Mikeaa̱ 4
4
Kjo̱a̱xió xi kꞌuieé na̱xi̱ńdáꞌniú Jerusalee̱n
1Ta̱nga ni̱xtjin xi kju̱i̱e̱tꞌanii̱, na̱xi̱ nínga tikón Ndiꞌaa̱ Néná,
kuí boá xi ꞌniú nkꞌa ngase ka̱ma,
ko̱jo xi ꞌniú xcha̱ndikón ngase,
kó ki̱a̱ kjochó xota̱ xi chji̱a̱ni ngayeje na̱xi̱ńdá.
2Kó achichí kjín xota̱ na̱xi̱ńdá xí ki̱a̱ kjo̱chó, xi bi̱ ka̱tso̱o̱ xkjín:
Ja̱bíjnúꞌun, tjiannijíngí Na̱xi̱i̱ Néná,
ki̱a̱ nínga tikón Ndiꞌaa̱ Nee̱ xota̱ tji̱e̱e̱ Jakoo̱b.
Kuí boá xi ko̱kóná ndi̱ya̱à, kó ñá, ki̱a̱ ku̱i̱ṉtja̱tji̱ngìi̱.
Ngatꞌa̱ ndeskande na̱xi̱ńdáꞌniú Sioo̱n kjindibáni kjo̱a̱kitii̱,
kó ndeskande na̱xi̱ńdáꞌniú Jerusalee̱n kjindibáni eén Néná.
3Kó kuí boá xi ka̱ma nendiꞌamasiee̱n kjín na̱xi̱ńdá,
ko̱jo xi ka̱tso̱ya ni xi ka̱maa̱ na̱xi̱ńdá xí ꞌniú yandikoón,
ko̱jo ngaskande xi ꞌniú kjin síndoo̱,
kó ki̱cha̱ndojoó, ki̱cha̱ bataka̱ sa̱ꞌín,
kó ki̱cha̱ xi tjítokó yáyojoó, ki̱cha̱ntꞌi̱u̱a̱ sa̱ꞌín.
Skjánjo̱jín xkjín, ngo na̱xi̱ńdá ko̱jo ingo na̱xi̱ńdá,
ti̱nde ngiti̱ skjítꞌoyàjín tsi̱ꞌe̱ nga skjánjo̱ xkjín.
4Ta̱sá nga ngo nga ngo xotaa̱ ki̱a̱ kꞌuíndongí ngindie yáꞌoliboo̱,
ko̱jo tsi ngindie yáꞌingoo̱, kó jmíjín xi ku̱i̱ndyiándikoón,
ngatꞌa̱ Néná xí tsi̱ꞌe̱ jájuún boá xi je bo̱a̱ katsó.
5Ndatsi xota̱ na̱xi̱ńdaá ki̱a̱ ndyi̱fítji̱ngi
nga ndyi̱tsꞌénkáxoma jaꞌeén ne xi tsꞌéndíkón,
ta̱nga ñá, ki̱a̱ timatji̱ngí nga ndyi̱niꞌánkaxomá jaꞌeén Néná,
kui xi Néná boá ta̱kjiꞌání.
Néná kꞌoxiéꞌá xota̱ na̱xi̱ńdá Israee̱l
6Bi̱ tsó Néná:
Kui ni̱xtjin jàn kꞌuitiko án cho̱tsa̱nga̱ xi fí ni̱ma̱tꞌaa,
kó kji̱ndi̱bájo̱ ngiñá an xi tjimá kichajaá, ko̱jo xi katsꞌendasèe̱n.
7Kó kui cho̱tsa̱nga̱ xi fí ni̱ma̱tꞌaa, kuí boá xi sa̱ꞌinkꞌangi an,
kó kui xi kisꞌiṉtso̱ma kichajaá, ngo na̱xi̱ńdá xí ꞌniú sa̱ꞌin an,
kó Néná boá xi ko̱tíxomaa̱ ki̱a̱ na̱xi̱ Sioo̱n,
ndeskande ngotꞌe̱, ko̱jo ta̱kjiꞌání.
8Kó ji xi tarieé xtín cho̱tsa̱nga̱a̱ ji,
na̱xi̱ nínga tikónsón na̱xi̱ńdáꞌniú Sioo̱n,
jí boá xi ko̱ti̱xome nginí ji xikoó ngasꞌe̱,
jí boá xi ka̱má nginí ji ngi̱ndie nínga botíxoma,
xi chji̱a̱ni na̱xi̱ńdáꞌniú Jerusalee̱n.
9Kó ngotꞌe̱ ꞌne̱, míkjo̱a̱a̱ nga tá ni̱ma̱ tꞌísé kon ji.
A jmíjínri nda̱ re. A kꞌien xota̱ xi tsjaá kjo̱a̱botíxomaa̱.
A on kjimaa xikoó tsi̱ndi̱o̱ xi ꞌbeé ngo xota̱chjo̱on xí je stse̱n ndií.
10Ja̱ ti̱tja̱tí ji kjo̱a̱ni̱ma̱ xikoó ngo xota̱chjo̱on xí je stse̱n ndií,
kó xikoó tsi nga tsen ndíi̱, jí na̱xi̱ńdáꞌniú Sioo̱n,
ngatꞌa̱ ngotꞌe̱ ꞌne̱, jè ku̱i̱tjaxieni ji na̱xi̱ńdáꞌniuú,
kó nínga jno̱o̱ kꞌuínkíndyin ji,
kó kjóchí ji nangi Babiloniaa̱, sꞌe̱ ki̱a̱ kꞌuijñándeé,
ngatꞌa̱ ki̱a̱ boá nínga Néná kꞌo̱xiéꞌaá, ngi̱ya tsja kondra̱a̱.
11Ta̱nga ngotꞌe̱ ꞌne̱ kjín na̱xi̱ńdá kjimatikó kondra̱ tse̱, xí bi̱ ndyi̱tsó:
¡Ngatama ndándí na̱xi̱ńdáꞌniú Sioo̱n!
¡Kó ndyikón má ñá xí ngatamabe nga si̱ꞌankjie!
12Ta̱nga na̱xi̱ńdaá nde bejín ni xi tjínjinkon Néná,
ti̱nde makjínjiín ni xi tsꞌénꞌbínda,
ngatꞌa̱ ꞌbitíkó xikoó chꞌo̱o̱ to ndso̱ko̱a̱n ṉño̱paa̱n,
ki̱a̱ ngi̱ndie nínga niꞌántsjie kui too̱.
13Ti̱sítji̱n ji, kó ti̱ꞌintsjie ji kui too̱, ji na̱xi̱ńdáꞌniú Sioo̱n,
ngatꞌa̱ án boá xi tsjaa nga kꞌuieé ndi̱ja̱ xi ki̱cha̱,
kó xtín ndse̱ ki̱cha̱ bronse̱ sa̱ꞌin an,
tsi̱ꞌe̱ nga si̱ꞌinxi̱ ji kjín nangi,
sꞌe̱ Néná ti̱ꞌinkꞌasꞌíi̱n ni xi sa̱ko̱ó kjo̱a̱xcha̱án,
ko̱jo kjo̱a̱cho̱o̱n, Néná xí tsi̱ꞌe̱ ngayeje nga̱sondiee̱ te̱ꞌée̱.
Currently Selected:
Mikeaa̱ 4: MAIX
Highlight
Copy
Compare
Share
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
