Josuee̱ 11
11
Josuee̱ katsꞌeén re Jabii̱n ko̱jo xota̱ xi nijan kamá
1Kó kjiꞌanga Jabii̱n, nda̱ re xi chji̱a̱ni na̱xi̱ńdáꞌniú Asoo̱r, tsintꞌié ngayeje ni xi kamaá, katsangiyaa̱ én Jobaa̱b, nda̱ re xi chji̱a̱ni na̱xi̱ńdáꞌniú Mandoo̱n, ko̱jo nda̱ ree̱ na̱xi̱ńdáꞌniú Simroo̱n, ko̱jo nda̱ ree̱ na̱xi̱ńdáꞌniú Aksaa̱f, 2ko̱jo já re xi chji̱a̱ni na̱xi̱ xi síndo xtji̱e̱e̱n ta̱ꞌin, ko̱jo já re xi síndo xtji̱e̱e̱n nangi Arabaa̱, ko̱jo xi síndo xtji̱e̱e̱n na̱ngii̱ ngi̱ndiò Ngalilea̱, ko̱jo xi síndo ki̱a̱ nangi nínga soón, ko̱jo xi síndo xtji̱e̱e̱n nangi Ndoo̱r, xtji̱e̱e̱n ki̱a̱ nínga ꞌbosꞌien tsꞌueé. 3Kó ti̱ katsangiyaa̱ kui eén xota̱ Kanaa̱n xi síndo xtji̱e̱e̱n nínga fotjo tsꞌueé, ko̱jo nínga ꞌbosꞌien tsꞌueé, ko̱jo xota̱ Amoo̱r, ko̱jo xota̱ Ee̱t, ko̱jo xota̱ Feree̱, ko̱jo xota̱ Jebuu̱ xi chji̱a̱ni ki̱a̱ na̱xi̱i̱, ko̱jo xota̱ Ee̱b xi síndo xtji̱e̱e̱n tꞌa na̱xi̱ Ermoo̱n, ki̱a̱ nangi Mispa̱. 4Kó kjindibá kui já ree̱, ko̱jo ngayeje jájuún, achichí kamá kui xotaa̱, xikó maá tsomií ndáchíkoón, ko̱jo ndi̱je̱e̱, ko̱jo karro̱ xi fíjo̱ nga fí kjo̱a̱xcha̱án. 5Ngayeje kui já ree̱ ngo xtín katsꞌén yojoo̱, kó kijí, sꞌe̱ ki̱a̱ kamátikó tiña tꞌa xo̱ngàndántꞌié Meroo̱n, kó ki̱a̱ iskjininkꞌa ndiꞌańjñoo̱, tsi̱ꞌe̱ nga skjánjo̱ xota̱ Israee̱l.
6Ta̱nga Néná, bi̱ katsoó Josuee̱: Ngata̱ ndakinjín má ji, ngatꞌa̱ ndyiojón kui chi̱bo̱a̱a̱ jè jesón ngayeje kui xotaa̱, kó ki̱a̱ sa̱ꞌinkꞌasꞌien an ngindyi̱ko̱n xota̱ Israee̱l. Ta̱nga jún, chjátꞌójnú sé ndi̱je̱e̱, ko̱jo tꞌítíjnú karro̱ kjo̱a̱xcha̱án.
7Kósꞌe̱ Josuee̱, ko̱jo ngayeje jájuún, ta̱niján má tsꞌasꞌiennié nga askjanjo̱ kui xotaa̱ ki̱a̱ tiñaa̱ xo̱ngàndántꞌié Meroo̱n, 8kó Néná katsꞌénkꞌasꞌien kui xotaa̱ ngi̱ya tsja xota̱ Israee̱l, kó xota̱ Israee̱l katsꞌénꞌoón, ko̱jo tsangatji̱ngii̱ ngaskande ki̱a̱ na̱xi̱ńdáꞌniú Sindoo̱n, ko̱jo ngaskande na̱xi̱ńdáꞌniú Misrefoo̱t-Maii̱n, ko̱jo ngaskande nangi soón Mispa̱, xtji̱e̱e̱n nínga fotjo tsꞌueé. Kó katsꞌénkjiesón, ngaskande nga ngiti̱ ingojín xi katsꞌénkꞌangi. 9Kó Josuee̱ katsꞌénkjatjosón ni xi atíxomaa̱ Néná nga sa̱ꞌín: Iskjítꞌó sé ndi̱je̱e̱, ko̱jo ítí karro̱ kjo̱a̱xcha̱án.
10Kui ni̱xtjin jàn, Josuee̱ kijí nginí kó katsꞌéntsi̱ꞌe̱ na̱xi̱ńdáꞌniú Asoo̱r, kó ki̱cha̱ndojó katsꞌénkꞌiénni nda̱ ree̱, ngatꞌa̱ kui ngi̱ndiee̱, kuí boá xi atíxomaa̱ ngayeje kui nangii̱ ngasꞌe̱. 11Kó ki̱cha̱ndojó kiniꞌánkꞌiénni ngayeje xota̱ xi síndo ki̱a̱a̱. Nde ingojín xi kisꞌińdo ngase, sꞌe̱ ikꞌítí na̱xi̱ńdáꞌniú Asoo̱r.
12Kó Josuee̱ katsꞌéntsi̱ꞌe̱ ngayeje kui na̱xi̱ńdáꞌniuú, kó ki̱cha̱ndojó katsꞌénkjiesónni já ree̱, ngaskande nga katsꞌénkjiesón ngayejee̱, katsꞌénkjié ndo̱jò ndójo̱, xikó má tsꞌén atíxoma Moisee̱, kui xi mosoo̱ Néná kamá.
13Kó xota̱ Israee̱l nde ngojín na̱xi̱ńdáꞌniú xi síndo nga̱són na̱xi̱i̱ xi ítí, ta̱kuítsí na̱xi̱ńdáꞌniú Asoo̱r. 14Kó iskjíbé ngayeje ni xi tjín ki̱a̱a̱, ko̱jo cho̱, ta̱nga ki̱cha̱ndojó katsꞌénkjiesónni ngayeje xota̱a̱ kui na̱xi̱ńdáꞌniú jàn, kó nde ingojín xi katsꞌénkꞌangi.
15Xikó má tsꞌén Néná atíxomaa̱ Moisee̱, kui xi mosoo̱ kamá, bo̱a̱ má tsꞌén Moisee̱ atíxomaa̱ Josuee̱, kó bo̱a̱ tsꞌén Josuee̱ nde chií jaꞌáxínjiín ngayeje én xí Néná atíxomaa̱ Moisee̱.
16Kó Josuee̱ ko̱jo jájuún katsꞌéntsi̱ꞌe̱ ngayeje kui tꞌanangii̱: Ngi̱ndie nínga na̱xi̱i̱, ko̱jo ngayeje tꞌanangi xi chji̱a̱ni Nengee̱b, ko̱jo ngayeje tꞌanangi Ngosee̱n, ko̱jo nangi soón, ko̱jo nangi Araba̱, ki̱a̱ nangi nínga na̱xi̱i̱ Israee̱l, ko̱jo nangi nínga soón. 17Kui tꞌanangii̱ xi yaꞌanii̱ ndeskande xtji̱e̱e̱n na̱xi̱ Alaa̱k, kui xi fínijíngí xtji̱e̱e̱n nangi Seii̱r, kó fochó ngaskande nangi Baa̱l-Ngaa̱nd, xi tikón ki̱a̱ nangi soón Líbano̱, ki̱a̱ xtji̱e̱e̱n tꞌa na̱xi̱ Ermoo̱n, kó katsꞌénkjiesón ngayeje já ree̱ kui ngi̱ndiee̱. 18Achichí kjín ni̱xtjin nga Josuee̱, ko̱jo xota̱a̱ katsꞌénjo̱ kjo̱a̱xchán kuí já ree̱. 19Ta̱kuítsí xota̱ Ee̱b xi kisꞌińdo Ngabaóo̱n xi kisꞌiee̱ kjo̱a̱xió kui ko̱jo xota̱ Israee̱l, ta̱nga ngayeje nangi ko̱jo na̱xi̱ńdá xí ngasee̱ kjo̱a̱xcha̱án katsꞌénjo̱. 20Ngatꞌa̱ ti̱kuíní Néná xi katsꞌéntajá ini̱ma̱a̱ xota̱ kondraa̱, tsi̱ꞌe̱ nga xchikjoaá nga skjánjo̱ xota̱ Israee̱l, kó bo̱a̱ tsꞌén nga xota̱ Israee̱l sa̱ꞌínkjié ngayejee̱, ko̱jo nga ni̱ma̱jín ka̱maa̱, nga ingojín xi kꞌuíndo ngase, xikótsꞌèn Néná atíxomaa̱ Moisee̱ ngasꞌe̱.
21Kó ti̱ kui ni̱xtjin jàn nga, Josuee̱ katsꞌénkjiesón, ko̱jo katsꞌénkjié kjin na̱xi̱ńdaá xota̱ anakitaa̱, já xi ꞌniú nkꞌa ko̱jo xi ꞌniú yiꞌi kamaá, xi kisꞌińdo ki̱a̱ na̱xi̱ńdáꞌniú Ebroo̱n, ko̱jo na̱xi̱ńdáꞌniú Ndebii̱r, ko̱jo na̱xi̱ńdáꞌniú Anaa̱b, ko̱jo ngayeje na̱xi̱ xi chji̱a̱ni nangi Jundáa̱ ko̱jo nangi Israee̱l. 22Kó nde ingojín xota̱ anakita̱ xi kisꞌie ngase nangii̱ xota̱ Israee̱l, ta̱ chiboá tsí ma xi kisꞌie ki̱a̱ na̱xi̱ńdáꞌniú Ngasaa̱, ko̱jo na̱xi̱ńdáꞌniú Ngaa̱t, ko̱jo na̱xi̱ńdáꞌniú Asndoo̱nd. 23Kó bo̱a̱ tsꞌén nga Josuee̱ katsꞌéntsi̱ꞌe̱ ngayeje kui tꞌanangii̱, xikó má tsꞌén nga Néná atíxomaa̱ Moisee̱. Kó Josuee̱ katsꞌénkꞌasꞌiee̱n kui tꞌanangii̱ xota̱ Israee̱l, kó akjángaá xki̱ xota̱ tji̱e̱. Kó jaskan kisꞌie kjo̱a̱xió tꞌanangii̱.
Currently Selected:
Josuee̱ 11: MAIX
Highlight
Share
Compare
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
