Lebitiko̱ 9
9
Kjo̱a̱tjó xi tjoón
1Xi ma jii̱n ni̱xtjin, Moisee̱ tsíchji̱a̱a̱ Aaroo̱n ko̱jo jaá, ko̱jo já ngito̱ko̱o̱ xota̱ Israee̱l. 2Kósꞌe̱ bi̱ katsoó Aaroo̱n:
Ti̱ꞌinkꞌasꞌin ji ngo kjo̱a̱tjó xi ngo ndií cho̱yojo tsi̱ꞌe̱ nga si̱ꞌanjetakoón jée̱, kó tꞌítí ji ngo cho̱tsa̱nga̱ xi jaꞌatji ndi̱ja̱a̱ nganda tsi̱ꞌe̱ Néná. 3Jaskan ngije kamá kui nii̱, bo̱a̱ tꞌíi̱n xota̱ Israee̱l nga ti̱ nga tsꞌenkꞌásꞌién ngo kjo̱a̱tjó xi ngo tindso̱ tsi̱ꞌe̱ nga si̱ꞌanjetakoón jeé, kó ngatꞌítí ngo ndií cho̱yojo, ko̱jo ngo ndií cho̱tsa̱nga̱ nganda tsi̱ꞌe̱ Néná. Kui cho̱o̱ chjiéngá cho̱ xi je ngo noó ka̱ma, kó chjiéngá cho̱ xi nda ngatama.
4Ngotꞌe̱ má, Néná ko̱kójnú kókjiꞌi ngaꞌniú xí tjiín. Kuíni nga chjiéngá si̱ꞌankꞌasꞌienjnúu̱ ngo kjo̱a̱tjó, xi ngo cho̱yojo toro̱, ko̱jo ngo cho̱tsa̱nga̱ xi jaꞌatji ndi̱ja̱a̱, tsi̱ꞌe̱ nga chji̱a̱ꞌajnúu̱ nga nda ko̱jo nga tsjatsꞌèn ku̱i̱ndyionjnú, ko̱jo chjiéngá si̱ꞌankꞌasꞌienjnúu̱ ngo kjo̱a̱tjó xi ni xi maxchá jno̱ xi isti̱ ku̱i̱ndyiaa̱ nga si̱ꞌanda̱ꞌyo̱ni.
5Kó xota̱ Israee̱l kijíjo̱ ki̱a̱ ndiꞌandikoón ngayeje ni xi tsíꞌaá Moisee̱ nga atíxomaa̱. Ngayeje xota̱ na̱xi̱ńdaá ki̱a̱ jachókindyia nínga tikón ṉchandikoón Néná, kó ki̱a̱ kisꞌińdo. 6Kósꞌe̱ Moisee̱ bi̱ katsoó: Kuí bí kui nii̱ xi tsꞌénbotixómá Néná nga si̱ꞌan. Tsi jún xi si̱ꞌankjatjosónjnú, Néná ko̱kójnú ngayeje ngaꞌniuú. 7Sꞌe̱ jaskan Moisee̱ bi̱ katsoó Aaroo̱n: Ndibéboeꞌé ji tꞌa ṉchandikoón, kó ki̱a̱ ti̱ꞌinkꞌasꞌin ji kjo̱a̱tjó xi kichꞌié tsi̱ꞌe̱ nga si̱ꞌanjetakoón jée̱, kó ngo kjo̱a̱tjó tꞌítí ji nganda tsi̱ꞌe̱ Néná. Kó ti̱ ki̱a̱ ti̱ꞌinkꞌasꞌin ji ngo kjo̱a̱tjó xi tsi̱ꞌe̱ xota̱ na̱xi̱ńdaá, tsi̱ꞌe̱ nga Néná sa̱ꞌínjetakoón ji ko̱jo xota̱ na̱xi̱ńdaá nga.
8Kó Aaroo̱n katsꞌénkꞌién kui ndí cho̱yojo chichií tsi̱ꞌe̱ nga íchjítjé jeé. 9Kó jaá Aaroo̱n kijíjo̱ boaꞌaá jiín kui cho̱o̱, kósꞌe̱ Aaroo̱n katsꞌénkꞌandyi̱ni ngo xtín tsja, sꞌe̱ indyiaá kui jiín ndyi̱ko̱n kui ṉchandikoón. Jín xí tsꞌangii̱ ki̱a̱ iskjitjónjón ngindie se ṉchandikoón. 10Sꞌe̱ jaskan ítí xinieé ki̱a̱ nga̱són ṉchandikoón, ko̱jo chjo̱ondáyaá, ko̱jo ngo chikjan chi̱nga̱ndaa̱ kui cho̱o̱, xikó má katsoó Néná nga atíxomaa̱ Moisee̱, bo̱a̱ má katsꞌén. 11Yojoo̱ ko̱jo tji̱xi̱ín kui cho̱o̱, ki̱a̱ ítí ndi̱tsee̱n nínga síndo ndiꞌaa̱ xotaa̱.
12-14Kósꞌe̱ tji̱e̱nmá Aaroo̱n katsꞌénkꞌasꞌien kui cho̱ xi ꞌbítí nganda tsi̱ꞌe̱ Néná. Kó jaá Aaroo̱n katsꞌénkꞌasꞌiee̱n Aaroo̱n kui cho̱ xi je kitiyaà, kósꞌe̱ Aaroo̱n ítí kui cho̱o̱ nga̱són ṉchandikoón, kó ki̱a̱ ítí to̱ko̱ kui cho̱o̱ nga. Jaskan aniéjón tsiꞌee̱, ko̱jo se kui cho̱o̱, kó ti̱ ítí nga. Kósꞌe̱ jaá Aaroo̱n kijíjo̱ boaꞌaá na̱ꞌmii̱ jiín kui cho̱o̱, kó Aaroo̱n iskjitjónjón nga nijón nga̱ndee̱ kui ṉchandikoón.
15Jaskan ngije kamá kui nii̱, Aaroo̱n katsꞌénkꞌasꞌien kui kjo̱a̱tjoó tsi̱ꞌe̱ nga si̱ꞌanjetakoón jeé xota̱ na̱xi̱ńdaá. Iskjíbé tindso̱ xi tsi̱ꞌe̱ kui kjo̱a̱tjoó, kósꞌe̱ katsꞌénkꞌasꞌiee̱n Néná, kó bo̱a̱ tsꞌén katsꞌénkꞌasꞌien xikó katsꞌeén kjo̱a̱tjó xi tjoón. 16Kó ti̱ ítí kui kjo̱a̱tjoó nganda tsi̱ꞌe̱ Néná nga, kó bo̱a̱ tsꞌén kijítji̱ngi kjo̱a̱kiti xi je ikꞌíjñá nga si̱ꞌan kui nii̱. 17Kui kjo̱a̱tjó xi ni xi maxchá jno̱o̱, iskjíbé ngo tji̱ngo̱ kui nii̱, kó ki̱a̱ ítí nga̱són ṉchandikoón, ki̱a̱ nijan ítí kui kjo̱a̱tjó xi ꞌbítí nga ta̱jño̱ó, nganda tsi̱ꞌe̱ Néná.
18Kó ti̱ Aaroo̱n katsꞌénkꞌién kui cho̱yojo toro̱ ko̱jo kui cho̱tsa̱nga̱ xi jaꞌatji ndi̱ja̱a̱, xi katsjá xota̱ na̱xi̱ńdaá tsi̱ꞌe̱ nga tsíꞌaá Néná nga nda ko̱jo nga tsjatsꞌèn kꞌuíndo, kó katsꞌénkꞌasꞌiee̱n Néná. Kósꞌe̱ jaá Aaroo̱n kijíjo̱ boaꞌaá na̱ꞌmii̱ jiín kui cho̱o̱, kó Aaroo̱n iskjitjónjón nga nijón nga̱ndee̱ kui ṉchandikoón. 19-20Kó nga̱són ṉchandikoón ki̱a̱ ítí ńtsꞌen, ko̱jo chjo̱ondáyaá, ko̱jo ngo chikjan chi̱nga̱ndaa̱, ko̱jo xinié xí kjijon tsiꞌee̱ cho̱yojo toroo̱, ko̱jo kui cho̱tsa̱nga̱ xi jaꞌatji ndi̱ja̱a̱. 21Ta̱nga Aaroo̱n, ta̱kuítsí ni xi niꞌán nga niꞌánkꞌasꞌien ni̱se̱e̱n, ko̱jo ti̱ꞌmi sé xi kixi̱i̱ nga jó kui cho̱o̱ xi katsꞌén. 22Nga fetꞌa, Aaroo̱n yejéntie tsja xtji̱e̱e̱n nínga síndo xota̱ na̱xi̱ńdaá kósꞌe̱ katsꞌénchikonñé.
Néná akó ngaꞌniuú ngindyi̱ko̱n xota̱ Israee̱l
Jaskan ngije katsꞌénkꞌasꞌien Aaroo̱n kjo̱a̱tjoó, jatjoxín boaꞌá nínga tikón ṉchandikoón, 23kó ki̱a̱ tsꞌasꞌien ndiꞌandikoón kui ko̱jo Moisee̱. Ngije jatjoni ki̱a̱a̱ nga joó katsꞌénchikonñé xota̱ na̱xi̱ńdaá. Ngayejee̱ nga kamábe ngaꞌniuú Néná, 24kó kamábe nga Néná katsangiya ndiꞌí xí ítí ngayeje ni xi síndosón nga̱són ṉchandikoón. Ngije kamá kui nii̱, ngayeje xota̱ na̱xi̱ńdaá askjandáyátsjá má, kó kixindyiańña ngaskande nga kisitꞌaa̱ xtjien tꞌanangii̱ nga katsꞌéndikón Néná.
Currently Selected:
Lebitiko̱ 9: MAIX
Highlight
Share
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
