Na̱ Estee̱r (Ebreo̱) 1
1
Sꞌué ꞌniú xí katsꞌén re Asueroo̱
1Bi̱ kamá ni̱xtjin nga kisꞌijña re Asueroo̱, xi atíxoma ndeskande na̱xi̱ńdá India̱ ngaskande na̱xi̱ńdá Etiopía̱, kui xi úchán ko̱jo kan yito nangi atíxomaa̱, 2kui ni̱xtjin jàn, kjiꞌanga re Asueroo̱ atíxoma ndeskande ki̱a̱ na̱xi̱ńdáꞌniú xi ꞌmí Susaa̱.
3Ngije jaꞌa ján nó nga tsꞌénbotixómá kui ree̱, ngo sꞌué ꞌniú katsꞌeén ngayeje xota̱ xi tjiín xá, ko̱jo xota̱ mosoo̱ ngayeje nangi nínga tsꞌénbotixómá. Kó ti̱ katsóyaà xota̱ ngito̱ko̱o̱ xota̱jun xi chji̱a̱ni xota̱ Persiaa̱, ko̱jo xota̱ Mendiaa̱, ko̱jo ngayeje xota̱ xi yandikón, ko̱jo xi síndotjoón nangi nínga tsꞌénbotixómá. 4Jun sá kixindyia kui sꞌueé, nínga kui ree̱ akó ngayeje kjo̱a̱cho̱n xi kisꞌiee̱, ko̱jo ngayeje kjo̱a̱tsjakjiꞌi, ko̱jo ngayeje ngaꞌniú xi tjiín ngi̱ndie nínga tsꞌénbotixómá.
5Kó ngije jetꞌaa̱ kui sꞌueé, ti̱ katsꞌén nginí ingo sꞌué ki̱a̱ ndi̱tsen ndo̱bo̱a̱xa̱á, kó katsóyaà ngayeje xota̱ xi síndo na̱xi̱ńdáꞌniú Susa̱, ndeskande xota̱ xi ꞌniú yandikoón, ngaskande xota̱ xi ꞌniú ni̱ma̱ síndoo̱, yito ni̱xtjin tsꞌandíyaá kui sꞌueé. 6Ki̱a̱ ndi̱tsen ndo̱bo̱a̱xa̱á nínga kisꞌijña ree̱, ikjien ngo ńjño kortina̱ xi ńchjón tiboa ko̱jo ńchjón aso kiniꞌánni, xi kiniꞌánkaꞌa ńꞌniú koán nínga ikjienyá ki̱cha̱ńtsó xí to̱ntiboa xi síndotokó yásé xi ndi̱jo̱ marmo̱l kamándanii̱, ti̱ ikꞌíndo yá xí kixindyionsón xi to̱nsinié, ko̱jo xi to̱ntiboa, kó ndi̱jo̱ marmoo̱l, ko̱jo kje̱ꞌe ngase ndi̱jo̱ tsjakon akjayaa̱ tꞌanangi nínga kamá kui sꞌueé. 7Achichí bino̱ kisꞌie, ngatꞌa̱ nda kamá ini̱ma̱a̱ ree̱, ni xi kiꞌyóyà binoo̱ to̱nsinié kamándani, kó jákje̱ꞌe ja̱kje̱ꞌe kón kamá nga ngo nga ngo kui nii̱. 8Kó kiꞌyó kui binoo̱ xikótsꞌèn tikón kjo̱a̱botíxomaa̱, nga jmíjín xi kjo̱a̱ꞌniú kiniꞌaán, ngatꞌa̱ ree̱ atíxomaa̱ ngayeje mosoo̱, nga ngayeje xota̱ xi kjo̱choó, bo̱a̱ kjiꞌi kꞌuí, xikó kjiꞌi bee̱ko̱n.
9Ti̱ katsꞌén ngo sꞌué na̱ re Bastii̱ ki̱a̱ ndo̱bo̱a̱xa̱á ree̱, tsi̱ꞌe̱ ínchjiín xota̱xá xi jachókoón ree̱ nga.
Na̱ re Bastii̱ tsintꞌiéꞌénjiín ree̱
10Xi ma yito ni̱xtjin nga kjima kui sꞌueé, kjiꞌanga achichí tsjátjiín ree̱, kjo̱a̱a̱ bino̱ xi je katsꞌe, tsíchji̱a̱a̱ yito xota̱ eunukoo̱#1:10 Kui én xí eunuko̱ tsoó kjín ngi̱ndie kjitꞌa ki̱a̱ xo̱jo̱n eén Néná, ngase má ki̱a̱ kjo̱a̱ꞌbínda xchaá. Kó, ꞌyá xota̱ xi eunuko̱ kiꞌmií. Nga én ngriengo̱ kuí boá xi, xi konda ndiꞌaa̱ tsó. Xota̱ xi chji̱a̱ni xi ingoboaá nga̱sondiee̱ xá tsatieni chjo̱ótoo̱ já mosoo̱, kósꞌe̱ katseꞌeé xá nga kui xi skoón ínchjiín já ree̱, kui xi na̱ ree̱ kamá, ko̱jo ínchjínńꞌniuú ree̱, ngatꞌa̱ ngije ngiti̱ májín xi tsꞌén nga foyojojo̱ ngase ínchjín, kuí boá xi kamáꞌniátakón ree̱ tsi̱ꞌe̱ nga skoón kui ínchjiín. Ki̱a̱ Nde 23:1, kjitꞌa nga nga ki̱a̱ na̱xi̱ńdá Israee̱l kamájín ikichá chjo̱ótoo̱ jáxíꞌiín, kuíni nga jmí tsi ki̱a̱ chji̱a̱ni kui kjo̱a̱xcha̱á., kó kuí boá xi Meumaa̱n, ko̱jo Bistaa̱, ko̱jo Arbonaa̱, ko̱jo Bijtaa̱, ko̱jo Abajtaa̱, ko̱jo Setaa̱r, ko̱jo Karkaa̱, 11kó tsíꞌaá nga ko̱e̱je̱kjaꞌá na̱ re Bastii̱, nga tsꞌényaꞌa koronaa̱, tsi̱ꞌe̱ nga sku̱i̱e̱ kui xotaa̱ nga achichí tsjákjiꞌi kui na̱ ree̱, ngatꞌa̱ ja̱koxi̱ boá nga achichí tsjá kisꞌie kui naa̱. 12Ta̱nga na̱ re Bastii̱ katsꞌénkjatjosónjín ni xi katsoó ree̱ xota̱ eunukoo̱, kuíni nga ree̱ achichí katsꞌénxchán, kamáxtií. 13Kósꞌe̱ ree̱ asíyaá xota̱ kjínkón xi be kjo̱a̱kitii̱ ko̱jo kjo̱a̱kixi̱i̱, mí ni xí sa̱ꞌín, ngatꞌa̱ ngatsjéni̱xtjin nga kui xi ntꞌieé nga tsꞌendájin kjo̱a̱xtii̱ xota̱ na̱xi̱ńdaá, ngatꞌa̱ bo̱a̱ kjíꞌí kjo̱a̱xcha̱á. 14Kó xi ꞌniú asíko̱jo, kuí boá xi ꞌmí Karsenaa̱, ko̱jo Setaa̱r, ko̱jo Andmataa̱, ko̱jo Tarsii̱, ko̱jo Meree̱, ko̱jo Marsenaa̱, ko̱jo Memukaa̱n. Nga yito kui xotaa̱, kuí boá xi ngito̱ko̱o̱ xota̱ Persiaa̱ ko̱jo xota̱ Mendiaa̱, kó kuí boá xi kisꞌińdo kje̱n nínga ꞌbíjñá ree̱. 15Kó ree̱ bi̱ katsoó nga asíyaá:
—Na̱ re Bastii̱ katsꞌénkjatjosónjín ni xi kixian an nga sa̱ꞌín, ni xi atixomáa̱ xota̱ eunukoo̱ nga sa̱ꞌín kui naa̱ katsaki. Kó xikó tsó kjo̱a̱kitii̱, mí ni xi si̱ꞌanjo̱ kui naa̱.
16Kósꞌe̱ Memukaa̱n, bi̱ katsoó ree̱ ngindyi̱ko̱n xota̱ kjínkón xi ngasee̱:
—Jmí tsi ta̱ ree̱ tsí xi chꞌo tsꞌén íjñá na̱ re Bastii̱ nga bo̱a̱ katsꞌén, ko̱jo ngayeje xota̱ ngito̱ko̱o̱, ko̱jo ngayeje na̱xi̱ńdaá, ko̱jo nangi nínga botixómá ree̱ boá nga. 17Ngatꞌa̱ kui ni xi katsꞌén na̱ ree̱ ku̱i̱ntꞌiè ngayeje ínchjiín, kó sa̱ꞌínchꞌó xi̱ꞌii̱n kjiꞌanga bo̱a̱ ka̱tso̱ nga re Asueroo̱ tsíchji̱a̱a̱ na̱ re Bastii̱, kó kijíjín. 18Kósꞌe̱ ínchjín xí chji̱a̱ni xota̱ Persiaa̱ ko̱jo xota̱ Mendiaa̱ ngije sku̱i̱e̱ ni xi katsꞌén na̱ ree̱, ka̱tso̱yaa̱ ngayeje xota̱ ngito̱ko̱o̱ ree̱, kó achichí kjo̱a̱xti, ko̱jo kjo̱a̱niꞌánchꞌó kꞌuiéná ngijee̱. 19Tsi sasieén ji re, ngatamanda ngo kjo̱a̱botíxoma, kó ngatjatꞌa ngi̱jii̱n kjo̱a̱kitii̱ xota̱ Persiaa̱ ko̱jo xota̱ Mendiaa̱, kó nga jmíjín xi tsja̱nié, nga ngiti̱ na̱ re Bastii̱jín xi ka̱ma ngase na̱ re, kó nga ree̱ ngatangase ingo na̱ xi kixi̱ ngase ta̱bo̱a̱jiín na̱ re Bastii̱. 20Kó nga ko̱nda̱ꞌyá kjo̱a̱kitii̱ ree̱ ngayeje nangi nínga botixómá, ngayeje ínchjiín sku̱i̱e̱ndikón xi̱ꞌii̱n, ndeskande xi ꞌniú yandikón ngase, ngaskande xi ꞌniú ni̱ma̱ ngase.
21Kó kui kjo̱a̱botíxomaa̱ tsja kamaá ree̱ ko̱jo xota̱ xi ngito̱ko̱o̱, kó kui ree̱ bo̱a̱ katsꞌén xikó tsó én xí tsíchji̱a̱ Memukaa̱n. 22Kó katsangiyaa̱ xo̱jo̱n ngayeje nangi nínga tsꞌénbotixómá. Kó kui xo̱jo̱o̱n kiniꞌánꞌindóni én xí chji̱a̱ xotaa̱ nga ngo nga ngo nangi, tsi̱ꞌe̱ nga, nga ngo nga ngo xota̱ xi̱ꞌin xi ngito̱ko̱ ka̱ma ndiꞌaa̱, kó nga ngayeje xotaa̱ kꞌuiyaá kui eén xikótsꞌèn ndokjo̱a̱ kui nangii̱.
Currently Selected:
Na̱ Estee̱r (Ebreo̱) 1: MAIX
Highlight
Share
Compare
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
