Jonaa̱ 3
3
Bi̱ tsꞌén tsintꞌiéꞌeén Néná Jonaa̱
1Kó Néná, ti̱ tsíchji̱a̱jo nginí Jonaa̱ xi ma joó ndi̱yà, nga bi̱ katsoó: 2Ti̱sítji̱n, kó tꞌen ji ki̱a̱ Nínibe̱, kui na̱xi̱ńdáꞌniú xí jee̱, kó ki̱a̱ tꞌíyé ji kui én xí xiyaá nga ko̱ndókjo̱e̱ ji.
3Kó Jonaa̱, jastjíe̱n sꞌe̱ kijí Na̱xi̱ńdáꞌniú Nínibe̱, xikó má katsoó Néná. Achichí je kamá na̱xi̱ńdáꞌniú Nínibee̱ ngindyi̱ko̱n Néná, nga ngaskande ján ni̱xtjin kamáná nga tsangín ndsa̱kó ngayejee̱.
4Kó ítsꞌi̱yanii̱ nga tsꞌasꞌien Jonaa̱ na̱xi̱ńdáꞌniuú, kó ni̱xtjin xi tjoón askjandáyaá xotaa̱, nga bi̱ katsoó: Ngotꞌe̱ yichán ni̱xtjii̱n, si̱ꞌankjie kui na̱xi̱ńdáꞌniuú.
5Kó xota̱ xi chji̱a̱ni na̱xi̱ńdáꞌniú Nínibee̱ kisꞌijii̱n Néná, kó katsóyaà xkjín nga sa̱ꞌínkjaꞌa kjindiá yojoo̱, ko̱jo tsajá ńjño tokjuie, ndeskande xota̱ xi ꞌniú xchaá, ngaskande xi ꞌniú xi̱xi̱i̱.
6Kó kjiꞌanga tsintꞌié kuí nii̱ nda̱ ree̱ na̱xi̱ńdáꞌniú Nínibee̱, jastjíe̱n nga̱són yáxíríe̱ nínga botixómaá, sꞌe̱ jaꞌáxín ńjño nda xi yajá, kósꞌe̱ ńjño tokjuie tsajá, sꞌe̱ kisꞌijñajin ndiso.#3:6 Xota̱ Nínibee̱ achichí tsá katsꞌénkꞌoyá yojoo̱, ta̱nga xota̱ Israee̱l achichí kitikjo̱a̱ katsꞌén yojoo̱ ngatꞌa̱ kjín ndi̱yà nga xota̱ chji̱ni̱e̱ꞌe̱én Néná tsíchji̱a̱jo. Cf. Isa 1.2-3; Jer 36.20-26; Ese 3.4-7. 7Kósꞌe̱ kui nda̱ ree̱, tji̱e̱nmá katsóyà ko̱jo katsjaá ngo kjo̱a̱botíxoma ngayeje xota̱ xi chji̱a̱ni na̱xi̱ńdáꞌniú Nínibe̱, nga bi̱ katsoó:
¡Ngayeje xotaa̱, ko̱jo cho̱o̱, ko̱jo cho̱yojoo̱, ko̱jo cho̱tsa̱nga̱a̱ nga ngojín xi kjinie nichinie! ¡Nga boeꞌéjiín nichinie, ko̱jo ni xi ꞌyó! 8#3:8 Nga katsꞌénkꞌoyá yojoo̱ kui xotaa̱, ki̱a̱ yaꞌanii̱ nga katsꞌénkjaꞌa kjindiá, ko̱jo nga katsóyà jeé, ko̱jo nga tsíchji̱a̱a̱ Néná, ko̱jo nga asíkjoyá xikótsꞌèn kisꞌińdo. Cf. Jer 25.5; 26.3; 36.7 ¡Ngayejee̱ xotaa̱ ko̱jo cho̱o̱, ngatjaꞌmani ńjño tokjuie yojoo̱!
¡Kó ꞌniú ndókjo̱a̱jnúu̱ Néná, ko̱jo ti̱ꞌankꞌoyàjnú yojojnú, kjo̱a̱a̱ ndi̱yà xí ndajín xi timájnú, ko̱jo kjo̱a̱a̱ ni xi ndajín xi ndyi̱niꞌánjnú nga ngo nga ngojnú! 9ꞌYá xí bena tsita̱ Néná ko̱síkjo ni xi je katsꞌénkjó nga sa̱ꞌín, sꞌe̱ kjo̱a̱ꞌajinda kjo̱a̱xcha̱án, kó sa̱ꞌínkjiéjínná.
10Kó Néná kamábe ni xi ndyi̱tsꞌèn, ko̱jo kótsꞌèn nga ndyi̱ꞌbíndomasien ndi̱yà xí ndajín xi tjimá, kósꞌe̱ katsjaá kon, nga ngiti̱ sa̱ꞌínjín ni xi je katsó nga sa̱ꞌínjo̱ kui xotaa̱ katsaki.#3:10 Tsitsíjìi̱n ni xi tsó kꞌi̱e̱e̱ kó nga mejeén ti̱ bo̱a̱ ti̱ tsó kjo̱a̱bokoyá xi kjitꞌa ki̱a̱: Jer 18.7-8; 26.3: nga tsi Néná xí sku̱i̱e̱ nga je ndyi̱tsꞌènkꞌoyá yojoo̱ xota̱ na̱xi̱ńdá nínga je bo̱a̱ katsó nga si̱ꞌanjeé, Néná tsꞌénjétakoón (cf. Ko̱jo ki̱a̱ Eks 32.14; 2 S 24.16; ko̱jo ki̱a̱ Aa̱m 7.3,6).
Currently Selected:
Jonaa̱ 3: MAIX
Highlight
Share
Compare
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
