Josuee̱ 21
21
Na̱xi̱ńdáꞌniú xí kasakoo̱ xota̱ tji̱e̱e̱ Lebii̱
1Kui ni̱xtjin jàn já ngito̱ko̱o̱ xtín xota̱ ndiꞌa xi chji̱a̱ni xota̱ tji̱e̱e̱ Lebii̱, kijíkoón chináꞌmi Eleasaa̱, ko̱jo Josuee̱ kui xi ndií Nuu̱n, ko̱jo ngito̱ko̱o̱ xota̱ tji̱e̱e̱ Israee̱l, 2ki̱a̱ na̱xi̱ńdáꞌniú Siloo̱ xi chji̱a̱ni nangi Kanaa̱n, kó bi̱ katsoó: Néná jè bo̱a̱ katsoó Moisee̱ nga sa̱kójne̱ na̱xi̱ńdáꞌniú nínga ku̱i̱ndyionjne̱, ko̱jo kꞌijñá nínga ka̱ma kꞌuitsómá cho̱ tjiéjne̱.
3Kó kuíni nga, xikó kjiꞌi ni xi katsó Néná, xota̱ Israee̱l katsjaá na̱xi̱ńdáꞌniú xota̱ tji̱e̱e̱ Lebii̱, ko̱jo kꞌijñá nínga kꞌuitsómá cho̱ tji̱e̱é.
4Kó nga kiniꞌán ngo kjo̱a̱chꞌáṉcha, tjón má xtín xota̱ ndiꞌaa̱ Koaa̱t, ndií Aaroo̱n, ndíndeè Lebii̱ xi katseꞌeé na̱xi̱ńdáꞌniú, kó tie ján na̱xi̱ńdáꞌniú katseꞌeé, kó kuí boá xi síndo ngi̱jii̱n tꞌanangii̱ xota̱ tji̱e̱e̱ Jundáa̱, ko̱jo tsi̱ꞌe̱ xota̱ tji̱e̱e̱ Simeoo̱n, ko̱jo tsi̱ꞌe̱ xota̱ tji̱e̱e̱ Benjaa̱. 5Kó xi ngase xota̱ tji̱e̱e̱ Koaa̱t, tie na̱xi̱ńdáꞌniú katseꞌeé nga kańton kui kjo̱a̱chꞌáṉchaa̱, kó kuí boá xi síndo ngi̱jii̱n tꞌanangii̱ xota̱ tji̱e̱e̱ Efraii̱n, ko̱jo tsi̱ꞌe̱ xota̱ tji̱e̱e̱ Ndaa̱n, ko̱jo tsi̱ꞌe̱ xota̱ tji̱e̱e̱ Manasee̱, xi síndo xtji̱e̱e̱n nínga ꞌbosꞌien tsꞌueé.
6Kó xtín xota̱ xi chji̱a̱ni Ngersoo̱n nga kańton kui kjo̱a̱chꞌáṉchaa̱, tie ján na̱xi̱ńdáꞌniú katseꞌeé xi síndo ngi̱jii̱n tꞌanangii̱ xota̱ tji̱e̱e̱ Isakaa̱r, ko̱jo tsi̱ꞌe̱ xota̱ tji̱e̱e̱ Asee̱r, ko̱jo tsi̱ꞌe̱ xota̱ tji̱e̱e̱ Neftalii̱, ko̱jo tsi̱ꞌe̱ xota̱ tji̱e̱e̱ Manasee̱, xi síndo xtji̱e̱e̱n nínga fotjo tsꞌueé.
7Kó xtín xota̱ xi chji̱a̱ni Merarii̱, tie jó na̱xi̱ńdáꞌniú katseꞌeé xi síndo ngi̱jii̱n tꞌanangii̱ xota̱ tji̱e̱e̱ Rubee̱n, ko̱jo tsi̱ꞌe̱ xota̱ tji̱e̱e̱ Ngaa̱nd, ko̱jo tsi̱ꞌe̱ xota̱ tji̱e̱e̱ Sabuloo̱n.
8Kó bo̱a̱ tsꞌén nga xota̱ Israee̱l katsjaá xota̱ tji̱e̱e̱ Lebii̱ kui na̱xi̱ńdáꞌniuú, ko̱jo kꞌijñá nínga kꞌuitsómá cho̱ tji̱e̱é, nga kańton kui kjo̱a̱chꞌáṉchaa̱ kamákabi kui ngi̱ndiee̱, xikó má tsꞌén atíxomaa̱ Néná Moisee̱ nga ka̱ma.
9Xota̱ tji̱e̱e̱ Jundáa̱, ko̱jo xota̱ tji̱e̱e̱ Simeoo̱n, kui na̱xi̱ńdáꞌniuú xi katsjá: 10Kó nga kiniꞌán kui kjo̱a̱chꞌáṉchaa̱, tjón má xtín xota̱ ndiꞌaa̱ Koaa̱t, ndií Aaroo̱n, ndíndeè Lebii̱ xi katseꞌeé kui na̱xi̱ńdáꞌniuú: 11Na̱xi̱ńdáꞌniú xi ꞌmí Arba̱, xi ti̱kuíní xi Ebroo̱n nga. Arbaa̱ ndií Anaa̱k kamá. Kó ti̱ katseꞌeé kꞌijñá nínga kꞌuitsómá cho̱ tji̱e̱é xtji̱e̱e̱n nga̱ndee̱ na̱xi̱ńdáꞌniuú. 12Ta̱nga kꞌijñaá kui na̱xi̱ńdáꞌniuú ko̱jo ndí nangií, ja̱bo̱a̱ jè katseꞌeé Kalee̱b, kui nda̱ xi ndií Jefunee̱ kamá.
13Kó ndií chináꞌmi Aaroo̱n, kui katseꞌeé na̱xi̱ńdáꞌniú nínga ma mindyionꞌmá xi ꞌmí Ebroo̱n, tsi̱ꞌe̱ xota̱ xi jmí tsi xá katsꞌénkꞌiénni kje̱ꞌe xota̱, ko̱jo na̱xi̱ńdáꞌniú Libnaa̱ ko̱jo kꞌijñá xí tjiín, 14ko̱jo na̱xi̱ńdáꞌniú Jatii̱r, ko̱jo na̱xi̱ńdáꞌniú Estemoaa̱ ko̱jo kꞌijñá xí tjiín, 15ko̱jo na̱xi̱ńdáꞌniú Oloo̱n, ko̱jo na̱xi̱ńdáꞌniú Ndebii̱r ko̱jo kꞌijñá xí tjiín, 16ko̱jo na̱xi̱ńdáꞌniú Aii̱n, ko̱jo na̱xi̱ńdáꞌniú Jutaa̱, ko̱jo na̱xi̱ńdáꞌniú Bee̱t-Semee̱ ko̱jo kꞌijñá xí tjiín. Nijan kui na̱xi̱ńdáꞌniuú ngi̱ya tꞌanangi xi chji̱a̱ni xota̱ tji̱e̱e̱ Jundáa̱ ko̱jo tsi̱ꞌe̱ xota̱ tji̱e̱e̱ Simeoo̱n síndo. 17Kó tꞌanangi xi chji̱a̱ni xota̱ tji̱e̱e̱ Benjaa̱ nijón na̱xi̱ńdáꞌniú má: Na̱xi̱ńdáꞌniú Ngabaóo̱n, ko̱jo na̱xi̱ńdáꞌniú Ngebaa̱ ko̱jo kꞌijñá xí tjiín, 18ko̱jo na̱xi̱ńdáꞌniú Anatoo̱t, ko̱jo na̱xi̱ńdáꞌniú Almoo̱n ko̱jo kꞌijñá xí tjiín. Nijón má kui na̱xi̱ńdáꞌniuú. 19Tie ján kamá ngayeje na̱xi̱ńdáꞌniú xí kasakoo̱ já chináꞌmii̱, xi chji̱a̱ni ndií Aaroo̱n ko̱jo kꞌijñá xí tjiín. 20Kó nga kańton kui kjo̱a̱chꞌáṉchaa̱ xota̱ tji̱e̱e̱ Lebii̱, xi chji̱a̱ni xtín xota̱ ndiꞌaa̱ Koaa̱t, katseꞌeé na̱xi̱ńdáꞌniú xi síndo ngi̱yaa̱ tꞌanangi xi chji̱a̱ni xota̱ tji̱e̱e̱ Efraii̱n. 21Kó ki̱a̱ xtji̱e̱e̱n na̱xi̱ xi chji̱a̱ni xota̱ tji̱e̱e̱ Efraii̱n, katseꞌeé na̱xi̱ńdáꞌniú nínga ma mindyionꞌmá, tsi̱ꞌe̱ xota̱ xi jmí tsi xá katsꞌénkꞌiénni kje̱ꞌe xota̱, kó kuí bí xi̱ꞌbi̱: Na̱xi̱ńdáꞌniú Sikee̱n, kó ti̱ katseꞌeé na̱xi̱ńdáꞌniú Ngésee̱r ko̱jo kꞌijñá xí tjiín, 22ko̱jo na̱xi̱ńdáꞌniú Kibsaii̱n, ko̱jo na̱xi̱ńdáꞌniú Bee̱t-Oroo̱n ko̱jo kꞌijñá xí tjiín. Nijón má kui na̱xi̱ńdáꞌniuú. 23Kó ki̱a̱ tꞌanangi xi chji̱a̱ni xota̱ tji̱e̱e̱ Ndaa̱n: Nijón na̱xi̱ńdáꞌniú katseꞌeé, kó kuí bí xi̱ꞌbi̱: Na̱xi̱ńdáꞌniú Eltekee̱, ko̱jo na̱xi̱ńdáꞌniú Ngibetoo̱n ko̱jo kꞌijñá xí tjiín, 24ko̱jo na̱xi̱ńdáꞌniú Ayaloo̱n, ko̱jo na̱xi̱ńdáꞌniú Ngaa̱t-Rimoo̱n ko̱jo kꞌijñá xí tjiín. Nijón má kui na̱xi̱ńdáꞌniuú. 25Kó ki̱a̱ tꞌanangi xi chji̱a̱ni xi ngi masien xota̱ tji̱e̱e̱ Manasee̱ kuí boá xi̱ꞌbi̱: Na̱xi̱ńdáꞌniú Taanaa̱k, ko̱jo na̱xi̱ńdáꞌniú Ngaa̱t-Rimoo̱n ko̱jo kꞌijñá xí tjiín. Jó má kui na̱xi̱ńdáꞌniuú. 26Tie kamá ngayeje na̱xi̱ńdáꞌniú xí kasakoo̱ xtín xota̱ ndiꞌaa̱ Koaa̱t ko̱jo kꞌijñá xí tjiín.
27Xota̱ xi chji̱a̱ni xtín xota̱ ndiꞌaa̱ Ngersoo̱n, xi chji̱a̱ni xota̱ tji̱e̱e̱ Lebii̱, jó na̱xi̱ńdáꞌniú nínga ma mindyionꞌmá katseꞌeé, tsi̱ꞌe̱ xota̱ xi jmí tsi xá katsꞌénkꞌiénni kje̱ꞌe xota̱, xi síndo ngi̱yaa̱ tꞌanangii̱ xi chji̱a̱ni xota̱ tji̱e̱e̱ Manasee̱. Xtji̱e̱nnii̱ nangi Basaa̱n, katseꞌeé na̱xi̱ńdáꞌniú Beeteraa̱, ko̱jo na̱xi̱ńdáꞌniú Ngolaa̱n. Jó na̱xi̱ńdáꞌniú má. 28Kó xi chji̱a̱ni tꞌanangii̱ xota̱ tji̱e̱e̱ Isakaa̱r, nijón na̱xi̱ńdáꞌniú katseꞌeé, kó kuí bí xi̱ꞌbi̱: Na̱xi̱ńdáꞌniú Kisioo̱n, ko̱jo na̱xi̱ńdáꞌniú Ndaberaa̱t ko̱jo kꞌijñá xí tjiín, 29ko̱jo na̱xi̱ńdáꞌniú Jarmuu̱t, ko̱jo na̱xi̱ńdáꞌniú Ee̱n-Nganii̱n ko̱jo kꞌijñá xí tjiín. Nijón na̱xi̱ńdáꞌniú má. 30Kó xi chji̱a̱ni tꞌanangii̱ xota̱ tji̱e̱e̱ Asee̱r, nijón na̱xi̱ńdáꞌniú katseꞌeé nga, kó kuí bí xi̱ꞌbi̱: Na̱xi̱ńdáꞌniú Miseaa̱l, ko̱jo na̱xi̱ńdáꞌniú Abndoo̱n ko̱jo kꞌijñá xí tjiín, 31ko̱jo na̱xi̱ńdáꞌniú Elkaa̱t, ko̱jo na̱xi̱ńdáꞌniú Rejoo̱b ko̱jo kꞌijñá xí tjiín. Nijón na̱xi̱ńdáꞌniú má. 32Kó xi chji̱a̱ni tꞌanangii̱ xota̱ tji̱e̱e̱ Neftalii̱, ján na̱xi̱ńdáꞌniú katseꞌeé, kó kuí bí xi̱ꞌbi̱: Na̱xi̱ńdáꞌniú Amoo̱t-Ndoo̱r, ko̱jo na̱xi̱ńdáꞌniú Kartaa̱n, ko̱jo ngo na̱xi̱ńdáꞌniú nínga ma mindyionꞌmá, tsi̱ꞌe̱ xota̱ xi jmí tsi xá katsꞌénkꞌiénni kje̱ꞌe xota̱, kó kuí boá xi Kendee̱, xi kisꞌijña nangi Ngalilea̱ ko̱jo kꞌijñá xí tjiín. 33Kó xota̱ xi chji̱a̱ni xtín xota̱ ndiꞌaa̱ Ngersoo̱n tie ján na̱xi̱ńdáꞌniú katseꞌeé ngayejee̱ ko̱jo kꞌijñá xí tjiín.
34Kó xota̱ tji̱e̱e̱ Lebii̱ xi chaja ngasee̱, xtín xota̱ ndiꞌaa̱ Merarii̱, xi chji̱a̱ni xota̱ tji̱e̱e̱ Sabuloo̱n, kuí bí na̱xi̱ńdáꞌniú xí katseꞌeé: Na̱xi̱ńdáꞌniú Jokneaa̱n, ko̱jo na̱xi̱ńdáꞌniú Kartaa̱ ko̱jo kꞌijñá xí tjiín, 35ko̱jo na̱xi̱ńdáꞌniú Ndimnaa̱, ko̱jo na̱xi̱ńdáꞌniú Naalaa̱l ko̱jo kꞌijñá xí tjiín. Nijón na̱xi̱ńdáꞌniú má. 36Kó xi chji̱a̱ni tꞌanangii̱ xota̱ tji̱e̱e̱ Rubee̱n ngi nijón na̱xi̱ńdáꞌniú katseꞌé ngasee̱, kó kuí bí xi̱ꞌbi̱: Na̱xi̱ńdáꞌniú Besee̱r, ko̱jo na̱xi̱ńdáꞌniú Jaa̱ ko̱jo kꞌijñá xí tjiín, 37ko̱jo na̱xi̱ńdáꞌniú Kandemoo̱t, ko̱jo na̱xi̱ńdáꞌniú Mefáa̱t ko̱jo kꞌijñá xí tjiín. 38Kó xi chji̱a̱ni tꞌanangii̱ xota̱ tji̱e̱e̱ Ngaa̱nd katseꞌeé ngi nijón na̱xi̱ńdáꞌniú, kó kuí bí xi̱ꞌbi̱: Na̱xi̱ńdáꞌniú Ramoo̱t xi tikón nangi Ngalaa̱nd, ko̱jo ngo na̱xi̱ńdáꞌniú nínga ma mindyionꞌmá, tsi̱ꞌe̱ xota̱ xi jmí tsi xá katsꞌénkꞌiénni kje̱ꞌe xota̱, kó kuí boá xi Maanaii̱n ko̱jo kꞌijñá xí tjiín, 39ko̱jo na̱xi̱ńdáꞌniú Esboo̱n, ko̱jo na̱xi̱ńdáꞌniú Jasee̱r ko̱jo kꞌijñá xí tjiín. Nijón na̱xi̱ńdáꞌniú má. 40Kó ngayeje na̱xi̱ńdáꞌniú xí kasakoo̱ xtín xota̱ ndiꞌaa̱ Merarii̱ nga kańton kjo̱a̱chꞌáṉchaa̱, tiejó na̱xi̱ńdáꞌniú má. 41Ngayeje na̱xi̱ńdáꞌniú xí kasakoo̱ xota̱ tji̱e̱e̱ Lebii̱, ngi̱ya tꞌanangii̱ xota̱ Israee̱l, ko̱jo kꞌijñaá, yichán jin na̱xi̱ńdáꞌniú kamá. 42Nga ngo nga ngo kui na̱xi̱ńdáꞌniuú kisꞌiee̱ kꞌijñá nga ngo foaꞌatjiyajoo̱n, kó bo̱a̱ kon kamá ngayejee̱.
Néná tsꞌénkjátjosón ni xi tsóyàtjón
43Kó bo̱a̱ tsꞌén nga Néná katsꞌénkꞌasꞌiee̱n xota̱ Israee̱l ngayeje tꞌanangi xi ja̱bo̱a̱ je katsóyàtjoón xota̱ xi xchaá nga tsja̱á. Kó kui xotaa̱ iskjíbé, kó ki̱a̱ kisꞌińdo. 44Kó Néná katsꞌén nga kꞌuieé kjo̱a̱xió, kó bo̱a̱ má katsꞌén xikótsꞌèn katsóyàtjoón xota̱ xi xchaá. Nde ngojín ngayeje kondra̱a̱ xi kamaá katsꞌeén nga askjanjo̱, ta̱sá Néná ngi̱ya tsja xota̱ Israee̱l katsꞌénkꞌasꞌien kui kondraa̱. 45Kó Néná katsꞌénkjatjosón ngayeje ni xi katsóyàtjoón xota̱ Israee̱l, kó nde ngojín ni íjñá tꞌaxín xi katsꞌénkjatjosónjín.
Currently Selected:
Josuee̱ 21: MAIX
Highlight
Share
Compare
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
