Josuee̱ 24
24
Josuee̱ ítikó xota̱ na̱xi̱ńdaá
1Kó Josuee̱ ítikó ngayeje xota̱ tji̱e̱e̱ Israee̱l ki̱a̱ na̱xi̱ńdáꞌniú Sikee̱n, kó tsíchji̱a̱a̱ ngayeje xota̱ xi xchaá xota̱ Israee̱l, ko̱jo já ngito̱ko̱o̱, ko̱jo nendiꞌamasiee̱n, ko̱jo xota̱ xi tjiín xá, kó ki̱a̱ jachókindyia ndiꞌandikoón Néná. 2Kó Josuee̱, bi̱ katsoó ngayeje xota̱ na̱xi̱ńdaá:
Bi̱ tsó Néná, kui xi Nee̱ xota̱ Israee̱l: Xi xchájnú ki̱a̱ kisꞌińdo ngasꞌe̱ ki̱a̱ xi ingoboaá ndejeèꞌ, kui nda̱ xi Taree̱ kiꞌmií, kui xi na̱ꞌmi kamánii̱ Abraa̱n ko̱jo Najoo̱r, kó kje̱ꞌe ne katsꞌénxátꞌaa̱ xi nde yajín ꞌyá kuií bo̱a̱. 3Kó án boá xi tsꞌaxié an Abraa̱n nga kistsoꞌbá xi ingoboaá ndejeèꞌ, kó kijíjo̱ an ngayeje tꞌanangi xi chji̱a̱ni nangi Kanaa̱n, kó katsꞌenkjín an xota̱ tji̱e̱e̱, kó katsjáa̱ ngo ndí xíꞌín xi kiꞌmí Isa̱. 4Kó Isaa̱ katsjáa̱ nga kisꞌiee̱ jó ndí xíꞌín, ngo xi kiꞌmí Jako̱b, ko̱jo ngo xi kiꞌmí Esau̱. Kó Esauu̱ katsjáa̱ nangi ki̱a̱ na̱xi̱ Seii̱r, ta̱nga Jakoo̱b ko̱jo ndií, xtji̱e̱e̱n nangi Ejipto̱ kijí.
5Jaskan katsangiya an Moisee̱ ko̱jo Aaroo̱n ki̱a̱ nangi Ejipto̱, kó katsꞌenꞌóo̱n xota̱ Ejiptoo̱ nga tsie kjo̱a̱ndikón katsꞌen an ki̱a̱, sꞌe̱ jaskan tsꞌaxiéjnúꞌun kui nangii̱. 6Kó tsꞌaxié an xota̱ xi xchájnú ki̱a̱ nangi Ejiptoo̱, kósꞌe̱ nga jachó tꞌa ndáchíkoón, xota̱ Ejiptoo̱ nga ndyi̱yaꞌa karroo̱ ko̱jo ndi̱je̱e̱ kijítji̱ngii̱ xi xchájnú ngaskande Ndáchíkón Inií. 7Kó ngije xota̱ xi xchájnú ni̱ma̱ katsó nga tsíchji̱a̱na tsi̱ꞌe̱ nga kosiko̱jo an, katsꞌénjñó an kui ngi̱ndiee̱, kó kjindibánié ndáfoaa̱ ndáchíkoón, kó kitingíndió kuí xotaa̱, kó jún má xi kamáyàjnú ni xi katsꞌenjo̱ an xota̱ Ejiptoo̱. Jaskan kjín nó kamájnú nga kixindyionjnú ki̱a̱ nangi kixií, 8ngaskande nga kjindibájo̱jnúꞌun ki̱a̱ tꞌanangii̱ xota̱ Amoo̱r, kui xi síndo ki̱a̱ xtji̱e̱e̱n xi ingoboaá ndejèꞌ Jorndaa̱n, kui xota̱ xi askjanjo̱jnú jún, ta̱nga án boá xi katsꞌenkꞌasꞌien an ngi̱ya ndsa̱jnú, kó bo̱a̱ tsꞌén nga kiniꞌántsa̱júnjnú kui tꞌanangii̱, kó an katsꞌenkjié an kui xotaa̱ xikótsꞌèn tsangínjnú.
9Jaskan Balaa̱k, ndií Sipoo̱r, kui xi nda̱ re xi xota̱ tji̱e̱e̱ Moaa̱b kamá, askjanjo̱ xota̱ Israee̱l, kó katsangiyakjaꞌá Balaa̱n, ndií Beoo̱r, tsi̱ꞌe̱ nga chꞌo tsꞌén ku̱i̱chji̱a̱taꞌinjnú, 10ta̱nga an tsintꞌiejáa̱n Balaa̱n, kó ta̱sá ta̱niján má katsꞌénchikonñéjnú ngijee̱. Kó bo̱a̱ tsꞌén tsꞌaxiéꞌájnúꞌun ngi̱ya tsja nda̱ re Balaa̱k. 11Kó ikitjatiójnú ndejèꞌ Jorndaa̱n, kósꞌe̱ jáchójnú ngaskande na̱xi̱ńdáꞌniú Jeriko̱. Kó xota̱ xi chji̱a̱ni na̱xi̱ńdáꞌniú Jerikoo̱ askjanjo̱jnú, ko̱jo xota̱ Amoo̱r, ko̱jo xota̱ Feree̱, ko̱jo Kanaa̱n, ko̱jo xota̱ Ee̱t, ko̱jo xota̱ Jerjee̱, ko̱jo xota̱ Ee̱b, ko̱jo xota̱ Jebuu̱, ta̱nga án boá xi katsꞌenkꞌasꞌienjnúꞌun ngi̱ya ndsa̱jnú kui xotaa̱. 12Kó katsangiyatjón an ndo̱bo̱a̱ xo̱ꞌbo̱e̱, kó kuí boá xi tsangatji̱ngii̱ kui xotaa̱ ngindiee̱ nga kjóchójnú jún, kó kui já re xi xota̱ Amoo̱r chji̱a̱nii̱, jmí tsi ki̱cha̱ndojójnú ko̱jo tsi yáchjonyájnú xi tsangani. 13Án boá xí katsjajnúꞌun tꞌanangi xi jmí tsi jún kiniꞌánxájnú tsi̱ꞌe̱ nga kasakojnú, ko̱jo na̱xi̱ńdáꞌniú xi jmí tsi jún kiniꞌándajnú, ki̱a̱ nínga tindyiónjnú ngotꞌe̱, ko̱jo katsjajnúꞌun ngi̱ndie nínga tjitjíe̱ tostsi̱jè, ko̱jo toꞌaseituna̱ xi jmí tsi jún ikꞌítji̱e̱jnú xi ndyi̱chiniéjnú ngotꞌe̱.
Xota̱ na̱xi̱ńdaá katsꞌéntja̱tsi̱e̱ya nginí kjo̱a̱ꞌbíndaa̱ Néná
14Kósꞌe̱ Josuee̱, bi̱ katsó ngase:
—Ngotꞌe̱ ꞌne̱, cha̱ndikónjnú Néná, kó ngayejení ini̱ma̱jnú nga ti̱ꞌanxátꞌajnúu̱, ko̱jo kixi̱ ti̱ꞌanjo̱jnú. Chja̱ꞌáxínjnú ngi̱jinjnú kui ne xi katsꞌéndikón xota̱ xi xchájnú xi ingoboaá ndejeèꞌ, ko̱jo ki̱a̱ nangi Ejipto̱, kó ta̱kuítsí Néná xi ti̱ꞌanxátꞌajnúu̱. 15Kó tsi sasiénjínjnú nga Néná si̱ꞌanxátꞌajnúu̱, ngotꞌe̱ ꞌne̱ chja̱ꞌájinjnú ꞌyání xi si̱ꞌanxátꞌajnúu̱, tsi kui ne xi katsꞌéndikón xota̱ xi xchájnú kjiꞌanga kisꞌińdo xi ingoboaá ndejeèꞌ, ko̱jo tsi nee̱ xota̱ Amoo̱r xi síndo ki̱a̱ nangi nínga tindyiónjnú ngotꞌe̱. Ta̱nga an ko̱jo xtín xota̱ ndiꞌana, Néná boá xi si̱ꞌanxátꞌajne̱ ji̱n.
16Kósꞌe̱ xota̱ na̱xi̱ńdaá, bi̱ katsó:
—¡Nga jmíni̱xtjin nga bo̱a̱ ka̱ma, nga jmíni̱xtjin nga kꞌuijñámasienjne̱ Néná, tsi̱ꞌe̱ nga kje̱ꞌe ne xi si̱ꞌanxátꞌajne̱! 17Ngatꞌa̱ Néná, kuí boá xi tsꞌaxiéjne̱ ji̱n ko̱jo xota̱ xi xchájne̱ ki̱a̱ nangi Ejiptoo̱, nínga moso̱ xi kastiñá kamájne̱, kó yàjne̱ nga tsie kjo̱a̱ndikón xí katsꞌén, ko̱jo nga askonjne̱ ngayeje ndi̱yà ko̱jo ngayeje na̱xi̱ńdá nínga ikitjajne̱. 18Kó Néná tsangatji̱ngii̱ ngayeje xota̱ na̱xi̱ńdá xi síndo ndi̱yà nínga ikitjajne̱, ko̱jo xota̱ Amoo̱r xi kisꞌińdo kui tꞌanangii̱ nga, kó kuíni nga ko̱jo ji̱n, ki̱a̱ si̱ꞌanxátꞌajne̱ Néná, ngatꞌa̱ kuí boá xi Nejne̱ nga.
19Ta̱nga Josuee̱, bi̱ katsoó xota̱ na̱xi̱ńdaá:
—Jún ka̱májín ki̱a̱ si̱ꞌanxátꞌajnúu̱ Néná, ngatꞌa̱ kuí boá ngo Ne xi tsjie, ko̱jo chi̱ni̱ boá, kó chikjo̱a̱jiín kjo̱a̱kitikjo̱a̱jnú ko̱jo jéjnú.
20Tsi kꞌuijñámasienjnú Néná, kó tsi kje̱ꞌe ne si̱ꞌanxátꞌajnúu̱, kji̱ndi̱bá kuí, kó achichí nga ndajínkjiꞌi ni xi ka̱majnú jún, ngatꞌa̱ sa̱ꞌínkjié ndo̱jò ndójo̱jnú, ndatsi je tsie ni xi nda je katsꞌénjo̱jnú.
21Kó xota̱ na̱xi̱ńdaá, bi̱ katsoó Josuee̱:
—¡Jmí, ta̱sá Néná boá xi si̱ꞌanxátꞌajne̱!
22Kósꞌe̱ Josuee̱, bi̱ katsoó ngijee̱:
Ti̱júnní xi chistiko̱ ndyi̱niꞌánjnúu̱ yojojnú tsobo̱a̱, nga Néná boá xi kachjeꞌéjinjnú nga kui xi si̱ꞌanxátꞌajnúu̱.
Kó ngayeje xotaa̱, bi̱ katsó:
—¡Bo̱a̱ kjiꞌi téi!
23Kó Josuee̱, bi̱ katsó ngase:
Ja̱ ngotꞌe̱ ꞌne̱ tsobo̱a̱, chja̱ꞌáxínjnú kui ne xi to̱kó síndojnú ki̱a̱a̱, kó ta̱sá ngayeje ini̱ma̱jnú nga Néná xí tsi̱ꞌe̱ xota̱ Israee̱l xi ni̱ma̱kjo̱a̱ ti̱ꞌánjnúu̱ yojojnú.
24Kó xota̱ na̱xi̱ńdaá, bi̱ katsoó Josuee̱:
Ta̱kuítsí Néná xi si̱ꞌanxátꞌajne̱, kó ta̱kuítsí xi ko̱nda̱ꞌyáꞌénjne̱ ni xi ka̱tso̱jne̱.
25Kósꞌe̱ ti̱kuii ni̱xtjin Josuee̱, ko̱jo xota̱ na̱xi̱ńdaá ngo ni índa, kó katsꞌénkꞌasꞌiee̱n kjo̱a̱kiti ko̱jo kjo̱a̱botíxoma ki̱a̱ na̱xi̱ńdáꞌniú Sikee̱n. 26Kó Josuee̱ kui eén katsꞌénꞌindó ngi̱ya xo̱jo̱n kjo̱a̱kitii̱ Néná. Kósꞌe̱ iskjíbé ngo ndi̱jo̱ xi ꞌniú je, kó ngindiee̱ ngo yáꞌáxka̱ íjñá, kui xi tikóntꞌa ndiꞌandikoón Néná. 27Kó bi̱ katsoó ngayeje xota̱ na̱xi̱ńdaá:
Kui ndi̱jo̱ xi yàjnú kꞌi̱e̱e̱, kuí boá xi xikoó tsi chistiko̱ ka̱ma, ngatꞌa̱ kuí boá xi xikoó tsi tsintꞌié ngayeje kui én xí Néná tsíchji̱a̱joná, kó ja̱ kuí boá xi ka̱máná chistiko̱ nga ko̱óngitaꞌínná, tsi̱ꞌe̱ nga kꞌuindísojo̱jín ñá Néná.
28Kósꞌe̱ Josuee̱ katsꞌénkixotꞌa xota̱ na̱xi̱ńdaá, kó kja̱kijí kja̱kijí nginí nga ngo nga ngo nangi xi je katseꞌeé.
Nga kisꞌinijín Josuee̱, ko̱jo Eleasaa̱, ko̱jo Kosiee̱
29Jaskan ngije jaꞌa ngase ni̱xtjin, kꞌien Josuee̱ ndií Nuu̱n, mosoo̱ Néná, kó úchán ko̱jo tie nó tjiín kuí nga bo̱a̱ kamá. 30Kó ki̱a̱ akjanijín tꞌanangi xi tsi̱ꞌe̱, ki̱a̱ na̱xi̱ńdáꞌniú Timnaa̱t-Seraa̱, kui xi tikón nangi na̱xi̱ xi chji̱a̱ni xota̱ tji̱e̱e̱ Efraii̱n, xtji̱e̱e̱n ta̱ꞌii̱n na̱xi̱ Ngaa̱.
31Kó xota̱ Israee̱l ki̱a̱ katsꞌénxátꞌaa̱ Néná ngayeje ni̱xtjin nga kisꞌijña Josuee̱, ko̱jo ngayeje ni̱xtjin nga kisꞌińdo ngase xota̱ xi xchaá, kui xi kamábe ngayeje ni xi katsꞌén Néná ngandaa̱ xota̱ Israee̱l.
32Kó ki̱a̱ nangi Sikee̱n ikꞌínijín ńdaa̱ Kosiee̱, kui xi xota̱ Israee̱l kjindibájo̱ni nangi Ejipto̱, ki̱a̱ kui tꞌanangi xi Jakoo̱b tsꞌatsiee̱ ndií Jamoo̱r, na̱ꞌmi Sikee̱n, kui xi úchán to̱ntiboa íchjíní, kósꞌe̱ tsi̱ꞌe̱ xota̱ tji̱e̱e̱ Kosiee̱ kamá ngijee̱.
33Kó ti̱ kꞌien Eleasaa̱ nga ndií Aaroo̱n, kó ki̱a̱ akjanijín ngo tꞌa na̱xi̱ xi tsi̱ꞌe̱ Fine̱ ndií, ki̱a̱ nangi na̱xi̱ xi chji̱a̱ni xota̱ tji̱e̱e̱ Efraii̱n.
Currently Selected:
Josuee̱ 24: MAIX
Highlight
Share
Compare
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
