Jonaa̱ 2
2
Bi̱ tsꞌén tsíchji̱a̱a̱ Néná Jonaa̱#2:1 (2-11) Kui én xí tsíchji̱a̱ Jonaa̱ nga tsíchji̱a̱a̱ Néná, mejeén ti̱ bo̱a̱ ti̱ tsó xi kó tsó xo̱jo̱n Salmo̱ xi boeꞌénii̱ ndokꞌóchji̱ì Néná, kui xi chji̱a̱ kjo̱a̱a̱ nga ndajín kamaá xi katsꞌéndaa̱, sꞌe̱ jaskan tsꞌénkie yojoo̱ nga Néná boá xi tsꞌaxiéꞌá, kó nga fetꞌani chji̱a̱ kjo̱a̱a̱ nga sa̱ꞌínkꞌasꞌien kjo̱a̱tjó, ki̱a̱ na̱ngo̱xi̱i̱ Néná xi tikón na̱xi̱ńdáꞌniú Jerusalee̱n Cf. Xsl 30; 116; 118
1Kósꞌe̱ Jonaa̱ nga tikónyà nga̱tsꞌo̱a̱ kui tji̱o̱ jee̱, tsíchji̱a̱a̱ Néná, kó bi̱ katsoó:
2Kjiꞌanga nda̱ kamána tsíchji̱a̱a̱ Néná, kó Kui katsꞌénsénna.
Ndeskande ki̱a̱ ngi̱yaa̱ kjo̱a̱bo̱yaa̱,
tsíꞌá an nga ko̱siko̱jona, kó Jí kandaꞌyée̱ nda̱na.
3Nínga ꞌniú na̱nga̱a̱ ndáchíkoón ikichijmijínní.
Kó ki̱a̱ ngamasiee̱n ndáchíkoón,
ki̱a̱ jaꞌatjiyajonna nga tsꞌénmonga ndáfoaa̱.
Ngayeje ngaꞌniuú ndáfoàa̱ an jaꞌaniéna.
4Kósꞌe̱ bi̱ kixian an: Jè kiniꞌínchꞌíní ngindyikin Ji,
kótsꞌèn ka̱mana nga skuie ngiñá an Ndiꞌa tsjiée̱.
5Ndáfoaa̱ jaꞌatjiyajoo̱n ngaskande ini̱ma̱na.
Nínga ꞌniú na̱nga̱a̱ ndáchíkoón yíꞌmána,
kó xka̱ xi tjín ngi̱jin ndáfoaa̱ kisitsakjájón má tokó án.
6Kijíjaya an ngaskande nínga síndo ngindiee̱ na̱xi̱i̱,
kó kjiꞌa nga tꞌanangii̱, je ku̱i̱ꞌíjñaꞌniúna ngatsjéni̱xtjin katsaki,#2:6 Ngindiee̱ ndáchíkoón: Tsó xo̱jo̱o̱n. Nínga síndo ja̱ma̱a̱ na̱xi̱i̱. Ni xi chji̱a̱ kꞌi̱e̱e̱, yà jàn tsí ki̱a̱rá nínga ꞌniú na̱nga̱a̱ ndáchíkoón, ngatꞌa̱ xota̱ Israee̱l katsꞌénkjó nga yáseé tꞌanangii̱ ki̱a̱ kisꞌińdo nínga ꞌniú na̱nga̱a̱ ndáchíkoón. Cf. Xsl 24.2; 69.2(3), ko̱jo tsitsíjenjnúu̱ Xsl 18.15(16).
Ji Ne xi tsa̱ꞌa̱n, Jí boá xi kaꞌnaxié Ji kjo̱a̱mindyionna ngi̱yaa̱ kui ti̱xa̱a̱.
7Kjiꞌanga je ngiti̱ kjiꞌme ini̱ma̱na katsaki,
jaꞌátsjienna Néná, kó tsíchji̱a̱a̱.
Kó kui kjo̱a̱ndokjo̱a̱na jachó ngaskande nínga tikón Ndiꞌa ndikóo̱n.
8Xota̱ xi ki̱a̱ ndyi̱fítji̱ngi kjo̱a̱nkꞌakoo̱n kui ne xi jmí ni chjíjiín,
jè katsꞌénkjii̱n yojoo̱ kjo̱a̱ni̱ma̱takoón Néná.
9Ta̱nga an boá xi tsjaa kjo̱a̱tjó nga sa̱ꞌintsjaà Jí,
kó sa̱ꞌinkjatjosón an ni xi kixiyatjoón nga sa̱ꞌin an.
¡Ngatꞌa̱ kjo̱a̱ꞌnaxiéꞌaá, tsi̱ꞌe̱ Néná boá!
10Kósꞌe̱ Néná, katsjaá ngo kjo̱a̱ tji̱o̱ xi ta̱nisién ꞌniú jee̱, kó kui tji̱o̱o̱ kijítsꞌénkjasó Jonaa̱ ki̱a̱ tꞌa chji̱ndi̱e̱e̱ ndáchíkoón.
Currently Selected:
Jonaa̱ 2: MAIX
Highlight
Share
Compare
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
