Amoo̱ 1
1
Tjón mára cho̱tsa̱nga̱ askoo̱n, sꞌe̱ jaskan nda̱ chji̱ni̱e̱ꞌe̱én Néná kamá
1Én xí tsíchji̱a̱ Amoo̱, ngo nda̱ xi askoo̱n cho̱tsa̱nga̱ ki̱a̱ nangi Tekoa̱, kui nda̱a̱ ngo ni akakoo̱ kjo̱a̱a̱ xota̱ Israee̱l, ni̱xtjin nga kisꞌijña Usiyaa̱ ree̱ nangi Jundáa̱, ko̱jo ni̱xtjin nga kisꞌijña re Jeroboaa̱n ndií Joaa̱, kui xi kamá re ki̱a̱ nangi Israee̱l, jó nó ngindiee̱ nga jaꞌa kjo̱a̱ndi̱ko̱n ꞌniuú. 2Kuí bí kui nii̱ xi katsóyà Amoo̱:
Néná kjandayàxchán ndeskande na̱xi̱ńdáꞌniú Sioo̱n,
kó ndaꞌyaá nda̱a̱ ndeskande na̱xi̱ńdáꞌniú Jerusalee̱n.
Ndi̱xcho̱o̱ já xí koo̱n cho̱tsa̱nga̱a̱ xcha̱ja,
¡kó kꞌijñá xí tjín nkꞌaa̱ na̱xi̱ Karmeloo̱ xi̱!
Én xí katsóyà Amoo̱ kondraa̱ na̱xi̱ńdaá
Én kondra̱ tsi̱ꞌe̱ na̱xi̱ńdáꞌniú Ndamasko̱
3Bi̱ tsó Ndi̱a̱ná kui xi Néná:
Kjo̱a̱a̱ ján jé xí katsꞌén xota̱ xi chji̱a̱ni na̱xi̱ńdáꞌniú Ndamasko̱,
kó ta̱ngatꞌanii̱ xi ma nijón jeé, nga sa̱ꞌinjetakónjáa̱n,
ngatꞌa̱ ni ki̱cha̱ katsꞌénkjién nga katsꞌénkjítie xota̱ xi chji̱a̱ni na̱xi̱ńdáꞌniú Ngalaa̱nd.
4Kuíni nga kꞌuitíña An ndo̱bo̱a̱xa̱á re Asaee̱l
kó kui ndiꞌií xi sa̱ꞌínkjié ko̱jo ndo̱bo̱a̱xa̱á Bee̱n-Andaa̱nd nga.
5Kó skjítꞌó Án ki̱cha̱ xi ꞌbíchjájo̱ni nga̱ntjo̱a̱a̱ na̱xi̱ńdáꞌniú Ndamasko̱,
ko̱jo sa̱ꞌinkjié An xota̱ xi chji̱a̱ni nangi soón Abee̱n,
ko̱jo xota̱ xi botixómá ki̱a̱ na̱xi̱ńdáꞌniú Bee̱t-Endee̱n,
kó xota̱ xi chji̱a̱ni nangi Siria̱ kongínjo̱ꞌniú ki̱a̱ na̱xi̱ńdáꞌniú Kii̱r. Tsó Ndi̱a̱ná kui xi Néná.
Én kondra̱ tsi̱ꞌe̱ na̱xi̱ńdáꞌniú Ngasa̱
6Bi̱ tsó Ndi̱a̱ná kui xi Néná:
Kjo̱a̱a̱ ján jé xí katsꞌén xota̱ xi chji̱a̱ni na̱xi̱ńdáꞌniú Ngasa̱,
kó ta̱ngatꞌanii̱ xi ma nijón jeé, nga sa̱ꞌinjetakónjáa̱n,
ngatꞌa̱ kijíjo̱ꞌniú ndo̱jò ndójo̱ xotaa̱ ngo na̱xi̱ńdá,
kósꞌe̱ ki̱a̱ nangi Endoo̱n katsꞌénkꞌasꞌien.
7Kuíni nga kꞌuitíña An xó xí tjíchjáꞌyáni na̱xi̱ńdáꞌniú Ngasa̱
kó kui ndiꞌií xi sa̱ꞌínkjié ndo̱bo̱a̱xa̱á nga.
8Sa̱ꞌinkjié An xota̱ xi síndo na̱xi̱ńdáꞌniú Asndoo̱nd,
ko̱jo xota̱ xi botixómaá nangi Askaloo̱n nga,
kó ngayeje ngaꞌniúna nga tsjachjíi̱ xota̱ na̱xi̱ńdáꞌniú Ekroo̱n,
kó kju̱i̱e̱són ngayeje xota̱ Filistea̱, kó nde ngojín xi kꞌuíndo ngase. Tsó Ndi̱a̱ná kui xi Néná.
Én kondra̱ tsi̱ꞌe̱ na̱xi̱ńdáꞌniú Tiroo̱
9Bi̱ tsó Ndi̱a̱ná kui xi Néná:
Kjo̱a̱a̱ ján jé xí katsꞌén xota̱ xi chji̱a̱ni na̱xi̱ńdáꞌniú Tiro̱,
kó ta̱ngatꞌanii̱ xi ma nijón jeé, nga sa̱ꞌinjetakónjáa̱n,
ngatꞌa̱ Endoo̱n katsꞌénkꞌasꞌien ndo̱jò ndójo̱ xotaa̱ ngo na̱xi̱ńdá,
kó kamábendikónjín ni xi índajo̱ xkjín nga xikoó tsi ngo ntsꞌi̱e̱ ma.
10Kuíni nga kꞌuitíña An xó xí tjíchjáꞌyáni na̱xi̱ńdáꞌniú Tiroo̱
kó kui ndiꞌií xi sa̱ꞌínkjié ngi̱ndie xi ꞌniuú nga.
Én kondra̱ tsi̱ꞌe̱ na̱xi̱ńdá Endoo̱n
11Bi̱ tsó Ndi̱a̱ná kui xi Néná:
Kjo̱a̱a̱ ján jé xí katsꞌén xota̱ xi chji̱a̱ni na̱xi̱ńdá Endoo̱n,
kó ta̱ngatꞌanii̱ xi ma nijón jeé, nga sa̱ꞌinjetakónjáa̱n,
ngatꞌa̱ ki̱cha̱ndojó tsangatji̱nginii̱ ntsꞌi̱e̱,
kó katsꞌénkꞌién, kó ni̱ma̱jín kamaá,
ko̱jo ngatsjéni̱xtjin nga tjitsꞌénxchán,
kó kui kjo̱a̱xcha̱án ta̱ kui tjíjin síkijírií.
12Kuíni nga kꞌuitíña An na̱xi̱ńdáꞌniú Temaa̱n,
kó kui ndiꞌií xi sa̱ꞌínkjié ndo̱bo̱a̱xa̱á na̱xi̱ńdáꞌniú Bosra̱ nga.
Én kondra̱ tsi̱ꞌe̱ na̱xi̱ńdá Amoo̱n
13Bi̱ tsó Ndi̱a̱ná kui xi Néná:
Kjo̱a̱a̱ ján jé xí katsꞌén xota̱ na̱xi̱ńdá Amoo̱n,
kó ta̱ngatꞌanii̱ xi ma nijón jeé, nga sa̱ꞌinjetakónjáa̱n,
ngatꞌa̱ kjiꞌanga kamámejeén katsꞌéntsié ngase tꞌanangii̱,
ki̱a̱ Ngalaa̱nd, jó tjín katsꞌén nga tsatieya ínchjín xí ndyi̱yaꞌa ndí.
14Kuíni nga kꞌuitíña An xó xí tjíchjáꞌyáni na̱xi̱ńdáꞌniú Rabáa̱,
kó kui ndiꞌií xi sa̱ꞌínkjié ndo̱bo̱a̱xa̱á nga,
Bo̱a̱ sa̱ꞌin An, ni̱xtjin nga xchaꞌayà ngi̱jii̱n kjo̱a̱xcha̱án,
ko̱jo ngi̱jii̱n ni̱xtjin nga ndajín chon ka̱ma nga̱sondiee̱,
15kó ree̱ ko̱jo já ngito̱ko̱ xi yandikoón xín na̱xi̱ńdaá kongínjo̱ꞌniú. Tsó Ndi̱a̱ná kui xi Néná.
Currently Selected:
Amoo̱ 1: MAIX
Highlight
Copy
Compare
Share
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
