Josuee̱ 7
7
Jé xí katsꞌén Akaa̱n
1Ta̱nga xota̱ Israee̱l ngo ni xi ꞌniú ndajín katsꞌén, ngatꞌa̱ Akaa̱n ndií Karmii̱, ndíndee̱ Sabndii̱, ndínde xi ma joó Seraa̱ xi chji̱a̱ni xota̱ tji̱e̱e̱ Jundáa̱, iskjíbé chiboa ni ndikón xí chjiéngá si̱ꞌankjatsoón katsaki. Kuíni nga Néná achichí ꞌniú katsꞌénxchánjo̱ni xota̱ Israee̱l.
2Jaskan Josuee̱, ndeskande na̱xi̱ńdáꞌniú Jerikoo̱ katsangiya chiboa jáxíꞌín xi kijí na̱xi̱ńdáꞌniú Aii̱. Kui na̱xi̱ńdáꞌniuú xtji̱e̱e̱n nínga fotjo tsꞌueé na̱xi̱ńdáꞌniú Betee̱l tikón, tiñaa̱ ngi̱ndie xi ꞌmí Bee̱t-Abee̱n. Kó Josuee̱, bi̱ katsoó kui jaá: Tangínjnú, kó tsitsíjenjnúu̱ ngayeje ni xi tjín ki̱a̱ na̱xi̱ńdáꞌniú Aii̱.
Kó kui jaá kijí, kó kijíkatsijenꞌmaá na̱xi̱ńdáꞌniú Aii̱. 3Kó ngije jeꞌeꞌoyá nginí kui jaá, bi̱ katsó nga íni̱jmi̱ì Josuee̱: Jmí kjo̱a̱jín nga ko̱na̱ngíyá ngayeje jájuún, tsi̱ꞌe̱ nga skjánjo̱ kui xotaa̱. Tsi jó ko̱jo tsi ján tsí mi̱ jájún, jè ka̱manii̱. Jè sa̱ꞌiín na̱xi̱ńdáꞌniú Aii̱, ngatꞌa̱ chiboa tsí má kui xotaa̱.
4Kósꞌe̱ mara̱ tsi ta̱ ján mi̱ jáxíꞌín xi kijíkjánjo̱ xotaa̱ na̱xi̱ńdáꞌniuú, ta̱nga xota̱ xi chji̱a̱ni na̱xi̱ńdáꞌniú Aii̱ katsꞌeén nga askjanjo̱, 5kó xota̱ na̱xi̱ńdáꞌniú Aii̱ katsꞌénkjiesón kantjiꞌún ngo xota̱ Israee̱l, tsangatji̱ngii̱ ndeskande nga̱ntjo̱a̱a̱ na̱xi̱ńdáꞌniuú, ngaskande ngi̱ndie xi ꞌmí Sebarii̱n, kó ki̱a̱ katsꞌeén nínga fíjayaa̱, kuíni nga achichí ni xi kamaá ini̱ma̱a̱, kó katsꞌénchi̱ni.
6Kósꞌe̱ Josuee̱ ko̱jo xota̱ xi xchá ngito̱ko̱o̱ xota̱ Israee̱l tsꞌatójó yojoo̱ kje̱n koxa̱a̱ kjo̱a̱ꞌbíndaa̱ Néná, kó iskjíndiyájón ńjñoo̱, ko̱jo ndiso indyiaá to̱ko̱, tsi̱ꞌe̱ nga akó kjo̱a̱ndasee̱n. Kó bo̱a̱ tsꞌén kisꞌińdo ngaskande nga kamájñoó. 7Kó Josuee̱, bi̱ katsó:
—Ai, ai Ne tsa̱ji̱n, ji xi botíxomejne̱ ngayeje ji̱n, míkjo̱a̱a̱ nga kiniꞌínkꞌatijne̱ ndejèꞌ Jorndaa̱n. A tsi̱ꞌe̱ nga ngi̱ya tsja xota̱ Amoo̱r si̱ꞌankꞌasꞌienjne̱, sꞌe̱ si̱ꞌankjiejne̱. ¡Ta̱sara̱ nda kisꞌie tsi ki̱a̱ kixindyionrajne̱ xi ingoboaá ndejeèꞌ! 8Ji Ne tsa̱ꞌa̱n, mí xí xián án ngotꞌe̱ ꞌne̱, nga xota̱ Israee̱l jè katsꞌénchi̱ni, kó ndyi̱mongandikoón kondra̱a̱. 9Ngatꞌa̱ kjiꞌanga ku̱i̱ntꞌiè xota̱ Kanaa̱n, ko̱jo ngayeje xota̱ xi síndo kui ngi̱ndiee̱, ku̱i̱ꞌíchjáꞌyájne̱ kósꞌe̱ sa̱ꞌínkjiéjne̱. Kósꞌe̱ mí ni xi si̱ꞌin ji ngijee̱, tsi̱ꞌe̱ nga bo̱a̱jín ka̱tso̱ nga kamájiín kichíi̱n xota̱ na̱xi̱ńdáa̱.
10Ta̱nga Néná, bi̱ katsoó Josuee̱:
—¡Ti̱sítji̱n ji! Ánní nga titsjajnitsakjínkon ji ki̱a̱ tꞌanangii̱. 11Xota̱ Israee̱l katsꞌénjé boá. Tsanganié ni xi indajo̱ an kui, kó iskjíbé chiboa ni xi ndajín xi tjín ki̱a̱a̱. Katsꞌénchejé, kó índoꞌmá ngi̱jii̱n ni xi tsi̱ꞌe̱, kósꞌe̱ jaskan índiso kjo̱a̱a̱ kui ni xi katsꞌén. 12Kuíni nga xota̱ Israee̱l ka̱májiín sa̱ꞌiín xota̱ xi kondra̱a̱. Ta̱sá ko̱nga, ngatꞌa̱ jè be nga ndajín katsꞌén. Tsi si̱ꞌankjatsónjínjnú kui ni xi ndajiín xi tikón ngi̱jinjnú, ngiti̱ kosiko̱jojínjnúꞌun. 13Ti̱sítji̱n ji, kó tatíxomée̱ xota̱ na̱xi̱ńdaá nga, ngatsꞌéntsjie yojoo̱, kó bi̱ tꞌíi̱n: Ndyiojón ti̱ꞌantsjiejnú yojojnú, ngatꞌa̱ Néná xi tsi̱ꞌe̱ xota̱ Israee̱l, bi̱ tsó: Ni xi ndajín tikónjinjnú jún xota̱ Israee̱l, kó ka̱májín si̱ꞌánjnúu̱ kondra̱jnú, ngaskande nga chja̱ꞌáxín kui ni xi ndajiín ngi̱jinjnú. 14Kuíni nga ndyiojón xki̱ ńgó ńgó xtín xota̱ tji̱e̱ tꞌítikójnú xingi̱jnú. Kó kui xtín xota̱ tji̱e̱ xi ko̱kó Néná, kuí boá xi kjo̱a̱ꞌa xtji̱e̱e̱n kje̱e̱n ngayeje xtín xota̱ ndiꞌaa̱, kó kui xtín xota̱ ndiꞌa xi koko an, kuí boá xi kjo̱a̱ꞌa xtji̱e̱e̱n kje̱e̱n ngayeje xota̱ ndiꞌaa̱. Jaskan xota̱ ndiꞌa xi ko̱kó nginí Néná, kuí boá xi kjo̱a̱ꞌa xtji̱e̱e̱n kje̱n ngayeje jáxíꞌiín, xki̱ ńgó ńgó. 15Kó kui nda̱ xi koko an, kuí boá xi tikoón ni xi chjiéngá si̱ꞌankjatsoón katsaki. Tꞌítí tikónjnú kuí, ko̱jo ngayeje xota̱ ndiꞌaa̱, ko̱jo ngayeje ni xi tjiín, ngatꞌa̱ katsꞌénkjatjosónjín ni xi je índajo̱ Ndi̱a̱ná. Kui ni xi katsꞌén kui xotaa̱ kjo̱a̱soboá boá, tsi̱ꞌe̱ ngayeje xotaa̱ na̱xi̱ńdá Israee̱l.
16Nga kamángindyiojón kamátikó xota̱ Israee̱l. Kó Josuee̱ tsíchji̱a̱a̱ tsi̱ꞌe̱ nga ko̱e̱je̱kon tiñaa̱ nga ngo nga ngo xtín xota̱ tji̱e̱e̱, kó xota̱ tji̱e̱e̱ Jundáa̱ akako. 17Kósꞌe̱ ńgó ńgó xtín xota̱ ndiꞌaa̱ Jundáa̱ jachó, kósꞌe̱ akako xtín xota̱ ndiꞌaa̱ Seraa̱. Kó nga kijíkóntiñaa̱ xtín xota̱ ndiꞌaa̱ Seraa̱, akako xota̱ ndiꞌaa̱ Sabndii̱, 18kó katsꞌénkjaꞌa kje̱e̱n ńgó ńgó ngayeje jáxíꞌiín. Kósꞌe̱ akako Akaa̱n, ndií Karmii̱, ndíndee̱ Sabndii̱, ndínde xi ma joó Seraa̱, xi xota̱ tji̱e̱e̱ Jundáa̱. 19Kósꞌe̱ Josuee̱, bi̱ katsoó Akaa̱n:
—Ji xi̱ꞌin, te̱ꞌée̱ kjo̱a̱je Néná, kui xi Nee̱ xota̱ Israee̱l, kó tꞌíyé ja̱koxi̱ ja̱koxi̱ní ni xi kiniꞌín ji, kó ngata̱ jmí ni ꞌbíꞌmíjínní.
20Kó Akaa̱n, bi̱ katsoó Josuee̱:
—Jo̱o̱n, ja̱koxi̱ boá. ¡Katsꞌenjé án ngindyi̱ko̱n Néná xí tsi̱ꞌe̱ xota̱ Israee̱l! Kó bi̱ kjíꞌí ni xi katsꞌen an: 21Ngi̱jii̱n ni xi kachjábé ji̱n, kamábe an ngo ńjño xi fotꞌa nga̱xtón xi achichí tsjákjiꞌi xi chji̱a̱ni nangi Babilonia̱, ko̱jo jó kilo̱ to̱ntiboa, ko̱jo ngo chikjan to̱nsinié xi tsꞌatio masien kilo̱ é. Achichí ꞌniú kamátsjána kui nii̱, kó iskjíbé án, kósꞌe̱ ki̱a̱ ínijín an ngindie ndiꞌańjñona. Kó to̱ntiboaa̱ ngaskande ngindie jàn tikón.
22Kó Josuee̱ katsangiya jó jáxíꞌín ki̱a̱ ndiꞌańjñoo̱ Akaa̱n. Kó kui jaá tsanga má nga kijí, kó ki̱a̱ kasako ngayeje ni xi ínijín Akaa̱n. Kó to̱ntiboaa̱ ngaskande ngindiee̱ ngayeje kui nii̱ tikón. 23Kósꞌe̱ kui jaá jatjoni ki̱a̱ ndiꞌańjñoo̱, nga kijíjoo̱ Josuee̱ ni xi kasakoo̱ ki̱a̱ nínga tikónjo̱ xota̱ na̱xi̱ńdaá. Kó ngindyi̱ko̱n Néná índo ngayeje kui nii̱. 24Kósꞌe̱ Josuee̱ ko̱jo ngayeje xota̱ Israee̱l kijíjo̱ Akaa̱n ndií Seraa̱, ko̱jo to̱ntiboaa̱, ko̱jo ńjño xi fotꞌa nga̱xtón, ko̱jo to̱nsinieé, ko̱jo ndí xíꞌiín, ko̱jo ndí ínchjiín, ko̱jo cho̱yojoo̱, ko̱jo bórroó, ko̱jo cho̱tsa̱nga̱a̱, ko̱jo ndiꞌańjñoo̱, ko̱jo ngayeje ni xi tjiín, kó ki̱a̱ tsangínjo̱ nínga soón nangi Akoo̱r. 25Kó ki̱a̱ Josuee̱, bi̱ katsoó Akaa̱n: Míkjo̱a̱a̱ nga bo̱a̱ kjiꞌi ni xi ndajín xi kiniꞌínje̱jne̱. Ngotꞌe̱ ꞌne̱, Néná ndajínkjiꞌi ni xi sa̱ꞌínjoo̱.
Kó xota̱ Israee̱l ndi̱jo̱ tsꞌaya nga katsꞌénkꞌién Akaa̱n, ko̱jo ngayeje xota̱ ndiꞌaa̱. Kósꞌe̱ ítí ngayejee̱, 26kó ki̱a̱ índoxó kjín ndi̱jo̱ xi ngaskande ngotꞌe̱ to̱kó síndo. Kuíni nga kui ngi̱ndiee̱ nangi soón Akoo̱r kiꞌmí. Kó bo̱a̱ tsꞌén nga jaꞌajenda kjo̱a̱xcha̱án Néná.
Currently Selected:
Josuee̱ 7: MAIX
Highlight
Share
Compare
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
