Joee̱l 2
2
Ni̱xtjin nga kjo̱e̱ꞌe nginí Ndi̱a̱ná kui xi Néná
1¡Ti̱ꞌankjaniéjnú tjioo̱ ki̱a̱ na̱xi̱ńdáꞌniú Sioo̱n!
¡Kó tꞌíyájnúu̱ ngayeje xotaa̱ ki̱a̱ na̱xi̱ ndikónna!
Ngatjatsié ndikón má ngayeje xotaa̱ kui ngi̱ndiee̱,
ngatꞌa̱ jè tikón tiña ni̱xtjii̱n Ndi̱a̱ná kui xi Néná.
2Ni̱xtjin xi jñó, ko̱jo ni̱xtji̱e̱n ka̱ma,
ni̱xtjin nga xindyiá ṉdi̱ xi ꞌniú jñó ka̱ma ki̱a̱ nga̱són na̱xi̱i̱.
Kji̱ndi̱bá ngo xtín xota̱ na̱xi̱ńdá xí je, ko̱jo xi tjiín ngaꞌniú,
kji̱e̱ ngo ndi̱yà ma, ngo ni xi xikoó xi̱ꞌbi̱,
kó ngiti̱ ka̱májín ngase, ngaskande ngije kjo̱a̱ꞌa nga kꞌuíndo kjín xota̱ tji̱e̱.
3Kui xota̱ kjín xi ko̱e̱je̱tjoón,
kuí boá xi ka̱ma xikoó ngo ndiꞌí xí sa̱ꞌínkjié ngayeje nii̱,
kó kui xota̱ xi tsjiengií, kuí boá xi ka̱ma xikó ngo ndiꞌí xí tjítíngá.
Ngindiee̱ nga kjo̱e̱ꞌé, tꞌanangii̱ achichí tsjachon kamá xikó maá Endee̱n,
ta̱nga ngije jaꞌa, ngi̱ndie xi kjiꞌitiya katsꞌén,
¡kó jmíjín xi jatjongii̱ yojoo̱!
4Bo̱a̱ má kón ka̱ma xikoó ndi̱je̱e̱,
kó ko̱nga xikoó tsi kjo̱a̱xchán jè ko̱e̱je̱.
5Kjiꞌanga skji̱nkꞌa ki̱a̱ ngi̱jin na̱xi̱i̱,
ko̱nda̱ꞌyaá xikó má tsꞌén fonie karro̱ ki̱a̱ ngi̱jin na̱xi̱i̱,
bo̱a̱ tsꞌén kjo̱ni̱e̱ xikó má tsꞌén fonie xka̱ kixií nga je tjítí,
xikó maá nga fí ngo xtín jájún xi ꞌniú, xi je ndyi̱fí kjo̱a̱xcha̱án.
6Ngindyi̱ko̱n kui, stsa̱kjon ngayeje xota̱ na̱xi̱ńdaá,
kó ngayeje kje̱n xotaa̱ tiboaꞌandá má ka̱ma.
7Ko̱nga xikó maá xota̱ xi chꞌokon,
kó ko̱e̱je̱nijíngí ngo xó, xikó maá já xí fí kjo̱a̱xcha̱án,
kui xi nga ngo nga ngo ki̱a̱ ndyi̱fítji̱ngi ndse̱je̱n ndse̱je̱n ndi̱yà nínga tjimá,
kó nde ngojín xi xín fí.
8Nde ngojín xi sa̱ꞌínniꞌii̱n xkjín, ńgó ńgó ko̱e̱je̱ra ndi̱ya̱à,
kó ndatsi tjín xí si̱ꞌanꞌoo̱n xkjín, xínjín ko̱e̱je̱.
9Kꞌo̱sꞌien chejé ngi̱jin na̱xi̱ńdáꞌniuú,
kó ki̱a̱ ko̱e̱je̱nijíngí xó xí tjíchjáꞌyáni, kó kꞌo̱sꞌien xki̱ ndiꞌa,
kó xikoó tsi chejé nga ki̱a̱ kꞌo̱sꞌienni ki̱a̱ nga̱ntjo̱a̱masienkjaá ndiꞌaa̱.
10Kje̱n kui, kjo̱tsie tꞌanangii̱, kó ꞌniú kjo̱ni̱e̱ nkꞌa jàn,
kó tsꞌueé, ko̱jo saá sꞌi̱jñó, kó ńñoo ngiti̱ sa̱ꞌíntsijenjín.
11Ndi̱a̱ná kui xi Néná boá xi tsjákjo̱a̱a̱ ngayeje jájuún,
achichí kjín má nga tjíndo nínga tsꞌénkjaꞌyá,
achichí ngaꞌniú tjiín kui xi tsjákjo̱a̱a̱.
¡Achichí je, ko̱jo ꞌniú chꞌo ka̱ma ni̱xtjii̱n Ndi̱a̱ná kui xi Néná!
¡ꞌYá xí kjo̱chíkjo̱a̱a̱ kui ni̱xtjii̱n!
Xota̱ na̱xi̱ńdaá Néná, chjiéngá sa̱ꞌínkꞌoyà yojoo̱
12Ta̱nga ngotꞌe̱ ꞌne̱, bi̱ tsó Ndi̱a̱ná kui xi Néná:
¡Ti̱ꞌankꞌoyàjnú yojojnú ngayejeni ini̱ma̱jnú,
kó ti̱ꞌankjaꞌajnú kjindiá yojojnú, ko̱jo ni̱ma̱ chaꞌájnú,
ko̱jo ni̱ma̱ tꞌínjnú nga ko̱ndókjo̱a̱jnú!
13¡Xikoó tsi ini̱ma̱jnú xi chjándiyàjnú,
kó jmí tsí ńjñojnú xi chjándiyàjónjnú!
¡Ndibáchon nginíjnúu̱ Ndi̱a̱ná kui xi Néná, kui xi Nejnú boá!
Ngatꞌa̱ achichí kjo̱a̱tjó tjiín, ko̱jo ni̱ma̱ maa̱ xotaa̱,
tsájín tsꞌénxchán, kó achichí tsie kjo̱a̱ni̱ma̱takón tjiín,
kó on maa̱ kui nga ndajín májnú jún.
14¡ꞌYá xí bená tsita̱ ni̱ma̱ ka̱maa̱ ñá, kó ko̱síkjo ni xi sa̱ꞌínjo̱ná,
kó ta̱sá kjo̱a̱niꞌánchikonñé sa̱ngíyáná,
ko̱jo nga tsja̱aná to ndso̱ko̱a̱n ṉño̱paa̱n,
tsi̱ꞌe̱ nga kamá ko̱e̱ꞌée̱ kjo̱a̱tjó Ndi̱a̱ná kui xi Néná!
15¡Ti̱ꞌankjaniéjnú tjioo̱ ki̱a̱ na̱xi̱ńdáꞌniú Sioo̱n!
¡Tꞌítikójnú yojójnú, kó ti̱ꞌankjaꞌájnú kjindiá!
16¡Tꞌítikójnú xota̱ na̱xi̱ńdaá,
ti̱ꞌantsjiejnú yojojnú, kó tꞌítikójnú xota̱ xi xchaá,
tꞌítikójnú jákjíndií, ko̱jo ndínda xi boki ngasee̱!
¡Ngatjatjo ngi̱yaꞌmaa̱ xi chjo̱on xí xi̱ꞌin xi sꞌe̱ ixán maá!
17¡Ngakjandá chináꞌmii̱ ki̱a̱ xtji̱e̱e̱n ngamasiee̱n nínga bitjasꞌi̱e̱nnii̱ Ndiꞌandikoón,
ko̱jo ṉchaa̱n Ndi̱a̱ná kui xi Néná!
Kó ni̱ma̱ nga tsó, nga bi̱ ka̱tso̱ xota̱ xi tsꞌén xaá Ndi̱a̱ná kui xi Néná:
Ji Ne, ti̱ꞌinjetakíi̱n xota̱ na̱xi̱ńdáa̱,
kó ngatꞌa̱ boeꞌéndièjín ji nga kjo̱a̱soboá kjo̱a̱ꞌa,
ko̱jo nga xota̱ xi kje̱ꞌe na̱xi̱ńdá ko̱jno̱kie,
míkjo̱a̱a̱ nga bi̱ ka̱tso̱ kon xota̱ na̱xi̱ńdaá: Ñá tikón Nee̱ ꞌne̱.
Néná tjoó xota̱ xi tsꞌénkꞌoyá yojoo̱
18Kósꞌe̱ Ndi̱a̱ná kui xi Néná, achichí kamáchi̱ni̱ni kjo̱a̱a̱ tꞌanangii̱,
kó kamáni̱ma̱a̱ xota̱ na̱xi̱ńdaá.
19Kó Ndi̱a̱ná kui xi Néná, bi̱ katsoó xota̱ na̱xi̱ńdaá:
Ngotꞌe̱ ꞌne̱, kꞌi̱e̱ tsꞌéntsangiyajnúꞌun to ndso̱ko̱a̱n ṉño̱pan,
ko̱jo bino̱, ko̱jo isti̱, kó kui nii̱ xi sa̱ꞌíntsienijnú,
kó ngiti̱ tsjandièjín An nga xota̱ na̱xi̱ńdaá ko̱jno̱kiejnú.
20Sa̱ꞌinkjinjnúꞌun kondra̱ xi ndibání xtji̱e̱e̱n ta̱ꞌii̱n,
kó ki̱a̱ tꞌanangi kixí xi kjitiyaa̱ sangiya An,
kui xi tjimátjoón, ki̱a̱ sangiya An ki̱a̱ ndáchíkón xi tikón xtji̱e̱e̱n nínga tjo tsꞌueé,
kó kui xi tjimá nga fetꞌanii̱, ki̱a̱ sangiya An,
ki̱a̱ ndáchíkón xi tikón xtji̱e̱e̱n nínga ꞌbosꞌien tsꞌueé.
Kó nda̱ chꞌojee̱n kjin kjo̱a̱ꞌándani,
ngatꞌa̱ achichí má ni xi ndajín xi katsꞌén,
ngatꞌa̱ Ndi̱a̱ná kui xi Néná achichí ni xi yiꞌi xi katsꞌén.
21¡Tsjangatamaa̱ ji tꞌanangi, kó nga ndakinjín má ji,
ngatꞌa̱ Ndi̱a̱ná kui xi Néná achichí ni xi yiꞌi xi katsꞌén!
22Ngata̱ ndakonjínmájnú jún cho̱ xi tjín ngi̱jin kꞌijñaá,
ngatꞌa̱ ndi̱xcho̱ xi tjín nangi kixií, ku̱i̱ꞌíńtsꞌién nginí,
ko̱jo yaá ko̱a̱ja̱ nginií to,
kó yáꞌingoo̱, ko̱jo ńꞌniuú tostsi̱je̱è, tsja̱á nginí kjo̱a̱cho̱n xi tsjá.
23¡Tsjangatamajnú jún xota̱ xi chji̱a̱ni na̱xi̱ńdáꞌniú Sioo̱n,
tsjangatamajnú ngatꞌaa̱ Ndi̱a̱ná kui xi Néná, kui xi Nejnú!
Ngatꞌa̱ Kuí boá xi tsangiya stsé xí xtì boaꞌaá, kó ni̱xtjii̱n má nga tsangiya,
kó stsé xí sájín boaꞌaa̱, bo̱a̱ tsꞌén tsangiya xikoó ni̱xtjin xchá jàn,
kó ti̱ tsangiyajnú stsé ꞌniuú nga.
24Ki̱a̱ ngi̱ndie nínga mindyia to ndso̱ko̱a̱n ṉño̱paa̱n sꞌi̱kitsie nginí,
kó ngaskande xtjónsón má ki̱a̱ ngi̱ndie nínga ꞌnaxié binoo̱,
ko̱jo nínga ꞌnaxié istii̱.
25Án boá xi tsja ngojojnúꞌun ngayeje ni ko̱jo kui nó nga katsꞌénniꞌínjnú chi̱ndoo̱,
ko̱jo chjandii̱, ko̱jo cho̱tji̱bo̱a̱yejee̱, ko̱jo chjo̱bo̱a̱a̱,
kui cho̱ xi xikó maá jajúnna kamá nga katsangiya an kondra̱ tsa̱jún.
26Jún tsie ni xi̱ni̱e̱jnú, kó nda stsi̱e̱jnú,
kó si̱ꞌantsjàjnúu̱ Jaꞌeén Ndi̱a̱ná kui xi Néná, kui xi Nejnú má,
kó achichí kjo̱a̱ndikón katsꞌén An nganda tsa̱jún,
kó xota̱ na̱xi̱ńdána jmíni̱xtjin nga kjo̱a̱ꞌa ngase kjo̱a̱soboá.
Néná katsjátsꞌoá nga sa̱ngíyá A̱si̱énni̱xtjii̱n
27Kó xcha̱jnú nga An, ki̱a̱ tikónjìi̱n ngamasiee̱n xota̱na Israee̱l,
kó nga Án boá xi Nejnú jún má An,
kó nga jmíjín ingo ngase ne,
kó jmíni̱xtjin sa̱ꞌinkjaꞌa ngase An kjo̱a̱soboá xota̱ na̱xi̱ńdána.
28Sꞌe̱ jaskan ngije kamá kui nii̱,
tsjáa̱ A̱si̱énni̱xtjinna ngayeje xotaa̱,
kó ndí xíꞌínjnú, ko̱jo ndí ínchjínjnú ka̱tso̱ya én xí An tsja An,
kó xota̱ xi xchájnú ko̱e̱ꞌeé chi̱ni,
kó já xo̱ngòjnú ko̱ko̱ó ni.
29Ti̱ bo̱a̱ ti̱ tsꞌén moso̱na xi chjo̱on xí xi̱ꞌin,
tsjáa̱ A̱si̱énni̱xtjinna kui ni̱xtjii̱n nga.
30Kó sa̱ꞌin An kjo̱a̱ndikón nkꞌa jàn, ko̱jo tꞌanangii̱,
xcha̱jnú jín, ko̱jo ndiꞌí, ko̱jo ṉdi̱ xi ja̱kon yásé má kón.
31Kó tsꞌueé sꞌi̱jñó, kó saá xikoó tsi jín ka̱ma.
Kui nii̱ xi ka̱ma ngindiee̱ nga kji̱ndi̱bá ni̱xtjii̱n Néná,
ni̱xtjin xi je, ko̱jo ni̱xtjin xi ꞌniú chꞌo ka̱ma.
32Ta̱nga ngayeje xota̱ xi sa̱ꞌínkaxoma Jaꞌeén Néná, kjo̱tjoꞌaa̱ yojoo̱,
ngatꞌa̱ ki̱a̱ na̱xi̱ Sioo̱n, ko̱jo na̱xi̱ńdáꞌniú Jerusalee̱n,
kꞌuíndo ngase xota̱ xi kꞌo̱ngi, xikó je katsó Ndi̱a̱ná kui xi Néná.
Kó ngi̱jii̱n kui xotaa̱ kꞌuíndo xota̱ xi Ndi̱a̱ná kui xi Néná jè jaꞌájin.
Currently Selected:
Joee̱l 2: MAIX
Highlight
Copy
Compare
Share
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
