Jonaa̱ 4
4
Jonaa̱ askjotíjo̱ Néná
1Ta̱nga Jonaa̱ tsjajín kamaá kui nii̱, kó achichí katsꞌénxchán. 2Kó bi̱ katsó nga tsíchji̱a̱a̱ Néná:
—¡Ji Ne! A kuijín kuí nii̱ xi kixian an nga tikón ngase an ki̱a̱ nangina. Kuíni nga na̱xi̱ńdáꞌniú Tarsii̱ kijí an, ngatꞌa̱ be án nga achichí nda Ji xota̱, ko̱jo nga tjiín kjo̱a̱ni̱ma̱takón, ko̱jo nga achichí niꞌin kjiꞌi nga si̱ꞌinxchín jí, ko̱jo nga achichí tsie kjo̱a̱tjó tjiín, nga jaskan bosíkje nginí ji nga si̱ꞌinjée̱ xotaa̱ se Ji.#4:2 Achichí tsie kjo̱a̱tjó tjiín, nga jaskan bosíkje nginí ji nga si̱ꞌinjée̱ xotaa̱ se Ji Cf. Eks 34.6; Jer 3.12; 31.20; 32.18; Joe 2.13. Jonaa̱ tsꞌénchji̱a̱ nga sꞌijii̱n nga Néná achichí nda xota̱, ko̱jo nga tjiín kjo̱a̱ni̱ma̱takón, ta̱nga mejénjín kamaá nga sku̱i̱e̱ ni xi ma nga fetꞌani: ngatꞌa̱ kjo̱a̱tjoó ko̱jo kjo̱a̱niꞌánjetakoón Néná foaꞌatjónrií tsindioó nangi Israee̱l, kó ngaskande kondraa̱ xota̱ na̱xi̱ńdaá Néná ka̱ma sa̱ko̱ó kui nii̱ nga. Cf. Jon 4.11. 3Kuíni nga ngotꞌe̱ ꞌne̱, Ji Ne, ꞌniú míꞌaá nga ta̱sá ti̱ꞌinkꞌinní ngotꞌe̱,#4:3 Ta̱sá ti̱ꞌinkꞌinní ngotꞌe̱: Cf. 1jr 19.4. Achichí nda̱ kamaá kui nda̱ chji̱ni̱e̱ꞌe̱én Néná, ngatꞌa̱ kamábe nga ni xi je tjíndaa̱ Néná, ki̱a̱jín nijan kamá xikótsꞌèn tjínjii̱n kui, ngatꞌa̱ achichí onkon kamá, ko̱jo katsꞌénkjínjiín kon nga achichí tsie ni xi maa̱ tsꞌén Néná. ngatꞌa̱ ta̱sá nda ngase ka̱mana kjo̱a̱bo̱yaa̱, ta̱bo̱a̱jiín kjo̱a̱mindyioo̱n.
4Kó Néná, bi̱ katsoó Jonaa̱:
—A ndakjiꞌi nga bo̱a̱ tsꞌén ꞌniú tiniꞌínxchín jí. #4:4 Jonaa̱ chjiéngá tsjá kamaá katsaki kjo̱a̱a̱ nga je kiniꞌánjetakoón xota̱ Nínibee̱, xikó má tsꞌén tsja kamaá ndí xí xchá xi chji̱a̱ Kjisoo̱ ki̱a̱ énkjiín ndí xí katsꞌénkjié ni xi katsjaá na̱ꞌmii̱ (cf. Lc 15.31-32).
5Kó Jonaa̱ jatjoxieni ki̱a̱ na̱xi̱ńdáꞌniuú, kósꞌe̱ ki̱a̱ kijíkꞌíjñá ngo ngi̱ndie xtji̱e̱e̱n nínga fotjo tsꞌueé. Ki̱a̱ katsꞌénda ngo ndiꞌa tji̱nkꞌi̱én xi xka̱ índoo̱ nkꞌaa̱, kó ki̱a̱ kisꞌijña ngindie tji̱nkꞌi̱e̱én kui ndiꞌaa̱, sꞌe̱ askoyaá míra̱ ni xi ka̱maa̱ kui na̱xi̱ńdáꞌniuú.
6Kó Néná ngo xka̱#4:6 Ngo xka̱: Yajín mí xka̱ xi chji̱a̱ xo̱jo̱n eén Néná kꞌi̱e̱e̱, tjín xota̱ xi nga katsꞌénkꞌatioya kui eén xka̱ ṉcho̱ íjñaá, ko̱jo kje̱ꞌe xí chi̱ngá íjñaá nga. íjñanda, xi tsá ka̱mankꞌa ki̱a̱ xtji̱e̱e̱n nga̱són to̱ko̱ Jonaa̱, tsi̱ꞌe̱ nga sa̱ꞌíntji̱nkꞌi̱eén, ko̱jo nga sa̱ꞌínkjaꞌajinda kjo̱a̱tamaá. Kó Jonaa̱ achichí tsjá kamaá kjo̱a̱a̱ kui xka̱a̱.
7Ta̱nga nga kisisie̱èn nga kamángindyiojón, Néná ngo chi̱ndo íjñanda xi katsꞌénꞌoón kui xka̱a̱, kó kixí, 8kó nga jatjo tsꞌueé, Néná katsꞌénkjaꞌa ngo tjo̱ xi achichí sibé kamá xi ndibání xtji̱e̱e̱n nínga tjo tsꞌueé, kó ndoboaá katsꞌénchjaán to̱ko̱ Jonaa̱ ngaskande nga je mejeén kjiꞌmeyà má, kó ngaskande kamámején maá ko̱yà, kó bi̱ katsó:
—¡Ta̱sá nda ngase tsi ko̱yà án, ta̱bo̱a̱jiín tsi kotíjña̱ ngase an!
9Kó Néná, bi̱ katsó nga asíyaá Jonaa̱:
—A ta̱nisién ꞌniú niꞌínxchín jí kjo̱a̱a̱ xka̱a̱.
Sꞌe̱ bi̱ katsó Jonaa̱:
—Jo̱o̱n, tjínna ngo kjo̱a̱a̱ nga ꞌniú xti mána, ngaskande nga ko̱yà án.
10Kósꞌe̱ Néná, bi̱ katsoó Jonaa̱:
—Ni̱ma̱ kamaá kjo̱a̱a̱ kui xka̱a̱, kui xi jmí tsi ji kiniꞌínde, ko̱jo tsi ji kiniꞌínxché jí, kui xka̱a̱ ngo ni̱xtji̱e̱n kamánkꞌá, kó xi ingo ni̱xtji̱e̱e̱n kichajá. 11Kó, a ni̱ma̱jín ka̱mana An na̱xi̱ńdáꞌniú Nínibe̱, kui na̱xi̱ńdáꞌniú xí achichí jee̱, kui xi úchán ko̱jo kan mi̱ ma xota̱ xi tjiín, kui xota̱ xi nde bejín mí ni bo̱a̱ xi skoón ko̱jo xi kixi̱i̱, ko̱jo nga achichí má cho̱ xi tjín kuí ngi̱ndiee̱ nga.#4:11 Nga fetꞌani kui xo̱jo̱n eén Néná chji̱a̱ kjo̱a̱a̱ nga achichí kjo̱a̱ni̱ma̱takón xi tjiín Néná, ngatꞌa̱ kjo̱a̱a̱ kui nii̱ boá xi chji̱a̱ ngayeje kui xo̱jo̱o̱n. Néná ni̱ma̱ kamaá Jonaa̱, kui nda̱ chji̱ni̱e̱ꞌe̱én Néná xí kitikjo̱a̱ kamaá, ko̱jo kjo̱a̱a̱ kui já xí tsꞌénxájin ngi̱jin ndáchíkoón, ko̱jo kjo̱a̱a̱ xota̱ Nínibee̱, ngaskande ko̱jo kjo̱a̱a̱ cho̱ xi tjín kuí na̱xi̱ńdáꞌniuú. Kjo̱a̱ni̱ma̱takoón Néná jmí tsi ta̱ tsi̱ꞌe̱ xota̱ Israee̱l tsí, ko̱jo tsi̱ꞌe̱ xota̱ na̱xi̱ńdá xi sꞌijii̱n Néná boá nga, xikoó xota̱ na̱xi̱ńdáꞌniú Nínibe̱, nínga achichí nga ndajín kamá xota̱ xi kisꞌińdo ki̱a̱a̱.
Currently Selected:
Jonaa̱ 4: MAIX
Highlight
Share
Compare
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
