Josuee̱ 18
18
Bi̱ tsꞌén akjángá Josuee̱ tꞌanangi xi ngasee̱
1Kjiꞌanga xota̱ Israee̱l je kamaá nga katsꞌéntsi̱ꞌe̱ ngayeje kui tꞌanangii̱, ki̱a̱ na̱xi̱ńdáꞌniú Siloo̱ kamátikó ngayejee̱, kó ki̱a̱ iskjininkꞌa ndiꞌandikoón Néná. 2Ta̱nga ngi̱jii̱n xota̱ Israee̱l, ngi yito xota̱ tji̱e̱ kichajá nga si̱ꞌankꞌasꞌiee̱n tꞌanangi.
3Kósꞌe̱ Josuee̱, bi̱ katsoó xota̱ Israee̱l:
Ngaskande kjiꞌání nga ka̱mamejénjnú chjábéjnú kui tꞌanangi xi je katsjájnú Néná, kui xi Nee̱ xota̱ xi xchájnú boá nga. 4Chja̱ꞌájinjnú ján jáxíꞌín xki̱ nga ngo nga ngo xota̱ tji̱e̱e̱, tsi̱ꞌe̱ nga an sangiya an nga ko̱e̱je̱katsijee̱n kui tꞌanangii̱, kósꞌe̱ ngije kjo̱e̱ꞌe̱ꞌóyá nginí nga tsóyàna kótsꞌèn ka̱ma si̱ꞌankabí. 5Sꞌe̱ jaskan yito tjín si̱ꞌán kuí tꞌanangii̱ nga ko̱kjangá, kó xota̱ tji̱e̱e̱ Jundáa̱ ki̱a̱ kꞌuíndo tꞌanangi xi tikón xtji̱e̱e̱n na̱ngi, kó xota̱ tji̱e̱e̱ Kosiee̱, ki̱a̱ kꞌuíndo tꞌanangi xi tikón xtji̱e̱e̱n ta̱ꞌin. 6Kó jún, yito tjín tꞌíndojnú kui tꞌanangii̱, kósꞌe̱ ndibájo̱jnúꞌun kui xki̱i̱, sꞌe̱ ngo kjo̱a̱chꞌáṉcha̱ sa̱ꞌin an ngindyi̱ko̱n Néná, tsi̱ꞌe̱ nga xcha̱ ꞌyání xi sa̱ko̱ó nga ngo nga ngo chikjan kui tꞌanangii̱. 7Ta̱nga xota̱ tji̱e̱e̱ Lebii̱ nde ngo tjín tꞌanangi sa̱kójiín ngi̱jinjnú, ngatꞌa̱ kui xotaa̱ xá chináꞌmii̱ Néná boá kjo̱a̱nda xi sa̱ko̱ó kui. Kó kjo̱a̱a̱ xota̱ tji̱e̱e̱ Ngaa̱nd, ko̱jo xota̱ tji̱e̱e̱ Rubee̱n, ko̱jo xi masien xota̱ tji̱e̱e̱ Manasee̱, jè kasakoo̱ tꞌanangi xi ingoboaá ndejèꞌ Jorndaa̱n, ki̱a̱ xtji̱e̱e̱n nínga fotjo tsꞌueé, kui tꞌanangi xi Moisee̱ katsꞌénkꞌasꞌiee̱n, kui nda̱ xi mosoo̱ Néná kamá.
8Kó kui já xí kachjaꞌájii̱n kisꞌińdonda, kó Josuee̱ katsangiya tsi̱ꞌe̱ nga skotsíjee̱n kóchon kui tꞌanangii̱, kó bi̱ katsoó: Tangínjnú, kó tsitsíjenjnúu̱ ngayeje kui tꞌanangii̱, sꞌe̱ jaskan kꞌi̱e̱ ndibájo̱jnúꞌun xki̱i̱, tsi̱ꞌe̱ nga an, ngo kjo̱a̱chꞌáṉcha̱ sa̱ꞌin an ngindyi̱ko̱n Néná kꞌi̱e̱ na̱xi̱ńdáꞌniú Siloo̱.
9Kó kui jaá kijíkatsijee̱n ngayeje kui tꞌanangii̱, kósꞌe̱ yito tjín katsꞌén xi ítꞌa ngo xo̱jo̱n xki̱ na̱xi̱ńdáꞌniú, kósꞌe̱ kijí nginí nínga síndo ndiꞌańjñoo̱ xotaa̱ ki̱a̱ na̱xi̱ńdáꞌniú Siloo̱ nínga tikón Josuee̱. 10Kósꞌe̱ Josuee̱ ngo kjo̱a̱chꞌáṉcha katsꞌén ngindyi̱ko̱n Néná, ki̱a̱ na̱xi̱ńdáꞌniú Siloo̱, kó ki̱a̱ akjángaá tꞌanangi xota̱ Israee̱l, xikó kjiꞌi xi tsoboaá.
Tꞌanangi xi kasakoo̱ xota̱ tji̱e̱e̱ Benjaa̱
11Tꞌanangi xi tjón kamákabi nga kiniꞌán kui kjo̱a̱chꞌáṉchaa̱, kuí boá xi kasakoo̱ xota̱ tji̱e̱e̱ Benjaa̱, nga xki̱ xtín xota̱ ndiꞌa, kui tꞌanangi xi tikón ngamasiee̱n tꞌanangi xi katsoboaá xota̱ tji̱e̱e̱ Jundáa̱, ko̱jo xota̱ tji̱e̱e̱ ndií Kosiee̱. 12Xtji̱e̱e̱n ta̱ꞌin, ꞌbítsi̱yani tsindioó ki̱a̱ tꞌa ndejèꞌ Jorndaa̱n, kósꞌe̱ fínijíngí xtji̱e̱e̱n na̱xi̱ xi tikón ta̱ꞌii̱n na̱xi̱ńdáꞌniú Jerikoo̱. Kósꞌe̱ fí nginí xtji̱e̱e̱n nínga ꞌbosꞌien tsꞌueé, ki̱a̱ nangi nínga na̱xi̱i̱, ngaskande nga fochó nangi kixí xi ꞌmí Bee̱t-Abee̱n. 13Ndeskande ki̱a̱a̱ foaꞌa tsindioó xtji̱e̱e̱n Ndiꞌí, ki̱a̱ tꞌa kui ngi̱ndiee̱, ki̱a̱ tikón na̱xi̱ńdáꞌniú Betee̱l, kósꞌe̱ foaꞌajaya ngaskande xtji̱e̱e̱n na̱xi̱ńdáꞌniú Ataroo̱t-Andaa̱r, ki̱a̱ tꞌa na̱xi̱ xi tikón xtji̱e̱e̱n na̱ngii̱ na̱xi̱ńdáꞌniú Bee̱t-Oroo̱n xi tikón na̱ngi. 14Kósꞌe̱ kui tsindioó ki̱a̱ jaꞌatjiya xtji̱e̱e̱n na̱ngi, ndeskande xtji̱e̱e̱n na̱xi̱ nínga ꞌbosꞌien tsꞌueé kui xi tikón kje̱n na̱xi̱ńdáꞌniú Bee̱t-Oroo̱n, xtji̱e̱e̱n na̱ngi, kó ki̱a̱ fotjokjà ki̱a̱ na̱xi̱ńdáꞌniú Kiriaa̱t-Jearii̱n, kui xi na̱xi̱ńdáꞌniuú xota̱ tji̱e̱e̱ Jundáa̱. Kuí bí xi̱ꞌbi̱ xi tsindió xí chji̱a̱ni xtji̱e̱e̱n nínga ꞌbosꞌien tsꞌueé.
15Kó tsindió xí tikón xtji̱e̱e̱n na̱ngi, ki̱a̱ ꞌbítsi̱yani xtji̱e̱e̱n nga̱ndee̱ na̱xi̱ńdáꞌniú Kiriaa̱t-Jearii̱n, kó ki̱a̱ fí ngase xtji̱e̱e̱n nínga ꞌbosꞌien tsꞌueé, kó ki̱a̱ fochó ngaskande ndáńchꞌi̱ xi chji̱a̱ni Neftoaa̱. 16Kó kuí tsindioó ki̱a̱ foaꞌajaya ki̱a̱ tꞌa na̱xi̱ xi tikón kje̱n nangi soón ndií Inoo̱n, ki̱a̱ xtji̱e̱e̱n nangi són xi ꞌmí Refaii̱n, xtji̱e̱e̱n ta̱ꞌin, kósꞌe̱ ki̱a̱ jaꞌajaya nginí nangi soón Inoo̱n, ki̱a̱ tꞌa tsindioó xota̱ Jebuu̱, xtji̱e̱e̱n na̱ngi, kósꞌe̱ ki̱a̱ fíjayani ngaskande ndáńchꞌi̱ Ee̱n-Rongee̱l. 17Kósꞌe̱ kijí xtji̱e̱e̱n ta̱ꞌin, ngaskande ndáńchꞌi̱ Ee̱n-Semee̱, sꞌe̱ ki̱a̱ kijí ngase ngaskande Ngeliloo̱t, kui ngi̱ndie xi tikón xtji̱e̱e̱n kje̱n nínga fínijíngií na̱xi̱ńdáꞌniú Andumii̱n, kósꞌe̱ foaꞌajaya nginí ngaskande nínga tikón ndi̱jo̱o̱ Boaa̱n, kui xi ndií Rubee̱n kamá. 18Kó ki̱a̱ jaꞌa xtji̱e̱e̱n tꞌa na̱xi̱ xi síndo kje̱n na̱xi̱ńdáꞌniú Araba̱, xtji̱e̱e̱n ta̱ꞌin, kósꞌe̱ foaꞌajaya nginí xtji̱e̱e̱n na̱xi̱ńdáꞌniú Araba̱. 19Jaskan jaꞌatꞌa tsindioó xtji̱e̱e̱n ta̱ꞌii̱n na̱xi̱ńdáꞌniú Bee̱t-Onglaa̱, kó ki̱a̱ fetꞌa tꞌa ndáchíkoón nínga fochó ndejèꞌ Jorndaa̱n, xtji̱e̱nnii̱ ta̱ꞌii̱n Ndáchíkón Kꞌieèn. Kuí bí xi̱ꞌbi̱ xi tsindioó xtji̱e̱e̱n na̱ngi.
20Kó ndejèꞌ Jorndaa̱n boá xi tsindioó xtji̱e̱e̱n nínga fotjo tsꞌueé. Kuí boá tꞌanangi xi kiniꞌánkꞌasꞌiee̱n xota̱ tji̱e̱e̱ Benjaa̱ nga xki̱ xtín xota̱ ndiꞌa, xikó kjiꞌi kui tsindioó.
21Kó na̱xi̱ńdáꞌniú xí kasakoo̱ xtín xota̱ ndiꞌaa̱ xota̱ tji̱e̱e̱ Benjaa̱, kuí bí xi̱ꞌbi̱: Na̱xi̱ńdáꞌniú Jerikoo̱, ko̱jo na̱xi̱ńdáꞌniú Bee̱t-Onglaa̱, ko̱jo na̱xi̱ńdáꞌniú Émee̱k-Kesii̱, 22ko̱jo na̱xi̱ńdáꞌniú Bee̱t-Arabaa̱, ko̱jo na̱xi̱ńdáꞌniú Semaraii̱n, ko̱jo na̱xi̱ńdáꞌniú Betee̱l, 23ko̱jo na̱xi̱ńdáꞌniú Abii̱n, ko̱jo na̱xi̱ńdáꞌniú Paráa̱, ko̱jo na̱xi̱ńdáꞌniú Ofraa̱, 24ko̱jo na̱xi̱ńdáꞌniú Kefaa̱r-Aamoníi̱, ko̱jo na̱xi̱ńdáꞌniú Ofníi̱, ko̱jo na̱xi̱ńdáꞌniú Ngebaa̱, tiejó na̱xi̱ńdá má ngayejee̱ ko̱jo ndí nangi xi chji̱a̱ni. 25Ko̱jo ngi tienijón na̱xi̱ńdáꞌniú ko̱jo ndí nangi xi chji̱a̱ni, kó kuí bí xi̱ꞌbi̱: Na̱xi̱ńdáꞌniú Ngabaóo̱n, ko̱jo na̱xi̱ńdáꞌniú Ramaa̱, ko̱jo na̱xi̱ńdáꞌniú Beeroo̱t, 26ko̱jo na̱xi̱ńdáꞌniú Mispa̱, ko̱jo na̱xi̱ńdáꞌniú Kefiráa̱, ko̱jo na̱xi̱ńdáꞌniú Mosaa̱, 27ko̱jo na̱xi̱ńdáꞌniú Rékee̱n, ko̱jo na̱xi̱ńdáꞌniú Irpee̱l, ko̱jo na̱xi̱ńdáꞌniú Taralaa̱, 28ko̱jo na̱xi̱ńdáꞌniú Selaa̱, ko̱jo na̱xi̱ńdáꞌniú Jelee̱f, ko̱jo na̱xi̱ńdáꞌniú Ngibeaa̱, ko̱jo na̱xi̱ńdáꞌniú Kiriaa̱t, ko̱jo na̱xi̱ńdáꞌniú Jebuu̱, kui xi jaskan Jerusalee̱n kiꞌmí ngijee̱. Kó kuí boá tꞌanangi xi katseꞌeé xota̱ tji̱e̱e̱ Benjaa̱ nga xki̱ xtín xota̱ ndiꞌa.
Currently Selected:
Josuee̱ 18: MAIX
Highlight
Share
Compare
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
