Josuee̱ 3
3
Nga jaꞌatio xota̱ Israee̱l ndejèꞌ Jorndaa̱n
1Nga ka̱mangindyiojón, Josuee̱ ko̱jo ngayeje xota̱ Israee̱l achichí ta̱jñó jastjíe̱n, kó jatjoni nangi Sitii̱n, sꞌe̱ jachó ngaskande ndejèꞌ Jorndaa̱n, kó ki̱a̱ kisꞌińdo tsá tꞌa ndejeèꞌ, ngindiee̱ nga kjo̱a̱ꞌatio.
2Xi ma jaán ni̱xtjin, já ngito̱ko̱o̱ na̱xi̱ńdaá kijíkoón ngayeje xota̱ xi síndo ki̱a̱ ndiꞌańjñoo̱, 3kó bi̱ katsoó xota̱ na̱xi̱ńdaá: Kjiꞌanga xcha̱jnú nga já chináꞌmi xi xota̱ tji̱e̱e̱ Lebii̱ je ndyi̱yaꞌa koxa̱a̱ kjo̱a̱ꞌbíndaa̱ Néná, tja̱tjójnú tji̱ꞌni̱u̱jnú nínga tindyiónjnú, kósꞌe̱ ki̱a̱ tangíntji̱ngíjnúu̱, 4tsi̱ꞌe̱ nga xcha̱jnú ndi̱yà nínga kongínjnú, ngatꞌa̱ kji̱e̱sa mongínjínjnú kui ndi̱ya̱à, ta̱nga ngata̱ ꞌniújín tiña mińtja̱tꞌajnúu̱ kui koxa̱a̱, ta̱sá tsi ta̱ nijan úchán metro̱ kjín ti̱ńtjanijnúu̱.
5Kó Josuee̱, bi̱ katsoó xota̱ na̱xi̱ńdaá: ¡Ti̱ꞌantsjiejnú yojojnú ngatꞌa̱ ndyiojón Néná kjín kjo̱a̱ndikón sa̱ꞌín ngi̱jinjnú!
6Jaskan Josuee̱, bi̱ katsoó já chináꞌmii̱ nga: Chi̱nkꞌajnú koxa̱a̱ kjo̱a̱ꞌbíndaa̱, kó tangíntjónjnúu̱ xota̱ na̱xi̱ńdaá.
Kó kui já chináꞌmii̱ tsankꞌá koxa̱a̱ kjo̱a̱ꞌbíndaa̱, kó kijítjoón xota̱ na̱xi̱ńdaá.
7Kó Néná, bi̱ katsoó Josuee̱: Ndeskande ngotꞌe̱ kꞌuitsꞌíyañáa̱ nga nkꞌa xá xí tsjaa ngindyi̱ko̱n ngayeje xota̱ Israee̱l, tsi̱ꞌe̱ nga sku̱i̱e̱, nga xikótsꞌèn asiko̱jo an Moisee̱ ngasꞌe̱, ti̱ bo̱a̱ ti̱ tsꞌén kosiko̱joo ji nga. 8Jí boá xi bi̱ sée̱ já chináꞌmi xi ndyi̱yaꞌankꞌá koxa̱a̱ kjo̱a̱ꞌbíndaa̱: Ngije kjóchójnú tꞌa ndaá ndejèꞌ Jorndaa̱n, ki̱a̱ xió chiyárajnú. 9Kósꞌe̱ Josuee̱, bi̱ katsoó xota̱ na̱xi̱ńdá Israee̱l:
Ndibáboáꞌájnú, kó tasiénijónjnúu̱ ni xi tsó Néná, kui xi Nejnú jún nga. 10Kó bi̱ katsó ngase Josuee̱: Kꞌi̱e̱ bí nínga xcha̱jnú nga kui Néná xí tikoón, kꞌi̱e̱ tikónjinná, ngatꞌa̱ kuí boá xi ko̱ngatji̱ngii̱ ndo̱jò ndójo̱ò ngayeje xota̱ Kanaa̱n, ko̱jo xota̱ Ee̱t, ko̱jo xota̱ Ee̱b, ko̱jo xota̱ Feree̱, ko̱jo xota̱ Jerjee̱, ko̱jo xota̱ Amoo̱r, ko̱jo xota̱ Jebuu̱. 11Kó xcha̱jnú nga koxa̱a̱ kjo̱a̱ꞌbíndaa̱ kui Néná xí tsi̱ꞌe̱ ngayeje nga̱sondiee̱, kjo̱a̱ꞌa ngindyikónjnú, nga kjo̱a̱ꞌaxtikjá ndejèꞌ Jorndaa̱n. 12Kuíni nga chje̱ꞌéjinjnú tiejó jáxíꞌín, ńgó ńgó nga tiejó tji̱e̱e̱ xota̱ Israee̱l, 13kó kjiꞌanga kui já chináꞌmi xi ndyi̱yaꞌankꞌá koxa̱a̱ kjo̱a̱ꞌbíndaa̱ Néná xí tsi̱ꞌe̱ ngayeje nga̱sondiee̱, tsja̱jin se ngi̱jii̱n ndáfoaa̱ ndejèꞌ Jorndaa̱n, kui ndáfoaa̱ jó tjín ka̱ma, ngatꞌa̱ kui ndáfoa xi ndibání xtji̱e̱e̱n ta̱ꞌii̱n sꞌi̱jña xió, kó ngo tjín ka̱ma nga ka̱matikó.
14Kó xota̱ na̱xi̱ńdaá jatjoni ngi̱ndie nínga kisꞌińdo ndiꞌańjñoo̱, tsi̱ꞌe̱ nga kjo̱a̱ꞌatio ndejèꞌ Jorndaa̱n, kó ki̱a̱ tjimátjoón chináꞌmi xi ndyi̱yaꞌankꞌá koxa̱a̱ kjo̱a̱ꞌbíndaa̱. 15Xki̱ nga fochó ni̱xtjii̱n cha̱a̱n ni tjieé xotaa̱, ndáfoaa̱ ndejèꞌ Jorndaa̱n fotjoxie nga mongasón kje̱ꞌe nangi katsaki, ta̱nga kjiꞌanga já chináꞌmi xi ndyi̱yaꞌankꞌá koxa̱a̱ kjo̱a̱ꞌbíndaa̱ tsꞌasꞌienjin ngi̱jii̱n ndejeèꞌ, 16ndáfoa xi ndibajénni xtji̱e̱e̱n ta̱ꞌin, kisꞌijña xió, kjinnii̱ na̱xi̱ńdáꞌniú Andaa̱n, kui xi tikóntꞌa na̱xi̱ńdáꞌniú Saretaa̱n. Tji̱e̱nga kui ndáfoa xi kijíjaya xtji̱e̱e̱n Ndáchíkón Kꞌieèn kixíyà kjin kjin, kó ndáfoaa̱ ndejèꞌ Jorndaa̱n jó tjín kamá, kó xota̱ na̱xi̱ńdaá jaꞌaxtikjá ndsa̱ko ndejeèꞌ, nga kijí xtji̱e̱e̱n na̱xi̱ńdáꞌniú Jerikoo̱. 17Kó já chináꞌmi xi ndyi̱yaꞌankꞌá koxa̱a̱ kjo̱a̱ꞌbíndaa̱ Néná, xió kixindyia ngamasiee̱n ndejèꞌ Jorndaa̱n, tji̱e̱nga ngayeje xota̱ na̱xi̱ńdá Israee̱l ndyi̱foaꞌatio nga nde tsꞌandyi̱jín sé, ngaskande nga kamaá nga jaꞌatio yeje xota̱ na̱xi̱ńdaá ki̱a̱ ndejèꞌ Jorndaa̱n.
Currently Selected:
Josuee̱ 3: MAIX
Highlight
Share
Compare
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
