Josuee̱ 8
8
Xota̱ Israee̱l askjanjo̱ xota̱a̱ na̱xi̱ńdáꞌniú Aii̱
1Kó Néná, bi̱ katsoó Josuee̱:
¡Ngata̱ ndakinjín má ji, ti̱nde ngata̱ niꞌínkjiéjínkjo̱a̱! Tꞌennijíngí ji na̱xi̱ńdáꞌniú Aii̱, kó tꞌenje̱ ji ngayeje jájuún. Án boá xi tjítsꞌenkꞌasꞌieen ngi̱ya ndse̱ ji nda̱ ree̱, ko̱jo xota̱a̱, ko̱jo na̱xi̱ńdáꞌniuú, ko̱jo tꞌanangii̱. 2Kó bo̱a̱ ti̱ ti̱ꞌinje̱ ji na̱xi̱ńdáꞌniú Aii̱, ko̱jo ree̱, xikó kiniꞌínje̱ ji na̱xi̱ńdáꞌniú Jerikoo̱. Ta̱nga ngotꞌe̱ ꞌne̱, ka̱má chjábéjnú ni xi tjiín, ko̱jo cho̱o̱ kui xotaa̱. Tꞌíjñinde ji ngo tjín jájún xi ngatꞌíndoxtikjá xtji̱e̱e̱n nga̱xto̱n na̱xi̱ńdáꞌniuú, tsi̱ꞌe̱ nga ta̱niján má nga nga kjánjo̱ kui xotaa̱.
3Kó Josuee̱ ko̱jo ngayeje jájuún kisꞌińdonda, kó kijínijíngí nga kijíkjánjo̱ xota̱ na̱xi̱ńdáꞌniú Aii̱, kó jaꞌájin kantié mi̱ jájún xi ꞌniú ngasee̱, kó nga jñoó katsangiya. 4Sꞌe̱ bi̱ katsoó nga atíxomaa̱:
¡Ndaꞌyámájnúꞌun! Ki̱a̱ ti̱ndyionꞌmájnú xtji̱e̱e̱n nga̱xto̱n na̱xi̱ńdáꞌniuú, kó ngata̱ kjinjín mindyiajnú, kó ti̱ndyiondajnú nga ku̱i̱xkánjo̱jnú xota̱a̱. 5Sꞌe̱ jaskan an, ko̱jo ngayeje xota̱ na̱xi̱ńdá xí síndojo̱na, kongíntíñajne̱ na̱xi̱ńdáꞌniuú, kó kjiꞌanga kui xotaa̱ kjo̱tjoni na̱xi̱ńdáꞌniuú nga ko̱e̱je̱kjánjo̱jne̱, xikó katsꞌén kui ni̱xtjin jàn, ku̱i̱yòjne̱ xtji̱e̱e̱n kje̱n. 6Kósꞌe̱ ko̱e̱jengatji̱ngijne̱ ngaskande nga ko̱ꞌna̱xiéjne̱ ki̱a̱ na̱xi̱ńdáꞌniuú, ngatꞌa̱ bi̱ ka̱tso̱: Ndyi̱mongandikónná xikó katsꞌén nga tjón tjoón. 7Tji̱e̱nga ku̱i̱yòjne̱ xtji̱e̱e̱n kje̱n, jún kjo̱tjonijnú ki̱a̱ ngi̱ndie nínga tindyionꞌmájnú, tsi̱ꞌe̱ nga ku̱i̱xkánjo̱jnú xota̱ na̱xi̱ńdáꞌniuú, ngatꞌa̱ Néná jè ngi̱ya ndsa̱ katsꞌénkꞌasꞌienná kuí ngi̱ndiee̱. 8Kó ngije kiniꞌánjnúu̱ xota̱a̱ kui na̱xi̱ńdáꞌniuú, títꞌandiꞌíjnú kui ngi̱ndiee̱ xikótsꞌèn je atíxoma Néná. Kuí bí kui nii̱ xi tsꞌénbotixoma an.
9Kósꞌe̱ bo̱a̱ tsꞌén Josuee̱ katsangiya jájuún tsi̱ꞌe̱ nga kꞌuíndoxtikjá, kó ki̱a̱ kisꞌińdoꞌmá ngamasiee̱n na̱xi̱ńdáꞌniú Betee̱l, ko̱jo na̱xi̱ńdáꞌniú Aii̱, ki̱a̱ xtji̱e̱e̱n nínga ꞌbosꞌien tsꞌueé kui na̱xi̱ńdáꞌniuú. Kó Josuee̱ ki̱a̱ kisꞌijña ngamasiee̱n xota̱ na̱xi̱ńdaá kui ni̱xtji̱e̱e̱n.
10Nga kamángindyiojón, achichí ta̱jñó jastjíe̱n Josuee̱, kó ítikó jájuún. Kó kuí kitsjientjoón xota̱ xi xchá ngito̱ko̱o̱ xota̱ Israee̱l, kósꞌe̱ kijíkjánjo̱ xota̱ na̱xi̱ńdáꞌniú Aii̱. 11Kó Josuee̱ nijan kijíjo̱ ngayeje jájuún nga kijí tiñaa̱ kui na̱xi̱ńdáꞌniuú, kó ngije jachó kje̱n, ki̱a̱ katsꞌénkjaꞌyá xtji̱e̱e̱n ta̱ꞌii̱n na̱xi̱ńdáꞌniú Aii̱. Ngo nangi són kisꞌijñanii̱ xtji̱e̱e̱n ndiꞌańjño nínga kisꞌińdo, ko̱jo nínga tikón na̱xi̱ńdáꞌniuú. 12Kósꞌe̱ Josuee̱ mara̱ ún mi̱ jáxíꞌín atíxomaa̱ tsi̱ꞌe̱ nga ko̱e̱je̱kꞌíndoꞌmá xtji̱e̱e̱n nínga ꞌbosꞌien tsꞌueé na̱xi̱ńdáꞌniuú, ngamasiee̱n na̱xi̱ńdáꞌniú Betee̱l, ko̱jo na̱xi̱ńdáꞌniú Aii̱. 13Bi̱ tsꞌén akjángá yojoo̱ jájuún: Ngo xtín jájuún ki̱a̱ kisꞌińdo xtji̱e̱e̱n ta̱ꞌii̱n na̱xi̱ńdáꞌniuú, ingo xtín kisꞌińdo ki̱a̱ xtji̱e̱e̱n nínga ꞌbosꞌien tsꞌueé, kui xi ta̱niján má kꞌo̱sꞌiennié na̱xi̱ńdáꞌniuú, tji̱e̱nga kui ni̱xtji̱e̱e̱n Josuee̱ kijíboaꞌá ngase ki̱a̱ ngamasiee̱n nangi soón. 14Kjiꞌanga nda̱ ree̱ na̱xi̱ńdáꞌniú Aii̱ kamábe kui nii̱, kui ko̱jo jáxíꞌiín achichí tsá ko̱jo ta̱jñóyà ngase jatjoni na̱xi̱ńdáꞌniuú nga kijíkjánjo̱ xota̱ Israee̱l, ki̱a̱ xtji̱e̱e̱n kje̱n nangi Araba̱, ta̱nga kui xotaa̱ nde bejín tsi xtji̱e̱e̱n nga̱xto̱n na̱xi̱ńdáꞌniuú chjábénií nga ku̱i̱xkánjo̱. 15Kósꞌe̱ Josuee̱ ko̱jo jáxíꞌín xi tsoꞌbájo̱ katsꞌén xikoó tsi je kiniꞌánchaja, kó nga̱xto̱n kijíni, kósꞌe̱ tsanga xtji̱e̱e̱n nangi kixií. 16Ngayeje jájuún na̱xi̱ńdáꞌniú Aii̱, katseꞌékjo̱a̱a̱ tsi̱ꞌe̱ nga ko̱ngatji̱ngii̱ xota̱ Israee̱l, kó kijíngátji̱ngii̱ Josuee̱, sꞌe̱ katsꞌénkjinnii̱ yojoo̱ na̱xi̱ńdáꞌniuú. 17Kó ki̱a̱ na̱xi̱ńdáꞌniú Aii̱, ko̱jo na̱xi̱ńdáꞌniú Betee̱l ngiti̱ ingojín jájún xi kisꞌińdo ngase, ngayejee̱ nga kijíngátji̱ngii̱ xota̱ Israee̱l, kó yejénti̱xa̱ nga̱ntjo̱a̱ jee̱ na̱xi̱ńdáꞌniuú.
Nga kiniꞌánkjié ko̱jo nga kandobá xota̱a̱ na̱xi̱ńdáꞌniú Aii̱
18Kósꞌe̱ Néná, bi̱ katsoó Josuee̱: Tjin ji yáyojó xi katsjayindse̱ ji xtji̱e̱e̱n na̱xi̱ńdáꞌniú Aii̱, ngatꞌa̱ án boá xi sa̱ꞌinkꞌasꞌieen ngi̱ya ndse̱ ji kui ngi̱ndiee̱.
Kósꞌe̱ Josuee̱ iskjininkꞌa tsja, kó yején yáyojó xi kjiyatsja xtji̱e̱e̱n na̱xi̱ńdáꞌniú Aii̱. 19Kó jájún xi síndoꞌmaá nga kamábe nga Josuee̱ iskjininkꞌa yáyojoó, tsanga má nga tsꞌasꞌien na̱xi̱ńdáꞌniuú nga katsꞌéntsi̱ꞌe̱, sꞌe̱ ítꞌandiꞌí ngijee̱. 20Kjiꞌanga jáxíꞌín xi chji̱a̱ni na̱xi̱ńdáꞌniú Aii̱ katsꞌénkꞌafóyá, kamábe nga ṉdi̱i̱ nga tjítí na̱xi̱ńdáꞌniuú ngaskande nkꞌa jàn jè kjochó, ngiti̱ bejín ñání nga ko̱nga ngase, ngatꞌa̱ xota̱ xi ndyi̱monga nangi kixií katsaki, katsꞌéngaꞌniú, kó askjanjo̱ xota̱ xi ndyi̱mongatji̱ngii̱. 21Josuee̱ ko̱jo xota̱ Israee̱l, nga kamábe nga je ikitjasꞌi̱e̱nꞌnié na̱xi̱ńdáꞌniuú, ko̱jo nga ṉdi̱i̱ nga tjítí, je ngaskande nkꞌa jàn kjochó, kijíꞌoyá nginí, kó askjanjo̱ xota̱ na̱xi̱ńdáꞌniú Aii̱, 22tji̱e̱nga xota̱ Israee̱l xi ja̱bo̱a̱ je síndo na̱xi̱ńdáꞌniuú jatjoni ki̱a̱a̱, kó xota̱ Aii̱ ikꞌíchjáꞌyá ngamasiee̱n xota̱ Israee̱l, ja̱kꞌi̱e̱ ja̱ngaján íchjáꞌyá, kósꞌe̱ katsꞌénkjiesón ngaskande nga nde ingojín xi kisꞌińdo ngase. 23Ta̱nga nda̱ ree̱ na̱xi̱ńdáꞌniú Aii̱ kandobá tikón, kósꞌe̱ tsangínjoo̱ Josuee̱.
24Kó ngije xota̱ Israee̱l katsꞌénkjiesón ngayeje xota̱ xi chji̱a̱ni na̱xi̱ńdáꞌniú Aii̱, xi síndo ngi̱jin kꞌijñaá ko̱jo nangi kixií ki̱a̱ nínga kijítji̱ngii̱, ngayejee̱ nga ki̱cha̱ndojó kiniꞌánkjiesónni, sꞌe̱ xota̱ Israee̱l ti̱ kijí nginí na̱xi̱ńdáꞌniú Aii̱, kó katsꞌénkjiesón ngayeje xota̱ xi síndo ngase ki̱a̱a̱. 25Kó kui ni̱xtjin jàn, tiejó mi̱ kamá xi chjo̱on xí xi̱ꞌin xi jesón xi chji̱a̱ni na̱xi̱ńdáꞌniú Aii̱. 26Ngatꞌa̱ Josuee̱ chiíjín jaꞌáxín tsja nga kjiyatsja yáyojoó, ngaskande nga xota̱ Israee̱l katsꞌénkjiesón ngayeje xota̱ xi chji̱a̱ni na̱xi̱ńdáꞌniú Aii̱. 27Kó xota̱ Israee̱l iskjíbé cho̱o̱, ko̱jo ngayeje ni xi tjín ki̱a̱ na̱xi̱ńdáꞌniuú, ngatꞌa̱ Néná xí ja̱bo̱a̱ je bo̱a̱ katsoó Josuee̱ nga ka̱ma bo̱a̱ sa̱ꞌín. 28Jaskan Josuee̱ atíxomaa̱ xotaa̱ nga ku̱i̱ꞌítí na̱xi̱ńdáꞌniú Aii̱, ngaskande nga sa̱ꞌínkjatsón ngayejee̱, xikótsꞌèn tikón ngaskande ngotꞌe̱. 29Kó ngo yá yejénboaꞌa nda̱ ree̱ na̱xi̱ńdáꞌniú Aii̱, kó ki̱a̱ íjñá ngaskande nga kamájñoó, kó ngije tsꞌasꞌien tsꞌueé atíxoma tsi̱ꞌe̱ nga ko̱ꞌne̱je̱ngi yojoo̱ kꞌiee̱n, ko̱jo nga ki̱a̱ kjójmi xtji̱e̱e̱n nínga bitjasꞌi̱e̱nnii̱ na̱xi̱ńdáꞌniuú, sꞌe̱ kjín ndi̱jo̱ ikꞌíndonieé xi akjaꞌmani, kui xi to̱kó síndo tsjé ngaskande ngotꞌe̱.
Josuee̱ katsꞌényà kjo̱a̱kitii̱ ki̱a̱ na̱xi̱ Ebaa̱l
30Kósꞌe̱ Josuee̱ atíxoma nga chjanínkꞌaá ngo ṉchandikón Nee̱ xota̱ Israee̱l ki̱a̱ na̱xi̱ Ebaa̱l, 31xikótsꞌèn Moisee̱, kui nda̱ xi mosoo̱ Néná kamá, atíxomaa̱ xota̱ Israee̱l nga sa̱ꞌínda, xikótsꞌèn kjitꞌa ki̱a̱ xo̱jo̱n kjo̱a̱kiti xi katsꞌénꞌindó Moisee̱ nínga bi̱ tsoó: Ngo ṉchandikón xí ndi̱jo̱ ndo̱jò soboá soboá ti̱ꞌinde ji, ndi̱jo̱ xi kji̱e̱ ta̱ꞌyajínni xi bokján. Kó ki̱a̱ boá nínga ikꞌítií cho̱, ko̱jo kiniꞌánkꞌasꞌiee̱n kjo̱a̱tjó tsi̱ꞌe̱ kjo̱a̱xió Néná.
32Kó Josuee̱ ti̱ ki̱a̱ jaꞌátꞌa ngo tie ndi̱jo̱ xikó tsó kjo̱a̱kiti xi katsꞌénꞌindó Moisee̱, ngindyi̱ko̱n ngayeje xota̱ Israee̱l. 33Kó ngayeje xota̱ Israee̱l, ko̱jo xota̱ xi xchaá, ko̱jo xota̱ xi nkꞌa xaá, ko̱jo nendiꞌamasiee̱n, jó tjín akjángá yojoo̱ nga kamátikó, kó ki̱a̱ kixindyia nga ngo ndiè nga ngo ndieè já chináꞌmi xi ndyi̱yaꞌankꞌá koxa̱a̱ kjo̱a̱ꞌbíndaa̱ Néná. Kó já xí xín nangi chji̱a̱ni, ko̱jo xota̱ xi chji̱a̱ni kui ngi̱ndiee̱, masien kixindyia xtji̱e̱e̱n na̱xi̱ Jerisii̱n, kó xi ingo tjiín xtji̱e̱e̱n na̱xi̱ Ebaa̱l kixindyia, xikó má tsꞌén atíxoma nga tjón tjón Moisee̱, nda̱ xi mosoo̱ Néná kamaá, tsi̱ꞌe̱ nga si̱ꞌanchikonñé xota̱ Israee̱l. 34Jaskan ngije kamá kui nii̱, Josuee̱ katsꞌényà ngayeje ni xi kjitꞌa xo̱jo̱n kjo̱a̱kitii̱, ko̱jo katsꞌényà kjo̱a̱niꞌánchikonñeé, ko̱jo ni xi ndajiín, xikótsꞌèn kjitꞌa xo̱jo̱o̱n. 35Kó Josuee̱ katsꞌényà ngayeje én xí kjitꞌa kjo̱a̱kitii̱, xi atíxoma Moisee̱ ngindyi̱ko̱n xota̱ Israee̱l, ko̱jo ngindyi̱ko̱n xi chjo̱on xí xi̱ꞌin, ko̱jo jákjíndí, ko̱jo xota̱ xi xín nangi chji̱a̱ni xi ki̱a̱ kisꞌińdojii̱n.
Currently Selected:
Josuee̱ 8: MAIX
Highlight
Share
Compare
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
