Josuee̱ 17
17
Tꞌanangi xi chji̱a̱ni xota̱ tji̱e̱e̱ Manasee̱
1Jaskan ngo kjo̱a̱chꞌáṉcha̱ kańtonni kjo̱a̱a̱ tꞌanangi xi katseꞌeé xota̱ tji̱e̱e̱ Manasee̱, ngatꞌa̱ ndí tjoón Kosiee̱ kamá. Kó Makii̱r boá xi ndí tjoón Manasee̱ kamá, kui xi na̱ꞌmi kamánii̱ xota̱ Ngalaa̱nd, kui nda̱ xi chꞌokon kamá nga kijí kjo̱a̱xcha̱án, kó kuí boá xi kiniꞌánkꞌasꞌiee̱n nangi Ngalaa̱nd, ko̱jo nangi Basaa̱n.
2Kó ti̱ katseꞌeé tꞌanangi xota̱ tji̱e̱ xi ngasee̱ Manasee̱, xki̱ xtín xota̱ ndiꞌaa̱: Kó kuí boá xi ndií Abiesee̱r, ko̱jo ndií Elee̱k, ko̱jo ndií Asriee̱l, ko̱jo ndií Sikee̱n, ko̱jo ndií Éfee̱r, ko̱jo ndií Semindaa̱. Kuí boá xi̱ꞌba̱ xi ndií Manasee̱ kamá, kui xi ndií Kosiee̱, nga xki̱ xtín xota̱ ndiꞌa.
3Ta̱nga Selofeaa̱nd, ndií Jefee̱r kamá, kó Jefee̱r ndií Ngalaa̱nd, kó Ngalaa̱nd ndií Makii̱r, kó Makii̱r ndií Manasee̱, jmí ndí xíꞌín kisꞌiejiín, ta̱soboá ndí ínchjín xí kisꞌiee̱, kó kuí boá xi kiꞌmí: Na̱ Maalaa̱, ko̱jo na̱ Noáa̱, ko̱jo na̱ Onglaa̱, ko̱jo na̱ Milkaa̱, ko̱jo na̱ Tirsaa̱. 4Kui ínchjiín kijí ngindyi̱ko̱n chináꞌmi Eleasaa̱, ko̱jo Josuee̱ ndií Nuu̱n, ko̱jo já ngito̱ko̱o̱ na̱xi̱ńdaá, kó bi̱ katsoó: Néná boá xi je atíxomaa̱ Moisee̱ nga tsja̱ajne̱ tꞌanangi xikoó kui xota̱ xi̱ꞌin xingi̱jne̱.
Kósꞌe̱ Josuee̱ katsjaá tꞌanangi xikoó xi kiniꞌánkꞌasꞌiee̱n xkjín na̱ꞌmii̱, xikótsꞌèn atíxoma Néná nga ka̱ma.
5Kó Manasee̱ tie chikjan tꞌanangi kasakoo̱ nga kjo̱a̱chꞌáṉcha̱ kańtonni, ko̱jo nangi Ngalaa̱nd, ko̱jo nangi Basaa̱n, kui xi tikón ki̱a̱ tꞌa ndejèꞌ Jorndaa̱n. 6Ngatꞌa̱ ínchjiín Manasee̱ katseꞌeé tꞌanangi xikoó tsi ndí xíꞌín kamá, kó tꞌanangi Ngalaa̱nd, ndí xíꞌiín Manasee̱ xi ngasee̱ katseꞌeé ki̱a̱.
7Kó tꞌanangi xi chji̱a̱ni Manasee̱, yaꞌanii̱ ndeskande tsindioó nínga síndo xota̱ tji̱e̱e̱ Asee̱r, ngaskande na̱xi̱ńdáꞌniú Mikmetaa̱t, kui xi tikón kje̱n na̱xi̱ńdáꞌniú Sikee̱n, kó fí ngase xtji̱e̱e̱n na̱ngi, ngaskande nínga tikón xo̱ngàndántꞌié Tapúaa̱. 8Nangi Tapúaa̱ tsi̱ꞌe̱ Manasee̱ kamá, ta̱nga ti̱kuii nangi Tapúaa̱ nínga tikón tsindioó tꞌanangii̱ Manasee̱, tsi̱ꞌe̱ ndií Efraii̱n kamá. 9Kó tsindioó ki̱a̱ foaꞌajayani nínga tikón xo̱ngàndántꞌieé nangi Kanaa̱, kui nangi xi síndo xtji̱e̱e̱n na̱ngii̱ kui xo̱ngàndántꞌieé ki̱a̱ chji̱a̱ni xota̱ tji̱e̱e̱ Efraii̱n xi síndo ngi̱jii̱n na̱xi̱ńdáꞌniú xí chji̱a̱ni Manasee̱. Kó tsindioó tꞌanangii̱ Manasee̱, ki̱a̱ yaꞌanii̱ ndeskande ta̱ꞌii̱n kui xo̱ngàndántꞌieé, kó ki̱a̱ fochó ngaskande ndáchíkón Menditerráneoo̱. 10Kó nangi xi kasakoo̱ Efraii̱n ki̱a̱ kisꞌijña xtji̱e̱e̱n na̱ngii̱ xo̱ngàndántꞌieé, kó xi tsi̱ꞌe̱ Manasee̱, ki̱a̱ kisꞌijña xtji̱e̱e̱n ta̱ꞌin, kó Ndáchíkón Menditerráneoo̱ boá xi kamá tsindioó. Kó nga xtji̱e̱e̱n ta̱ꞌin ki̱a̱ fochótꞌaa̱ tsindioó xota̱ tji̱e̱e̱ Asee̱r, kó nga xtji̱e̱e̱n nínga fotjo tsꞌueé, ki̱a̱ kamátsindiójo̱ tꞌanangii̱ xota̱ tji̱e̱e̱ Isakaa̱r. 11Ngi̱jii̱n tꞌanangii̱ xota̱ tji̱e̱e̱ Isakaa̱r ko̱jo xota̱ tji̱e̱e̱ Asee̱r, tsi̱ꞌe̱ Manasee̱ kamá na̱xi̱ńdáꞌniú Bee̱t-Seaa̱n ko̱jo ndí nangi xi kisꞌiee̱, ko̱jo na̱xi̱ńdáꞌniú Ibleaa̱n ko̱jo ndí nangi xi kisꞌiee̱, ko̱jo xota̱ xi kisꞌińdo na̱xi̱ńdáꞌniú Ndoo̱r ko̱jo ndí nangi xi kisꞌiee̱, ko̱jo xota̱ xi kisꞌińdo na̱xi̱ńdáꞌniú Endoo̱r ko̱jo ndí nangi xi kisꞌiee̱, ko̱jo xota̱ xi kisꞌińdo na̱xi̱ńdáꞌniú Taanaa̱k ko̱jo ndí nangi xi kisꞌiee̱, ko̱jo xota̱ xi kisꞌińdo na̱xi̱ńdáꞌniú Mengindoo̱ ko̱jo ndí nangi xi kisꞌiee̱. Ján kamá kui xtín na̱xi̱ńdáꞌniuú ngayejee̱. 12Ta̱nga xota̱ tji̱e̱e̱ Manasee̱ kamájiín katsꞌeén tꞌanangii̱ xota̱ Kanaa̱n xi síndo kui na̱xi̱ńdáꞌniuú, kó kui xota̱ Kanaa̱n ꞌniú katsꞌén nga to̱kó ki̱a̱ síndo, ngaskande ngotꞌe̱. 13Ta̱nga ngije kasakongaꞌniú ngasee̱ xota̱ Israee̱l, katsꞌeén kjo̱a̱ꞌniú nga íchjítjé yojoo̱, ta̱nga tsangatji̱ngíjiín.
Xota̱ tji̱e̱e̱ Kosiee̱ tsíꞌá ngase tꞌanangi
14Kósꞌe̱ xota̱ tji̱e̱e̱ Kosiee̱, tsíchji̱a̱jo Josuee̱, nga bi̱ katsoó:
—Míkjo̱a̱a̱ nga nga ta̱ ngo chikjan tsí tꞌanangi katseꞌéjne̱, nga kiniꞌán kui kjo̱a̱chꞌáṉchaa̱ xi achichí má ji̱n, kó Néná tjítsꞌénchíkonñéjne̱ ngaskande ngotꞌe̱.
15Kósꞌe̱ Josuee̱, bi̱ katsoó:
—Tsi ja̱koxi̱ nga achichí májnú, ngatꞌa̱ sꞌiénjínjnú na̱xi̱i̱ Efraii̱n kui tꞌanangi xi kasakojnú jún, ja̱ tangínnijíngijnú na̱xi̱i̱, kó ti̱chájnú yá ko̱jo kꞌijñá ki̱a̱ nangii̱ xota̱ Feree̱, ko̱jo nangii̱ xota̱ Refaa̱.
16Ta̱nga ndií Kosiee̱, bi̱ katsó:
—Ka̱májínnijne̱ kui tꞌanangi na̱xi̱i̱, ngatꞌa̱ ngayeje kui xotaa̱ xi tjiín karro̱ xi ki̱cha̱: Xota̱ kananeo̱ xi síndo ki̱a̱ nangi soón, ko̱jo xota̱ xi síndo ki̱a̱ Bee̱t-Seaa̱n ko̱jo ndí nangi xi chji̱a̱ni, ko̱jo xota̱ xi síndo nangi soón Jesree̱l.
17Kósꞌe̱ Josuee̱, bi̱ katsoó xota̱ tji̱e̱e̱ Kosiee̱, ko̱jo xota̱ tji̱e̱e̱ Efraii̱n, ko̱jo xota̱ tji̱e̱e̱ Manasee̱:
—Achichí kjín májnú, kó ta̱nisién tjínjnú ngaꞌniú, kuíni nga jmí tsi ta̱ ngo tsí tjín tꞌanangi xi sa̱kojnú nga si̱ꞌan kui kjo̱a̱chꞌáṉchaa̱. 18Ngayeje kui nangi nínga na̱xi̱i̱ tsa̱jún ka̱ma, ndatsi kꞌijñá boá ngotꞌe̱, ta̱nga jún boá xi si̱ꞌantsjiejnú, kó tsa̱jún ka̱ma ngayeje tsindioó, ngatꞌa̱ jún boá xi ku̱i̱yotjingíjnúu̱ xota̱ Kanaa̱n ndatsi tjiín karroo̱ xi ki̱cha̱, kó ndatsi tjiín ngaꞌniú.
Currently Selected:
Josuee̱ 17: MAIX
Highlight
Share
Compare
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
