Nauu̱n 1
1
Én xí kanangiyaa̱ xota̱ Nínibe̱, na̱xi̱ńdáꞌniuú nangi Asiria̱
1Én xí kiꞌmíyatjón kjo̱a̱a̱ na̱xi̱ńdáꞌniú Nínibe̱. Chꞌo̱ xo̱jo̱n xi kjitꞌa ni xi akakoo̱ Nauu̱n, nda̱ xi chji̱a̱ni na̱xi̱ńdáꞌniú Elkoo̱.
2Néná, Ne xi chi̱ni̱ ko̱jo xi tsꞌéngojo boá, Néná tsꞌénxchán, kó tsꞌéngojo,
Néná tsꞌéngojo ni xi tsꞌénjo̱ kondra̱a̱, kó tsꞌénxchánjo̱ kondra̱a̱.
3Néná achichí chjiya nga tsꞌénxchán, ta̱nga achichí tsiekon,
ta̱nga kjo̱a̱ꞌáxínjín jé xí tsoboaá xota̱ xi katsꞌénjeé.
Néná fotsoꞌbá ngi̱jii̱n ndyíkií, ko̱jo kjiꞌanga ꞌniú kjiboaꞌa stseé,
kó ṉdi̱i̱, kuí boá xi xa̱a̱ se ma.
4Tsꞌénxchánjo̱ ndáchíkoón, kó tsꞌénxíyá, kó ti̱ tsꞌénxíyá ngayeje ndejeèꞌ nga.
Tsꞌénxí tꞌanangii̱ nangi Basaa̱n, ko̱jo nangii̱ na̱xi̱ Karmeloo̱,
kó ti̱ tsꞌénxíꞌniú naxó xí tjín nangi Líbanoo̱ nga.
5Ngindyi̱ko̱n Néná fotsié má na̱xi̱i̱,
kó nangi soón ma ńdá má,
ngindyi̱ko̱n Néná bosiénkixi̱ má tꞌanangii̱,
ko̱jo nga̱sondiee̱, ko̱jo ngayeje xota̱ xi ki̱a̱ síndo.
6Kjiꞌanga tjitsꞌénxchán Néná,
ꞌyá xí ka̱maa̱ kꞌuijñákixi̱,
ꞌyá xí xchikjoaá kjo̱a̱xcha̱án.
Nga tsꞌénxchán xikó maá tsi ndiꞌí tjitjoó,
kó ngindyi̱ko̱n kui, bixóndó ndi̱jo̱ yiꞌii̱.
7Achichí ndaxota̱ Néná,
kuí boá xi tsjangaꞌniúná ni̱xtjin nga nda̱ máná.
Kó be boá ꞌyání xi kjimaꞌniákón kuí.
8Ta̱nga ngo stsé ꞌniú xí fítjiboajo̱ná boá xi sa̱ꞌínkjiéni na̱xi̱ńdáꞌniú Nínibe̱.
Kó ko̱ngatji̱ngii̱ kondra̱a̱ ndatsi nínga jñoó.
9Mí ni xi niꞌánkjínjnúu̱ takónjnú kjo̱a̱a̱ Néná.
Nga ja̱koxi̱ kuí boá xi sa̱ꞌínkjié ndo̱jò ndójo̱,
kó jmí tsi jó ndi̱yà sa̱ꞌíngojo kjo̱a̱a̱ kondra̱a̱.
10Ndatsi ja̱kon ndaꞌyá xí kistsakjájii̱n xkjín má kón,
kjiꞌanga chꞌi̱ nga tsie xán je katsꞌe, si̱ꞌankjie xikó maá xtjié kixií.
11Ngamasièe̱n ji na̱xi̱ńdáꞌniú Nínibe̱, jatjoni ngo xi tsjaá kjo̱a̱botíxoma xindajín Beliaa̱l,
kui xi ꞌbínda ni xi ndajín kondra̱a̱ Néná,
12ta̱nga bi̱ tsó Néná:
Ndatsi tjingáꞌniuú, kó ndatsi achichí kjín má,
ti̱ kuí xí si̱ꞌankjieni, kó ngiti̱ kꞌuíndojín ngase.
Ndatsi je katsꞌen ndaseen, jè ngiti̱ sa̱ꞌindasénjín ngasee̱,
13ta̱sá skjítꞌó án yá xí kjingi ngasen ji,
kó ti̱ skjítindsó an ńꞌniúki̱cha̱ xi tjitáꞌniú jí.
14Ta̱nga kjo̱a̱a̱ ji na̱xi̱ńdáꞌniú Nínibe̱,
Néná boá xi ko̱tíxoma nga ngiti̱ jmíjín xi kjo̱a̱ꞌátsjiee̱n ji,
án boá xi sa̱ꞌinkjatsón án a̱si̱én xí ki̱cha̱ kamándanii̱, ki̱a̱ na̱ngo̱xi̱i̱ nèe̱,
ko̱jo án boá xi nga̱tsjò sa̱ꞌin an, ngatꞌa̱ achichí nga ndajín ji.
15¡Tsitsíjìi̱n ki̱a̱ nga̱són na̱xi̱i̱ se xota̱ xi tsꞌéndibájo̱ én ndaa̱,
kui xi tsꞌéntsóyà kjo̱a̱a̱ kjo̱a̱xioó!
¡Ti̱ꞌin ji sꞌué xí niꞌín ji Jundáa̱,
kó ti̱ꞌinkjatjosén ji ni xi je kiꞌmíyetjén ji nga si̱ꞌin,
ngatꞌa̱ xota̱ xi ꞌniú ndajiín jè ngiti̱ kji̱ndi̱bájín nga skjánjoo̱,
ngatꞌa̱ jè kiniꞌánkjié ndo̱jò ndójo̱!
Currently Selected:
Nauu̱n 1: MAIX
Highlight
Copy
Compare
Share
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
