱ꞌe̱ nga tsja̱ndièjiín nga si̱ꞌankꞌasꞌien chꞌià nga ni̱xtjin ndikoón. 20Ta̱nga xota̱ xi botiñaá, ko̱jo xi ꞌbotsie ngayeje to̱ko̱ya nii̱, ki̱a̱ kisꞌińdo nga̱xto̱n na̱xi̱ńdáꞌniú Jerusalee̱n tsi ngo ko̱jo tsi jó ndi̱yà. 21Kósꞌe̱ bi̱ kixiáa̱n nga tsíchji̱a̱jo an: Míkjo̱a̱a̱ nga ki̱a̱ ndyi̱niꞌánkjaꞌyájnú ki̱a̱ kje̱n xó xí tjíchjáꞌyáni na̱xi̱ńdáꞌniuú. Tsi ti̱ bo̱a̱ si̱ꞌán nginíjnú, ndo̱bo̱a̱yà sangisꞌiénjnúꞌun. Kó ndeskande koó kjiꞌa, ngiti̱ kjindibájín nga ni̱xtjin ndikón. 22Kó bo̱a̱ kixiáa̱n xota̱ tji̱e̱e̱ Lebii̱ nga sa̱ꞌíntsjie yojoo̱, ko̱jo nga ko̱e̱je̱konda nga̱ntjo̱a̱a̱ na̱xi̱ńdáꞌniuú, tsi̱ꞌe̱ nga sku̱i̱e̱ndikón ni̱xtjin ndikoón. Kó bi̱ kixian ngasée̱ Néná nga: Ngatjaꞌátsjiee̱n an kjo̱a̱a̱ kui nii̱ nga, Ji Ne xi tsa̱ꞌa̱n, kó ti̱ꞌinjetakínní, kjo̱a̱a̱ kjo̱a̱ni̱ma̱takón tsie xi tjiín.
23Kó kui ni̱xtjin jàn, ti̱ kamábe an nga tjín xota̱ jundíoo̱ xi kisꞌińdojo̱ ínchjín xí chji̱a̱ni na̱xi̱ńdáꞌniú Asndoo̱nd, ko̱jo na̱xi̱ńdáꞌniú Amoo̱n, ko̱jo na̱xi̱ńdáꞌniú Moaa̱b, 24kó ndií kamaá én xí chji̱a̱ xota̱ na̱xi̱ńdáꞌniú Asndoo̱nd, kó ndajín kamaá tsíchji̱a̱ eén xota̱ Jundáa̱, ta̱sá én xí chji̱a̱ kui xota̱ na̱xi̱ńdaá xi nda kamaá tsíchji̱a̱. 25Kó askjotíjo̱ an kui xotaa̱, kó chꞌo kixiáa̱n nga ka̱maa̱, kó tjín káꞌá xi atijée̱, kó iskjien an tsja̱to̱ko̱, kó katsꞌen an nga katsjá tsꞌoa kjo̱a̱a̱ Néná, nga bi̱ kixiáa̱n: Ka̱májín ko̱e̱ꞌéjnúu̱ ndí ínchjínjnú ndí xíꞌiín kui xotaa̱, ko̱jo ka̱májín ndí ínchjiín kui ku̱i̱xanjo̱ ndí xíꞌínjnú. 26Kó bi̱ kixian ngasée̱:
A mí tsi ta̱ngatꞌanii̱ kui nii̱ nga katsꞌénjé Salomoo̱, nda̱ ree̱ nangi Israee̱l. Kó ndatsi ngi̱jii̱n kjín na̱xi̱ńdá jmíjín ingo re xi kamá xikoó kuí, kó Néná tjó kamaá, kó Néná boá xi katsꞌén nda̱ re, tsi̱ꞌe̱ ngayeje na̱xi̱ńdá Israee̱l, kó ngaskande kui, katsꞌénjé ta̱ngatꞌanii̱ ínchjín xí xín nangi chji̱a̱nii̱. 27Kósꞌe̱, a bo̱a̱ si̱ꞌanjne̱ xikoó jún, kui ni xi ꞌniú ndajiín, nga ndyi̱niꞌánjéjnú kondra̱a̱ Néná, nga ínchjín xí xín nangi chji̱a̱ni ku̱i̱ndyionjo̱jne̱.
28Kó tsangatji̱ngíi̱ ki̱a̱ tꞌa nínga tikón an ngo ndií Joyandaa̱, kui xi ndií chináꞌmi xi ꞌniú nkꞌa xaá xi ꞌmí Eliasii̱b, ngatꞌa̱ xkandaa̱ Sanbalaa̱t, nda̱ xi chji̱a̱ni nangi Oo̱r kamá. 29Kó bi̱ kixiáa̱n Néná: ¡Ji Ne xi tsa̱ꞌa̱n, ngatjaꞌátsjiee̱n kui xotaa̱, ngatꞌa̱ kuí boá xi katsꞌenkjatsón xá chináꞌmii̱, ko̱jo kjo̱a̱ꞌbínda xi kiniꞌánjo̱ já chináꞌmi xi xota̱ tji̱e̱e̱ Lebii̱!
30Kó bo̱a̱ tsꞌén katsꞌentsjie an xota̱ na̱xi̱ńdaá, kjo̱a̱a̱ ngayeje xota̱ xi kje̱ꞌe nangi chji̱a̱ni, kó kixiyáa̱ xá xí sa̱ꞌín já chináꞌmii̱, ko̱jo xota̱ tji̱e̱e̱ Lebii̱, nga ngo nga ngo xi sa̱ꞌín xaá, 31ko̱jo tsi̱ꞌe̱ nga ko̱e̱je̱jo chji̱e̱ xi chikín, ni̱xtjin xi je xá ikꞌíjñánii̱, ko̱jo tsi̱ꞌe̱ nga sa̱ꞌínkꞌasꞌien ni xi tjón kamáxchaá. ¡Ji Ne xi tsa̱ꞌa̱n, ngatjaꞌátsjiee̱n an, tsi̱ꞌe̱ nga nda si̱ꞌinje̱ní!
Currently Selected:
Neemiyaa̱ 13: MAIX
Highlight
Copy
Compare
Share
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
