Oseaa̱ 1
1
Oseaa̱ ngo na̱masien ixánjo̱
1Kuí bí kui eén xi Néná tsíchji̱a̱jo Oseaa̱ ndií Beerii̱, ni̱xtjin nga Usiyaa̱, ko̱jo Jotaa̱n, ko̱jo Akaa̱, ko̱jo Esekiyaa̱ kamá ree̱ nangi Jundáa̱, ko̱jo ni̱xtjin nga Jeroboaa̱n ndií Joaa̱ kamá ree̱ na̱xi̱ńdá Israee̱l. 2Nga ítsꞌi̱yanii̱ Néná nga tsíchji̱a̱jo Oseaa̱, bi̱ katsoó:
Tꞌen ji, kó ngo na̱masien ti̱xenje̱, tsi̱ꞌe̱ nga kꞌuieé ndií ngo na̱masien,
ngatꞌa̱ xotaa̱ tꞌanangii̱, je katsꞌénjé xikoó ngo na̱masien, kó je íjñámasien Néná.
3Kó kijí Oseaa̱, sꞌe̱ kisꞌijñajo̱ na̱ Ngomee̱r tsa̱kji̱ín Ndiblayii̱n, kó tsaꞌa ndí, sꞌe̱ jaskan katsee̱n ngo ndí xíꞌín. 4Kósꞌe̱ Néná, bi̱ katsoó Oseaa̱: Jesree̱l títꞌe jaꞌén jí, ngatꞌa̱ jè ta̱ ngi chiboa tsí ni̱xtjin chaja ngase nga kjuinkóo̱n, tsi̱ꞌe̱ nga kotijée̱ xota̱ ndiꞌaa̱ Jeuu̱, ta̱ngatꞌanii̱ jín xí iskjitjón ki̱a̱ na̱xi̱ńdáꞌniú Jesree̱l, kó sa̱ꞌinkjié An ngi̱ndie nínga botíxoma xi chji̱a̱ni na̱xi̱ńdá Israee̱l. 5Kó kui ni̱xtjii̱n skjítꞌó Án yáyojoó, ko̱jo yáchjonyaá xota̱ Israee̱l ki̱a̱ nangi soón Jesree̱l.
6Ngije jaꞌa ni̱xtjin, ti̱ kisꞌie nginií ingo ndí na̱ Ngomee̱r, kó ngo ndí chjo̱on katsee̱n, sꞌe̱ Néná, bi̱ katsoó Oseaa̱:
Lo-Ruama̱ títꞌe jaꞌén jí, jmí kjo̱a̱ni̱ma̱takónjín tsó kui jaꞌeén,
ngatꞌa̱ ni̱ma̱jín ka̱mana nga sa̱ꞌinjetakóo̱n xota̱ ndiꞌaa̱ na̱xi̱ńdá Israee̱l.
7Ta̱nga ni̱ma̱ ka̱mana xota̱ ndiꞌaa̱ Jundáa̱,
kó kꞌoxiéꞌá An ta̱ngatꞌanii̱ Néná, kui xi Nee̱ kui,
kó jmí tsí yáchjonyá sa̱ꞌinkjièn Án nga kꞌoxiéꞌá An,
ti̱nde jmí tsi ki̱cha̱ndojó, ti̱nde jmí tsi kjo̱a̱xchán,
ti̱nde jmí tsi ndi̱je̱, ti̱nde jmí tsi xota̱ xi ꞌbíndosoón ndi̱je̱e̱.
8Kjiꞌanga na̱ Ngomee̱r jaꞌáxiín chiki ndí chjo̱ón, kui xi ꞌmí na̱ Lo-Ruamaa̱, katsee̱n ingo ndí xíꞌín, 9kó Néná, bi̱ katsoó Oseaa̱:
Kui ndií Lo-Amii̱ títꞌe jaꞌén jí, jmí tsi xota̱na ma tsó kui jaꞌeén
ngatꞌa̱ jún jmí tsi xota̱na májnú,
ti̱nde jmí tsi An Xi An ka̱ma An kjo̱a̱a̱ jún.
Na̱ Ngomee̱r boá xi bokó Israee̱l
10Kósꞌe̱ kjo̱chó ni̱xtjin nga ndií xota̱ Israee̱l,
kjín ka̱ma xikó maá tsomií ndáchíkoón,
kui xi májín chꞌíchi̱bo̱a̱, ko̱jo májín ꞌbíxki̱,
kó ki̱a̱ nínga bi̱ kiꞌmíjnú jún:
Jún boá xi xota̱ na̱xi̱ńdána.
Ti̱ bi̱ kꞌuínjnú nga: Jún boá xi ndií Néná xí tikoón.
11Kó xota̱ tji̱e̱e̱ Jundáa̱, ko̱jo xota̱ Israee̱l
ta̱ ngo tsí ka̱ma nga ka̱matikó,
kó kjo̱a̱ꞌájin ngo xi ngito̱ko̱o̱ ka̱ma,
kó ki̱a̱ kjo̱tjojinni tꞌanangii̱,
ngatꞌa̱ kuí boá ni̱xtjin xi jee̱ Jesree̱l.
Currently Selected:
Oseaa̱ 1: MAIX
Highlight
Copy
Compare
Share
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
