Mikeaa̱ 7
7
Kjo̱a̱chaꞌándaseén chji̱ni̱e̱ꞌe̱én Néná
1¡Ai xi̱xꞌi̱a̱n xò án! Ngatꞌa̱ bo̱a̱ kamána xikoó xi mongase cha̱n xi fetꞌanii̱ cho̱ndoboaá,
ko̱jo xikoó xi mongase tostsi̱je̱è xí fetꞌanii̱,
kjiꞌanga je ngiti̱ jmíjín én tostsi̱je̱è xí ka̱ma xi̱ni̱e̱ ngase,
ko̱jo kui toꞌingo̱ xi kamámejeén ini̱ma̱na nga skjíni̱e̱ an.
2Jè kichajá xota̱ xi tjiín kjo̱a̱ni̱ma̱takón kꞌi̱e̱ tꞌanangii̱,
jé ngiti̱ jmíjín xota̱ xi kixi̱,
ngatꞌa̱ ngayejee̱ nga ndyi̱koyaa̱ nga tjín xí sa̱ꞌínkꞌién,
nga ngo nga ngo xotaa̱ ndyi̱ꞌbíndoo̱ chja̱ya̱ xkjín.
3Jè kamángaá tsja nga ni xi ndajín ndyi̱tsꞌèn,
xota̱ xi tjiín xaá to̱n ndyi̱míꞌangi ni xi tsꞌén,
kó nendiꞌamasiee̱n ti̱ to̱n ndyi̱míꞌangi nga tsꞌendájin ngo kjo̱a̱,
kó xota̱ xi yandikoón ni xi ndajín xi mejeén ꞌbíjin ngi̱jin ini̱ma̱a̱,
kó ti̱kuii xkjín nijan ꞌbínda kui nii̱, tsi̱ꞌe̱ nga fotjosón ni xi mejeén sa̱ꞌín.
4Kui xota̱ xi ta̱nisién nda ngasee̱, kuí boá xi xikoó yásarsaa̱,
kui xi ꞌniú kixi̱ ngasee, kuí boá xi xikoó ngo yándáꞌyá,
ta̱nga jè makjachó ni̱xtjin nga si̱ꞌanjo̱ xki̱,
kui ni̱xtjin xi katsóyà xota̱ xi kondaa̱ na̱xi̱ńdaá.
¡Kó kjiꞌá boá nga ka̱matsobéjii̱n!
5Kuíni nga ngata̱ maꞌnítakínjín ji xota̱ xi nda yaꞌaa̱,
ko̱jo ngata̱ maꞌnítakínjín ji amingo̱ xi ꞌniú nda yaꞌaa̱,
chíi̱n yojòo̱ kjo̱a̱a̱ xi ki̱a̱ fojñatꞌaa,
ko̱jo ngata̱ chiboa chjéxꞌéjín ji ndso̱ꞌbe.
6Ngatꞌa̱ ndií tsꞌenchꞌó xi na̱ꞌmii̱,
kó ndí chjo̱ón kondra̱ ka̱maa̱ na̱aa̱n,
kó kja̱ndaa̱ kondra̱ ka̱maa̱ ṉchiꞌyaá,
kó kondraa̱ xotaa̱, ti kuíni bo̱a̱ xi xota̱ ndiꞌaa̱.
7Ta̱nga an, Néná boá xi skotsijèe̱n,
kó skoyàñáa̱ kuí Néná xi ꞌboxiéꞌána.
¡Néna boá xi ku̱i̱ntꞌièna!
Néná boá xi kꞌo̱xiéꞌá xota̱ na̱xi̱ńdaá
8¡Jún kondra̱ xi tsa̱ꞌa̱n!
Ngata̱ mojnóchéjínní, ngatꞌa̱ ndatsi je tsꞌáka an, kjo̱stjíe̱n ngiñá an,
ndatsi nínga jñoó tikón án, ta̱nga Néná boá xi ndiꞌína ka̱ma.
9Kjo̱chíkjo̱a̱na kjo̱a̱xcha̱án Néná,
ngatꞌa̱ katsꞌenjé án kondraa̱ kui,
ngaskande nga sa̱ꞌíndajin kjo̱a̱ xi tsa̱ꞌa̱n,
kó nga ka̱mana kꞌoxiéꞌá an yojona,
Néná boá xi kjo̱jona nínga tikón ndiꞌií,
kó án boá xi skuie an kjo̱a̱kixi̱i̱.
10Kó nga sku̱i̱e̱ kui nii̱ kondra̱na, achichí soboá ka̱maa̱,
kui xi bi̱ katsóna ngasꞌe̱: Ñá tikón Nèe̱ ꞌne̱.
Jè tsá sku̱i̱e̱ ndyikón án, nga ko̱jna̱nié xikoó ndásee̱ ngi̱ya ndi̱yàtié.
11Jí na̱xi̱ńdá Jerusalee̱n,
kji̱ndi̱bá ni̱xtjin nga chjaninkꞌa nginí xóo̱,
kó kui ni̱xtjii̱n ka̱ma tiyá ngase tsindió xí chji̱a̱ni nangìi̱.
12Kuí boá kui ni̱xtjii̱n nga kji̱ndi̱bákoón xota̱ xi chji̱a̱ni,
ndeskande nangi Asiriaa̱, ngaskande nangi Ejipto̱,
ndeskande ndejèꞌ Niloo̱, ngaskande ndejèꞌ Éufratee̱,
ndeskande ngo ndieè ndáchíkoón, ngaskande xi ingo ndieè,
ndeskande ngo ndieè na̱xi̱i̱, ngaskande xi ingo ndieè,
13kó si̱ꞌankjatsón kuí tꞌanangii̱,
ta̱ngatꞌanii̱ xota̱ xi ki̱a̱ síndoo̱,
kjo̱a̱a̱ nga ndajín kjiꞌi ni xi katsꞌén.
Néná ni̱ma̱ kamaá xota̱ Israee̱l
14Ji Ne tsa̱ji̱n, ti̱ꞌinkjìn ji yánísiée̱ nga xchíi̱n xota̱ na̱xi̱ńdáa̱,
kui xi xtín cho̱tsa̱nga̱ xi tse̱, xi tjimá soboá
ki̱a̱ ngamasiee̱n kꞌijñaá na̱xi̱ Karmeloo̱,
kó ki̱a̱ tꞌenje̱ ji xtín cho̱tsa̱nga̱a̱ ki̱a̱ nangi Basaa̱n,
ko̱jo nangi Ngalaa̱nd, xikoó ni̱xtjin xchá jàn.
15Xikoó ni̱xtjin nga akjatjojnú ki̱a̱ nangi Ejiptoo̱,
nga an kokojnúꞌun kjo̱a̱jena,
16xi ngayeje xota̱ na̱xi̱ńdá xí sku̱i̱e̱,
xi achichí ni xi ka̱maa̱, ta̱ngatꞌanii̱ ngaꞌniúna,
kó ngaskande tsja ko̱óꞌmáni tsꞌoa,
kó ku̱i̱ꞌíchjá tji̱bo̱a̱nijón tsi̱ꞌe̱ nga ku̱i̱ntꞌièjín.
17Chojo skji̱ni̱e̱ xikoó ye̱e̱,
ko̱jo tsi xikoó cho̱ xi ꞌbifé yojoo̱ nga̱són tꞌanangii̱,
kjo̱tsièndíkón ma nga kjo̱tjoni ti̱xa̱ xi síndoyá,
kó kji̱ndi̱bá ngindyikin ji nga stsa̱kjonnií,
ko̱jo nga sku̱i̱e̱ndikoón ji Ne, ji xi Nejne̱ ji.
18¡Jmíjín ngo Ne xi xikoó ji!
Xi tsꞌénjétakoón jeé xota̱ na̱xi̱ńdaá,
kó tsꞌénchíyà kjo̱a̱xchán xí katsꞌénjo̱ xota̱ xi tsi̱ꞌe̱.
Jmí tsi ngatsjéni̱xtjin nga katsꞌénxchán,
ngatꞌa̱ achichí tsjá maá nga ni̱ma̱ maa̱ xotaa̱.
19Kó ni̱ma̱ ka̱ma nginií ñá,
kó ku̱i̱ꞌínijìn ni xi ndajín xi kiniꞌán,
kó ki̱a̱ kꞌo̱jmi ngaskande nínga ꞌniú na̱nga̱a̱ ndáchíkón ngayeje jéná.
20Takée̱ kjo̱a̱ꞌniátakóo̱n xota̱ tji̱e̱e̱ Jakoo̱b,
ko̱jo ngatama ni̱ma̱a̱ xota̱ tji̱e̱e̱ Abraa̱n,
xikótsꞌèn katseꞌée̱ ndso̱ꞌbe xota̱ xi xchájne̱,
ndeskande ni̱xtjin xchá jàn.
Currently Selected:
Mikeaa̱ 7: MAIX
Highlight
Copy
Compare
Share
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
