Josuee̱ 6
6
Xota̱ Israee̱l bi̱ tsꞌén katsꞌéntsi̱ꞌe̱ na̱xi̱ńdáꞌniú Jerikoo̱
1Kó ta̱ngatꞌanii̱ nga kandakonni xota̱ Israee̱l, achichí nda ikꞌíchjá nga̱ntjo̱a̱ jee̱ na̱xi̱ńdáꞌniú Jerikoo̱, kó ta̱ꞌyajínni xi kamá tsꞌasꞌien ko̱jo tsi kamá jatjoni kui na̱xi̱ńdáꞌniuú. 2Kósꞌe̱ Néná, bi̱ katsoó Josuee̱:
Ngi̱ya ndse̱ ji tjítsꞌenkꞌasꞌien an na̱xi̱ńdáꞌniú Jerikoo̱, ko̱jo nda̱ ree̱, ko̱jo jájún xi chꞌokon ngasee̱. 3Kuíni nga ji ko̱jo jájúu̱n ku̱i̱tjatjíyajónjnúu̱ na̱xi̱ńdáꞌniuú ngo ndi̱yà ndyiojón ndyiojón, ngaskande xi ma jun ni̱xtjii̱n. 4Kó yito já chináꞌmii̱ tsjiéntjoón koxa̱a̱ kjo̱a̱ꞌbíndaa̱, xi ko̱a̱ꞌa̱ yito tjio xi ndi̱ja̱a̱ cho̱tsa̱nga̱ xi jaꞌatji ndi̱ja̱a̱ kamándani. Xi ma yitoo̱ ni̱xtjin, ngayeje kui xotaa̱, yito ndi̱yà kjo̱a̱ꞌatjiyajoo̱n na̱xi̱ńdáꞌniuú, tji̱e̱nga já chináꞌmii̱ sa̱ꞌínkjanie tjioo̱. 5Kó kjiꞌanga kui jaá sa̱ꞌínkjanie ndojó ndojó ndi̱ja̱a̱ kui cho̱tsa̱nga̱a̱, ngije ko̱nda̱ꞌyájnúu̱, ngayeje xota̱ na̱xi̱ńdaá ꞌniú skja̱ndáyà, kósꞌe̱ xoó na̱xi̱ńdáꞌniuú ku̱i̱xo̱ndò, kósꞌe̱ kjiꞌá boá nga xota̱ na̱xi̱ńdaá ka̱ma ko̱e̱je̱nijíngí xtji̱e̱e̱n kje̱n kui ngi̱ndiee̱.
6Kósꞌe̱ Josuee̱, ndií Nuu̱n, ítikó já chináꞌmii̱, kósꞌe̱ bi̱ katsoó: ¡Tjiàn, kó chi̱nkꞌajnú koxa̱a̱ kjo̱a̱ꞌbíndaa̱! Kó yito jún ti̱ꞌankjaniéjnú tjio xi ndi̱ja̱a̱ cho̱tsa̱nga̱a̱ kje̱n kui koxa̱a̱ kjo̱a̱ꞌbíndaa̱ Néná.
7Kó Josuee̱, bi̱ katsoó xota̱ na̱xi̱ńdaá: Tꞌítsꞌi̱yàjnúu̱ nga ti̱tjatjíyajónjnúu̱ na̱xi̱ńdáꞌniuú. Kó já xí ndyi̱yaꞌa ni xi bixkánjoo̱, ngatjítjoón koxa̱a̱ kjo̱a̱ꞌbíndaa̱ Néná.
8Kó ngije Josuee̱ tsíchji̱a̱jo xota̱ na̱xi̱ńdaá, nga yito kui já chináꞌmi xi ndyi̱yaꞌa kui tjio xi ndi̱ja̱a̱ cho̱tsa̱nga̱a̱, jaꞌa kje̱n nínga tikón koxa̱a̱ kjo̱a̱ꞌbíndaa̱ Néná, katsꞌénkjanie kui tjioo̱, tji̱e̱nga kui koxa̱a̱ kjo̱a̱ꞌbíndaa̱ Néná ki̱a̱ kitsjiengií. 9Sꞌe̱ kui já xí ndyi̱yaꞌa ni xi bixkánjoo̱ ki̱a̱ kijítjoón kui já chináꞌmi xi ndyi̱tsꞌènkjánié kui tjioo̱, kó xtji̱e̱e̱n nga̱xto̱n koxa̱a̱ kjo̱a̱ꞌbíndaa̱, kijí ingo xtín jájún xi ndyi̱yaꞌa ni xi bixkánjo̱ nga ndyi̱tsꞌènkjánié kui tjioo̱ nga. 10Kó Josuee̱ ja̱bo̱a̱ jè bi̱ katsoó xota̱ na̱xi̱ńdaá: Ngata̱ chaꞌayàjínjnú, xió ti̱ndyiónjnú, nde ngo én ndokjo̱a̱jínjnú, ngaskande nga an xi bi̱ xiánjnúꞌun: ¡Chaꞌayàjnú! Kó kjiꞌá boá nga ꞌniú xchaꞌayàjnú.
11Kó bo̱a̱ tsꞌén Josuee̱, katsꞌén nga koxa̱a̱ kjo̱a̱ꞌbíndaa̱ Néná jaꞌatjiyajoo̱n ngo ndi̱yà na̱xi̱ńdáꞌniuú, kósꞌe̱ kijí nginí ki̱a̱ nínga síndo ndiꞌańjñoo̱, nínga katsꞌénkjaꞌa kui ni̱xtji̱e̱e̱n. 12Nga kamángindyiojón, Josuee̱ achichí ta̱jñó jastjíe̱n, kó já chináꞌmii̱ tsankꞌá nginí koxa̱a̱ kjo̱a̱ꞌbíndaa̱ Néná. 13Kó nga yito kui já chináꞌmi xi ndyi̱yaꞌa nga yito tjio xi ndi̱ja̱a̱ cho̱tsa̱nga̱a̱, kijítjón nginií koxa̱a̱ kjo̱a̱ꞌbíndaa̱ Néná nga katsꞌénkjanie ndojó ndojó kui tjioo̱. Kó ngo xtín kuí jájún xí ndyi̱yaꞌa ni xi bixkánjoo̱ kijítjón, sꞌe̱ xi ma jó xtín jájuún, ki̱a̱ tsajángí nga̱xto̱n koxa̱a̱ kjo̱a̱ꞌbíndaa̱ Néná, tji̱e̱nga ndyi̱tsꞌènkjánié ndojó ndojó tjioo̱ nga. 14Kó bo̱a̱ tsꞌén jaꞌatjiyajon nginií na̱xi̱ńdáꞌniuú xi ma joó ni̱xtjin, kósꞌe̱ kijí nginí nínga síndo ndiꞌańjñoo̱. Kó ti̱ bo̱a̱ ti̱ katsꞌén nginí ngaskande xi ma jun ni̱xtjii̱n. 15Xi ma yito ni̱xtjin, jastjíe̱n nga ndibáꞌásie̱én, kó ti̱ jaꞌatjiyajon nginií na̱xi̱ńdáꞌniuú, ta̱nga kui ni̱xtjii̱n, yito ndi̱yà kamaá nga jaꞌatjiyajoo̱n. 16Kó xi ma yitoo̱ ndi̱yà nga ndyi̱foaꞌatjiyajoo̱n, tji̱e̱nga já chináꞌmii̱ ndyi̱tsꞌènkjánié tjioo̱, Josuee̱, bi̱ katsoó xota̱ na̱xi̱ńdaá:
¡ꞌNiú chaꞌayàjnú ꞌne̱! ¡Ngatꞌa̱ Néná jè katsꞌénkꞌasꞌienná kuí na̱xi̱ńdáꞌniuú! 17Na̱xi̱ńdáꞌniuú ko̱jo ngayeje xota̱ na̱xi̱ńdaá si̱ꞌankjie yejé, xikoó tsi ngo kjo̱a̱tjó xi si̱ꞌankꞌasꞌiee̱n Néná. Ta̱kuítsí na̱masien Raa̱b ko̱jo xota̱ xi síndo ndiꞌaa̱ xi kꞌuíndo ngase, ngatꞌa̱ kuí boá xi katsꞌénngaꞌma xota̱ xi kanangiya ñá nga kijíkatsijenꞌmaá. 18Ngata̱ ngojín jún xi niꞌánjo̱jnú, ko̱jo tsi chjábéjnú ngo kui ni xi ndajín xi si̱ꞌankjiee, ngatꞌa̱ tsi bo̱a̱ si̱ꞌánjnú, si̱ꞌankjatsónjinjnú nínga síndo ndiꞌańjñoo̱ xota̱ Israee̱l tsobo̱a̱. 19Ta̱nga ngayeje to̱ntiboaa̱, ko̱jo to̱nsinieé, ko̱jo ni xi ki̱cha̱ bronse̱ kamándanii̱, ko̱jo ngayeje ni xi ki̱cha̱a̱, Néná boá xi si̱ꞌankꞌasꞌiee̱n, kó ki̱a̱ kꞌuíndojii̱n kjo̱a̱cho̱n xi tsi̱ꞌe̱ Néná.
20Kósꞌe̱ xota̱ na̱xi̱ńdaá askjandáyà, kó já chináꞌmii̱ ꞌniú katsꞌénkjanie tjioo̱. Kó kjiꞌanga xota̱ na̱xi̱ńdaá tsintꞌié nga janie tjioo̱, ꞌniú askjandáyà, kó ixóndó xoó na̱xi̱ńdáꞌniuú. Kósꞌe̱ kjiꞌá boá nga xota̱ na̱xi̱ńdaá kijínijíngí nínga tikón na̱xi̱ńdáꞌniuú, kó ńgó ńgó kijíni xtji̱e̱e̱n kje̱n kui ngi̱ndiee̱, ngaskande nga katsꞌéntsi̱ꞌe̱ kui na̱xi̱ńdáꞌniuú. 21Kósꞌe̱ ki̱cha̱ndojó katsꞌénkjiesónni ngayeje xotaa̱ kui na̱xi̱ńdáꞌniuú, xi chjo̱on xí xi̱ꞌin, ko̱jo jáxóngo̱ó, ko̱jo xota̱ xi xchá xí kisꞌie kui ngi̱ndiee̱. Kó ti̱ bo̱a̱ ti̱ katsꞌénjo̱ cho̱yojoo̱, ko̱jo cho̱tsa̱nga̱a̱, ko̱jo bórroó nga.
Na̱ Raa̱b ko̱jo xota̱ ndiꞌaa̱ jatjoꞌaa̱ yojoo̱
22Kósꞌe̱ Josuee̱, bi̱ katsoó ngajó já xí kijíkatsijenꞌmá kui tꞌanangii̱: Tangínjnú ndiꞌaa̱ na̱ Raa̱b, kó ꞌna̱xiéjnú kui, ko̱jo ngayeje xota̱ xi síndo ndiꞌaa̱, xikótsꞌèn je katseꞌéjnúu̱ ndso̱ꞌbájnú.
23Kó ngajó kui já xí kijíkatsijenꞌmaá, kijíngase na̱ Raa̱b, ko̱jo na̱ꞌmii̱, ko̱jo na̱aa̱n, kó ntsꞌi̱e̱, ko̱jo xkjín, ko̱jo ngayeje ni xi kisꞌiee̱, kósꞌe̱ kijíjo̱ ngo ngi̱ndie nínga jmí ni ka̱májiín, ki̱a̱ tiña nínga síndo ndiꞌańjñoo̱ xota̱ Israee̱l. 24Kósꞌe̱ ítꞌandiꞌí na̱xi̱ńdáꞌniuú, ko̱jo ngayeje ni xi kisꞌie ki̱a̱a̱, ta̱nga kijíjo̱ to̱ntiboaa̱, ko̱jo to̱nsinieé, ko̱jo ni xi ki̱cha̱ bronsee̱, ko̱jo ni xi ki̱cha̱a̱, kó ngayeje kui nii̱, ki̱a̱ ikꞌíjñá nínga síndo kjo̱a̱cho̱n xi tsi̱ꞌe̱ Néná. 25Ta̱nga Josuee̱ tsꞌaxiéꞌá na̱masien Raa̱b, ko̱jo na̱ꞌmii̱, ko̱jo ngayeje xota̱ ndiꞌaa̱. Kó ngaskande ngotꞌe̱ to̱kó tjín xota̱ tji̱e̱e̱ na̱ Raa̱b ki̱a̱ Israee̱l. Ngatꞌa̱ kuí boá xi katsꞌénngaꞌma já xí kijíkatsijenꞌmá na̱xi̱ńdáꞌniú Jerikoo̱, kui xi katsangiya Josuee̱.
26Kui ni̱xtjin jàn Josuee̱ ngo ni ínieé xota̱ Israee̱l, nga bi̱ katsoó: ¡Ngatꞌíko̱jonii̱ ngindyi̱ko̱n Néná kui xota̱ xi skjinínkꞌá nginí na̱xi̱ńdáꞌniú Jerikoo̱! Ta̱ꞌyaní xi ka̱mamejeén sa̱ꞌíndaya nginí xoó na̱xi̱ńdáꞌniuú, ndí tjoón ko̱yà, kó xi sa̱ꞌíndaya nginí nga̱ntjo̱a̱a̱, ndí xí kjindií ko̱yà.
27Kó Néná asíko̱jo Josuee̱, kó ngayeje ni xi katsꞌén, ngayeje kui ngi̱ndiee̱ nga kamáyà.
Currently Selected:
Josuee̱ 6: MAIX
Highlight
Share
Compare
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
