Jonaa̱ 1
1
Jonaa̱ tsintꞌiéꞌénjiín Néná
1Ngo ndi̱yà Néná tsíchji̱a̱jo ngo nda̱ xi ꞌmí Jonaa̱ ndií Amitai̱, kó bi̱ katsoó: 2¡Ti̱sítji̱n, kó tꞌen ji ki̱a̱ na̱xi̱ńdáꞌniú Nínibe̱#1:2 Na̱xi̱ńdáꞌniú Nínibe̱ Kuí boá xi kamá ngi̱ndie ꞌniú nínga kisꞌińdo xota̱xá xí chji̱a̱ni nangi Asiria̱, kó kuí boá kui xota̱xa̱á xi nó yito úchán ko̱jo kan ngoo̱, ngindiee̱ nga kjo̱e̱ꞌe Kristoo̱, nga katsꞌénkjié xota̱ xi chji̱a̱ni nínga ta̱ꞌii̱n na̱xi̱ńdá Israee̱l, kó tsangatji̱ngii̱ kjín xota̱ Israee̱l nga tsꞌaxié nangii̱. (cf. 2Jr 14:1-23) Xota̱ chji̱ni̱e̱ꞌe̱én Néná xi ꞌmí Nauu̱n (1.14—3.19) ko̱jo Sofoniyaa̱ (2.13-15) kuí boá xi katsóyà nga si̱ꞌankjie, kui nii̱ xi kamá nó jun mi̱ ko̱jo tiejoó, ngindiee̱ nga kjo̱e̱ꞌe Kristoo̱. Kjiꞌanga kiniꞌánꞌindó xo̱jo̱o̱n Jonaa̱, kui na̱xi̱ńdáꞌniuú, achichí nga ꞌniú ndajín kamá xotaa̱, kó kondra̱ kisꞌińdonii̱ xota̱ na̱xi̱ńdaá Néná. Cf. Nau 1:1; 2:13—3:19. , kui na̱xi̱ńdáꞌniú xí jee̱, kó bo̱a̱ tꞌíi̱n kui xotaa̱, nga kui ni xi ndajín xí ndyi̱tsꞌèn, ngaskande ngindyikón Án je jachó!
3Ta̱nga Jonaa̱, jastjíe̱n tsi̱ꞌe̱ nga ko̱ngani ngindyi̱ko̱n Néná, kó ta̱sá na̱xi̱ńdáꞌniuú Tarsii̱#1:3 Tjín xota̱ xi ndyi̱kjitꞌoyá xo̱jo̱n xi tsó nga na̱xi̱ńdá «Tarsii̱» kuí xò bo̱a̱ xi tikón ki̱a̱ na̱xi̱ńdá España̱, kui ni̱xtjin xi timá ngotꞌe̱. Kó kui ngi̱ndiee̱ ta̱ xtji̱e̱e̱n ngi̱jin ndáchíkón Menditerráneoo̱ tsí nga kamá jáchóni. Ta̱ kuí tsí xi ꞌniú kjin ngase tikón kamaá xota̱ Israee̱l kui ni̱xtjin jàn. kamámejeén kijí, kósꞌe̱ ki̱a̱ jachó tꞌa ndáchíkoón na̱xi̱ńdáꞌniú Jope̱#1:3 Na̱xi̱ńdáꞌniú Jope̱ kuí boá na̱xi̱ńdáꞌniú xi kisꞌijñatꞌa ndáchíkón Menditerráneoo̱ xi tiña ngase kamaá na̱xi̱ńdáꞌniú Jerusale̱n. , nínga kasakoo̱ ngo tjotso je xi je makjí má. Íchjí tsi̱ꞌe̱ nga ko̱e̱je̱ya kui tjotsoo̱, ko̱jo nga nijan ko̱e̱je̱jo kui jaá ki̱a̱ na̱xi̱ńdáꞌniú Tarsii̱, kjinnii̱ nínga tikón Néná.
4Ta̱nga ngije tjimájin ndáchíkoón, Néná katsꞌénkjaꞌa ngo tjo̱ xi ta̱sasá kamáꞌniú, kó kui tjotso jee̱, jè má mejeén ma kakjan.
5Achichí katsakjónní kui já xí tjimájo̱ kui tjotso jee̱, kó nga ngo nga ngo tsíchji̱a̱a̱ ne xi tsꞌéndíkón, kó tsꞌajmijin ngi̱jin ndáchíkoón ngayeje chꞌià xí ndyi̱yaꞌa, tsi̱ꞌe̱ nga ka̱ma xtja̱ tjotso jee̱. Tji̱e̱nga Jonaa̱ ki̱a̱ kijíjaya xtji̱e̱e̱n ngindiee̱ kui tjotso jee̱, kó ki̱a̱ kisꞌie ko̱jo kisꞌifé tjen tjen.
6Kó nda̱ ngito̱ko̱o̱ kui tjotso jee̱, kijíkóntiñaa̱ Jonaa̱, kó bi̱ katsoó:
—Mí xí tiniꞌín ji nga kꞌi̱e̱ titsjafé kon ji. ¡Ti̱sítji̱n ji, kó ndokjoée̱ Ne tse̱! ¡Tsi nda ni̱xtjin kui Nee̱, ni̱ma̱ ka̱maa̱ ñá, kó ko̱yàjín ñá!
7Sꞌe̱ nga ngo nga ngo kui já xí tjimáyà kui tjotso jee̱, bi̱ katsoó xkjín:
—¡Ja̱bíjnúꞌun, kó ngo kjo̱a̱chꞌáṉcha̱ końtón,#1:7 Kjo̱a̱chꞌáṉcha̱: Kjín ndiè kjitꞌa xo̱jo̱n eén Néná nga kui ni̱xtjin jàn ngongá kjo̱a̱chꞌáṉcha̱ katsaton kui xotaa̱, kó bo̱a̱ tsꞌén nga kamábe mí ni xi mejeén Néná nga sa̱ꞌín, sꞌe̱ jaskan askosoón kui xotaa̱ ni xi katsꞌén ngijee̱ (cf. Xki̱ 26.55-56; 1 S 10.20-21; 14.36-42; Nxk 1.26). tsi̱ꞌe̱ nga xcha̱ ꞌyára̱ni xi konnii̱, kjo̱a̱a̱ kui ni xi ndajín xi kjindibániéná ñá!
Kó ngije katsaton kui kjo̱a̱chꞌáṉcha̱a̱, kamábe nga Jonaa̱ boá xi konnii̱. 8Kósꞌe̱ kui jaá, bi̱ tsꞌén asíyaá Jonaa̱:
—¡Tꞌíyéjne̱ ngotꞌe̱ má, míkjo̱a̱a̱ nga bi̱ kjiꞌi kjo̱a̱ni̱ma̱ xi kjindibánié ñá! Mí xá xí niꞌín ji. Ñá kjindibéni ji. Ñá na̱xi̱ńdá ndókjo̱e̱ni ji. Ñání nangìi̱.
9Kó Jonaa̱, bi̱ katsoó kui jaá:
—Nda̱ ebreo̱ án#1:9 Nda̱ ebreo̱ án: Ngongá bo̱a̱ tsꞌén tsíchji̱a̱ xota̱ xi xín nangi chji̱a̱ni kui ni̱xtjin jàn, ngase má xi xota̱ Ejiptoo̱. (Jen 40.15; 41.12; Eks 1.16) ko̱jo xota̱ xi chji̱a̱ni nangi Filistea̱ (1 S 4.6,9; 13.3). Kó Jonaa̱ ndatsi nda̱ xi chji̱a̱ni Israee̱l boá, bo̱a̱ tsꞌén tsíchji̱a̱, ngatꞌa̱ xota̱ xi tsꞌénxájin ngi̱jin ndáchíkoón xi kje̱ꞌe ne tsꞌéndíkón boá xi tsíchji̱a̱jo. , kó tsakjonñáa̱ Néná, kui Néná xí tikón ndiꞌakꞌajmii̱, Kui xi katsꞌénda ndáchíkoón ko̱jo tꞌanangii̱.
10Kó kui jaá achichí ꞌniú katsakjónní, kó bi̱ tsꞌén asíyá ngasee̱ Jonaa̱:
—Míkjo̱a̱a̱ nga bo̱a̱ kjiꞌi ni xi kiniꞌín ji.
Ngatꞌa̱ kui jaá kamákjínrií nga Néná boá xi tsꞌénmongaa̱, ngatꞌa̱ ti̱ kuíní xi bo̱a̱ katsoó.
11Sꞌe̱ bi̱ tsꞌén asíyá nginií Jonaa̱:
Kó mí xí si̱ꞌanjo̱jne̱ ji, tsi̱ꞌe̱ nga sꞌi̱jñaxió ndáchíkoón. Ngatꞌa̱ ta̱sá ma saꞌniú sáꞌniú ngase kjimá tjo̱o̱ ndáchíkoón.
12Kó bi̱ katsó Jonaa̱:
—Chjábéjnúꞌun, kó ki̱a̱ tjajmijinjnúꞌun ngi̱jin ndáchíkoón, sꞌe̱ xi̱xió, ngatꞌa̱ be án nga ta̱ngatꞌanii̱ an nga bi̱ kjiꞌi tjo̱ꞌniú xí kjindibániéjnú.
13Ta̱nga kui jaá, ꞌniú iskjindaá tsi̱ꞌe̱ nga ko̱e̱je̱jo tjotso jee̱ ki̱a̱ tꞌa chji̱ndi̱e̱e̱, ta̱nga kamájiín, ngatꞌa̱ ꞌniú ngase kamáꞌniú tjo̱o̱ ndáchíkoón. 14Kósꞌe̱ ꞌniú tsíchji̱a̱a̱ Néná, nga bi̱ katsoó: ¡Ji Ne, ꞌniú ndyi̱chjiáꞌájne̱ Ji, nga ko̱yàjínjne̱ ta̱ngatꞌanii̱ kjo̱a̱mindyioo̱n kui nda̱a̱, ti̱nde ngata̱ ji̱njín ꞌbíníjne̱ jé, kjo̱a̱a̱ ngo nda̱ xi jmíjéjiín, ngatꞌa̱ Jí Ne, Jí boá xi bo̱a̱ tsꞌén kamámejeén kiniꞌín ji kui nii̱!
15Kósꞌe̱ kui já xí tjimáyà tjotso jee̱, iskjíbé Jonaa̱, kó tsꞌajmijin ngi̱jin ndáchíkoón, kó tji̱e̱nmá kixixió tjo̱ꞌniuú. 16Kó kui jaá nga kamábe nii̱, achichí katsakjonní Néná, kó katsꞌénkꞌasꞌiee̱n kjo̱a̱tjó, ko̱jo índajo̱ ngo ni Néná. 17Kó Néná íjñanda ngo tji̱o̱ xi ta̱nisién ꞌniú je#1:17 (2.1) Ngo tji̱o̱ xi ta̱nisién ꞌniú je: Xo̱jo̱n eén Néná tsóyà cha̱n cha̱njín ꞌyá tji̱o̱o̱ bo̱a̱, tji̱o̱; ta̱ bo̱a̱ tsí tsó nga ndokꞌóchji̱nií kui tji̱o̱o̱ nga kꞌienjín Jonaa̱, kó nga jachó nginí tꞌa chji̱ndi̱e̱e̱, tsi̱ꞌe̱ nga jatjosón xá xí chjiéngá sa̱ꞌín. xi katjéjén ndo̱jò Jonaa̱. Kó Jonaa̱ ki̱a̱ kisꞌijña ngi̱ya nga̱tsꞌo̱a̱ kui tji̱o̱o̱, ján ni̱xtjin ko̱jo ján ni̱xtji̱e̱n.#1:17 (2.1) Cf. Mt 12.38-40, Kjisoo̱ tsíchji̱a̱ kjo̱a̱a̱ nga ján ni̱xtjin ko̱jo ján ni̱xtji̱e̱n kisꞌijña Jonaa̱ ngi̱ya nga̱tsꞌo̱a̱ kui tji̱o̱ jee̱, ngatꞌa̱ xotaa̱ ngo chi̱bo̱a̱ ndikón tsíꞌaá, ngatꞌa̱ kisꞌijinjiín. Tsitsíjenjnúu̱ ni xi tsó Mt 16.1-4; ko̱jo Lc 11.29-32.
Currently Selected:
Jonaa̱ 1: MAIX
Highlight
Share
Compare
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
