Nauu̱n 2
2
Nangi Asiriaa̱ si̱ꞌankjie
1Kui xi tsꞌenkjiéná jè kijínijíngí kondra̱ tse̱,
chindé ji nínga tikón ngaꞌniúu̱,
chindé ji ndi̱ya̱à, ꞌniú tindyin ji, kó tꞌítikí jí jájúu̱n,
2ngatꞌa̱ Néná boá xi sa̱ꞌíndaya nginí kjo̱a̱jee̱ xota̱ tji̱e̱e̱ Jakoo̱b,
ko̱jo kjo̱a̱jee̱ xota̱ Israee̱l,
ngatꞌa̱ xota̱ xi tsꞌénchéjeé, jè katsꞌénkjié,
kó jè katsꞌénkjié ꞌyo̱o̱ ńꞌniuú tostsi̱je̱è.
3Iní boá ni xi ꞌbíchjánii̱ yáyojoó kui já xí chꞌokoo̱n,
kó ti̱ iní boá ńjño xi ndyi̱yajá nga,
karroo̱ ja̱kon ki̱cha̱ xi ndiꞌí má kón,
kó ni̱xtjin nga xi̱ndyiándi̱yà ngaskande kjo̱tsiè má yáyojoó xi yá sipree̱ kamándani.
4Já xí síndosoón ndi̱je̱e̱ achichí tsá tjimá, kó karroo̱ tjimá xikoó tsi tsobeé,
tjimá ngi̱ya ndi̱yàtieé ndi̱tsee̱n,
xikó maá yá xí tjítokó ndiꞌí xí tjítí kjima,
ko̱jo xikó maá tsi ja̱kꞌi̱e̱ ja̱ngaján kjifoaꞌatꞌe kjima.
5Tjíꞌmíyaà já xí chꞌokoo̱n, kó kui jaá achichí tsá ndyi̱fí,
achichí tsá ndyi̱fí xtji̱e̱e̱n xó xí tjíchjáꞌyáni na̱xi̱ńdáꞌniuú,
kó ndyi̱ꞌbíndonda yojoo̱ tsi̱ꞌe̱ nga ko̱e̱je̱jindajo.
6Jè katjoxꞌá nga̱ntjo̱a̱a̱ xo̱ngà nínga foaꞌaya ndejeèꞌ,
kó ndo̱bo̱a̱xa̱á jè ku̱i̱xo̱ndò.
7Jè katseꞌékjo̱a̱ nga na̱ ree̱ ko̱ꞌna̱xié kó kongínjo̱ꞌniú,
kó ti̱ kongínjo̱ ínchjín chji̱ni̱e̱ꞌboo̱ nga,
kó ata̱ ni̱ma̱ ndyi̱tsó, xikó maá tójo nga ndyi̱ꞌboya ni̱se̱e̱n.
8Na̱xi̱ńdáꞌniú Nínibee̱ kuí boá xi kjima xikoó ngo ngi̱ndiò xí kjifotjongi ndáfoaa̱,
kó bi̱ ndyi̱tsó nga ndyi̱kjandayà:
¡Ta̱si̱e̱njnú ki̱a̱a̱! ¡Ta̱si̱e̱njnú ki̱a̱a̱!
Kó nde ngojín xi tsꞌensén.
9¡Chjábéjnú to̱nsinieé ko̱jo to̱ntiboaa̱!
¡Jmíjín xi kju̱i̱e̱e̱ kui kjo̱a̱cho̱o̱n!
¡Ngayeje to̱ko̱ya ni tsjakon xi tjín kꞌi̱e̱e̱!
10¡Jè kisꞌijñatiya, jè kiniꞌánkjié, jè kiniꞌánkjatsón!
Jè tjichájá ini̱ma̱a̱, jè ngiti̱ jmí ngaꞌniújiín tikoó.
Jè kjife ngaꞌniuú, kó kje̱n jè kjima tiboaꞌandá.
11Ñá tikón ngi̱ndie nínga kisꞌińdo xandi̱je̱e̱,
ñá tikón ngi̱ndie nínga kisꞌińdo ndií xandi̱je̱e̱.
Ñá kisꞌińdoꞌmá xandi̱je̱ xi̱ꞌii̱n, ko̱jo xandi̱je̱ ínchjiín,
ko̱jo ndií xandi̱je̱e̱, tsi̱ꞌe̱ nga jmíjín xi indyiándikoón.
12Xandi̱je̱e̱ katsꞌénkꞌién cho̱ tsi̱ꞌe̱ nga nda kitsiee̱ ndií,
kó katsꞌénxi̱ kui cho̱o̱ tsi̱ꞌe̱ xandi̱je̱ ínchjiín.
Ti̱xa̱ nínga kisꞌińdoꞌmá kisꞌikitsié má cho̱ xi katsꞌénkjiesón.
13¡Kondra̱ tse̱ jè tikón an! Tsó Néná xí tsi̱ꞌe̱ jájuún.
Kꞌuití an, kó ta̱ ṉdi̱ tsí sa̱ꞌin an karroo̱,
kó ndí xandi̱je̱e̱, ki̱cha̱ndojó kju̱i̱e̱sónni,
ngiti̱ jmí cho̱ kꞌuínniꞌínkꞌínjín ji kui tꞌanangii̱,
kó nginijánjín ko̱nda̱ꞌyaá nda̱a̱ chji̱ni̱e̱ꞌée̱n.
Currently Selected:
Nauu̱n 2: MAIX
Highlight
Copy
Compare
Share
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
