Mikeaa̱ 6
6
Kjo̱a̱xchán xí kisꞌiee̱ Néná ko̱jo xotaa̱ na̱xi̱ńdá Israee̱l
1Ndaꞌyájnú ngotꞌe̱ ꞌne̱ ni xi tjítsó Néná:
Ti̱sítji̱n ji, kó ti̱xkénje̱ ji na̱xii̱,
kó tji̱ngi̱i̱ ngatintꞌiè ni xi sé ji.
2Ndaꞌyájnú nga skja̱n Néná jún na̱xi̱, ko̱jo ngaꞌniuú nga̱sondiee̱,
ngatꞌa̱ Néná ngo kjo̱a̱xti tjiín kui ko̱jo xota̱ na̱xi̱ńdaá,
kó na̱xi̱ńdá Israee̱l boá xi skjánjo̱.
3Mí xí katsꞌenjo̱jnúꞌun jún xota̱ na̱xi̱ńdá xí tsa̱ꞌa̱n,
axa̱ míkjo̱a̱a̱ nga kamáxtìjnú.
¡Tꞌíyájnúꞌun míkjo̱a̱a̱!
4Ngatꞌa̱ án boá xí tsꞌaxiéꞌájnúꞌun nínga moso̱ kamájnú jún,
kó katsangiyatjónjnúꞌun Moisee̱, ko̱jo Aaroo̱n, ko̱jo na̱ Riyaa̱.
5Ngatjaꞌátsjienjnú jún xota̱ na̱xi̱ńdá xí tsa̱ꞌa̱n,
kjo̱a̱a̱ ni xi índa Balaa̱k, nda̱ ree̱ na̱xi̱ńdá Moaa̱b,
ko̱jo mí ni xi katsoó Balaa̱n ndií Beoo̱r,
ndeskande nangi Sitii̱n ngaskande nangi Ngilngaa̱l ngatjaꞌátsjienjnú,
tsi̱ꞌe̱ nga xcha̱jnú ni nda xi katsꞌénjo̱jnú Néná nga ni̱ma̱ kamaá jún.
Ni xi mejeén Néná nga sa̱ꞌín xota̱ na̱xi̱ńdaá
6Jún xota̱ Israee̱l, bi̱ ꞌmíjnú:
Mí ni xi si̱ꞌankꞌasꞌién nga kjóchó ngindyikón kui Néná xí tikón ndiꞌakꞌajmii̱.
A kjo̱a̱tjó kongínjòo̱ nga xꞌi̱a̱ ndií cho̱tsa̱nga̱ xi ngo noó.
7A skjíbé Néná kjín mi̱ ndií cho̱tsa̱nga̱, ko̱jo tsi tie mi̱ litro̱ istii̱.
A si̱ꞌankꞌasꞌien ñá ndí tjónná ta̱ngatꞌanii̱ kjo̱a̱xchán xí kiniꞌánjo̱ Néná,
axa̱ ndí xí ngasená ta̱ngatꞌanii̱ jé xí katsꞌén ini̱ma̱ná.
8Jún xota̱ na̱xi̱ńdá, Néná jè katsóyajnú mí ni xi nda,
ko̱jo mí ni xi míꞌájnú Néná.
Ta̱kuítsí ni xi mejeén nga kꞌuiéjnú kjo̱a̱kixi̱,
ko̱jo nga ni̱ma̱ ka̱majnú xingi̱jnú,
ko̱jo nga ni̱ma̱kjo̱a̱ ka̱majnú ngindyi̱ko̱n kui.
Nga atíjeé Néná xota̱ na̱xi̱ńdáꞌniú Jerusalee̱n
9Jún xota̱ na̱xi̱ńdáꞌniú Jerusalee̱n, ndaꞌyájnú ni xi tsó Néná,
kuí boá xi kꞌo̱xiéꞌá xota̱ xi tsakjón jaꞌeén,
kui xi xota̱ xi ku̱i̱ꞌítikó kuí.
10A to̱kó tjínrií kjo̱a̱cho̱n xi kixi̱jín tsꞌén kasako ndiꞌaa̱ xota̱ xi ꞌniú ndajiín,
kui xi tsꞌénkjién chi̱bo̱a̱ xi májín, kui ni xi ꞌniú chꞌóna.
11A tsjie ji̱n tsi baskula̱ ko̱jo tsi stsa chejé ndyi̱niꞌánkjiénjne̱ nga ndyi̱chꞌíchi̱bo̱a̱jne̱ ni.
12Xota̱ xi cho̱o̱n achichí ni xi ndajín tjiín,
xota̱ na̱xi̱ńdáꞌniuú éndísó boá xi chji̱a̱,
na̱je̱n tsꞌénkjién nga ꞌboṉcha̱.
13Kuíni nga an boá xi ꞌniú sa̱ꞌinꞌóo̱n,
kó sa̱ꞌinkjiejnúꞌun ta̱ngatꞌanii̱ jéjnú.
14Ndatsi xi̱ni̱e̱jnú ni nichinie, ta̱nga stsi̱e̱jínjnú,
kó kjo̱a̱ndasenjnú kꞌuijñájinrajnú,
chja̱ꞌáꞌyájnú ni xi ikꞌítji̱e̱jnú, ta̱nga xtjo̱ꞌótjójínjnú,
kó xi xtjo̱ꞌótjójnú kjo̱a̱xcha̱án sa̱ꞌínkjié.
15Kꞌuítji̱e̱jnú ni, ta̱nga jmí ni ka̱maxchájínjnú,
ko̱ꞌna̱xiéjnú istii̱ toꞌolibo̱, ta̱nga nde si̱ꞌankjiénjínjnú,
ko̱ꞌna̱xiéjnú binoo̱ tostsi̱je̱è, ta̱nga nde sꞌi̱o̱jínjnú.
16Ngatꞌa̱ ki̱a̱ tsangíntji̱ngíjnú kjo̱a̱botíxomaa̱ Omrii̱ nda̱ ree̱ na̱xi̱ńdá Israee̱l,
ko̱jo ngayeje ni xi katsꞌén xota̱ ndiꞌaa̱ Akaa̱b,
kó jún, ki̱a̱ tsangíntji̱ngíjnú ni xi atíxomajnú,
tsi̱ꞌe̱ nga sa̱ꞌin an ngo ni xi ko̱e̱je̱ndikónjnú,
kó xota̱ na̱xi̱ńdájnú ko̱jno̱cha,
kó chjiéngá kjo̱chíkjo̱a̱jnú nga sa̱ꞌínchꞌójnú xota̱ na̱xi̱ńdána.
Currently Selected:
Mikeaa̱ 6: MAIX
Highlight
Copy
Compare
Share
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
