Josuee̱ 9
9
Xota̱ Ngabaóo̱n tsꞌenṉcha̱jo Josuee̱
1Kó kjiꞌanga tsintꞌié kuí nii̱ ngayeje já re xi síndo xi ingoboaá ndejèꞌ Jorndaa̱n, ko̱jo ki̱a̱ nínga na̱xi̱i̱, ko̱jo nínga soón, ko̱jo ki̱a̱ tꞌa Ndáchíkón Jee̱, ki̱a̱ kje̱n nangi Líbanoo̱, ko̱jo nangi xi chji̱a̱ni xota̱ Ee̱t, ko̱jo xota̱ Amoo̱r, ko̱jo xota̱ Kanaa̱n, ko̱jo xota̱ Feree̱, ko̱jo xota̱ Ee̱b, ko̱jo xota̱ Jebuu̱, 2kamátikó xtín, kó índa nga ngo tjín ka̱ma nga skjánjo̱ Josuee̱, ko̱jo xota̱ Israee̱l.
3Ta̱nga, kjiꞌanga xota̱ Ngabaóo̱n tsintꞌié ni xi katsꞌénjo̱ Josuee̱ xota̱ xi chji̱a̱ni na̱xi̱ńdáꞌniú Aii̱, ko̱jo na̱xi̱ńdáꞌniú Jerikoo̱, 4katsꞌénkjién kjo̱a̱kjíntakoón, kó kijí xikoó tsi xota̱xchà kamá tsi̱ꞌe̱ nga kꞌo̱ṉcha̱jo, kósꞌe̱ ísoón bórroó koxta̱ xchá, ko̱jo katsꞌénkaꞌa stsa tji̱xin xchá xí mindyia bino̱, xi je katjondiyá ko̱jo xi tjixtió, 5kó yíyà ndiétjíbo̱a̱, ko̱jo tsajá ńjño xchá xí tjixtió. Kó tsaꞌa pan xi jè kamátajá, ko̱jo xi je katjoxa̱. 6Kó bo̱a̱ kon kamá nga jachó kui jaá ki̱a̱ ndiꞌańjño xi síndo Ngilngaa̱l, kó bi̱ katsoó Josuee̱ ko̱jo xota̱ Israee̱l:
—Ta̱nisién ꞌniú kjin nangi nínga kjindibánijne̱. Kó mejénjne̱ nga ngo ni kꞌuíndajo̱jne̱ jún.
7Ta̱nga xota̱ Israee̱l, bi̱ katsoó kui xota̱ Ee̱b:
—Yàjínjne̱ tsi ti̱ kꞌi̱e̱e̱ tindyiónjnú xtji̱e̱e̱n kui ngi̱ndiee̱, kó míkjo̱a̱a̱ nga ngo ni mejénjnú kꞌuíndajo̱jne̱ ji̱n.
8Kósꞌe̱ kui xota̱ Ngabaóo̱n, bi̱ katsoó Josuee̱:
—Moso̱ tse̱ boá ji̱n.
Kósꞌe̱ Josuee̱, bi̱ katsoó:
—Ta̱nga, ꞌyání bo̱a̱ jún. Kó ñá kjindibánijnú.
9Kósꞌe̱ kui jaá, bi̱ katsó:
Moso̱ tse̱ boá ji̱n ndi̱a̱, kó ta̱nisién ꞌniú kjin nangi nínga kjindibánijne̱, ngatꞌa̱ kandaꞌyájne̱ nga tsie xò ni xi tsꞌén Ne xi tsa̱jún. Kó ti̱ kandaꞌyájne̱ ngayeje ni xi katsꞌén ki̱a̱ nangi Ejiptoo̱ nga, 10ko̱jo ngayeje ni xi katsꞌénjo̱ nga jó já re xi xota̱ Amoo̱r xi síndo xtji̱e̱nnii̱ ngándaá ndejèꞌ Jorndaa̱n, xikoó: Sijoo̱n nda̱ re xi chji̱a̱ni nangi Esboo̱n, ko̱jo Oo̱j nda̱ re xi chji̱a̱ni nangi Basaa̱n, xi síndo xtji̱e̱e̱n na̱xi̱ńdáꞌniú Astaroo̱t. 11Kuíni nga xota̱ xi xchájne̱ ko̱jo ngayeje xota̱ xi síndo nangijne̱, bi̱ katsójne̱ nga tsíchji̱a̱jojne̱:
—Chꞌi̱a̱jnú nichinie tsi̱ꞌe̱ nga kjo̱chíkjo̱a̱jnú ndi̱yà nínga kongínjnú, kó tangínjnú ngaskande nga sa̱kójnú xota̱ Israee̱l, kósꞌe̱ bi̱ tꞌínjnúu̱:
—Moso̱ tsa̱jún boá ji̱n, kó mejénjne̱ nga ngo ni kꞌuíndajo̱jne̱ jún. 12¡Tsitsíjenjnúu̱ kókón panjne̱! Kjiꞌanga jatjojne̱ ndiꞌajne̱ to̱kó sibé ngase, ta̱nga ngotꞌe̱ ꞌne̱ jè kamátajá, ko̱jo jè katjoxa̱. 13Kjiꞌanga ikindyia ji̱n bino̱ kui tji̱xi̱ín, tja̱tsi̱e̱ boá katsaki, ta̱nga ¡tsitsíjenjnúu̱ kókón ngotꞌe̱ ꞌne̱, je katjondiyá! ¡Kó ko̱jo ńjñojne̱ ko̱jo tji̱xíndiéjne̱ jè kamáxchá ta̱ngatꞌanii̱ kui ndi̱yà nínga kjindibánijne̱!
14Kósꞌe̱ xota̱ Israee̱l, iskjíbé kuí nichiniee̱, ta̱nga nde asíyájiín Néná. 15Kó bo̱a̱ tsꞌén nga Josuee̱ índajo̱ ngo kjo̱a̱xió, tsi̱ꞌe̱ nga jmí ni sa̱ꞌínjo̱jín. Kó já ngito̱ko̱ xota̱ Israee̱l katsjátsꞌoá nga sku̱i̱e̱ndikón kuí kjo̱a̱ꞌbíndaa̱.
Xota̱ Israee̱l kamákjiín nga ndyi̱ꞌboṉcha̱ xota̱ Ngabaóo̱n
16Kó xi ma jaán ni̱xtjin, ngije índa kui nii̱, xota̱ Israee̱l tsintꞌié nga xota̱ Ngabaóo̱n, xota̱ xi ki̱a̱ síndotꞌatiñaa̱ nangii̱ boá. 17Kósꞌe̱ xota̱ Israee̱l jatjoni ki̱a̱a̱, kó xi ma jaán ni̱xtjin jachó ngaskande na̱xi̱ńdáꞌniuú kui jaá, kó kuí boá xi na̱xi̱ńdáꞌniú Ngabaóo̱n, ko̱jo na̱xi̱ńdáꞌniú Kafiraa̱, ko̱jo na̱xi̱ńdáꞌniú Beeroo̱t, ko̱jo na̱xi̱ńdáꞌniú Kiriaa̱t-Jearii̱n. 18Ta̱nga xota̱ Israee̱l katsꞌénkjiesónjín, ngatꞌa̱ já ngito̱ko̱o̱ je katsjátsꞌoá nga katsꞌénkjién jaꞌeén Néná xi tsi̱ꞌe̱ xota̱ Israee̱l, nga jmí ni sa̱ꞌínjo̱jín. Kósꞌe̱ ngayeje xota̱ na̱xi̱ńdaá tsíchji̱a̱taꞌin kui já ngito̱ko̱o̱. 19Ta̱nga kui jaá tsꞌaxiéꞌá yojoo̱, nga bi̱ katsoó xota̱ na̱xi̱ńdaá:
—Ngi̱ya jaꞌeén Néná xí tsi̱ꞌe̱ xota̱ Israee̱l boá nga katseꞌéjne̱ ndso̱ꞌbajne̱ nga jmí ni si̱ꞌanjo̱jín ñá kuí xotaa̱. 20Ta̱nga kuí nii̱ xi ka̱ma si̱ꞌanjo̱ tsi̱ꞌe̱ nga kꞌuíndora, ngatꞌa̱ tsájmi̱ Néná sa̱ꞌínjéná, kjo̱a̱a̱ nga je katseꞌéjne̱ ndso̱ꞌbajne̱. 21Kó kui já ngito̱ko̱o̱, bi̱ katsó:
—Ngata̱ jmí ni niꞌánjo̱jínjnú. Kó kui jaá chikín tsatie, ko̱jo ndáfoa íñajaa̱n ngayeje xota̱ Israee̱l, ngatꞌa̱ bo̱a̱ katsoó nga katsjátsꞌoá.
22Kósꞌe̱ Josuee̱ tsíchji̱a̱a̱ xota̱ Ngabaóo̱n, kó bi̱ katsoó:
—Kó míkjo̱a̱a̱ nga kichꞌíṉcha̱konjnú nga bi̱ kiꞌmíjnú: Kjin kjindibánijne̱, kó nga ja̱koxi̱ ti̱ kꞌi̱e̱ní tiña kjindibánijnú. 23Kó ta̱ngatꞌanii̱ kui nii̱, nga ndajín ka̱majnú, kó kuíni nga ngatsjéni̱xtjin kꞌuié ngi̱jinjnú xota̱ xi moso̱, ko̱jo xi botie chikín, ko̱jo xi ku̱i̱ꞌíñijan ndáfoa tsi̱ꞌe̱ ndiꞌa xi tsi̱ꞌe̱ Néna.
24Kó kui jaá, bi̱ katsoó Josuee̱:
Ngatꞌa̱ ji̱n xi moso̱jne̱, ja̱bo̱a̱ jè kiꞌmíyà cha̱n cha̱njne̱ nga Ne tsa̱jún atíxomaa̱ Moisee̱, kui xi mosoo̱, nga kui tsja̱á ngayeje kui tꞌanangii̱, ko̱jo nga sa̱ꞌínkjié ngayeje xota̱ xi síndo ngindyikónjnú, kuíni nga achichí kandakonijne̱ nga kju̱i̱e̱sónjne̱, kó ta̱sá bi̱ kiniꞌánjne̱. 25Ngotꞌe̱ ꞌne̱, ngi̱ya ndse̱ jí tindyionjne̱. Kó ni xi bee̱takín nga nda ko̱jo nga kixi̱ ti̱ꞌinje̱jne̱.
26Kó bo̱a̱ tsꞌén nga Josuee̱ asíko̱jo xota̱ Ngabaóo̱n, kó katsjandièjiín xota̱ Israee̱l nga sa̱ꞌínkjiesón. 27Kó kuí ni̱xtjin jàn Josuee̱ katsjaá xá nga moso̱ kamá, nga tsatie chikín, ko̱jo nga íñajan ndáfoa tsi̱ꞌe̱ xota̱ Israee̱l, ko̱jo tsi̱ꞌe̱ ṉchandikoón Néná. Ngaskande koó nga kiniꞌánꞌindó kui eén to̱kó ndyi̱tsꞌèn tsjé kui xaá xota̱ Ngabaóo̱n, ki̱a̱ ngi̱ndie nínga jaꞌájin Néná nga kꞌuíjñá.
Currently Selected:
Josuee̱ 9: MAIX
Highlight
Share
Compare
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
