Mikeaa̱ 5
5
Nga ko̱tíxoma xi kꞌo̱xiéꞌá na̱xi̱ńdáꞌniú Jerusalee̱n
1Xó tꞌíchjéꞌyéni ji yojòo̱ ji ndí chjo̱on xota̱ xi fi kjo̱a̱xchán,
ngatꞌa̱ jè tjín xí je ndyi̱foaꞌatjiyajónná,
kó ki̱cha̱ xi botixómáni kꞌo̱nié tꞌanijon nendiꞌamasiee̱n na̱xi̱ńdá Israee̱l.
2Ta̱nga ji na̱xi̱ńdáꞌniú Belee̱n xi tindyin ji ki̱a̱ ngi̱jii̱n nangii̱ xota̱ tji̱e̱e̱ Efraii̱n,
ji xi chichí ji ngi̱jii̱n xota̱ ndiꞌaa̱ Jundáa̱,
jí boá xi kjo̱tjojinnii̱ kui xi ka̱ma ngito̱ko̱o̱ na̱xi̱ńdá Israee̱l.
Kuí boá xi kjindibáni ndeskande nga ítsꞌi̱yanii̱ nga tjón tjón,
ndeskande ni̱xtjin xi kisꞌie ngasꞌe̱.
3Kuíni nga Néná sa̱ꞌínkꞌasꞌiee̱n kondraa̱ ngaskande ni̱xtjin nga stse̱n ndií, kui xi ku̱i̱ꞌé ndií,
kósꞌe̱ ntsꞌi̱e̱ xi ngasee̱ kji̱ndi̱báꞌoyá nginí nínga síndo xota̱ na̱xi̱ńdá Israee̱l.
4ꞌNiú kꞌuijñá, kó ko̱ko̱ó ndi̱yà nga sa̱ꞌínkjién ngaꞌniuú Néná,
kó sa̱ꞌínkjién kjo̱a̱je xi tjiín jaꞌeén Néná, kui xi Nee̱ kui,
kó kꞌuieé kjo̱a̱xió nga kꞌuíndo,
ngatꞌa̱ kꞌuieé kjo̱a̱je ngaskande nínga fetꞌani tꞌanangii̱.
5Kó kuí boá xi kjo̱a̱xióná ka̱ma.
Tsi xota̱ Asiriaa̱ ka̱makon nga kji̱ndi̱bá tsꞌéntsi̱ꞌe̱ tꞌananginá,
ko̱jo tsi ka̱makon nga kꞌo̱sꞌien kjo̱a̱ꞌniú ndo̱bo̱a̱xáná,
yito xota̱ xi koo̱n cho̱tsa̱nga̱ ko̱jo jin xota̱ ngito̱ko̱ si̱ꞌankjánjo̱,
6kui xi ki̱cha̱ndojó sa̱ꞌínkjiéni nangi Asiria̱,
kó kichiro̱ sa̱ꞌínkjiéni nangii̱ xota̱ tji̱e̱e̱ Nimrroo̱nd,
kó bo̱a̱ tsꞌén kꞌo̱xiéꞌáná kjiꞌanga kji̱ndi̱bá kjánjo̱ná xota̱ Asiriaa̱,
ko̱jo kjiꞌanga tsja̱jon nínga tikón tsindioó tꞌananginá.
Na̱xi̱ńdáꞌniú Jundáa̱, ngi̱jii̱n na̱xi̱ńdaá tikón
7Ngi̱jii̱n kjín xota̱ na̱xi̱ńdá, xota̱ xi tsꞌangii̱ xota̱ tji̱e̱e̱ Jakoo̱b,
kuí boá xi ka̱ma xikoó xoñoo̱ Néná,
ko̱jo xikoó stsé xí boaꞌa ngi̱jin kꞌijñaá,
kui xi jmíjín xi koyaa̱,
ti̱nde jmíjín xota̱ nga̱sondie xi ꞌniákón.
8Xota̱ xi kꞌo̱ngii̱ xota̱ tji̱e̱e̱ Jakoo̱b ki̱a̱ kꞌuíndo ngi̱jii̱n na̱xi̱ńdaá,
ngamasiee̱n kjín nangi, xikó maá xandi̱je̱ xi ꞌbe ngi̱jii̱n cho̱ tamaá,
ko̱jo xikó maá ndií xandi̱je̱ ngi̱jii̱n ngo xtín cho̱tsa̱nga̱,
kui xi nga foaꞌa, kjíbé ko̱jo tsjánié, kó nde ngojín xi fotjongii̱ yojoo̱.
9Chjanínkꞌée̱ ndse̱ kondra̱a̱, kó ngayejee̱ nga kju̱i̱e̱.
10Kó kui ni̱xtjin jàn tsó Néná,
sa̱ꞌinkjiesón an ndi̱je̱e̱ ngi̱jii̱n na̱xi̱ńdáa̱, ko̱jo sa̱ꞌinkjatsón án karro̱ kjo̱a̱xcháa̱n.
11Ti̱ sa̱ꞌinkjatsón án na̱xi̱ńdáꞌniú xi tjín tꞌanangii̱ nga,
kó sa̱ꞌinkixóndó án ngayeje nínga síndo ngaꞌniúu̱.
12Kó ti̱ bo̱a̱ ti̱ tsꞌén sa̱ꞌinkjatsón án kjo̱a̱tjiꞌe xi niꞌín ji nga,
ngiti̱ kꞌuiéjín ngasee̱ xota̱ xi kotꞌasón.
13Kó ti̱ bo̱a̱ ti̱ tsꞌén sa̱ꞌinkjatsón án a̱si̱én xí ne sée̱ ko̱jo ndi̱jo̱ xi yendikín jí,
kó nginijánjín si̱ꞌindikín jí ni xi ndse̱ katsꞌénda.
14Kó ti̱ bo̱a̱ ti̱ tsꞌén sa̱ꞌinkjatsón án a̱sie̱én na̱ ne Asera̱ xi síndoo,
kó sa̱ꞌinkjatsón án na̱xi̱ńdáꞌniúu̱ nga.
15Kó achichí ꞌniú sa̱ꞌinxchán án nga sa̱ꞌingojo an,
kjo̱a̱a̱ kui na̱xi̱ńdá xi tsintꞌiéꞌénjínna.
Currently Selected:
Mikeaa̱ 5: MAIX
Highlight
Copy
Compare
Share
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
