Joee̱l 3
3
Néná ko̱tíjeé na̱xi̱ńdaá
1Tsitsíjenjnúu̱ kui ni̱xtjii̱n, ko̱jo kui chi̱bo̱a̱a̱,
kjiꞌanga An kꞌuindondé Án xota̱ xi síndoꞌniuú,
xi chji̱a̱ni xota̱ tji̱e̱e̱ Jundáa̱, ko̱jo na̱xi̱ńdáꞌniú Jerusalee̱n.
2Kꞌuitiko Án ngayeje na̱xi̱ńdá xí tjín tꞌanangii̱,
kó ki̱a̱ kjuínjo̱ An xtji̱e̱e̱n nangi soón Josafaa̱t,
kó ki̱a̱ skjantjé An nganda tsi̱ꞌe̱ xota̱ na̱xi̱ńdána, kui xota̱ xi tsa̱ꞌa̱a̱n,
ngatꞌa̱ katsꞌéntsojoboa xota̱ Israee̱l ngi̱jii̱n na̱xi̱ńdaá,
kósꞌe̱ katsꞌénkabi tꞌanangi xi tsa̱ꞌa̱n.
3Kó kjo̱a̱chꞌáṉcha̱ katsatonni kjo̱a̱a̱ nangina,
kó jákjíndí xíꞌín íchjínií ínchjínmasieén,
ko̱jo jákjíndí ínchjín íchjínií nga tsꞌatsie bino̱, kósꞌe̱ katsꞌe ngijee̱.
4Kó jún xota̱ na̱xi̱ńdáꞌniú Tiroo̱,
ko̱jo jún xota̱ na̱xi̱ńdáꞌniú Sindoo̱n,
ko̱jo ngayeje xotaa̱ nangi Filisteaa̱,
mí xí tjínjnú kondra̱ tsa̱ꞌa̱n.
A mejénjnú si̱ꞌangojojnú ni xi katsꞌenjo̱jnúꞌun.
Ngatꞌa̱ tsi ka̱mamejénjnú si̱ꞌangojojnú,
achichí tsá sa̱ꞌin An, nga ti̱ juún kꞌuíchjíjnú ni xi si̱ꞌánjnú.
5Ngatꞌa̱ jún boá xi kachjábéjnú to̱ntiboana ko̱jo to̱nsiniéna,
ko̱jo ni xi ꞌniú tsjákónna, kósꞌe̱ ki̱a̱ ikꞌíndojnú ngi̱yaa̱ na̱ngo̱xi̱jnú.
6Kó akatíñájnú xota̱ tji̱e̱e̱ Jundáa̱, ko̱jo xotaa̱ na̱xi̱ńdáꞌniú Jerusalee̱n,
ko̱jo xota̱ ngriengoo̱, tsi̱ꞌe̱ nga kjin kanangiyajnú ki̱a̱ ngi̱ndie nínga chji̱a̱ni.
7Ta̱nga Án boá xi kꞌoxié An ki̱a̱ ngi̱ndie nínga jún akatíñájnú,
kó Án boá xi sa̱ꞌin An, nga jún kꞌuíchjíjnú ni xi kiniꞌánjnú.
8Kó kotiñáa̱ ndí ínchjínjnú, ko̱jo ndí xíꞌínjnú xota̱ jundíoo̱,
kó xota̱ jundíoo̱, xota̱ Saba̱ ko̱tíñaá kui xi síndo nangi xi ꞌniú kjii̱n.
Ngatꞌa̱ Án boá xi bo̱a̱ tꞌíxián An.
Nda̱ chji̱ni̱e̱ꞌe̱én tsóyà ni xi ka̱ma nga kjo̱chó ni̱xtjin
9¡Tꞌíyájnúu̱ kui nii̱ xota̱ na̱xi̱ńdaá!
¡Ti̱ndyiondajnú kjo̱a̱a̱ kjo̱a̱xcha̱án,
tꞌíndondajnú já xí chꞌokoo̱n!
Jún ngayeje já xí fí kjo̱a̱xcha̱án:
¡Ndibáboáꞌájnú, kó tangínnijíngijnú!
10Ki̱cha̱ndojó ti̱ꞌánjnú, ki̱cha̱ xi niꞌánkjiénjnú nga ꞌbítji̱e̱jnú ni,
kó ki̱cha̱ yojó ndyikón ti̱ꞌánjnú, ki̱cha̱ntꞌi̱u̱a̱ xi niꞌánkjiénjnú nga bichájnú ni tjieé.
Bi̱ nga tsó xi inda tikoón: ¡Tjínna ngaꞌniú!
11¡Tsá ti̱ꞌánjnú, kó tsá ndibájnú,
ngayeje jún xota̱ na̱xi̱ńdá xí tindyiónjnú nga ngo foaꞌatjiyajoo̱n,
kꞌi̱e̱ ngatamatikójnú kꞌi̱e̱e̱!
¡Ji Ndi̱a̱ xi Ne, ti̱ꞌin Ji nga kꞌi̱e̱ kji̱ndi̱bájayani xota̱a̱ xi chꞌokóo̱n!
12¡Tꞌíyájnúu̱ xota̱ na̱xi̱ńdaá, kó ngatjandibá kꞌi̱e̱ nangi soón Josafaa̱t,
ngatꞌa̱ kꞌi̱e̱ bí nínga kotíjña̱ An nga kotijée̱,
ngayeje xota̱ na̱xi̱ńdá xí síndo nga ngo foaꞌatjiyajoo̱n!
13¡Chjábéjnú ki̱cha̱ntꞌi̱u̱a̱a̱, ngatꞌa̱ jè kamáxchá ni tjieé!
¡Ndibájnú, kó jna̱niejnú tostsi̱je̱è, ngatꞌa̱ jè tjikítsie ki̱a̱ ngi̱ndie nínga mindyiaa̱,
kó ngaskande xikoó tsi je tjítjonsón má tina̱xa̱a̱,
ngatꞌa̱ achichí má ni xi ndajín xi je katsꞌén kui na̱xi̱ńdaá!
14¡Achichí kjín xota̱ na̱xi̱ńdá xí kjo̱chó ki̱a̱ nangi són nínga ka̱majeé!
¡Jè tikón tiña ni̱xtjii̱n Ndi̱a̱ná kui xi Néná ki̱a̱ nangi són nínga ka̱majeé!
15Tsꞌueé ko̱jo saá sꞌi̱jñó,
kó ńñoo ngiti̱ sa̱ꞌíntsijenjín ngase.
16Ndi̱a̱ná kui xi Néná ꞌniú sa̱ꞌínxchán ndeskande na̱xi̱ńdáꞌniú Sioo̱n,
ꞌniú skja̱ndáyà ndeskande na̱xi̱ńdáꞌniú Jerusalee̱n,
kó kjo̱tsie ndiꞌakꞌajmii̱ ko̱jo tꞌanangii̱,
ta̱nga xota̱ na̱xi̱ńdaá, Ndi̱a̱ná kui xi Néná boá xi skoyaá,
ngatꞌa̱ Kuí boá xi tsjangaꞌniuú xota̱ Israee̱l.
Néná tsꞌénchji̱a̱
17Kó kjiꞌá boá nga xcha̱jnú nga Án boá xi Ndi̱a̱ná kui xi Néná Án,
ko̱jo nga ki̱a̱ tikón An na̱xi̱ńdáꞌniú Sioo̱n,
nínga tikón na̱xi̱ tsjiena, kui xi na̱xi̱ńdáꞌniú Jerusale̱n tsjiee̱,
kó xota̱ xi xín nangi chji̱a̱ni, ka̱májín kjo̱chó ki̱a̱a̱.
18Kui ni̱xtjin jàn, na̱xi̱i̱ bino̱ xi ixi kjo̱tjoo̱,
kó nangi nínga soón ntsjén tsja̱a,
kó nínga síndo na̱xi̱i̱ nangi Jundáa̱ ndáfoa kjo̱tjoo̱,
kó Ndiꞌaa̱ Ndi̱a̱ná kui xi Néná ngo ndáńchꞌi̱ kꞌuijñá xi ko̱síndaá nangi soón Sitii̱n.
19Kó nangi Ejiptoo̱ nangi kjiꞌitiya ka̱ma,
kó nangi Endoo̱n nangi kixí xi kjiꞌitiya ka̱ma,
ta̱ngatꞌanii̱ ni xi ndajín xi kiniꞌánjo̱ xota̱ tji̱e̱e̱ Jundáa̱,
ngatꞌa̱ jiín xota̱ xi jmí jéjiín iskjitjón ki̱a̱ tꞌanangii̱.
20Ta̱nga nangi Jundáa̱ ngatsjéni̱xtjin nga kꞌuíndo xota̱ kui ngi̱ndiee̱,
kó na̱xi̱ńdáꞌniú Jerusalee̱n ngatsjéni̱xtjin nga kꞌuijñá.
21Án boá xi sa̱ꞌintsjiejón An jiín xota̱ xi katsꞌentsjiejónjín An,
kó Án ki̱a̱ kotíjña̱ An ki̱a̱ na̱xi̱ńdáꞌniú Sioo̱n.
Currently Selected:
Joee̱l 3: MAIX
Highlight
Copy
Compare
Share
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
