Josuee̱ 20
20
Na̱xi̱ńdáꞌniú nínga ma mindyionꞌmá
1Jaskan ngije kamá kui nii̱, Néná tsíchji̱a̱a̱ Josuee̱, kó bi̱ katsoó:
2Ndókjo̱e̱je ji xota̱ Israee̱l, kó bo̱a̱ tꞌíi̱n: Nga chjiéngá ko̱ngase na̱xi̱ńdáꞌniú nínga ma mindyionꞌmá xi ka̱machjieén, kui na̱xi̱ńdáꞌniú xi je sa tsíchji̱a̱jo an Moisee̱, 3tsi̱ꞌe̱ nga ki̱a̱ ka̱ma ko̱ngaꞌma kui xota̱ xi jmí tsi xá sa̱ꞌínkꞌiénni kje̱ꞌe xota̱, kó ki̱a̱ ka̱ma kꞌuijñáꞌmá kui na̱xi̱ńdáꞌniuú, tsi̱ꞌe̱ nga xkjín kuí ini̱ma̱a̱ jmí ni sa̱ꞌínjo̱jín kui xi ka̱májiín sa̱ꞌíngojo. 4Kui xota̱ xi ki̱a̱ ko̱ngaꞌma kui na̱xi̱ńdáꞌniuú, chjiéngá ki̱a̱ kjo̱chó nínga bitjasꞌi̱e̱nnii̱ na̱xi̱ńdáꞌniuú, kó ka̱tso̱yaa̱ xota̱ xi xchaá ni xi kamaá. Kó kui jaá ka̱ma sa̱ꞌínkꞌasꞌien, ko̱jo ka̱ma tsja̱á ngo ngi̱ndie nínga ka̱makꞌuijñá ngijee̱. 5Kó tsi xkjín xí ꞌniú tiñanii̱ xota̱ xi kiniꞌánkꞌieén ko̱e̱je̱tji̱ngii̱ tsi̱ꞌe̱ nga sa̱ꞌínkꞌién, ka̱májín si̱ꞌankꞌasꞌien ngi̱ya tsja kui xotaa̱, ngatꞌa̱ jmí tsi xá katsꞌénkꞌiénni, ko̱jo tsi chꞌoo̱ xkjín ngindiee̱ nga bo̱a̱ kamá. 6Kó chjiéngá ki̱a̱ kꞌuijñá kui na̱xi̱ńdáꞌniuú ngaskande nga ka̱mandajin kjo̱a̱a̱ ngindyi̱ko̱n xota̱ na̱xi̱ńdaá, ko̱jo tsi ngaskande nga ko̱yà ngito̱ko̱o̱ chináꞌmi xi tikón kui ni̱xtjii̱n. Bo̱a̱ tsí tsꞌén nga ka̱ma ko̱e̱je̱ꞌoyá nginí ndiꞌaa̱, ki̱a̱ na̱xi̱ńdáꞌniú nínga kjindibáni.
7Kósꞌe̱ xota̱ Israee̱l jaꞌájin kui na̱xi̱ńdáꞌniuú:
Na̱xi̱ńdáꞌniuú Kendee̱, xi tikón nangi Ngalileaa̱, ki̱a̱ na̱xi̱ xi chji̱a̱ni xota̱ tji̱e̱e̱ Neftalii̱.
Na̱xi̱ńdáꞌniuú Sikee̱n, xi tikón xtji̱e̱e̱n na̱xi̱ xi chji̱a̱ni xota̱ tji̱e̱e̱ Efraii̱n.
Na̱xi̱ńdáꞌniuú Ebroo̱n, xi tikón xtji̱e̱e̱n na̱xi̱ xi chji̱a̱ni xota̱ tji̱e̱e̱ Jundáa̱.
8Na̱xi̱ńdáꞌniuú Besee̱r, ki̱a̱ xi ingoboaá Ndejèꞌ Jorndaa̱n, xtji̱e̱e̱n nínga fotjo tsꞌueé na̱xi̱ńdáꞌniú Jerikoo̱, ki̱a̱ nangi kixií, nangi són xi chji̱a̱ni xota̱ tji̱e̱e̱ Rubee̱n.
Na̱xi̱ńdáꞌniuú Ramoo̱t, ki̱a̱ nangi Ngalaa̱nd, xi chji̱a̱ni xota̱ tji̱e̱e̱ Ngaa̱nd.
Na̱xi̱ńdáꞌniuú Ngolaa̱n, ki̱a̱ nangi Basaa̱n xi chji̱a̱ni xota̱ tji̱e̱e̱ Manasee̱.
9Kuí bí kui na̱xi̱ńdáꞌniuú nínga ma mindyionꞌmá, kui xi kachjeꞌéjin tsi̱ꞌe̱ ngayeje xota̱ Israee̱l, ko̱jo ngayeje xota̱ xi xín nangi kjindibáni ta̱nga ki̱a̱ síndojin, tsi̱ꞌe̱ nga ki̱a̱ ko̱ngaꞌma ngayeje xota̱ xi jmí tsi xá katsꞌénkꞌiénni kje̱ꞌe xota̱, tsi̱ꞌe̱ nga xkjín xí ꞌniú tiña manii̱ kui ini̱ma̱a̱ sa̱ꞌíngojojín, ngindiee̱ nga ka̱majeé ngindyi̱ko̱n xota̱ na̱xi̱ńdaá.
Currently Selected:
Josuee̱ 20: MAIX
Highlight
Share
Compare
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
