Josuee̱ 14
14
Tꞌanangi xi tikón xtji̱e̱e̱n nínga ꞌbosꞌien tsꞌueé ndejèꞌ Jorndaa̱n
1Ngayeje kui tꞌanangii̱ xi kasakoo̱ xota̱ Israee̱l ki̱a̱ nangi Kanaa̱n, kui xi katsꞌénkabisón chináꞌmi Eleasaa̱, ko̱jo Josuee̱ kui xi ndií Nuu̱n, ko̱jo já ngito̱ko̱o̱ xota̱ tji̱e̱e̱ xota̱ Israee̱l. 2Xikó má tsꞌén atíxomaa̱ Néná Moisee̱ nga ko̱kjángaá kui tꞌanangii̱, kó ngo kjo̱a̱chꞌáṉcha̱ katsꞌénkjién nga katsꞌénkabisoón xi ngi nijan masien xota̱ tji̱e̱e̱ Israee̱l kui tꞌanangii̱. 3Ngatꞌa̱ Moisee̱ ja̱bo̱a̱ jè katsꞌénkabisoón tꞌanangi xi ngi jó masien xota̱ tji̱e̱e̱ xota̱ Israee̱l, ki̱a̱ xi ingoboaá ndejèꞌ Jorndaa̱n, ta̱nga xota̱ tji̱e̱e̱ Lebii̱ jmí tꞌanangi katsjájiín, 4ngatꞌa̱ jó tjín xota̱ tji̱e̱ kjindibáni ndií Kosiee̱, xota̱ tji̱e̱ xi chji̱a̱ni Manasee̱, ko̱jo xota̱ tji̱e̱ xi chji̱a̱ni Efraii̱n, kó nde chií tꞌanangi katseꞌéjiín xota̱ tji̱e̱e̱ Lebii̱, ta̱kuítsí na̱xi̱ńdáꞌniú nínga ka̱ma kꞌuíndo, ko̱jo kꞌijñá nínga ka̱ma sa̱ꞌíntji̱e̱ cho̱o̱. 5Kó xikótsꞌèn nga Néná ja̱bo̱a̱ je atíxomaa̱ Moisee̱, bo̱a̱ katsꞌén xota̱ Israee̱l, kó bo̱a̱ tsꞌén kamákabisón kui tꞌanangii̱.
Kalee̱b kiniꞌánkꞌasꞌiee̱n na̱xi̱ńdáꞌniú Ebroo̱n
6Kó xota̱ tji̱e̱e̱ Jundáa̱ kijíkoón Josuee̱ ngo ndi̱yà nga síndo ki̱a̱ Ngilngaa̱l, kó ko̱jo Kalee̱b jachó nga, kui xi ndií Jefunee̱ kamá, kui xi xota̱ kenitaa̱ chji̱a̱ni. Kósꞌe̱ Kalee̱b, bi̱ katsoó Josuee̱:
Ji jè yé ji ni xi Néná katsoó nga tsíchji̱a̱jo Moisee̱, kui nda̱ xi katsꞌénxátꞌaa̱ Néná, kjo̱a̱a̱ ji ko̱jo an nga kixindyión ki̱a̱ na̱xi̱ńdáꞌniú Kandee̱-Barnea̱. 7Yichán nó tjínna kui ni̱xtjin jàn kjiꞌanga Moisee̱, nda̱ xi katsꞌénxátꞌaa̱ Néná, katsangiyana ndeskande Kandee̱-Barnea̱ nga kijíkatsijenꞌmáa̱ kui tꞌanangii̱. Kó kixiya kixi̱ kixi̱i̱ xikó tsꞌén kamábe an, 8ta̱nga kui já ntsꞌie xi nijan kijíjo̱na, indyiándikoón xota̱ na̱xi̱ńdaá, kó an, to̱kó kijítji̱ngira an Néná nga kamáꞌniátakón an kui. 9Kui ni̱xtjin jàn Moisee̱ katsjátsꞌoá nga bi̱ katsó: Kjénní nga kui tꞌanangi xi je katsjájón ndsa̱ki ji, kuí boá xi sa̱ko̱ó jí, ko̱jo ndíi̱ ngatsjéni̱xtjin, ngatꞌa̱ kꞌintji̱ngi ko̱jo kamáꞌniátakón ji Néna, 10kó ngotꞌe̱ ꞌne̱, ta̱ngatꞌanii̱ Néná nga tikón an, xikó katsó kuí, kui xi yichán ún noó, ndeskande nga Néná tsíchji̱a̱jo Moisee̱, kjiꞌanga xota̱ Israee̱l to̱kó tjimá ngase ki̱a̱ nangi kixií, kó ngotꞌe̱ ꞌne̱, ngije ichítié ko̱jo kantjiꞌún nó tjínna, 11to̱kó tjingáꞌniúna, xikó maá kui ni̱xtjin jàn, kjiꞌanga Moisee̱ katsangiyana nga kijíkatsijenꞌmáa̱ kui tꞌanangii̱. Xikó kjiꞌi ngaꞌniú tjínna kuí ni̱xtjin jàn, to̱kó bo̱a̱ kjiꞌi ngaꞌniú tjín ngasena ngotꞌe̱, tsi̱ꞌe̱ nga ka̱ma kjuín án kjo̱a̱xchán, tsi kꞌosꞌi̱e̱n an, ko̱jo tsi kjo̱tjo an. 12Kó kuíni nga míꞌaá nga ko̱e̱ꞌéní kuí ngi̱ndie nínga na̱xi̱i̱, ko̱jo na̱xi̱ńdáꞌniuú kui ngi̱ndiee̱ kui xi katsó Néná kui ni̱xtjin jàn, ngatꞌa̱ jí má bo̱a̱ xi kandaꞌyé ji, kjiꞌanga ki̱a̱ síndojinná xota̱ tji̱e̱e̱ Anaa̱k, kui xota̱ xi ꞌniú nkꞌa ko̱jo ꞌniú yiꞌii̱. Tsita̱ꞌa Néná tikónjo̱na, ka̱mara̱na kongatji̱ngíi̱, xikó má katsó Néná nga tsíchji̱a̱.
13Kósꞌe̱ Josuee̱ katsꞌénchikonñé Kalee̱b, kui xi ndií Jefunee̱ kamá, kó kui ko̱jo xota̱ tji̱e̱e̱, katsꞌénkꞌasꞌiee̱n tꞌanangii̱ na̱xi̱ńdáꞌniú Ebroo̱n. 14Kó bo̱a̱ tsꞌén nga na̱xi̱ńdáꞌniú Ebroo̱n, tsi̱ꞌe̱ Kalee̱b, ndií Jefunee̱, ko̱jo tsi̱ꞌe̱ xota̱ tji̱e̱e̱ kamá, ngaskande ngotꞌe̱, ngatꞌa̱ Kalee̱b ꞌniú kijítji̱ngii̱ ko̱jo kamáꞌniátakón Nee̱ xota̱ Israee̱l. 15Ngasꞌe̱ na̱xi̱ńdáꞌniú Ebroo̱n, Kiriaa̱t-Arba̱ mára kiꞌmí, ngatꞌa̱ Arbaa̱ kuí boá kui jaꞌeén xí tsi̱ꞌe̱ ngo nda̱ xi ꞌniú nkꞌa ko̱jo ꞌniú ndikón ngase kamá ngi̱jii̱n xota̱ tji̱e̱e̱ Anaa̱k. Jaskan ngije kamá kui nii̱, kisꞌiee̱ kjo̱a̱xió tꞌanangii̱ kjo̱a̱a̱ kjo̱a̱xcha̱án.
Currently Selected:
Josuee̱ 14: MAIX
Highlight
Share
Compare
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
