Mikeaa̱ 3
3
Ni xi ka̱maa̱ xota̱ xi kixi̱jín tsꞌenseén xota̱ na̱xi̱ńdaá
1Kó bi̱ xian an:
Tasiénnijónjnú jún xota̱ xi botixómá, xi chji̱a̱ni xota̱ tji̱e̱e̱ Jakoo̱b,
ko̱jo jún xota̱ xi ngito̱ko̱o̱ na̱xi̱ńdá Israee̱l.
A júnjín xi tsoboájnú nga xcha̱jnú ni xi kixi̱i̱.
2Jún niꞌánchꞌójnú ni xi ndaa̱, kó niꞌántjójnú xi ndajiín,
kó xota̱ na̱xi̱ńdána ndajín niꞌánjo̱jnú,
ngatꞌa̱ chjeꞌéxínjnúu̱ tji̱xin yojoo̱, ko̱jo yojo xi tjiín ńdaa̱,
3chiniejnú yojoo̱, kó bicháyájnú tji̱xi̱ín, ko̱jo chjátꞌójnú ńdaa̱,
kó bicháyájnú yojoo̱ xikoó tsi ki̱a̱ ngi̱ya tikoó si̱ꞌanchjányà.
4Kuíni nga kjiꞌanga ko̱ndókjo̱a̱jnúu̱ Néná, nde sa̱ꞌínsénjínjnú,
ngatꞌa̱ kui ni̱xtjii̱n ku̱i̱ꞌíjñaꞌmájnú kje̱n,
ta̱ngatꞌanii̱ ni xi ꞌniú ndajín xi kiniꞌánjnú.
Chji̱ni̱e̱ꞌén ndísoó
5Bi̱ tsó Néná kjo̱a̱a̱ jáchji̱ni̱e̱ꞌén xí tsꞌénchájá xota̱ na̱xi̱ńdaá kui:
Kui xi kjo̱a̱a̱ kjo̱a̱xió tsóyaà xota̱ xi tsjaá ni xi kjinie,
ta̱nga kjo̱a̱xchán ꞌboxieé xota̱ xi jmí nichinie tsjájiín.
6Ngiti̱ kꞌuiéjínjnú ni xi ko̱kójnú Néná nga ni̱xtji̱e̱e̱n,
ti̱nde ka̱májín kꞌuiyájnú ni xi sꞌe̱ ka̱ma nga jñoó,
tsꞌueé sꞌi̱jñó kjo̱a̱a̱ kui jáchji̱ni̱e̱ꞌe̱én,
kó ni̱xtjii̱n jñó ka̱maa̱ kui nga.
7Xota̱ xi tsóyà ni xi ka̱maa̱, ko̱jo tjiꞌe xi kotꞌasoón, kjo̱a̱soboá kjo̱a̱ꞌa,
kó ngayejee̱ nga chjiéngá ko̱ókjo tsꞌoa, ngatꞌa̱ Néná sa̱ꞌínsénjiín.
8Ta̱nga an, kisꞌikitsie mána ngaꞌniú, ko̱jo kjo̱a̱kixi̱, ko̱jo kjo̱a̱kjínkón, ta̱ngatꞌanii̱ A̱si̱énni̱xtjii̱n Néná, tsi̱ꞌe̱ nga kongítaꞌin an kjo̱a̱kitikjo̱a̱a̱ xota̱ tji̱e̱e̱ Jakoo̱b, ko̱jo jé xí ndyi̱tsꞌèn xota̱ Israee̱l.
Nga kiniꞌánchaja xota̱ na̱xi̱ńdáꞌniú Jerusalee̱n
9Kó Néná, bi̱ katsó:
Tasiénnijónjnú jún xota̱ xi botixómá xi chji̱a̱ni xota̱ tji̱e̱e̱ Jakoo̱b,
ko̱jo jún xota̱ xi ngito̱ko̱o̱ na̱xi̱ńdá Israee̱l.
Jún boá xi chꞌójnú kjo̱a̱kixi̱i̱,
ko̱jo xi niꞌántsobéjinjnúu̱ ngayeje kjo̱a̱ndaa̱.
10Jún xi ndyi̱chjaninkꞌajnú na̱xi̱ńdáꞌniú Sioo̱n nga ndyi̱chjatjónjnú jiín xota̱,
ko̱jo ndyi̱chjaninkꞌajnú na̱xi̱ńdáꞌniú Jerusalee̱n, nga ndyi̱niꞌánkjiénjnú ni xi ꞌniú ndajiín.
11Nendiꞌamasienjnú to̱n ndyi̱kjíbengí nga ndyi̱tsꞌèndajin ngo kjo̱a̱,
kó chináꞌmijnú to̱n ndyi̱foaꞌáchjí nga ndyi̱bokoyaá xotaa̱,
jáchji̱ni̱e̱ꞌénjnú to̱n ndyi̱foaꞌáchjí nga ndyi̱tsóyà ni xi ka̱ma,
kó Néná bósieén ni xi tsꞌén, nga bi̱ tsó:
A kꞌi̱e̱jín tikónjinná Néná.
Ja̱ jmí ni xi ndajín ka̱májínna.
12Kuíni nga ta̱ngatꞌanii̱ jún nga na̱xi̱ńdáꞌniú Jerusalee̱n,
ngo ngindie nínga je akakjan nga si̱tji̱e̱ ni ka̱ma,
na̱xi̱ńdáꞌniú Jerusalee̱n ngo ngi̱ndie xi je ixóndó ka̱ma,
kó tji̱ngi̱ nínga tikón Ndiꞌa ndikoón, ngo na̱xi̱ xi kꞌijñáꞌniú ka̱ma.
Currently Selected:
Mikeaa̱ 3: MAIX
Highlight
Copy
Compare
Share
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
