Lebitiko̱ 11
11
Cho̱ xi tsjie ko̱jo xi tsjiejín ngindyi̱ko̱n Néná
1Néná atíxomaa̱ Moisee̱ ko̱jo Aaroo̱n, 2tsi̱ꞌe̱ nga bi̱ ka̱tso̱o̱ xota̱ Israee̱l nga sa̱ꞌínkꞌasꞌiee̱n kui kjo̱a̱botíxomaa̱:
Ka̱ma xi̱ni̱e̱jnú yojoo̱ ta̱ꞌya cho̱ní, 3ta̱nga chjiéngá cho̱ xi tji̱ ningoo̱ ko̱jo xi kjinieya kixꞌi kixꞌi ni xi kjinie. 4-8Ta̱nga ka̱májín xi̱ni̱e̱jnú yojoo̱ cho̱toꞌoyitsꞌe̱n, ko̱jo chińtsi̱é, ko̱jo chińtsi̱é tie nijon, ngatꞌa̱ kui cho̱ xi̱ꞌba̱ kjinieya kixꞌi kixꞌi ni xi kjinie, ta̱nga jmí tsi tji̱ ningoo̱. Ti̱nde ka̱májín xi̱ni̱e̱jnú yojoo̱ chi̱nga̱, ngatꞌa̱ kui cho̱o̱ tji̱ ningoo̱, ta̱nga jmí tsi kjinieya kixꞌi kixꞌi ni xi kjinie. Ti̱nde nga niꞌánjo̱jínjnú yojo kꞌiee̱n kui cho̱o̱, chjiéngá cho̱ xi tsjiejín kꞌuínjnúu̱.
9Kjo̱a̱a̱ cho̱ xi tjín ngi̱jin ndáchíkoón, ko̱jo xi tjín ngi̱jin ndejeèꞌ, ka̱ma xi̱ni̱e̱jnú xi tjiín tjia ko̱jo tji̱bo̱a̱tsjie. 10-12Ta̱nga tsi jmíjiín tjia ko̱jo tsi jmíjiín tji̱bo̱a̱tsjie, ka̱májín xi̱ni̱e̱jnú, ndatsi ki̱a̱ ngi̱jin ndáfoaa̱ maxchá. Ta̱sá chjiéngá cho̱ xi tsjiejín kꞌuínjnúu̱, kó chjiéngá tsꞌe̱ ka̱majnú nga xcha̱jnú yojoo̱ kui cho̱o̱ xi je jesoón.
13-19Kjo̱a̱a̱ cho̱ xi tjiín tsja̱nga̱, ka̱májín xi̱ni̱e̱jnú kui xi xiyà an kꞌi̱e̱e̱, ngatꞌa̱ chjiéngá cho̱ xi tsjiejín kꞌuínjnúu̱, xikoó:
Ja̱a̱,
cho̱ xi bokján ńdaa̱,
ja̱ xi ꞌbé ndáchíkoón,
cho̱ milanoo̱,
cho̱ abestruu̱,
ni̱sie stseé,
ni̱sie ngabiotaa̱,
jnó ndi̱ja̱a̱,
ni̱sie kuerboo̱ ndáchíkoón,
jnoó,
cho̱ ibii̱s,
cho̱ pelíkanoo̱,
cho̱ kjinie yojo siee̱n,
cho̱ singeñaa̱,
cho̱ abubiyaa̱,
ningoó,
ngayeje to̱ko̱ya cho̱ alkoo̱n,
ngayeje to̱ko̱ya ni̱sie kuerboo̱,
ngayeje to̱ko̱ya ja̱ kjinie xo̱nda̱a̱,
ngayeje to̱ko̱ya sko̱a̱a̱.
20Kjo̱a̱a̱ cho̱ xi ꞌniú xi̱xi̱i̱, chjiéngá cho̱ xi tsjiejín kꞌuínjnúu̱, ngayeje xi tjiín nga̱, ta̱nga xi nijón sé tjín. 21Ta̱nga ka̱ma xi̱ni̱e̱jnú ngayeje xi kjínkꞌá tꞌanangii̱, ngatꞌa̱ ndojó ngase se xi síndo xtji̱e̱e̱n nga̱xto̱n. 22Kó kuíni nga ka̱ma xi̱ni̱e̱jnú ngayeje to̱ko̱ya chjondi ko̱jo chjo̱bo̱a̱. 23Ta̱ꞌya cho̱ xi̱xi̱ní xi tjiín nga̱ ko̱jo nijón sé, chjiéngá cho̱ xi tsjiejín kꞌuínjnúu̱. 24-25Tsi tjín xí sa̱ꞌínjo̱ yojo kꞌiee̱n ngo kui cho̱o̱ xi je jesón, tsjiejín ka̱ma xi bo̱a̱ katsꞌeén ngaskande nga ka̱majñoó, kó chjiéngá ko̱nié ńjñoo̱ ngijee̱.
26Ngayeje cho̱ xi tji̱ ningoo̱ ta̱nga tsi kjinieya kixꞌi kixꞌijín nichiniee̱, chjiéngá cho̱ xi tsjiejín kꞌuínjnúu̱. Tsi tjín xí sa̱ꞌínjo̱ kui cho̱o̱, ti̱ tsjiejín ka̱ma nga.
27-28Ngayeje cho̱ xi nga fí ngi̱ya se tsꞌénkjién nga bosién, chjiéngá cho̱ xi tsjiejín kꞌuiín nga. Tsi tjín xí sa̱ꞌínjo̱, ko̱jo tsi skjíbé yojo kꞌiee̱n kui cho̱o̱, tsjiejín ka̱ma ngaskande nga ka̱majñoó, kó chjiéngá ko̱nié ńjñoo̱ nga.
29Kjo̱a̱a̱ cho̱ xi ꞌbifé yojoo̱ nga̱són tꞌanangii̱, chjiéngá cho̱ xi tsjiejín kꞌuínjnúu̱ kui xi̱ꞌbi̱: cho̱tosaa̱, ńchaa̱n, ngayeje to̱ko̱ya xkja, 30ko̱jo róxchó, ko̱jo xandso, ko̱jo cho̱ kamaleoo̱n. 31Tsi tjín xí sa̱ꞌínjo̱ ko̱jo tsi skjíbé yojo kꞌiee̱n kui cho̱o̱, tsjiejín ka̱ma ngaskande nga ka̱majñoó. 32Tsi ngo yojo kꞌiee̱n kui cho̱o̱, kꞌo̱kanieé ngo ni xi yá ko̱jo tsi tji̱xi̱ín, ko̱jo tsi ngo ńjño xi chajá, ko̱jo tsi ngo ki̱cha̱ xi niꞌánkjién nga niꞌánxá, ngayeje kui ni xi bo̱a̱ ka̱maa̱, tsjiejín ka̱ma ngaskande nga ka̱majñoó, kó tsi̱ꞌe̱ nga ka̱matsjie nginí, chjiéngá nda ko̱niéjónni ndáfoa. 33-34Tsi ngo yojo kꞌiee̱n kui cho̱o̱ kꞌo̱kayà ngi̱yaa̱ ngo ti̱jì nda, ngayeje kui ni xi ndyi̱a̱ kui ti̱ji̱í, tsjiejín ka̱ma, ndatsi ndáfoa ko̱jo tsi nichinie xi ndyi̱a̱, kó chjiéngá ko̱kjan kui ti̱ji̱í. 35Tsi ngo yojo kꞌiee̱n kui cho̱o̱, kꞌo̱kayà ngo orjno̱ ko̱jo tsi kꞌo̱kasón ngo ṉchanndiꞌí, ngiti̱ tsjiejín ka̱ma kui nii̱, kó chjiéngá ko̱kjan. 36Ngayeje xi sa̱ꞌínjo̱ yojo kꞌiee̱n ngo kui cho̱o̱, ngiti̱ tsjiejín ka̱ma. Ta̱kuítsí ndáńchꞌi̱, ko̱jo tsi nínga tjitjó ndáfoa xi niꞌánkjieén xi to̱kó tsjiera ka̱ma. 37Tsi yojo kꞌiee̱n kui cho̱o̱ xi ki̱a̱ kꞌo̱kanié nínga síndo xojmá xí kꞌuítji̱e̱e̱, kui xojmaá to̱kó tsjiera ka̱ma. 38Ngototo tsí kjiꞌanga tsjiejín ka̱ma kui xojmaá, kjiꞌanga ngo kui cho̱o̱ xi kꞌo̱kajin ndáfoa nínga ndyi̱a̱ngandá.
39Tsi ngo cho̱ xi ka̱ma xi̱ni̱e̱jnú ko̱yà, xi sa̱ꞌínjo̱ yojo kꞌiee̱n kui cho̱o̱, tsjiejín ka̱ma ngaskande nga ka̱majñoó. 40Tsi tjín xí skji̱ni̱e̱ yojoo̱ kui cho̱o̱, tsjiejín ka̱ma ngaskande nga ka̱majñoó, kó chjiéngá ko̱nié ńjñoo̱. Tsi tjín xí skjinínkꞌá yojoo̱ kui cho̱ xi je kꞌiee̱n, tsjiejín ka̱ma ngaskande nga ka̱majñoó, kó chjiéngá ko̱nié ńjñoo̱ nga.
41Jún ka̱májín xi̱ni̱e̱jnú yojoo̱ ngayeje cho̱ xi ꞌbifé yojoo̱ nga̱són tꞌanangii̱, ngatꞌa̱ tsjiejín kui cho̱o̱. 42Kuíni nga ka̱májín xi̱ni̱e̱jnú yojoo̱ ngo cho̱ xi ꞌbifé yojoo̱ nga̱són tꞌanangii̱, ti̱nde ka̱májín xi̱ni̱e̱jnú ndí cho̱ xi̱xi̱ xi tsꞌénkjién nga nijón sé nga fí, ko̱jo tsi xi kjín sé tjín. 43-45Tsjie tindyiónjnú, kó ngata̱ niꞌánndándíjínjnú yojojnú xikoó kui cho̱o̱. Án boá Nee̱ xota̱ Israee̱l, kó án boá ngo Ne xi kje̱ꞌe. Án boá xi tsꞌaxiéjnúꞌun nangi Ejipto̱, tsi̱ꞌe̱ nga an xi ka̱ma an Nejnú. Ka̱májín bo̱a̱ kon ka̱majnú xikoó xota̱ xi kje̱ꞌe nangi, ngatꞌa̱ an bo̱a̱jín kon an xi kókón ne xi kje̱ꞌe.
46Kuí bí kui kjo̱a̱botíxomaa̱ kjo̱a̱a̱ cho̱ xi tjín tꞌanangii̱, ko̱jo xi ꞌbímatji̱e̱e̱n, ko̱jo xi tjín ngi̱jin ndáfoaa̱, ko̱jo cho̱ xi ꞌbifé yojoo̱ nga̱són tꞌanangii̱, 47tsi̱ꞌe̱ nga jún ka̱ma xcha̱jnú cho̱ xi tsjie, ko̱jo cho̱ xi tsjiejín ngindyikón an, ko̱jo cho̱ xi ka̱ma xi̱ni̱e̱jnú ko̱jo xi ka̱májín xi̱ni̱e̱jnú.
Currently Selected:
Lebitiko̱ 11: MAIX
Highlight
Share
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
