Joee̱l 1
1
Chjo̱bo̱a̱ xi katsꞌénkjié ni tjieé.
1Kuí bí én xí Ndi̱a̱ná kui xi Néná katsjaá Joee̱l ndií Petuee̱l:
2¡Ndaꞌyájnú kui nii̱ jún xota̱ xi xchá,
kó tasiénnijónjnú ngayeje jún xota̱ xi tjín kuí ngi̱ndiee̱!
A jè kamá kui nii̱, ni̱xtjin nga tindyiónjnú,
axa̱ ni̱xtjin nga kisꞌińdo xota̱ xi xchájnú.
3¡Kuí nii̱ xi kꞌuiyàjnúu̱ ndíjnú, kó ndíjnú ka̱tso̱yaa̱ ndií kuí,
kó ndií kuí, ka̱tso̱yaa̱ xota̱ tji̱e̱ xi jaskan kꞌuieé!
4Ni xi katsꞌénkjiéjín chi̱ndoo̱, chjandii̱ katsꞌénkjié,
kó ni xi katsꞌénkjiéjín cho̱tji̱bo̱a̱yejee̱, chjo̱bo̱a̱a̱ katsꞌénkjié.
5¡Ti̱ꞌankjaꞌájnúu̱ yojojnú, jún xota̱ xi chꞌi̱, kó chaꞌájnú!
¡Ni̱ma̱ ndókjo̱a̱jnú ngayeje jún, xota̱ xi ꞌbi xán,
ngatꞌa̱ jè chje̱ꞌéxiín ndso̱ꞌbájnú xaán!
6Ngatꞌa̱ ngo xtín xota̱ na̱xi̱ńdá xí kjín má, je jachó nangina,
kó bo̱a̱ má kón ṉꞌni̱u̱, ko̱jo ńdatꞌanijon xikoó tsi̱ꞌe̱ xandi̱je̱e̱.
7Jè katsꞌénkjié ngayeje nínga tjitji̱e̱na tostsi̱je̱è,
kó ti̱ jè katsꞌénkjié ngayeje yáꞌingo̱na nga,
¡iskítꞌojén, kó yíyojo tꞌanangi, kó je katjoꞌóxín tji̱bo̱a̱a̱ tjiaa̱ kui yaá!
8Cheꞌé jí xikoó ngo na̱ xo̱ngò xi boajá ńjño xa̱ꞌya̱,
ngatꞌa̱ kꞌien xi̱ꞌin xi kisꞌijñajo̱ nga kjindí.
9Ndiꞌandikoón Ndi̱a̱ná kui xi Néná, jè kachjeꞌéxín kjo̱a̱tjoó,
kjo̱a̱a̱ ni xi maxchá jno̱o̱, ko̱jo binoo̱,
kó chináꞌmi xi tsꞌén xaá Ndi̱a̱ná kui xi Néná, je síndo xa̱ꞌya̱ nga.
10Jè kisꞌietiya kꞌijñaá, ko̱jo je kisꞌijña xa̱ꞌya̱ tꞌanangii̱,
ngatꞌa̱ jè kiniꞌánkjatsón to ndso̱ko̱a̱n ṉño̱paa̱n,
jè kixíyà binoo̱, kó ti̱ jè je istii̱ nga.
11Nde ngiti̱ tsójiín nga sa̱ꞌínxá ngase xota̱ xi tsꞌén xájnoo̱,
kó ni̱ma̱ ndyi̱kjandà xota̱ xi foaꞌáꞌyá cha̱a̱n tostsi̱je̱è,
ta̱ngatꞌanii̱ to ndso̱ko̱a̱n ṉño̱paa̱n, ko̱jo sebandaa̱,
ngatꞌa̱ cha̱a̱n ni xi maxchá tꞌanangii̱, jè kichajá.
12Jè kixí ńꞌniuú tostsi̱je̱è, jè kixíꞌniú yáꞌingoo̱,
ti̱ bo̱a̱ ti̱ kamaá yángranandaa̱,
ko̱jo yáńtioó, ko̱jo yámásanaa̱ nga,
ngayeje yá xí tjín ngi̱jin kꞌijñá jàn je kixí,
¡ngaskande xotaa̱ jè ngiti̱ tsjajín tjiín nga síndo nga̱sondie!
13¡Ńjño xa̱ꞌya̱ cha̱jájnú jún já chináꞌmi!
¡Ni̱ma̱ chaꞌájnú jún xota̱ xi tsꞌénxá ki̱a̱ ṉchandikoón!
¡Ndibájnú, kó ńjño xa̱ꞌya̱ cha̱jájnú nga tsjayójojnú jún xi niꞌánjnú xaá Néná!
Ngatꞌa̱ Ndiꞌandikoón Néná, jè kachjeꞌéxín kjo̱a̱tjoó,
kjo̱a̱a̱ ni xi maxchá jno̱o̱, ko̱jo binoo̱.
14¡Tꞌíyájnúu̱ xotaa̱ tsi̱ꞌe̱ nga si̱ꞌankjaꞌájnú kjindiá yojojnú!
¡Tꞌítikójnú xingi̱jnú ki̱a̱ Ndiꞌaa̱ Ndi̱a̱ná kui xi Néná!
¡Tꞌítikójnú xota̱ xi xchaá, ko̱jo xota̱ xi chji̱a̱ni ngayeje kui ngi̱ndiee̱,
kó ki̱a̱ Ndiꞌaa̱ Ndi̱a̱ná kui xi Néná, ki̱a̱ ndókjo̱a̱jnúu̱ Néná!
15¡Xi̱xꞌi̱a̱n xò xotaa̱ kui ni̱xtjii̱n!
¡Ngatꞌa̱ je tikón tiña ni̱xtjii̱n Ndi̱a̱ná kui xi Néná!
¡Kó kui Néná xí tsi̱ꞌe̱ ngayeje ngaꞌniuú,
kji̱ndi̱bá nga sa̱ꞌínkjié ngayeje nii̱!
16A ngindyikónjín ñá nga kachjeꞌéxín nichiniee̱.
A jèjín kachjeꞌéxínná kjo̱a̱tsja xi ꞌbéná nga mongín Ndiꞌaa̱ Néná.
17¡Je jando ngayeje xojmá xí ꞌbítji̱e̱e̱,
kó ndiꞌa nínga mindyia ni xi kamáxchaá je kiniꞌánkjatsón!
Ngatꞌa̱ to ndso̱ko̱a̱n ṉño̱paa̱n je kixí.
18¡Achichí ni xi ndyi̱tsó cho̱ tjieé nga ndyi̱kjandayà!
¡Cho̱yojoo̱ ata̱ ni̱ma̱ ndyi̱tsꞌèn nga bojoó,
ngatꞌa̱ ngiti̱ jmí ndi̱xcho̱jiín, kó ti̱ je kjifesón cho̱tsa̱nga̱ nga!
19Jí boá xi tsꞌénchji̱a̱a̱ Ji xi Ndi̱a̱na, Ji Ne,
ngatꞌa̱ ndiꞌií je katsꞌénkjié yá xi̱xi̱ xi tjín tꞌanangi kixií,
kó jè kití ngayeje yá xí tjín ngi̱jin kꞌijñaá nga.
20¡Ngaskande cho̱ tamá xí tjín ngi̱jin kꞌijñaá,
ni̱ma̱ ndyi̱tsó nga ji ndyi̱chji̱a̱a̱,
ngatꞌa̱ xo̱ngàndántꞌieé je kixíyà,
kó ndiꞌií je katsꞌénkjié ndi̱xcho̱ xi tjín ngi̱jin kꞌijñaá!
Currently Selected:
Joee̱l 1: MAIX
Highlight
Copy
Compare
Share
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
