Josuee̱ 10
10
Xota̱ Israee̱l katsꞌeén nga askjanjo̱ xota̱ tji̱e̱e̱ Amoo̱r
1Kó kjiꞌanga Andonisendee̱k, nda̱ re xi chji̱a̱ni na̱xi̱ńdáꞌniú Jerusalee̱n, tsintꞌié nga Josuee̱ katsꞌeén nga askjanjo̱, ko̱jo nga katsꞌénkjatsón ngayeje ni xi tjiín na̱xi̱ńdáꞌniú Aii̱ ko̱jo nda̱ ree̱, xikó má katsꞌénjo̱ na̱xi̱ńdáꞌniú Jerikoo̱ ko̱jo nda̱ ree̱. Kó ti̱ tsintꞌié nga xota̱ Ngabaóo̱n índajo̱ ngo kjo̱a̱xió xota̱ Israee̱l, ko̱jo nga ki̱a̱ je síndojii̱n kui xotaa̱, 2achichí katsakjónní, ngatꞌa̱ na̱xi̱ńdáꞌniú Ngabaóo̱n, kuí boá xi kamá ngo na̱xi̱ńdáꞌniú xi ta̱nisién ndikón ngase, ta̱bo̱a̱jiín na̱xi̱ńdáꞌniú Aii̱, kje̱ꞌení nga xota̱a̱ ta̱nisién ꞌniú chꞌokon kamá nga. 3Kuíni nga Andonisendee̱k katsangiyaa̱ én já re kui xi: Oaa̱n xi chji̱a̱ni na̱xi̱ńdáꞌniú Ebroo̱n, ko̱jo Pireaa̱n xi chji̱a̱ni na̱xi̱ńdáꞌniú Jarmuu̱t, ko̱jo Jafíaa̱ xi chji̱a̱ni na̱xi̱ńdáꞌniú Lakii̱, ko̱jo Ndebii̱r xi chji̱a̱ni na̱xi̱ńdáꞌniú Englóo̱n. Kó én xi katsangiyaa̱, bi̱ tsó: 4Ndibájnú kꞌi̱e̱e̱, kó tasíko̱jojnúꞌun nga nga si̱ꞌáa̱n nga ku̱i̱xkánjo̱ xota̱ Ngabaóo̱n, ngatꞌa̱ jè índajo̱ ngo kjo̱a̱xió Josuee̱ ko̱jo xota̱ Israee̱l.
5Kó ún kui já re xi chji̱a̱ni xota̱ Amoo̱r kui xi: Re xi chji̱a̱ni na̱xi̱ńdáꞌniú Jerusalee̱n, ko̱jo xi chji̱a̱ni na̱xi̱ńdáꞌniú Ebroo̱n, ko̱jo xi chji̱a̱ni na̱xi̱ńdáꞌniú Jarmuu̱t, ko̱jo xi chji̱a̱ni na̱xi̱ńdáꞌniú Lakii̱, ko̱jo xi chji̱a̱ni na̱xi̱ńdáꞌniú Englóo̱n xi ngo tjín katsꞌén yojoo̱, kó kijí ko̱jo jájuún, kó ki̱a̱ kisꞌińdotꞌa tiñaa̱ na̱xi̱ńdáꞌniú Ngabaóo̱n, sꞌe̱ askjanjo̱ kui xotaa̱. 6Kósꞌe̱ xota̱ na̱xi̱ńdáꞌniú Ngabaóo̱n katsangiyaa̱ én Josuee̱, ki̱a̱ nínga síndo ndiꞌańjñoo̱ ki̱a̱ Ngilngaa̱l, kó bi̱ katsoó: ¡Tsá ndibá chiíjnú kꞌi̱e̱e̱, tsi̱ꞌe̱ nga ko̱ꞌna̱xiéꞌéjne̱ ko̱jo nga ko̱si̱ke̱jejne̱! ¡Ngata̱ ꞌbíjñímasínjínjne̱! Ngatꞌa̱ ngayeje já re xi chji̱a̱ni xota̱ Amoo̱r xi síndo xtji̱e̱e̱n na̱xi̱i̱, ngo tjín jè katsꞌén yojoo̱, kó jè síndonda nga skjánjo̱jne̱ ji̱n.
7Kó Josuee̱ jatjoni xtji̱e̱e̱n Ngilngaa̱l, ko̱jo ngayeje jájún xi fí kjo̱a̱xcha̱án, ko̱jo ngayeje já xí chꞌokoo̱n. 8Ngindiee̱ nga kjo̱tjo, Néná tsíchji̱a̱jo Josuee̱, nga bi̱ katsoó: Ngata̱ ndakinjín má ji, ngatꞌa̱ án boá xi je tjítsꞌenkꞌasꞌieen ngi̱ya ndse̱, kó nde ingojín kui xotaa̱ xi sa̱ꞌiín.
9Kó nga ngo ni̱xtji̱e̱e̱n Josuee̱, ko̱jo jájuún jatjoni Ngilngaa̱l, kósꞌe̱ ta̱niján má tsꞌasꞌiennié nga askjanjo̱ kui xota̱. 10Kó Néná boá xí katsꞌén nga achichí katsakjónní xota̱ Ngabaóo̱n, nga kamábe jájún Israee̱l kui ngi̱ndiee̱. Kó xota̱ Israee̱l achichí kjín má xota̱ xi katsꞌénkjiesón, kó tsangatji̱ngii̱ xi ngase xotaa̱ ngaskande xtji̱e̱nnii̱ ndi̱yà xí fínijíngí ki̱a̱ na̱xi̱ńdáꞌniú Bee̱t-Oroo̱n, ko̱jo ngaskande ki̱a̱ na̱xi̱ńdáꞌniú Asekaa̱, ko̱jo na̱xi̱ńdáꞌniú Masendaa̱. 11Kó kjiꞌanga ndyi̱monga xota̱ Amoo̱r, ngindyi̱ko̱n xota̱ Israee̱l xtji̱e̱e̱n nínga fíjayanii̱ ndi̱yà xí tikón ki̱a̱ na̱xi̱ńdáꞌniú Bee̱t-Oroo̱n, Néná katsꞌénkixóñeé ndókoá xí ja̱kon ndi̱jo̱ yiꞌi má kón xi ixóni nkꞌa jàn, ngaskande nga fóchó na̱xi̱ńdáꞌniú Asekaa̱, kó jesón. Kó kjín ngase kamá xota̱ xi kui ndókoaá katsꞌénkjiesón, ta̱bo̱a̱jiín xi katsꞌénkjiesón jájún Israee̱l.
12Kó ni̱xtjin nga Néná katsjaá nga katsꞌeén xota̱ Amoo̱r, Josuee̱ tsíchji̱a̱a̱ Néná ngindyi̱ko̱n ngayeje xota̱ Israee̱l, kó bi̱ katsoó:
Ji tsꞌué, ngiti̱ niꞌíntíyéjín ji,
ti̱ndyinra ji kꞌi̱e̱ Ngabaóo̱n.
Kó jí sá, chiyéra ji ki̱a̱ nangi soón Ayaloo̱n.
13Kósꞌe̱ tsꞌueé kisꞌijña xió,
kó saá ngiti̱ katsꞌéntíyájín,
ngaskande nga xota̱ Israee̱l
katsꞌénkjiesón yeje kondra̱a̱.
A ki̱a̱jín kjitꞌa kui nii̱, ki̱a̱ Xo̱jo̱o̱n Jasee̱r. Tsꞌueé kisꞌijña xió ngamasiee̱n nkꞌa jàn, kó mejeén nga ngo ni̱xtjii̱n nga tsꞌasꞌienjín tsꞌueé. 14Ngiti̱ ingojín ndi̱yà, ko̱jo tsi jaskan nga kꞌuié ngase ngo ni̱xtjin xikoó xi̱ꞌbi̱, kjiꞌanga Néná tsintꞌieé ngo nda̱ xi tsíchji̱a̱. ¡Kjo̱a̱a̱ nga Néná boá xi askjantjé ngayeje xota̱ Israee̱l! 15Jaskan ngije katsꞌeén xota̱ Amoo̱r, Josuee̱ ko̱jo jájuún, kijí nginí ki̱a̱ nínga síndo ndiꞌańjñoo̱ ki̱a̱ Ngilngaa̱l.
Nga kandobá ko̱jo nga kiniꞌánkꞌién nga ún já ree̱ xi chji̱a̱ni xota̱ tji̱e̱e̱ Amoo̱r
16Kó nga ún kui já re xi chji̱a̱ni xota̱ Amoo̱r jatjoo̱ yojoo̱ nga tsanga, kósꞌe̱ ki̱a̱ kijíkꞌíndoꞌmá ngo ti̱xa̱na̱xi̱, xtji̱e̱nnii̱ nangi Makendaa̱. 17Ta̱nga kui nii̱ kiniꞌánkintꞌié Josuee̱, nga bi̱ kiꞌmií: Nga ún kui já ree̱, ki̱a̱ síndoꞌmá ngo ti̱xa̱na̱xi̱ ki̱a̱ Makendaa̱. 18Kó bi̱ tsꞌén atíxoma Josuee̱: Ti̱ꞌangátíkjayájnú ndi̱jo̱ xi yiꞌi ngaskande ngi̱xtio nga̱ntjo̱a̱a̱ ti̱xa̱na̱xi̱i̱, kósꞌe̱ tꞌíndojnú jájún xi skondá. 19Ta̱nga jún ngata̱ ki̱a̱jín xió mindyiajnú. Tangíntji̱ngíjnúu̱ kui já kondraa̱, kó xtji̱e̱e̱n nga̱xto̱n te̱ꞌéchjíjnúu̱, ngata̱ boeꞌéndièjínjnúu̱ nga kꞌo̱sꞌien ki̱a̱ na̱xi̱ńdáꞌniuú, ngatꞌa̱ Néná jè ngi̱ya ndsa̱ katsꞌénkꞌasꞌienná kondra̱ná.
20Kó Josuee̱ ko̱jo xota̱ Israee̱l achichí kjín xota̱ xi chji̱a̱ni xota̱ Amoo̱r xi katsꞌénkjiesón, ngaskande nga katsꞌénkjié yeje, ta̱nga xi tsꞌangii̱ yojoo̱ tsangaꞌma nga tsꞌasꞌien na̱xi̱ńdáꞌniú xi nda tjíchjáꞌyaá. 21Kó ngayeje xota̱ na̱xi̱ńdá Israee̱l nda jatjoo̱ yojoo̱ nga kijí nginí nínga tikón Josuee̱, ki̱a̱ nínga síndo ndiꞌańjñoo̱ ki̱a̱ Makendaa̱, kó nde ngojín xota̱ xi kamá tsíchji̱a̱taꞌin xota̱ Israee̱l.
22Kósꞌe̱ Josuee̱, bi̱ katsó: Chjáxꞌájnú ki̱a̱ ngi̱xtio nga̱ntjo̱a̱a̱ ti̱xa̱na̱xi̱i̱, kó ꞌnaxiéjnú nga ún kui já ree̱. 23Kó bo̱a̱ katsꞌén kui xotaa̱, tsꞌaxié ki̱a̱ ti̱xa̱na̱xi̱i̱ nga ún kui já ree̱, kui xi chji̱a̱ni na̱xi̱ńdáꞌniú Jerusalee̱n, ko̱jo na̱xi̱ńdáꞌniú Ebroo̱n, ko̱jo na̱xi̱ńdáꞌniú Jarmuu̱t, ko̱jo na̱xi̱ńdáꞌniú Lakii̱, ko̱jo na̱xi̱ńdáꞌniú Englóo̱n. 24Kó ngije tsangínjoo̱ Josuee̱, Josuee̱ tsíchji̱a̱a̱ ngayeje jáxíꞌín xi chji̱a̱ni Israee̱l, kó bi̱ katsoó ngito̱ko̱o̱ jájún xi nijan kijíjoo̱: Ndibáboáꞌájnú kꞌi̱e̱e̱, kó tꞌíjñásónjnúu̱ ndsa̱kojnú kjásén kui já ree̱.
Kósꞌe̱ kijíboaꞌá kui jájuún, kó íjñasoón se kjásén kui já ree̱, 25kó Josuee̱, bi̱ katsoó: ¡Ngata̱ ndakonjínmájnú, ti̱ꞌangaꞌniújnú, kó ꞌniú ti̱ndyiàjnú, ngatꞌa̱ Néná, bo̱a̱ sa̱ꞌínjo̱ ngayeje kondra̱ xi ku̱i̱xkánjo̱jnú jún!
26Jaskan Josuee̱ katsꞌénkjiesón nga ún kui já ree̱, kó ńgó ńgó yejénboaꞌa ngo yá nkꞌa, kó ki̱a̱ kitsjienboaꞌa kui yaá ngaskande nga kamájñoó. 27Kó kjiꞌanga je tsꞌénꞌbosꞌien tsꞌueé, Josuee̱ katsangiya jájuún tsi̱ꞌe̱ nga kꞌo̱e̱je̱ngini yojo kꞌiee̱n kui yaá, kó ki̱a̱ indyiá ki̱a̱ ngi̱ya ti̱xa̱na̱xi̱ nínga kisꞌińdoꞌmaá. Kósꞌe̱ ndi̱jo̱ xi ꞌniú yiꞌi íchjáni ngi̱xtio nga̱ntjo̱a̱a̱ kui ti̱xa̱na̱xi̱i̱, kui xi ngaskande ngotꞌe̱ to̱kó ki̱a̱ tjíndo.
Josuee̱ katsꞌén ngasee̱ tꞌanangii̱ xota̱ tji̱e̱e̱ Amoo̱r
28Ti̱kuii ni̱xtjin Josuee̱, katsꞌeén na̱xi̱ńdáꞌniú Makendaa̱ nga, kó ki̱cha̱ndojó katsꞌénkꞌiénni ngayeje xota̱ na̱xi̱ńdáꞌniuú, ko̱jo nda̱ ree̱, kó nde ingojín xi tsꞌangii̱ yojoo̱. Kó nda̱ ree̱, ti̱ bo̱a̱ ti̱ katsꞌénjo̱ xikó katsꞌénjo̱ nda̱ ree̱ na̱xi̱ńdáꞌniú Jerikoo̱, xikoó tsi ngo kjo̱a̱tjó xi katsꞌénkꞌasꞌiee̱n Néná.
29Sꞌe̱ ki̱a̱ Makendaa̱ jatjoni Josuee̱ ko̱jo jájuún nga kijí Libnaa̱, kó ti̱ askjanjo̱ xotaa̱ kui ngi̱ndiee̱ nga. 30Kó Néná ti̱ katsꞌénkꞌasꞌiee̱n ngi̱ya tsja kui na̱xi̱ńdáꞌniuú ko̱jo ree̱, kó ki̱cha̱ndojó katsꞌénkjiesónni, nga nde ingojín xi tsꞌangii̱ yojoo̱. Kó nda̱ ree̱ ti̱ bo̱a̱ ti̱ katsꞌénjo̱ xikó katsꞌénjo̱ nda̱ ree̱ na̱xi̱ńdáꞌniú Jerikoo̱.
31Jaskan Josuee̱ ko̱jo jájuún jatjoni na̱xi̱ńdáꞌniú Libnaa̱, sꞌe̱ kijí na̱xi̱ńdáꞌniú Lakii̱, kó ki̱a̱ kisꞌińdo tiñaa̱, sꞌe̱ jaskan askjanjo̱ ngijee̱. 32Kó xi ma joó ni̱xtjin Néná katsꞌénkꞌasꞌien ngi̱ya tsja xota̱ Israee̱l na̱xi̱ńdáꞌniú Lakii̱, kó ki̱cha̱ndojó katsꞌénkjiesónni ngayeje xotaa̱, nde ingojín xi tsꞌangii̱ yojoo̱, xikó má katsꞌénjo̱ xota̱ na̱xi̱ńdáꞌniú Libnaa̱ nga. 33Kósꞌe̱ Oraa̱n nda̱ re xi chji̱a̱ni na̱xi̱ńdáꞌniú Ngésee̱r kijíkasikójo na̱xi̱ńdáꞌniú Lakii̱ katsaki, ta̱nga Josuee̱ katsꞌénkjiesón kui nda̱ ree̱ ko̱jo xota̱a̱, ngaskande nga nde ngiti̱ ingojín xi katsꞌénkꞌangi.
34Sꞌe̱ Josuee̱ ko̱jo jájuún ki̱a̱ na̱xi̱ńdáꞌniú Lakii̱ jatjoni nga kijí na̱xi̱ńdáꞌniú Englóo̱n, kó ki̱a̱ kisꞌińdo tiñaa̱ kui na̱xi̱ńdáꞌniuú, kósꞌe̱ askjanjo̱ ngijee̱. 35Ti̱kuii ni̱xtjin katsꞌéntsi̱ꞌe̱ kui na̱xi̱ńdáꞌniuú, kó ki̱cha̱ndojó katsꞌénkjiesónni ngayeje xota̱ xi ki̱a̱ síndo, xikó má kiniꞌánjo̱ xotaa̱ na̱xi̱ńdáꞌniú Lakii̱.
36Jaskan Josuee̱ ko̱jo ngayeje jájuún jatjoni na̱xi̱ńdáꞌniú Englóo̱n nga kijí na̱xi̱ńdáꞌniú Ebroo̱n, kó askjanjo̱ xota̱ na̱xi̱ńdaá kui ngi̱ndiee̱, 37kó katsꞌeén. Kósꞌe̱ ki̱cha̱ndojó katsꞌénkjiesónni nda̱ ree̱, ko̱jo ngayeje xota̱a̱ kui na̱xi̱ńdáꞌniuú, kó nde ingojín xi tsꞌangii̱ yojoo̱, xikó má katsꞌénjo̱ xota̱ na̱xi̱ńdáꞌniú Englóo̱n. Kó katsꞌénkjié yeje.
38Jaskan Josuee̱ ko̱jo xota̱ na̱xi̱ńdá Israee̱l kijí xtji̱e̱e̱n na̱xi̱ńdáꞌniú Ndebii̱r, kó askjanjo̱ kui xotaa̱ nga, 39katsꞌéntsi̱ꞌe̱ kui na̱xi̱ńdáꞌniuú ko̱jo nda̱ ree̱, ko̱jo xota̱a̱, kó katsꞌénkjatsón ni xi tjiín, ko̱jo ki̱cha̱ndojó katsꞌénkjiesónni ngayeje xota̱ xi ki̱a̱ síndoo̱. Xikó katsꞌénjo̱ na̱xi̱ńdáꞌniú Ebroo̱n, ko̱jo na̱xi̱ńdáꞌniú Libnaa̱ ko̱jo ree̱, bo̱a̱ katsꞌénjo̱ na̱xi̱ńdáꞌniú Ndebii̱r, ko̱jo nda̱ ree̱ nga.
40Kó bo̱a̱ tsꞌén nga Josuee̱ katsꞌéntsi̱ꞌe̱ ngayeje kui nangii̱. Askjan nínga na̱xi̱, ko̱jo nangi Nengee̱b, ko̱jo nangi nínga soón, ko̱jo nínga tji̱ngi̱i̱, kó katsꞌénkjiesón ngayeje já ree̱, nde ingojín xi katsꞌénkꞌangi, xikó má tsꞌén Néná atíxomaa̱ xota̱ Israee̱l nga sa̱ꞌín. 41Josuee̱ kijíjo̱ jájuún ndeskande nangi Kandee̱-Barnea̱, ngaskande nangi Ngasa̱, ko̱jo ngayeje nangi Ngosee̱n, ko̱jo ngaskande na̱xi̱ńdáꞌniú Ngabaóo̱n. 42Kó bo̱a̱ tsꞌén nga Josuee̱ katsꞌeén ngayeje já re xi síndo kui nangii̱, ko̱jo tꞌanangii̱, ngatꞌa̱ bo̱a̱ tsꞌén atíxoma Nee̱ xota̱ Israee̱l, kui Ne xi askjantjéni kui xotaa̱.
43Kó Josuee̱ ko̱jo ngayeje xota̱ Israee̱l, kijí nginí nínga síndo ndiꞌańjñoo̱ ki̱a̱ Ngilngaa̱l.
Currently Selected:
Josuee̱ 10: MAIX
Highlight
Share
Compare
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
