Nendiꞌamasien 1
1
Xota̱ tji̱e̱e̱ Jundáa̱ ko̱jo xota̱ tji̱e̱e̱ Simeoo̱n, katsoboá nda̱ re Andoni̱-Besee̱k
1Bi̱ kamá jaskan ngije kꞌien Josuee̱, xota̱ Israee̱l, bi̱ katsó nga asíyaá Néná:
—ꞌYá xota̱ tji̱e̱e̱ xi tjón ko̱e̱je̱, nga ko̱e̱je̱kjánjo̱ xota̱ Kanaa̱n.
2Kó Néná, bi̱ katsó:
—Tjón xota̱ tji̱e̱e̱ Jundáa̱ ko̱e̱je̱, ngatꞌa̱ kuí boá xi sa̱ꞌinkꞌasꞌièe̱n ngi̱ya tsja kui tꞌanangii̱.
3Kó xota̱ tji̱e̱e̱ Jundáa̱, bi̱ katsoó xota̱ tji̱e̱e̱ Simeo̱n ntsꞌi̱e̱: Tjianijíngí ki̱a̱ nangi xi sa̱kójne̱, tsi̱ꞌe̱ nga nijan ku̱i̱xkánjo̱ xota̱ Kanaa̱n, kó ji̱n kongínjo̱jne̱ jún nga kongínjnú ki̱a̱ tꞌanangi xi je tsa̱jún.
Kó xota̱ tji̱e̱e̱ Simeoo̱n kijíjo̱ xota̱ tji̱e̱e̱ Jundáa̱. 4Kó kijínijíngí xota̱ tji̱e̱e̱ Jundáa̱, sꞌe̱ Néná katsꞌénkꞌasꞌiee̱n ngi̱ya tsja xota̱ Kanaa̱n, ko̱jo xota̱ Feree̱, kó ki̱a̱ na̱xi̱ńdáꞌniú Besee̱k tie mi̱ ma já xí katsꞌénꞌoón nga askjanjo̱. 5Kó kasakoo̱ nda̱ re Andoni̱-Besee̱k, kó ti̱ askjanjo̱ kui nga, kó katsꞌeén xota̱ Kanaa̱n, ko̱jo xota̱ Feree̱. 6Ta̱nga nda̱ re Andoni̱-Besee̱k tsanga, kó kijítji̱ngii̱, sꞌe̱ katsoboá, kó tsatie xtín xí jeé tsja ko̱jo se. 7Kósꞌe̱ nda̱ re Andoni̱-Besee̱k, bi̱ katsó: Ngo ndi̱yà, ichítié ko̱jo kan ma já re xi tsatietjón an xtín xí jeé tsja ko̱jo se, kó ki̱a̱ jaꞌátikó nichinie ngindie yámíxa̱na, kó xikó katsꞌen an, bo̱a̱ tsꞌén katsꞌénkꞌíchjína Néná. Kósꞌe̱ ki̱a̱ tsangínjo̱ nda̱ re Andoni̱-Besee̱k ki̱a̱ na̱xi̱ńdáꞌniú Jerusalee̱n, nínga kꞌien ngijee̱.
Xota̱ tji̱e̱e̱ Jundáa̱ katsꞌéntsi̱ꞌe̱ na̱xi̱ńdáꞌniú Jerusalee̱n, ko̱jo na̱xi̱ńdáꞌniú Ebroo̱n
8Kó xota̱ tji̱e̱e̱ Jundáa̱ askjanjo̱ xota̱a̱ na̱xi̱ńdáꞌniú Jerusalee̱n, kósꞌe̱ katsꞌéntsi̱ꞌe̱ na̱xi̱ńdáꞌniuú, kó ki̱cha̱ndojó katsꞌénkjiesónni ngayeje xota̱a̱ kui ngi̱ndiee̱, kósꞌe̱ ítí na̱xi̱ńdáꞌniuú. 9Jaskan xota̱ tji̱e̱e̱ Jundáa̱, jaꞌajaya nga kijíkjánjo̱ xota̱ Kanaa̱n xi kisꞌińdo ki̱a̱ na̱xi̱i̱, ko̱jo ki̱a̱ nangi Nengee̱b, ko̱jo ki̱a̱ nangi soón. 10Kó xota̱ tji̱e̱e̱ Jundáa̱, ti̱ askjanjo̱ xota̱ Kanaa̱n xi kisꞌińdo ki̱a̱ na̱xi̱ńdáꞌniú Ebroo̱n, kui xi Kiriaa̱t-Arba̱ kiꞌmí ngasꞌe̱, kó katsꞌénkjié xota̱ xi chji̱a̱ni Sesaii̱, ko̱jo Aimaa̱n, ko̱jo Talmaii̱.
Otoniee̱l katsꞌéntsi̱ꞌe̱ na̱xi̱ńdáꞌniú Ndebii̱r
11Sꞌe̱ xota̱ tji̱e̱e̱ Jundáa̱ jatjoni na̱xi̱ńdáꞌniú Ebroo̱n, kó kijíkjánjo̱ xota̱ xi síndo na̱xi̱ńdáꞌniú Ndebii̱r, kui xi Kiriaa̱t-Séfee̱r kiꞌmí ngasꞌe̱. 12Kó Kalee̱b, bi̱ katsó ki̱a̱a̱: Kui xi ka̱makon nga skjánjo̱, kó nga sa̱ꞌiín xota̱ na̱xi̱ńdáꞌniú Kiriaa̱t-Séfee̱r, tsjàa̱ tsa̱kjìnna xi ꞌmí Aksaa̱, tsi̱ꞌe̱ nga chjo̱ón ka̱ma. 13Kó xi katsꞌeén kui na̱xi̱ńdáꞌniuú, Otoniee̱l boá, ndií ntsꞌi̱e̱ xi kjindí Kalee̱b, xi ꞌmí Kenaa̱, kó bo̱a̱ tsꞌén nga Kalee̱b katsjaá tsa̱kji̱ín kui nda̱a̱, tsi̱ꞌe̱ nga chjo̱ón ka̱ma. 14Kó ngije jachó ni̱xtjin nga na̱ Aksaa̱ ko̱e̱je̱jo kui nda̱a̱, Otoniee̱l tsíchji̱a̱jo chjo̱ón tsi̱ꞌe̱ nga ku̱i̱ꞌaa̱ na̱ꞌmii̱ ngo chikjan tꞌanangi. Kósꞌe̱ kui tsa̱kji̱ín jatjajenni bórró xí tikónsoón nga je ndyi̱fí katsaki, kó Kalee̱b, bi̱ katsoó:
—Kó kamaá chjo̱on.
15Kó tsa̱kji̱ín, bi̱ katsó:
—Ji na̱ꞌmi, ingo kjo̱a̱niꞌánchikonñé te̱ꞌéní. Jè be an nga je katseꞌéní tꞌanangi ki̱a̱ nangi kixií Nengee̱b, ta̱nga mejénna nga ti̱ ko̱e̱ꞌéní nínga tjín ndáńchꞌi̱ nga.
Kósꞌe̱ Kalee̱b katsjaá ndáńchꞌi̱ xi síndo xtji̱e̱e̱n ta̱ꞌin, ko̱jo xi síndo xtji̱e̱e̱n na̱ngi.
Tꞌanangi xi katsꞌéntsi̱ꞌe̱ xota̱ tji̱e̱e̱ Jundáa̱, ko̱jo xota̱ tji̱e̱e̱ Benjaa̱
16Kósꞌe̱ xota̱ kenita̱ xi chji̱a̱ni chiꞌyaá Moisee̱, jatjoni na̱xi̱ńdáꞌniú Yáxka̱je̱én, kó nijan kijíjo̱ xota̱ tji̱e̱e̱ Jundáa̱ ki̱a̱ tꞌanangi kixí xi chji̱a̱ni xota̱ tji̱e̱e̱ Jundáa̱, kui xi tikón xtji̱e̱e̱n na̱ngii̱ na̱xi̱ńdáꞌniú Araa̱nd, kó ki̱a̱ kisꞌińdo kui ngi̱ndiee̱. 17Kó xota̱ tji̱e̱e̱ Jundáa̱, ko̱jo xota̱ tji̱e̱e̱ Simeoo̱n kijíkjánjo̱ xota̱ Kanaa̱n xi síndo ki̱a̱ nangi Sefaa̱t, kó katsꞌénkjié kui ngi̱ndiee̱, kósꞌe̱ na̱xi̱ńdáꞌniú Orma̱ ítꞌajaꞌén.
18Kó xota̱ tji̱e̱e̱ Jundáa̱, ti̱ katsꞌéntsi̱ꞌe̱ na̱xi̱ńdáꞌniú Ngasa̱ ko̱jo tꞌanangii̱, ko̱jo na̱xi̱ńdáꞌniú Askaloo̱n ko̱jo tꞌanangii̱, ko̱jo na̱xi̱ńdáꞌniú Ekroo̱n ko̱jo tꞌanangii̱. 19Kó Néná ki̱a̱ kisꞌijñajii̱n xota̱ tji̱e̱e̱ Jundáa̱, kó kui xotaa̱ tsangatji̱ngii̱ xota̱ xi kisꞌińdo ki̱a̱ na̱xi̱i̱, ta̱nga kamájiín tsangatji̱ngii̱ xota̱ xi kisꞌińdo ki̱a̱ nangi nínga soón, ngatꞌa̱ kui xotaa̱ karro̱ kjo̱a̱xchán xí ki̱cha̱ kisꞌiee̱. 20Kó xikó má katsó Moisee̱ ngasꞌe̱, Kalee̱b katseꞌeé na̱xi̱ńdáꞌniú Ebroo̱n, kó kui nda̱a̱ tsangatji̱ngii̱ xota̱ ndiꞌaa̱ nga ján ndií Anaa̱k kui ngi̱ndiee̱. 21Ta̱nga xota̱ tji̱e̱e̱ Benjaa̱ tsangatji̱ngíjiín xota̱ Jebuu̱ xi kisꞌińdo ki̱a̱ na̱xi̱ńdáꞌniú Jerusale̱n, kó kui xota̱ Jebuu̱, ki̱a̱ nijan kisꞌińdojii̱n xota̱ tji̱e̱e̱ Benjaa̱ ki̱a̱ na̱xi̱ńdáꞌniú Jerusalee̱n ngaskande ngotꞌe̱.
Xota̱ tji̱e̱e̱ Efraii̱n, ko̱jo xota̱ tji̱e̱e̱ Manasee̱, katsꞌéntsi̱ꞌe̱ na̱xi̱ńdáꞌniú Betee̱l
22Kó Néná ti̱ ki̱a̱ kisꞌijñajii̱n xota̱ tji̱e̱e̱ Kosiee̱ nga, kó kui jaá kijíkjánjo̱ xota̱ na̱xi̱ńdáꞌniú Betee̱l. 23Kó xota̱ tji̱e̱e̱ Kosiee̱, índo xota̱ xi kondaꞌma ki̱a̱ na̱xi̱ńdáꞌniú Betee̱l, kui xi Ndiꞌí kiꞌmí ngasꞌe̱. 24Kó kui já xí askondaꞌmaa̱, kamábe ngo nda̱ xi tsꞌénfotjoni ki̱a̱ na̱xi̱ńdáꞌniuú, kó bi̱ katsoó:
—Takejne̱ nínga tikón nga̱ntjo̱a̱ nínga bitjasꞌi̱e̱nnii̱ kui na̱xi̱ńdáꞌniuú, kó jmí ni si̱ꞌanjo̱jínjne̱ ji.
25Kó kui nda̱a̱, akoó nínga bitjasꞌi̱e̱nnii̱ kui na̱xi̱ńdáꞌniuú, kó tsꞌasꞌien kui xotaa̱, kó ki̱cha̱ndojó katsꞌénkjiesónni ngayejee̱, ta̱nga jmí ni katsꞌénjo̱jín kui nda̱a̱, ko̱jo xtín xota̱ ndiꞌaa̱. 26Kósꞌe̱ kui nda̱a̱ ki̱a̱ kijí nínga síndo xota̱ Ee̱t, kó ki̱a̱ katsꞌénda ngo na̱xi̱ńdáꞌniú xi Ndiꞌí ítꞌajaꞌén, kó bo̱a̱ ꞌmí kui ngi̱ndiee̱ ngaskande ngotꞌe̱.
Tꞌanangi xi jmíjín xi katsꞌéntsi̱ꞌe̱
27Ta̱nga xota̱ tji̱e̱e̱ Manasee̱, tsangatji̱ngíjiín xota̱ xi kisꞌińdo ki̱a̱ na̱xi̱ńdáꞌniú Bee̱t-Seaa̱n ko̱jo ndí nangií, ko̱jo xota̱ xi chji̱a̱ni na̱xi̱ńdáꞌniú Taanaa̱k ko̱jo ndí nangií, ko̱jo xota̱ xi chji̱a̱ni na̱xi̱ńdáꞌniú Ndoo̱r ko̱jo ndí nangií, ko̱jo xota̱ xi chji̱a̱ni na̱xi̱ńdáꞌniú Ibleaa̱n ko̱jo ndí nangií, ko̱jo xota̱ xi chji̱a̱ni na̱xi̱ńdáꞌniú Mengindo̱ ko̱jo ndí nangií, kó xota̱ Kanaa̱n achichí ꞌniú katsꞌén nga to̱kó ki̱a̱ kisꞌińdora kui nangii̱. 28Ta̱nga kjiꞌanga kasakongaꞌniuú xota̱ Israee̱l, katsꞌeén kjo̱a̱ꞌniú xota̱ Kanaa̱n tsi̱ꞌe̱ nga íchjítjé yojoo̱, ta̱nga tsangatji̱ngíjiín kui ngi̱ndiee̱.
29Ti̱nde xota̱ tji̱e̱e̱ Efraii̱n tsangatji̱ngíjiín xota̱ Kanaa̱n xi kisꞌińdo ki̱a̱ na̱xi̱ńdáꞌniú Ngésee̱r, ta̱sá ki̱a̱ nijan kisꞌińdojo̱ kui xotaa̱ ki̱a̱ na̱xi̱ńdáꞌniú Ngésee̱r nga.
30Ti̱nde xota̱ tji̱e̱e̱ Sabuloo̱n tsangatji̱ngíjiín xota̱ xi kisꞌińdo ki̱a̱ na̱xi̱ńdáꞌniú Kitroo̱n, ti̱nde xota̱ xi kisꞌińdo ki̱a̱ na̱xi̱ńdáꞌniú Naalaa̱l, ta̱sá ki̱a̱ nijan kisꞌińdo ko̱jo xota̱ Kanaa̱n, kó ti̱ katsꞌeén kjo̱a̱ꞌniú, tsi̱ꞌe̱ nga íchjítjé yojoo̱.
31Ti̱nde xota̱ tji̱e̱e̱ Asee̱r tsangatji̱ngíjiín xota̱ xi kisꞌińdo ki̱a̱ na̱xi̱ńdáꞌniú Akoo̱, ti̱nde xota̱ xi kisꞌińdo na̱xi̱ńdáꞌniú Sindoo̱n, ti̱nde xota̱ xi kisꞌińdo na̱xi̱ńdáꞌniú Alaa̱b, ti̱nde xota̱ xi kisꞌińdo na̱xi̱ńdáꞌniú Aksii̱b, ti̱nde xota̱ xi kisꞌińdo na̱xi̱ńdáꞌniú Jelbaa̱, ti̱nde xota̱ xi kisꞌińdo na̱xi̱ńdáꞌniú Afee̱k, ti̱nde xota̱ xi kisꞌińdo na̱xi̱ńdáꞌniú Rejoo̱b.
32Kó xota̱ tji̱e̱e̱ Asee̱r ki̱a̱ nijan kisꞌińdo ko̱jo xota̱ Kanaa̱n xi kisꞌińdo kui nangii̱, ngatꞌa̱ kamámejénjiín tsangatji̱ngii̱.
33Ti̱nde xota̱ tji̱e̱e̱ Neftalii̱ kamámejénjiín tsangatji̱ngii̱ xota̱ xi kisꞌińdo ki̱a̱ na̱xi̱ńdáꞌniú Bee̱t-Semee̱, ko̱jo xi kisꞌińdo na̱xi̱ńdáꞌniú Bee̱t-Anaa̱t, ta̱sá ki̱a̱ nijan kisꞌińdo ko̱jo xota̱ Kanaa̱n xi kisꞌińdo kui nangii̱, ta̱nga katsꞌeén kjo̱a̱ꞌniú tsi̱ꞌe̱ nga íchjítjé yojoo̱ xota̱ xi kisꞌińdo ki̱a̱ na̱xi̱ńdáꞌniú Bee̱t-Semee̱, ko̱jo na̱xi̱ńdáꞌniú Bee̱t-Anaa̱t.
34Kó xota̱ Amoo̱r katsꞌénchíkjo̱a̱a̱ xota̱ tji̱e̱e̱ Ndaa̱n, kó tsangatji̱ngii̱ ngaskande nínga na̱xi̱i̱, kó katsjandièjiín nga kjo̱a̱ꞌajaya nangi soón. 35Kó xota̱ Amoo̱r ꞌniú katsꞌén nga to̱kó ki̱a̱ kisꞌińdora na̱xi̱ Eree̱, ko̱jo ki̱a̱ na̱xi̱ńdáꞌniú Ayaloo̱n, ko̱jo na̱xi̱ńdáꞌniú Saalbii̱n, ta̱nga ngije kasakongaꞌniuú xota̱ tji̱e̱e̱ Kosiee̱, katsꞌeén kjo̱a̱ꞌniú tsi̱ꞌe̱ nga íchjítjé yojoo̱.
36Kó tsindioó xota̱ Amoo̱r ki̱a̱ yaꞌanii̱ ndeskande nínga fínijíngií na̱xi̱ńdáꞌniú Akrabii̱n, ndeskande Selaa̱, xtji̱e̱e̱n ta̱ꞌin.
Currently Selected:
Nendiꞌamasien 1: MAIX
Highlight
Share
Compare
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
