Lebitiko̱ 10
10
Néná atíjeé Nandaa̱b ko̱jo Abiuu̱
1Jaá Aaroo̱n xi ꞌmí Nandaa̱b ko̱jo Abiuu̱, iskjíbé ni xi ꞌbítíyá nisijee̱n, kó ítíyá nisije̱n, ta̱nga jmí tsi bo̱a̱ tsꞌén katsꞌénda xikótsꞌèn atíxoma Néná nga si̱ꞌanda kui nii̱, 2kó kuíni nga Néná ngo ndiꞌí katsangiyaa̱ xi katsꞌénkjiesón nga joó. 3Kósꞌe̱ Moisee̱ bi̱ katsoó Aaroo̱n:
—Kuí bí kui nii̱ xi íjinkon Néná nga bi̱ katsó:
Mejénna nga ku̱i̱ntꞌiéꞌénna chináꞌmina,
kó nga ngayeje xota̱ na̱xi̱ńdaá xi ngatsꞌèntsjàna.
Kó nde ngo ni katsójín Aaroo̱n.
4Sꞌe̱ jaskan Moisee̱ tsíchji̱a̱a̱ Misaee̱l ko̱jo Elsafaa̱n, ndií nda̱ xi ꞌmí Usiee̱l, kui xi tsinii̱ Aaroo̱n, kó bi̱ katsoó: ꞌNa̱xiéjnú kꞌi̱e̱ ndiꞌandikoón kui ini̱ma̱ xi xingi̱jnú má, kó tangínjo̱jnú ndi̱tsen nínga síndo ndiꞌaa̱ xotaa̱.
5Kó kijí kui jaá, kó ti̱kuii chi̱nga ndioo̱ kui ini̱ma̱ xi je jesoón xi íxtiéní, kó tsꞌaxiéni ki̱a̱ nínga síndo ndiꞌaa̱ xotaa̱. 6-7Kósꞌe̱ Moisee̱ bi̱ katsoó Aaroo̱n ko̱jo nga jó ndií, kui xi Itamaa̱r ko̱jo Eleasaa̱:
Ka̱májín ku̱i̱ndyion xa̱ꞌya̱jnú kjo̱a̱a̱ nga jesón xingi̱jnú. Ngata̱ chjándójínjnú tsja̱tokójnú, ti̱nde ngata̱ chjándiyàjínjnú ńjñojnú. Ngatjaꞌátsjienjnú nga kjiꞌanga kanangijon isti̱ tokojnú, jè katseꞌéxájnú nga chináꞌmii̱ Néná kamájnú. Ti̱nde ka̱májín kjin kongínnijnúu̱ nínga tikón ndiꞌandikoón, ngatꞌa̱ tsi bo̱a̱ si̱ꞌánjnú, Néná sa̱ꞌínxchánjo̱ ngayeje xota̱ na̱xi̱ńdaá kó ko̱yàjnú jún. Chjiéngá ndasen ka̱maa̱ xota̱ Israee̱l ta̱nga kjo̱a̱a̱ nga Néná katsangiya kui ndiꞌií.
Kó bo̱a̱ katsꞌén kui jaá ni xi atíxomaa̱ Moisee̱ nga sa̱ꞌín.
Ni xi ka̱májín sa̱ꞌín já chináꞌmii̱
8Néná bi̱ katsoó Aaroo̱n:
9-10Kjiꞌanga ji ko̱jo tsi jáa̱ ku̱i̱tjásꞌi̱e̱njnú ki̱a̱ ndiꞌandikoón, ka̱májín tsi ni xi tsꞌenchꞌi̱ná sꞌi̱o̱jnú. Tsi bo̱a̱ si̱ꞌánjnú, ko̱yàjnú, ngatꞌa̱ jún boá xi ka̱ma xcha̱jnú ni xi an chjiá an, ko̱jo ni xi ánjín chjiá an, ko̱jo ni xi tsjie ko̱jo ni xi ndándí ngindyikón án. Kui kjo̱a̱botíxomaa̱ jmíni̱xtjin sa̱síkjo. 11Kó ti̱ chjiéngá ko̱ko̱yájnúu̱ xota̱ Israee̱l nga chjiéngá sa̱ꞌínkjatjosón kui kjo̱a̱botíxoma xi kixiyàa̱ nga tsíchji̱a̱jo an Moisee̱.
12-13Moisee̱ ti̱ bi̱ ti̱ katsoó Aaroo̱n ko̱jo ndií kui xi Itamaa̱r ko̱jo Eleasaa̱:
Ngi̱jii̱n kui kjo̱a̱tjó xi ꞌbítí ngandaa̱ Néná, kui kjo̱a̱tjó xi ni xi maxchání jno̱o̱ ꞌniú ndikón ngase xi̱ꞌba̱. Kuíni nga kuí boá kui kjo̱a̱tjoó xi si̱ꞌandanijnú pan xi jmí nisanjiín. Kui paa̱n ki̱a̱ xi̱ni̱e̱jnú ki̱a̱ tꞌa ṉchandikoón, ngatꞌa̱ kuí boá kui ngi̱ndiee̱ xi xá tikónni.
14-15Kó kjiꞌanga xota̱ na̱xi̱ńdaá sa̱ꞌínkꞌasꞌiee̱n Néná ngo kjo̱a̱tjó, tsi̱ꞌe̱ nga ku̱i̱ꞌa nga nda ko̱jo nga tsjatsꞌèn kꞌuíndo, ji ko̱jo ndí xíꞌíi̱n, ko̱jo ndí xí ínchjíi̱n ka̱ma skjíbé ni̱se̱e̱n ko̱jo ti̱ꞌmi̱í kui cho̱ xi si̱ꞌankꞌasꞌiee̱n, ngatꞌa̱ kuí boá kui nii̱ xi tsoboaá nga skjíbé. Chjiéngá ngo ngi̱ndie nínga tsjie skji̱ni̱e̱, ta̱nga ngindiee̱ nga skji̱ni̱e̱, chjiéngá tjón mára nga tsꞌén xikó niꞌán nga niꞌánkꞌasꞌien ngo kjo̱a̱tjó, ki̱a̱ nga̱són ṉchandikoón Néná, kó ngatꞌítí xinieé kui cho̱o̱. Kui kjo̱a̱botíxomaa̱ tsi̱ꞌe̱ Néná boá, kó jmíni̱xtjin sa̱síkjo.
16Jaskan ngi̱chí sájín Moisee̱ asíyá kjo̱a̱a̱ tindso̱ xi niꞌánkꞌasꞌien tsi̱ꞌe̱ nga niꞌánjetakón jeé. Kó ngije tsintꞌié nga je ikꞌítí kui cho̱o̱ ki̱a̱ nga̱són ṉchandikoón, katsꞌénxchánjo̱ Itamaa̱r ko̱jo Eleasaa̱ nga bi̱ katsoó:
17—Ánní nga kichiniejínjnú kui tindsoo̱ ki̱a̱ ndiꞌandikoón. A mí tsí jè yàjnú nga kui kjo̱a̱tjoó, ni xi ndikón boá, ¡kjo̱a̱tjó xi niꞌánkꞌasꞌien tsi̱ꞌe̱ nga niꞌánjetakón jé boá! Kó kuí kjo̱a̱tjoó xi Néná tsꞌénjétakónni jéjnú, ko̱jo jeé xota̱ na̱xi̱ńdaá. 18Kó nga kui jiín ki̱a̱jín tsangínjo̱ ngi̱yaa̱ kui ndiꞌandikoón, chjiéngá jún ki̱a̱ kichiniejnú kui kjo̱a̱tjoó ki̱a̱ ngi̱ndie xi je tikóndaa̱ katsaki, xikótsꞌèn je atixomájnúꞌun.
19Kó Aaroo̱n bi̱ katsoó:
—Ngotꞌe̱, ndína Nandaa̱b ko̱jo Abiuu̱, kijítsꞌenkꞌásꞌieén ngo kjo̱a̱tjó Néná, tsi̱ꞌe̱ nga sa̱ꞌínjetakoón jeé, kó ti̱ ítí ngo kjo̱a̱tjó nganda tsi̱ꞌe̱ Néná, ta̱nga jè ndajín kamá nga kichajá kui jána xi̱ꞌba̱. A beriítakín nga Néná tsja kamaá tsi ngotꞌe̱ iskjíni̱e̱ an kui kjo̱a̱tjó xi niꞌánkꞌasꞌien tsi̱ꞌe̱ nga niꞌánjetakón jeé.
20Nga tsintꞌieé Moisee̱ ni xi katsó Aaroo̱n, achichí nda kasasiee̱n kui nii̱.
Currently Selected:
Lebitiko̱ 10: MAIX
Highlight
Share
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
