Josuee̱ 5
5
1Kó kjiꞌanga ngayeje já re xi xota̱ Amoo̱r chji̱a̱ni xi síndo xtji̱e̱e̱n nínga ꞌbosꞌien tsꞌueé, ki̱a̱ xi ingoboaá ndejèꞌ Jorndaa̱n, ko̱jo ngayeje já re xi chji̱a̱ni nangi Kanaa̱n xi síndo ki̱a̱ xtji̱e̱e̱n tꞌa ndáchíkoón, tsintꞌié kótsꞌèn Néná katsꞌénxíyà ndáfoaa̱ ndejèꞌ Jorndaa̱n, ngindyi̱ko̱n xota̱ na̱xi̱ńdaá, ngaskande nga ikitjatió yejé, achichí ni xi kamaá ini̱ma̱a̱, kó ngaskande ngiti̱ jmíjín xi kamákón nga kamámejeén skjánjo̱ ngase xota̱ Israee̱l.
Nga kiniꞌaán sirkunsisioo̱n xotaa̱ ki̱a̱ ngi̱ndie xi ꞌmí Ngilngaa̱l
2Kui ni̱xtjin jàn Néná tsíchji̱a̱jo Josuee̱, kó bi̱ katsoó: Ti̱ꞌinde ji kichiro̱ ndi̱jo̱, kósꞌe̱ ti̱ꞌíi̱n sirkunsisioo̱n yojo ndikoón xota̱ Israee̱l xi kji̱e̱ niꞌánjiín.
3Kó Josuee̱ katsꞌénda kichiro̱ yojó, kósꞌe̱ katsꞌeén sirkunsisioo̱n xota̱ Israee̱l ki̱a̱ nga̱soón na̱xi̱ Araloo̱t. 4Kuí bí kui kjo̱a̱a̱ nga Josuee̱ katsꞌeén sirkunsisioo̱n: Ngatꞌa̱ ngayeje xota̱ Israee̱l xi jatjoni nangi Ejiptoo̱, kui jáxíꞌín xi je fí kjo̱a̱xcha̱án, ki̱a̱ jesón nangi kixií ki̱a̱ ngi̱ya ndi̱ya̱à, nga jatjoni nangi Ejipto̱. 5Ngatꞌa̱ ndatsi ngayeje xota̱ na̱xi̱ńdá xí jatjoni nangi Ejiptoo̱ ja̱ bo̱a̱ je kiniꞌaán sirkunsisio̱n, ta̱nga xi katsen ki̱a̱ nangi kixií, ngije jatjoni ki̱a̱ nangi Ejiptoo̱, kji̱e̱ niꞌánjiín sirkunsisioo̱n. 6Ngatꞌa̱ xota̱ Israee̱l yichán nó kamaá nga kisꞌińdo ki̱a̱ nangi kixií, ngaskande nga ngayeje xota̱ xi xchá xí fí kjo̱a̱xcha̱án xi jatjoni nangi Ejiptoo̱ jesón, ngatꞌa̱ tsintꞌiéꞌénjiín nga tsíchji̱a̱ Néná, kó kuíni nga Néná bo̱a̱ katsó, nga ko̱kójiín tꞌanangi nda xi katsóyàtjón nga tsja̱á xota̱ xi xchaá, kui ngi̱ndie xi ngatsjéni̱xtjin nga tsie nichinie tjiín. 7Kó bo̱a̱ tsꞌén nga Josuee̱ katsꞌeén sirkunsisioo̱n ndií kui xotaa̱, kui xi Néná índo ngajoo̱, ngatꞌa̱ kji̱e̱ jmíjín xi tsꞌeén sirkunsisioo̱n. 8Kó ngije kamá nga kiniꞌaán sirkunsisio̱n ngayeje xotaa̱, ki̱a̱ xió kisꞌińdo ki̱a̱ ndiꞌańjñoo̱, ngaskande nga kamándaya nínga oo̱n.
9Kósꞌe̱ Néná, bi̱ katsoó Josuee̱: Ngotꞌe̱ boá nga je jaꞌaxínjnúꞌun kjo̱a̱soboaá nga moso̱ xi kastiñá kamájnú ki̱a̱ nangi Ejiptoo̱. Kó kuíni nga ngaskande ngotꞌe̱, Ngilngaa̱l kiꞌmí kui ngi̱ndiee̱.
10Kó nga kamángixoón ni̱xtjin tienijoón sá xí ꞌmí Abii̱b, xota̱ Israee̱l ki̱a̱ katsꞌénkjaꞌyá ki̱a̱ ngi̱ndie xi ꞌmí Ngilngaa̱l, kó katsꞌén sꞌué paskuaa̱ ki̱a̱ nangi són xi tikón tiñaa̱ na̱xi̱ńdáꞌniú Jerikoo̱. 11Kó nga kamángindyiojón nga katsꞌén sꞌué paskuaa̱, iskjinie tjón tjón ni xi maxchá ki̱a̱ tꞌanangi kanaa̱n, xikoó: To ndso̱ko̱a̱n ṉño̱pan xi niꞌántsjó, ko̱jo pan xi jmí nisan mindyiajiín. 12Kó jaskan ngije iskjinie ni xi maxchaá tꞌanangii̱, ngiti̱ ixójín ngase mana̱ nga ta̱jño̱ó, kó bo̱a̱ tsꞌén nga xota̱ Israee̱l nginijánjín iskjinie ngase manaa̱, ta̱sá ni xi kamáxchá tꞌanangi kanaa̱n xi iskjinie kui nó jàn.
Josuee̱ ko̱jo nda̱ xi yaꞌa ki̱cha̱ndojoó
13Ngo ni̱xtjin nga Josuee̱ ki̱a̱ tikón tiñaa̱ na̱xi̱ńdáꞌniú Jerikoo̱, kamábe xtji̱e̱e̱n kje̱n, ngo nda̱ xi sikónkixi̱, xi tjiyátsjà ngo ki̱cha̱ndojó. Kó Josuee̱ kijíkóntiñaa̱, kósꞌe̱ bi̱ tsꞌén asíyaá:
—A ji̱n ndókjo̱e̱ni ji, axa̱ kondra̱jne̱ ndókjo̱e̱ni.
14Kó bi̱ katsó kui nda̱a̱:
—Jmí. Án boá xi jun ngito̱ko̱o̱ Néná. Kuí xá jéꞌe̱ ñaꞌan kꞌi̱e̱e̱.
Kósꞌe̱ Josuee̱ asiéntikoó nga ꞌniú kamábendikón ngaskande nga kisitꞌaa̱ xtjien tꞌanangii̱, kó bi̱ katsoó:
—Án boá xi mosòo̱. Mí ni xi mejeén ko̱ti̱xoméní Ndi̱a̱.
15Kósꞌe̱ nda̱ jun ngito̱ko̱o̱ Néná, bi̱ katsoó Josuee̱:
—ꞌNa̱xié ji tji̱xíndiée̱, ngatꞌa̱ ngi̱ndie nínga tasín ji, ngi̱ndie tsjie boá.
Kó Josuee̱ tsintꞌiéꞌén.
Currently Selected:
Josuee̱ 5: MAIX
Highlight
Share
Compare
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
