Josuee̱ 4
4
Nga tiejó ndi̱jo̱ xi kaꞌnaxiéjin ndejèꞌ Jorndaa̱n
1Kjiꞌanga ngayeje xota̱ na̱xi̱ńdaá je kamaá nga jaꞌatio ndejèꞌ Jorndaa̱n, Néná tsíchji̱a̱jo Josuee̱, nga bi̱ katsoó: 2Chje̱ꞌéjin ji tiejó jáxíꞌín, ngo xki̱ nga ngo xtín xota̱ tji̱e̱, 3kó bo̱a̱ tꞌíi̱n nga ngatjí ki̱a̱ ngi̱ndie nínga xió ndyi̱a̱ já chináꞌmii̱, ki̱a̱ ngamasiee̱n ndejèꞌ Jorndaa̱n, kó ki̱a̱ nga kjíbé tiejó ndi̱jo̱, sꞌe̱ ngatjíjo̱ ngaskande ngi̱ndie nínga ku̱i̱ꞌíndo ndiꞌańjñoo̱ kui ni̱xtji̱e̱n.
4Kósꞌe̱ Josuee̱ tsíchji̱a̱a̱ nga tiejó já xí jaꞌájin, ngo xi chji̱a̱ni nga ngo nga ngo nga tiejó tji̱e̱e̱ xota̱ Israee̱l, 5kó bi̱ katsoó:
Tangínjnú ngaskande ngamasiee̱n ndejèꞌ Jorndaa̱n, xtji̱e̱e̱n kje̱n nínga tikón xió koxa̱a̱ kjo̱a̱ꞌbíndaa̱ Néná, kó ki̱a̱ chjábéjnú ngo ndi̱jo̱ poso̱ xki̱ nga ngo xtín xota̱ tji̱e̱ xi chji̱a̱ni Israee̱l, kósꞌe̱ tjasóntjiajnú ngijee̱. 6Kó kuí ndi̱jo̱o̱ xi ngo chi̱bo̱a̱ ka̱majnú, tsi̱ꞌe̱ nga ni̱xtjin nga ko̱síyájnú ndíjnú, mí ni xi mejeén tsó kui ndi̱jo̱o̱, 7jún bi̱ kꞌuínjnúu̱: Nga ndáfoaa̱ ndejèꞌ Jorndaa̱n jó tjín tsakjanga kje̱n nínga kisꞌijña xió koxa̱a̱ kjo̱a̱ꞌbíndaa̱ Néná, kjiꞌanga jaꞌatio xotaa̱, ndejèꞌ Jorndaa̱n. Kó ndáfoaa̱ ndejeèꞌ ngiti̱ tsangajín ngase. Kó kuíni nga kui ndi̱jo̱o̱ xi ngatsjéni̱xtjin sa̱ꞌinkjaꞌátsjiee̱n xota̱ Israee̱l ni xi katsꞌén Néná kuí ngi̱ndiee̱.
8Kó xota̱ Israee̱l, bo̱a̱ katsꞌén xikó katsoó Josuee̱: Iskjíbé tiejó ndi̱jo̱ ki̱a̱ ngamasiee̱n ndejèꞌ Jorndaa̱n, xikó má katsoó Néná Josuee̱ nga tsíchji̱a̱jo. Ngo ndi̱jo̱ nga ngo nga ngo xtín xota̱ tji̱e̱e̱ Israee̱l, kó kijíjo̱ kui ndi̱jo̱o̱ ki̱a̱ nínga katsꞌénkjaꞌyá kui ni̱xtji̱e̱e̱n, kó ki̱a̱ índoxó. 9Kó Josuee̱ ti̱ iskjíbé tiejó ndi̱jo̱ xi índoxó ki̱a̱ ngamasiee̱n ndejèꞌ Jorndaa̱n, nínga kixindyiaxió ngotjón já chináꞌmi xi ndyi̱yaꞌankꞌá koxa̱a̱ kjo̱a̱ꞌbíndaa̱. Kó kui ndi̱jo̱o̱ to̱kó ki̱a̱ síndo tsjé ngaskande ngotꞌe̱. 10Kó já chináꞌmi xi ndyi̱yaꞌankꞌá koxa̱a̱ kjo̱a̱ꞌbíndaa̱, ki̱a̱ kixindyiara ki̱a̱ ngamasiee̱n ndejèꞌ Jorndaa̱n, ngaskande nga xota̱ na̱xi̱ńdaá katsꞌénkjatjosón ngayeje ni xi katsoó Néná Josuee̱ nga sa̱ꞌín. Ti̱ kuíní kjo̱a̱botíxomaa̱ xi Moisee̱ katsjaá Josuee̱ nga.
Kó xota̱ na̱xi̱ńdaá tsá katsꞌeén yojoo̱ nga jaꞌatio ndejeèꞌ. 11Kó ngije kamaá ngayeje xota̱ na̱xi̱ńdaá nga jaꞌatio ndejeèꞌ, ti̱ jaꞌatio já chináꞌmi xi ndyi̱yaꞌankꞌá koxa̱a̱ kjo̱a̱ꞌbíndaa̱ Néná ngindyi̱ko̱n xota̱ na̱xi̱ńdaá nga. 12Kó ko̱jo xota̱ tji̱e̱e̱ Rubee̱n, ko̱jo xota̱ tji̱e̱e̱ Ngaa̱nd, ko̱jo xi masien xota̱ tji̱e̱e̱ Manasee̱ kui tjón jaꞌatio ndejeèꞌ nga ndyi̱yaꞌa ni xi tsꞌénkjién nga kján, xikó má tsꞌén atíxomaa̱ Moisee̱ nga sa̱ꞌín. 13Mara̱ tsi ta̱ yichán mi̱ ma jáxíꞌín, xi je síndonda nga ko̱e̱je̱ kjo̱a̱xchán, xí jaꞌayise nga ndyi̱fí xtji̱e̱e̱n nangi soón na̱xi̱ńdáꞌniú Jerikoo̱, kje̱n koxa̱a̱ kjo̱a̱ꞌbíndaa̱ Néná. 14Kó kui ni̱xtjii̱n, Néná katsjaá ngo xá xí nkꞌa Josuee̱ ngindyi̱ko̱n ngayeje xota̱ Israee̱l, kó kui xotaa̱ ngayeje ni̱xtjin nga kamábendikón Josuee̱, xikótsꞌèn kamábendikón Moisee̱ ngasꞌe̱.
15Kósꞌe̱ Néná, bi̱ katsoó Josuee̱: 16Tatíxomée̱ já chináꞌmi xi ndyi̱yaꞌankꞌá koxa̱a̱ kjo̱a̱ꞌbíndaa̱, nga ngatjatjoxiejin ki̱a̱ ndejèꞌ Jorndaa̱n ꞌne̱.
17Kó Josuee̱ atíxomaa̱ já chináꞌmii̱ tsi̱ꞌe̱ nga kjo̱tjoxiejin ndejèꞌ Jorndaa̱n. 18Kó kjiꞌanga já chináꞌmi xi ndyi̱yaꞌankꞌá koxa̱a̱ kjo̱a̱ꞌbíndaa̱ Néná jatjoxiejin ndáfoaa̱ ndejeèꞌ, kó ngije tꞌanangi xi kixí katsjájón sé, ndáfoaa̱ ndejèꞌ Jorndaa̱n, ti̱ tsanga nginí ngi̱ndiee̱, kó ti̱ tsangasón nginí kje̱ꞌe nangi, xikoó ngasꞌe̱.
19Kó ni̱xtjin tiee̱ sá xí tjoón xi ꞌmí Abii̱b má, kjiꞌanga xota̱ na̱xi̱ńdá Israee̱l jaꞌatio ndejèꞌ Jorndaa̱n, kó ki̱a̱ tiñaa̱ ngi̱ndie xi ꞌmí Ngilngaa̱l kisꞌińdo, xtji̱e̱e̱n nínga fotjo tsꞌueé ki̱a̱ na̱xi̱ńdáꞌniú Jerikoo̱. 20Kó Josuee̱ ki̱a̱ índoxó ki̱a̱ ngi̱ndie xi ꞌmí Ngilngaa̱l nga tiejó ndi̱jo̱ xi katjóbé ki̱a̱ ngi̱jin ndejèꞌ Jorndaa̱n, 21kó bi̱ katsoó xota̱ Israee̱l:
Kjiꞌanga kjo̱chó ni̱xtjin nga ko̱síyájnú ndíjnú mí ni xi mejeén tsó kui ndi̱jo̱ xi síndoxoó, 22bo̱a̱ tꞌínjnúu̱ nga tsi̱ꞌe̱ nga si̱ꞌankjaꞌátsjien boá nga xota̱ Israee̱l jaꞌaxtikjá ndejèꞌ Jorndaa̱n, kó nde tsꞌandyi̱jín sé, 23ngatꞌa̱ Néná katsꞌénxíyà ndáfoaa̱ ndejèꞌ Jorndaa̱n ngindyikónjnú, ngaskande nga ikitjatió yejejnú, bo̱a̱ má kamá xikó katsꞌeén Néná Ndáchíkón Inií, kui xi katsꞌénxíyà ngindyikón ñá ngaskande nga ikitjaxtíkjá yejé, 24tsi̱ꞌe̱ nga ngayeje xota̱ na̱xi̱ńdá xí síndo kꞌi̱e̱ tꞌanangii̱ sku̱i̱e̱ nga Néná tjiín ngaꞌniú, ko̱jo tsi̱ꞌe̱ nga xcha̱ndikónjnú Néná ngatsjéni̱xtjin.
Currently Selected:
Josuee̱ 4: MAIX
Highlight
Share
Compare
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
