Josuee̱ 23
23
Josuee̱ katsꞌénkixotꞌa xota̱ na̱xi̱ńdaá
1Jaskan ngije jaꞌa ni̱xtjin nga Néná katsjaá kjo̱a̱xió xota̱ Israee̱l, kjo̱a̱a̱ ngayeje kondra̱ xi síndo nga ngo foaꞌatjiyajoo̱n, Josuee̱ jè ꞌniú xchá kamá, 2kó katsangiyakjaꞌá ngayeje xota̱ xi xchaá xota̱ Israee̱l, ko̱jo xota̱ xi ngito̱ko̱o̱, ko̱jo xota̱ xi tjiín xá, kó bi̱ katsoó:
Jè xchá án, ngatꞌa̱ jè kjín nó tjínna, 3kó jún jè kamáyàjnú ngayeje ni xi katsꞌénjo̱ Nejnú ngayeje kui na̱xi̱ńdaá, ta̱ngatꞌanii̱ jún, ngatꞌa̱ Nejnú boá xi askjantjéjnú. 4Jè katsꞌenkabíjnúꞌun nga kiniꞌán kjo̱a̱chꞌáṉcha̱ kui tꞌanangii̱ tsi̱ꞌe̱ xota̱ tji̱e̱jnú, kui na̱xi̱ńdá xí je kiniꞌánkjatsoón ko̱jo xi síndo ngasee̱, xi yaꞌanii̱ ndeskande ndejèꞌ Jorndaa̱n, ngaskande ndáchíkón Menditerráneoo̱, ki̱a̱ xtji̱e̱e̱n nínga ꞌbosꞌien tsꞌueé. 5Kó Néná boá xi ko̱ngatji̱ngii̱ kui xotaa̱ xi kótsꞌèn kongínjnú, kó tsa̱jún ka̱ma tꞌanangii̱, xikó je katsó Néná nga katsóyàtjón. 6Ta̱nga ti̱ꞌangaꞌniújnú, ko̱jo nda ti̱ꞌankjatjosónjnú ngayeje ni xi kjitꞌa xo̱jo̱n kjo̱a̱kitii̱ Moisee̱. Kó ngata̱ niꞌánkjinjínjnúu̱ yojojnú, ti̱nde xtji̱e̱e̱n nga skoón, ti̱nde xtji̱e̱e̱n nga kixi̱i̱.
7Ngata̱ ki̱a̱jín niꞌánkꞌajinjnúu̱ yojojnú xotaa̱ kui na̱xi̱ńdá xi kꞌi̱e̱ síndo ngi̱jinjnú, ngata̱ ngiboanénájín ꞌmíjnú kjo̱a̱a̱ kui nee̱, nga niꞌánkaxomájínjnú jaꞌeén, ti̱nde nga kuijín niꞌánxátꞌajnúu̱, ko̱jo ngata̱ kuijín ku̱i̱ndyiajnúu̱ tikónjnú. 8Ta̱kuítsí Néná xí tangíntji̱ngírajnúu̱, xikó ndyi̱niꞌánjnú ngaskande ngotꞌe̱, 9ngatꞌa̱ xikótsꞌèn ndyi̱mongín boaꞌájnú, Néná bo̱a̱ tsꞌén, tsꞌén mongatji̱ngii̱ na̱xi̱ńdá xí yiꞌi ko̱jo xi ꞌniú. Kó ngaskande ngotꞌe̱ kji̱e̱ ta̱ꞌyajínni xi je kamaá katsꞌénjnú jún. 10Ta̱ ngo tsí nda̱ xi̱ꞌin xi ndokjo̱a̱nijnú jún, xi ka̱maa̱ ko̱ngatji̱ngii̱ ngo mi̱ kondra̱, ngatꞌa̱ Néná boá xi tsꞌénkjántjéjnú, xikó má katsó kuí.
11Ta̱nga nda chónjnúu̱ yojojnú, ko̱jo tjó ti̱ꞌánjnú Néná, kui xi Ne tsa̱jún. 12Ngatꞌa̱ tsi si̱ꞌankjinjnúu̱ yojojnú Néná, kó tsi ki̱a̱ nijan ka̱majnú xota̱ na̱xi̱ńdá xí kisꞌińdo ngase ki̱a̱ ngi̱jinjnú, kó tsi kjo̱a̱bixan kꞌuíndajnú jún ko̱jo kui xotaa̱, 13ja̱ jè yàjnú nga Néná ngiti̱ ko̱ngatji̱ngijiín kui xota̱ na̱xi̱ńdaá xikótsꞌèn ndyi̱mongínjnú, kó ta̱sá kuí xotaa̱ xi xikónií tsi ngo chja̱ya̱ ka̱majnú jún, kó kuí boá xi sa̱ꞌínkꞌákajnú, kó xikoó tsi ngo ńꞌniú ka̱ma, xi Néná kꞌo̱nié nga̱xtonjnú ngijee̱, ko̱jo xikoó tsi ngo ndaꞌyá xí kꞌo̱sꞌiengi ndyikonjnú ka̱ma, ngaskande nga kju̱i̱e̱ yejejnú ki̱a̱ tꞌanangi nda xi katsjájnú Néná.
14Jè tikónda an, kó jè tsá kꞌosꞌi̱e̱n an ngi̱yaa̱ kjo̱a̱bo̱yaa̱, kuíni nga mejénna nga xcha̱jnú ngayeje ini̱ma̱jnú, ko̱jo ngayeje kjo̱a̱mindyionjnú, nga Néná jmíni̱xtjin nga kichajaá nga sa̱ꞌínkjatjosón ngo ni, ta̱sá ngayeje ni xi katsóyàtjónná je jatjosón. 15Ta̱nga xikótsꞌèn nga jatjosón ngayeje ni nda xi katsóyàtjónná Néná, ti̱ bo̱a̱ ti̱ tsꞌén sa̱ꞌínkjatjosón nga ka̱ma ngayeje ni xi ndajín xi katsóyàtjón kuí nga, ngaskande nga nde ingojín jún xi kꞌuíndo ngase kui nangi nda xi katsjájnú kuí. 16Kó tsi si̱ꞌankjatjosónjínjnú ni xi je índajo̱jnú Néná, kó tsi ki̱a̱ kongintjingíjnú nga si̱ꞌanxátꞌajnúu̱ kje̱ꞌe ne nga ko̱si̱e̱njnúu̱ tikójnú, ka̱maxtii̱ Néná kondra̱ tsa̱jún, kó tsá kju̱i̱e̱sónjnú ki̱a̱ tꞌanangi nda xi katsjájnú Néná.
Currently Selected:
Josuee̱ 23: MAIX
Highlight
Share
Compare
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
