Josuee̱ 22
22
Xota̱ tji̱e̱ xi kjindibáꞌoyá nginí nangii̱
1Kósꞌe̱ Josuee̱ katsangiyakjaꞌá xota̱ tji̱e̱e̱ Rubee̱n, ko̱jo xota̱ tji̱e̱e̱ Ngaa̱nd, ko̱jo xi ngi masien xota̱ tji̱e̱e̱ Manasee̱, 2kó bi̱ katsoó:
Jún jè kiniꞌánkjatjosónjnú ngayeje kjo̱a̱botíxoma xi katsjájnú Moisee̱, mosoo̱ Néná, kó ti̱ je kiniꞌánkjatjosónjnúꞌun ngayeje ni xi atixomájnúꞌun an nga. 3Kó ikꞌíjñámasienjínjnú ntsꞌiejnú ngayeje kui ni̱xtjii̱n, ngaskande ngotꞌe̱, kó ta̱sá kiniꞌánkjatjosónjnú ngayeje kjo̱a̱botíxomaa̱ Néná. 4Kó ngotꞌe̱ ꞌne̱, nga Néná je katsjaá kjo̱a̱xió ntsꞌiejnú, xikó má katsó nga katsóyàtjónjnú, ndibá nginíjnú, ndibákindyion nginíjnú ndiꞌajnú, nínga tikón tꞌanangi xi tsa̱jún, kui xi katsjájnú Moisee̱, mosoo̱ Néná, ki̱a̱ xtji̱e̱e̱n nínga fotjo tsꞌueé ndejèꞌ Jorndaa̱n. 5Ta̱nga ngata̱ niꞌánchíyájínjnú nga si̱ꞌankjatjosónjnú kjo̱a̱botíxomaa̱ ko̱jo kjo̱a̱kitii̱ Moisee̱, mosoo̱ Néná, kui xi bi̱ katsó nga atíxomájnú: Ti̱ꞌantjójnú Néná, kó ki̱a̱ tangíntji̱ngíjnú ndi̱ya̱à kui, ndaꞌyáꞌénjnúu̱ kjo̱a̱botíxomaa̱, kó ngatamaꞌniátakónjnú kuí. Kó ngayeje ini̱ma̱jnú, ko̱jo ngayeje takónjnú nga ti̱ꞌánjnú xaá Néná.
6Kó Josuee̱ katsꞌénchikonñé, ko̱jo katsꞌénkixotꞌa, kósꞌe̱ kijí ndiꞌaa̱ kui xotaa̱.
7Masien xota̱ tji̱e̱e̱ Manasee̱ xi Moisee̱ katsjaá tꞌanangi ki̱a̱ nangi Basaa̱n, kó xi ngi masiee̱n, Josuee̱ boá xi katsjaá tꞌanangi ngi̱jii̱n ntsꞌi̱e̱, kꞌi̱e̱ xtji̱e̱e̱n kꞌi̱e̱ xi ingoboaá ndejèꞌ Jorndaa̱n, xtji̱e̱e̱n nínga fotjo tsꞌueé, kó ko̱jo kui xotaa̱ xi Josuee̱ katsꞌénkjí ndiꞌaa̱ nga, ngije katsꞌénchikonñé.
8Kó bi̱ katsoó: Tangín nginíjnú ndiꞌajnú nga xꞌi̱a̱jnú tsie kjo̱a̱cho̱n, ko̱jo kjín cho̱ tjié, ko̱jo to̱ntiboa, ko̱jo to̱nsinié, ko̱jo ki̱cha̱ bronse̱, ko̱jo kjín ńjño xi chajá, kó ti̱ꞌankabisónjnúu̱ ngayeje xota̱ ndiꞌajnú kui ni xi kachjaꞌáxínjnúu̱ xota̱ xi kondraa̱.
9Kó bo̱a̱ tsꞌén nga xota̱ tji̱e̱e̱ Rubee̱n, ko̱jo xota̱ tji̱e̱e̱ Ngaa̱nd, ko̱jo xi ngi masien xota̱ tji̱e̱e̱ Manasee̱, kijíꞌoyá nginí, kó katsꞌénkjii̱n yojoo̱ xota̱ Israee̱l, ndeskande ki̱a̱ na̱xi̱ńdáꞌniú Siloo̱, kui xi tikón ki̱a̱ nangi Kanaa̱n, kósꞌe̱ kijí nangi Ngalaa̱nd, nga kijí nangi xi tsi̱ꞌe̱, xikó katsoó Néná nga tsíchji̱a̱jo Moisee̱.
Ṉchandikón xi kachjaninkꞌa xtji̱e̱e̱n nínga fotjo tsꞌueé ndejèꞌ Jorndaa̱n
10Kó kjiꞌanga xota̱ tji̱e̱e̱ Rubee̱n, ko̱jo xota̱ tji̱e̱e̱ Ngaa̱nd, ko̱jo xi ngi masien xota̱ tji̱e̱e̱ Manasee̱ jachó tsindioó ndejèꞌ Jorndaa̱n, xi tikón ki̱a̱ nangi Kanaa̱n, ki̱a̱ iskjininkꞌa ngo ṉchandikón xi ta̱nisién je. 11Kó xota̱ Israee̱l tsintꞌié nga xota̱ tji̱e̱e̱ Rubee̱n, ko̱jo xota̱ tji̱e̱e̱ Ngaa̱nd, ko̱jo xi ngi masien xota̱ tji̱e̱e̱ Manasee̱, nga je iskjininkꞌa ngo ṉchandikón kje̱n nangi Kanaa̱n, ki̱a̱ tsindioó ndejèꞌ Jorndaa̱n, xtji̱e̱nnii̱ nínga síndo xota̱ Israee̱l. 12Nga je tsintꞌié kuí nii̱ xota̱ Israee̱l, kamátikó ngayejee̱ ki̱a̱ na̱xi̱ńdáꞌniú Siloo̱, tsi̱ꞌe̱ nga ko̱e̱je̱kjánjo̱ kui xotaa̱. 13Ta̱nga ngindiee̱ nga ko̱e̱je̱, xota̱ Israee̱l katsangiyakoo̱n Finee̱, ndií chináꞌmi Eleasaa̱, tsi̱ꞌe̱ nga ku̱i̱chji̱a̱jo xota̱ tji̱e̱e̱ Rubee̱n, ko̱jo xota̱ tji̱e̱e̱ Ngaa̱nd, ko̱jo xi ngi masien xota̱ tji̱e̱e̱ Manasee̱ xi síndo nangi Ngalaa̱nd. 14Kó tie ma já ngito̱ko̱ xi nijan kijíjo̱ Finee̱, ngo ngito̱ko̱o̱ xtín xota̱ ndiꞌa xi chji̱a̱ni nga ngo nga ngo xtín xota̱ tji̱e̱e̱ xota̱ Israee̱l. 15Kó kui jaá jachókoón xota̱ tji̱e̱e̱ Rubee̱n, ko̱jo xota̱ tji̱e̱e̱ Ngaa̱nd, ko̱jo xi ngi masien xota̱ tji̱e̱e̱ Manasee̱, kó bi̱ katsoó: 16Ngayeje xota̱ na̱xi̱ńdaá Néná, bi̱ tsó:
—Míkjo̱a̱a̱ nga kiniꞌánkjatjosónjínjnú ni xi ikꞌíndajo̱jnú Nee̱ xota̱ Israee̱l. Ánní nga ikꞌíjñámasienjnú ndi̱ya̱à Néná, kó ngo ṉchandikón kachjaninkꞌajnú nga kiniꞌánkitikjo̱a̱jnú yojojnú kondra̱a̱ Néná. 17A jejín tsie má jé xí katsꞌén Peoo̱r, kui xi kji̱e̱ ma tsjiejónjín ñá ngaskande ngotꞌe̱, kó nga ta̱ngatꞌanii̱ kui nii̱ nga achichí má xota̱a̱ Néná xí jesoón, 18tsi̱ꞌe̱ nga ngotꞌe̱ ꞌne̱, ti̱ kꞌuijñámasien nginíjnú Néná. Tsi ngotꞌe̱ si̱ꞌankitikjo̱a̱jnú yojojnú ngindyi̱ko̱n Néná, ndyiojón sa̱ꞌínxchán, kó ko̱tíjeé ngayeje xota̱ Israee̱l.
19Tsi sꞌijinjnú nga ndándí boá kui tꞌanangi xi kasakojnú, tangínjnú ki̱a̱ tꞌanangi xi tsi̱ꞌe̱ Néná, ki̱a̱ nínga tikón ndiꞌandikoón Néná, kó ki̱a̱ chjábéjnú tꞌanangi ngi̱jii̱n nangi xi tsa̱ji̱n, ta̱nga nga niꞌánkitikjo̱a̱jínjnúu̱ yojojnú Néná, ti̱nde nga bixkánjo̱jínjnú xota̱jne̱ nga chjanínkꞌájnú ingo ṉchandikón, ngatꞌa̱ jè tikón ngo xi tsi̱ꞌe̱ Néná. 20A ta̱ngatꞌajínnií Akaa̱n, ndií Seraa̱, xi katsꞌén ngo jé xí ꞌniú, kósꞌe̱ ngayeje xota̱ Israee̱l kamájeé. ¡Kó jmí tsi ta̱kuítsí Akaa̱n xi kꞌien kjo̱a̱a̱ kui jé xí katsꞌeén!
21Kósꞌe̱ xota̱ tji̱e̱e̱ Rubee̱n, ko̱jo xota̱ tji̱e̱e̱ Ngaa̱nd, ko̱jo xi ngi masien xota̱ tji̱e̱e̱ Manasee̱, bi̱ katsoó ngito̱ko̱o̱ xtín xota̱ ndiꞌaa̱ xota̱ Israee̱l:
22—Néná, kui xi Nee̱ ngayeje ne, jè be nga jmí tsi kui nii̱ xi kiniꞌánjne̱ kjo̱a̱a̱ nga kitikjo̱a̱ kamájne̱, ko̱jo tsi kjo̱a̱a̱ nga kui ku̱i̱xkánjo̱jne̱. Néná, kui xi Nee̱ ngayeje ne, jè be, kó ngatamabe xota̱ Israee̱l nga: Tsi ikꞌíndisojne̱, ja̱ nga ꞌboxiéꞌájínjne̱ ngotꞌe̱ tsobo̱a̱. 23Tsi ngo ṉchan kachjaninkꞌajne̱ kjo̱a̱a̱ nga mejénjínjne̱ nga Néná kongintjingíjne̱, ko̱jo tsi kjo̱a̱a̱ nga kje̱ꞌe ne si̱ꞌankꞌasꞌienjne̱ kjo̱a̱tjó tsi̱ꞌe̱ kjo̱a̱xió, mejénjne̱ nga ti̱kuii Néná ngatsꞌénjéjne̱.
24Ta̱nga ni xi kiniꞌánjne̱, bo̱a̱ kiniꞌánjne̱, ngatꞌa̱ mejénjínjne̱ nga ni̱xtjin xi ndibaá ndíjnú bi̱ ka̱tso̱o̱ ndíjne̱: Míkjo̱a̱a̱ nga Néná, kui xi Nee̱ xota̱ Israee̱l niꞌántsjájnúu̱. 25Ngatꞌa̱ Néná boá xi íjñá ndejèꞌ Jorndaa̱n nga kui xi ka̱ma tsindioó tꞌanangijnú ko̱jo tꞌanangi xi tsa̱ji̱n, jún xota̱ tji̱e̱e̱ Rube̱n, ko̱jo xota̱ tji̱e̱e̱ Ngaa̱nd, kó kuíni nga jún jmí nijínjnú kjo̱a̱a̱ Néná.
Kósꞌe̱ bo̱a̱ tsꞌén nga ndí tsa̱jún, ka̱maa̱ sa̱ꞌín nga ndíjne̱ ngiti̱ stsa̱kjonjín Néná.
26Kuíni nga bi̱ kiꞌmíjne̱: Ngo ṉchandikón chjanínkꞌá, jmí tsi kjo̱a̱a̱ nga ngo kjo̱a̱tjó si̱ꞌankꞌasꞌién, 27kjo̱a̱a̱ nga xikónií tsi ngo chi̱bo̱a̱ sꞌijña tsi̱ꞌe̱ tsa̱jún ko̱jo tsi̱ꞌe̱ tsa̱ji̱n, ko̱jo tsi̱ꞌe̱ xota̱ xi jaskan kꞌuié, nga ka̱máná si̱ꞌanxátꞌáa̱ Néná, nga si̱ꞌankꞌasꞌien kjo̱a̱tjóná, kjo̱a̱a̱ kjo̱a̱tjó tsi̱ꞌe̱ kjo̱a̱xioó, kó nga ndíjnú ko̱jo ndíjne̱ bi̱jín ka̱tso̱ ndyiojón: Jún jmí nijínjnú kjo̱a̱a̱ Néná.
28Kó ji̱n bi̱ kiꞌmíjne̱: Tsi kui nii̱ kꞌuínjne̱ ji̱n, ko̱jo tsi xota̱ tji̱e̱jne̱ xi sꞌe̱ kꞌuieé, ja̱ ka̱ma bi̱ kꞌuínjne̱: Nga kotsijee̱n ṉchandikón xí katsꞌénda xota̱ xi xchájne̱ nga ti̱ bo̱a̱ má ti̱ kjiꞌi xikoó ṉchandikoón Néná, ngatꞌa̱ jmí tsi kiniꞌánda tsi̱ꞌe̱ nga kjo̱a̱tjó si̱ꞌankꞌasꞌienjne̱, kamánda tsi̱ꞌe̱ nga kui xi ko̱kó ni xi kiniꞌán ñá jún ko̱jo ji̱n. 29Nga jmíni̱xtjin nga kitikjo̱a̱ si̱ꞌanjne̱ yojojne̱ kondraa̱ Néná, ko̱jo tsi xín ndi̱yà kongínjne̱ nga si̱ꞌandajne̱ ngo ṉchandikón tsi̱ꞌe̱ kjo̱a̱tjoó, ko̱jo chji̱e̱e̱, ko̱jo nga cho̱ kꞌuítií, ngatꞌa̱ jè tikoón ngo ṉchandikón Néná ki̱a̱ Ndiꞌandikoón.
30Kó nga tsintꞌié ni xi katsó xota̱ tji̱e̱e̱ Rubee̱n, ko̱jo xota̱ tji̱e̱e̱ Ngaa̱nd, ko̱jo xi ngi masien xota̱ tji̱e̱e̱ Manasee̱, chináꞌmi Finee̱, ko̱jo já ngito̱ko̱o̱ xtín xota̱ ndiꞌaa̱ xota̱ Israee̱l kui xi nijan síndoo̱, nda kasasiee̱n kui nii̱, 31kósꞌe̱ Finee̱, ndií chináꞌmi Eleasaa̱, bi̱ katsoó:
Ngotꞌe̱ jè kamákjínná nga Néná kꞌi̱e̱ tikónjinná, ngatꞌa̱ jún jmí tsi Néná boá xi kamámejénjnú ku̱i̱xkánjo̱jnú. Kó jún jè kaꞌnaxiéngíjnú xota̱ tji̱e̱e̱ xota̱ Israee̱l ngi̱ya kjo̱a̱xcha̱án Néná.
32Kósꞌe̱ Finee̱, ndií chináꞌmi Eleasaa̱, ko̱jo já ngito̱ko̱o̱, katsjandieè xota̱ tji̱e̱e̱ Rubee̱n, ko̱jo xota̱ tji̱e̱e̱ Ngaa̱nd, ko̱jo xi ngi masien xota̱ tji̱e̱e̱ Manasee̱, nga ko̱e̱je̱ꞌoyá nginí nangi Ngalaa̱nd, xtji̱e̱e̱n nangi Kanaa̱n, nínga síndo xota̱ Israee̱l, tsi̱ꞌe̱ nga ku̱i̱ꞌíni̱jmi̱ì ngayeje kui nii̱. 33Kó xota̱ Israee̱l nda kasasiee̱n kui nii̱, kó katsjaá ndokꞌóchji̱ì Néná, kó ngiti̱ jmí ni katsójín tsi nijan ko̱e̱je̱kjánjo̱ ngase kui xotaa̱, tsi̱ꞌe̱ nga sa̱ꞌínkjatsón tꞌanangi nínga kisꞌińdo xota̱ tji̱e̱e̱ Rubee̱n, ko̱jo xota̱ tji̱e̱e̱ Ngaa̱nd. 34Kó xota̱ tji̱e̱e̱ Rubee̱n, ko̱jo xota̱ tji̱e̱e̱ Ngaa̱nd, chistiko̱ ítꞌajaꞌén ṉchandikoón Néná, kjo̱a̱a̱ nga kuí boá kui nii̱ xi akó nga Néná boá xi Ndi̱a̱a̱.
Currently Selected:
Josuee̱ 22: MAIX
Highlight
Share
Compare
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
